?Wetaem Bambae Ol Faet Oli Finis?—?Baebol i Talem Wanem?

Taem Iran i atakem Isrel long Sarede 13 Eprel 2024, António Guterres we i Sekretari Jenerol Blong Yunaeted Nesen i talem se: “Naoia i no moa taem blong mekem ol bigfala faet we i mekem ol man oli wari. Naoia yumi mas kontrolem fasin blong yumi.”

Faet ya we i stap gohed long Medel Is i wan nomo long ol faet we oli stap gohed raon long wol.

“Tede i gat plante moa faet i bitim eni narafala taem afta long Wol Wo Tu. Ol faet ya oli spolem samwe 2 bilian man, hemia 25 pesen blong ol man.”—Sekiuriti Kaonsel Blong Yunaeted Nesen, 26 Jenuware 2023.

Ol kantri we faet i stap gohed long olgeta naoia, hemia Isrel, Gasa, Siria, Asebaejan, Yukren, Sudan, Itiopia, Naeja, Mianma, mo Haiti.a

?Wetaem bambae ol faet ya oli finis? ?Ol lida blong wol oli naf blong mekem se i gat pis? ?Baebol i talem wanem?

Wol ya i fulap long ol faet

Ol faet we oli stap hapen raon long wol tede, i wan saen we i soemaot se i no longtaem ol faet bambae oli finis. Hemia i laenap wetem profet tok blong Baebol we i tokbaot taem we yumi stap long hem naoia. Baebol i tokbaot taem ya se hem i “lashaf blong sistem blong wol ya.”—Matiu 24:3.

• “Bambae yufala i harem se i gat ol faet mo yufala i harem nius blong ol faet. . . . Bambae ol nesen oli faet agensem ol narafala nesen, mo ol kingdom oli faet agensem ol narafala kingdom.”—Matiu 24:6, 7.

Blong faenemaot olsem wanem ol faet we oli stap hapen tede oli mekem ol profet tok blong Baebol oli kamtru, ridim atikol ya “?Wanem Saen Blong ‘Ol Las Dei,’ o ‘En Blong Wol’?”

Wan bigfala faet we bambae i finisim olgeta faet

Baebol i talemaot se wan dei bambae i no moa gat ol faet. ?Olsem wanem samting ya bambae i kamtru? Hemia tru long “faet long bigfala dei blong God Ya We i Gat Olgeta Paoa,” we Baebol i singaot se Amagedon. (Revelesen 16:14, 16) Faet ya bambae i openem rod blong God i mekem promes blong hem i kamtru, hemia blong ol man oli gat pis blong olwe.—Ol Sam 37:10, 11, 29.

Blong save moa long bigfala faet ya blong God we bambae i finisim olgeta faet, ridim atikol ya “?Wanem Ya Faet Blong Amagedon?”