Halpem “Olgeta We Oli Soemaot Se Oli Stret Blong Kasem Laef”

1. ?Ol man oli mekem wanem taem oli harem gud nius? (Ol Wok 13:​47, 48; 16:​14, 15)

LONG taem blong ol fas Kristin, plante man oli akseptem trutok long faswan taem we oli harem gud nius. (Ridim Ol Wok 13:​47, 48; 16:​14, 15.) Tede tu, sam man oli glad blong lesin long gud nius long faswan taem we oli harem. Mo sam man we bifo oli no wantem lesin long gud nius, sam taem biaen oli glad blong lesin. Taswe, ?yumi mas mekem wanem sipos yumi faenem ol man we “oli soemaot se oli stret blong kasem laef”?

2. ?Olsem wanem wok we yumi mekem i sem mak long wok blong wan man blong wok long garen?

² Traem tingbaot pijatok ya: Wok we yumi mekem blong pulum ol man i kam disaepol, i sem mak long wok blong wan man blong wok long garen. Sipos hem i luk wan tri we ol frut blong hem oli raep, bambae hem i kwik blong go havestem, be long semtaem, bambae hem i gohed blong lukaot gud long ol narafala tri we frut blong olgeta i no raep yet. Long sem fasin, sipos yumi faenem wan man we i glad blong lesin long gud nius, yumi wantem givhan long hem kwiktaem blong i kam wan disaepol blong Kraes. Be long semtaem, bambae yumi gohed blong traem pulum intres blong ol narafala we maet oli nidim moa taem blong tingting gud long ol samting we oli harem. (Jon 4:​35, 36) Yumi mas luksave sipos man i rere blong akseptem trutok o nogat, olsem nao bambae yumi naf blong save beswan rod blong givhan long hem. Naoia bambae yumi tokbaot samting we yumi save mekem long faswan taem we yumi storian wetem ol man we oli glad blong lesin. Mo tu, bambae yumi tokbaot olsem wanem yumi save givhan long olgeta blong oli gohed blong kam klosap moa long Jehova.

TAEM OL MAN OLI GLAD BLONG LESIN

3. ?Yumi save mekem wanem sipos yumi faenem ol man we oli intres? (1 Korin 9:26)

³ Sipos yumi faenem ol man we oli intres, yumi wantem givhan long olgeta kwiktaem blong oli stat blong wokbaot long rod blong kasem laef. Long taem olsem, yumi no mas fraet blong askem olgeta blong stadi Baebol mo singaot olgeta i kam long ol miting blong yumi, nating se hemia faswan taem we yumi storian wetem olgeta.—Ridim 1 Korin 9:26.

4. Tokbaot wan ekspiriens we i soemaot se i gat sam man we kwiktaem nomo oli glad blong stadi Baebol.

⁴ Askem man blong i stadi. Sam man we yumi prij long olgeta, kwiktaem nomo oli glad blong stadi Baebol. Eksampol, long wan Tasde, wan yangfala woman long Kanada i kam long troli mo i karem wan kopi blong buklet ya !Enjoem Laef Olwe!. Ale, sista we i stap long troli i eksplenem se buklet ya oli stap yusum blong mekem wan fri Baebol stadi. Woman ya i intres mo i givim fon namba blong hem long sista ya. Long sem dei ya, woman ya i sanem mesej long sista ya blong askem wetaem bambae tufala i stadi. Nao sista i talem long hem se bambae hem i go luk hem long wiken, be woman ya i askem se: “?I oraet sipos tumoro?” Ale, tufala i stadi long nekis dei, hemia Fraede. Long sem wiken ya nomo, woman ya i stat blong kam long ol miting mo i gohed gud.

5. ?Yumi mas luksave wanem sipos yumi wantem askem man blong stadi Baebol? (Mo tu, yu luk ol pija.)

⁵ I tru, i no evri man we bambae oli kwik blong stadi Baebol olsem yangfala woman ya. Samfala, maet oli nidim we yumi givhan moa long olgeta. Maet fastaem yumi mas tokbaot wan topik we oli intres long hem. Be sipos yumi gohed blong gat stret tingting long olgeta mo yumi soemaot se yumi intres long olgeta, maet kwiktaem nomo bambae yumi save statem wan Baebol stadi wetem olgeta. ?Yumi save talem wanem taem yumi askem man blong stadi? Bambae yumi luk samting we sam brata mo sista we oli gat gudhan blong statem ol Baebol stadi oli talem.

6. ?Yumi save talem wanem, blong man i wantem gohed blong storian wetem yumi?

