Oli Spenem Plante Bilian Dola Long Ol Faet—?Wanem Ol Trabol We Oli Kamaot From?

Mane we ol man oli spenem blong mekem faet i bigwan tumas.

• “Las yia ol gavman raon long wol oli spenem 2.2 taosen bilian U.S. dola blong mekem ol faet. Hemia i bigwan moa i bitim mane we oli spenem long ol yia we i pas.”—Niuspepa ya The Washington Post, 13 Februari 2024.

Mo i gat sam narafala trabol bakegen we oli kamaot from ol faet. Traem tingbaot faet we i stap gohed long Yukren.

• Plante soldia oli ded. Sam man blong mekem risej oli talem se stat long taem we faet long Yukren i stat long 2022, i gat klosap 500,000 soldia we oli kasem kil o oli ded.

• Plante narafala man tu oli ded. Wan ripot we i kamaot long Yunaeted Nesen i talem se i gat bitim 28,000 man we oli kasem kil o oli ded. Antap long hemia, wan haeman blong Yunaeted Nesen i talem se: “I gat plante moa man we oli safa from faet ya. Yumi no naf blong kaontem olgeta evriwan.”a

Namba blong ol man we oli safa from ol faet raon long wol i bigwan tumas.

• 114 milian man. Hemia namba blong ol man we oli mas aot long ples blong olgeta from we i gat ol faet. Namba ya oli kaontem stat bifo i kam kasem long Septemba 2023.

• 783 milian man. Hemia namba blong ol man we oli hanggri from we oli no gat naf kakae. “Bigfala risen from wanem ol man oli sot long kakae, hemia from we i gat ol faet long ples blong olgeta.”—Ripot blong Kakae Long Fulwol (World Food Programme).

?Wan dei bambae i no moa gat ol faet, mo ol man oli no moa pua o sot long kakae? ?Wan dei bambae i gat pis long fulwol? ?Baebol i talem wanem?

Yumi laef long wan taem we i gat plante faet

Baebol i bin talemaot se bambae i gat plante faet long wol. Hem i tokbaot profet tok blong wan man we i sidaon long wan hos mo i talem se hemia i pija blong ol faet.

• “Nao wan narafala hos i kamtru we i red olsem faea. Man we i sidaon long hem, i kasem raet blong tekemaot pis long wol, blong ol man oli mas kilkilim olgeta oli ded. Mo hem i kasem wan bigfala naef blong faet.”—Revelesen 6:4.

I gat tu narafala hos we oli folem hem. Man we i sidaon long faswan hos i pija blong kakae i sot, mo man we i sidaon long narafala hos i pija blong ded we i kamaot from ol sik o from ol narafala trabol. (Revelesen 6:5-8) Blong kasemsave moa long profet tok ya mo blong luk olsem wanem i stap kamtru long taem blong yumi, ridim atikol ya “Ol Fo Man Ya Long Hos ?Oli Hu?”

Long fiuja bambae i gat pis

I no longtaem, bambae ol man oli no moa spenem mane blong mekem ol faet o ol wo. Hemia from we Baebol i talem se:

• God bambae i “finisim ol wo long olgeta ples long wol.”—Ol Sam 46:9.

• God bambae i finisim ol trabol we oli kamaot from ol faet. “Hem bambae i ravemaot wota blong ae blong olgeta, mo bambae i no moa gat man i ded, mo bambae man i no moa sore, mo bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Revelesen 21:4.

• God bambae i mekem se yumi evriwan i stap long pis. Hem i talem se: “Ol man blong mi bambae oli laef long wan ples we i gat pis olwe, bambae oli laef long wan ples we i sefgud, mo long wan kwaet ples blong spel.”—Aesea 32:18.

Ol profet tok blong Baebol oli talemaot se ol faet mo ol narafala trabol we yumi stap luk tede, oli soemaot se i no longtaem bambae i gat pis long fulwol.

?Olsem wanem God bambae i mekem se i gat pis long fiuja? Bambae hem i yusum Kingdom blong hem, hemia gavman blong hem we i stap long heven, blong mekem olsem. (Matiu 6:10) Blong kasemsave moa long Kingdom ya mo samting we Kingdom ya bambae i mekem, wajem sot video ya ?Wanem Ya Kingdom Blong God?