⁶ Sam pablisa mo sam paenia oli eksplenem se long sam kantri i moa gud blong no yusum ol tok olsem “stadi,” “Baebol kos,” o “tijim yu,” taem yumi stap tokbaot Baebol stadi. Be oli makem se beswan rod hemia blong yusum ol tok olsem “storian,” “tokbaot tugeta,” o “kasem save moa long Baebol.” Sipos yu wantem se wan man i glad blong storian bakegen wetem yu, yu save talem long hem se: “Mi sapraes se Baebol i naf blong ansarem ol impoten kwestin we yumi gat long laef” o “Baebol i no wan buk we i joen wetem wosip nomo, hem i tokbaot sam samting we i save givhan tu long laef blong yumi.” Mo yu save talem tu se: “I tekem smoltaem nomo, maet 10 o 15 minit nomo, blong lanem wan gudfala samting we i save givhan long laef blong yu.” I no nid blong yusum ol tok olsem “mekem plan” o “evri wik,” from we hemia i save mekem man i fraet.

7. ?Samfala oli harem trutok wetaem? (1 Korin 14:​23-25)

⁷ Singaot man i kam long miting. I luk olsem se long taem blong aposol Pol, sam man oli harem trutok fastaem, taem oli kam long wan Kristin miting. (Ridim 1 Korin 14:​23-25.) Hemia i sem mak tu tede. Plante man oli gohed gud moa taem oli stat blong kam long ol miting. Taswe, ?wetaem yumi save singaot ol man oli kam long ol miting? Buklet ya !Enjoem Laef Olwe! i tokbaot ol miting long lesen 10, be yumi no nid blong wet kasem lesen ya blong yumi save singaot man i kam long miting. Yumi save mekem olsem long faswan taem we yumi storian wetem olgeta, mo maet yumi save tekem smoltaem blong talem stamba tok blong pablik tok, o tokbaot sam poen long Wajtaoa Stadi blong wik ya.

8. Taem yumi singaot wan man i kam long miting, ?yumi save tokbaot wanem long hem? (Aesea 54:13)

⁸ Taem yumi singaot wan man i kam long miting, i gud yumi eksplenem se ol miting blong yumi oli defren long ol narafala jej. Taem wan Baebol stadi i kam faswan taem long miting mo i joen long Wajtaoa Stadi, hem i askem long tija blong hem se: “Man ya we i stanap long fored, ?hem i save nem blong evriwan?” Ale, sista we i stadi wetem hem i eksplenem se yumi traehad blong save nem blong evriwan long kongregesen, sem mak olsem we yumi save nem blong ol famle blong yumi. Baebol stadi ya i luk se hemia i defren olgeta long jej blong hem. Yumi save tokbaot long Baebol stadi blong yumi, sam narafala samting tu we i mekem se ol miting blong yumi oli defren long ol narafala jej. (Ridim Aesea 54:13.) Yumi save eksplenem se yumi kam long ol miting blong wosipim Jehova, kasem save moa long saed blong hem, mo lefleftemap tingting blong yumi. (Hib. 2:12; 10:​24, 25) From samting ya, ol miting blong yumi oli folem gud wan plan mo oli blong givhan long yumi, be yumi no mekem sem samting oltaem olsem ol narafala jej. (1 Kor. 14:40) Mo tu, Haos Kingdom blong yumi i simpol mo yumi kam long hem blong lanem samting. Yumi neva leftemap wan pati blong politik se i gud moa long narawan, from we yumi no joen long politik. Mo yumi no stap singsingaot strong, o raorao from ol defdefren tingting. I gud yumi soem video ya ?Wanem i Stap Hapen Insaed Long Haos Kingdom? long Baebol stadi, olsem nao bambae hem i save se ol miting oli olsem wanem.

9-10. ?Yumi save talem wanem long man blong mekem se hem i no fraet blong kam long miting? (Mo tu, yu luk pija.)

⁹ Sam man oli fraet blong kam long miting from we oli ting se bambae yumi askem olgeta blong kam wan Witnes blong Jehova. Taswe i gud yumi talem long olgeta se eni man i welkam blong kam, mo yumi no fosem ol man blong kam ol Witnes, o blong tekpat long ol miting blong yumi. Ol famle oli welkam blong kam wetem ol pikinini blong olgeta. Long ol miting blong yumi, i no gat wan spesel ples blong ol pikinini, be oli sidaon wetem ol perens blong olgeta mo evriwan i lanem sem samting. Long rod ya, ol perens oli save hu we ol pikinini blong olgeta oli stap joen wetem, mo wanem samting oli stap lanem. (Dut. 31:12) Yumi no stap askem ol man blong sakem kleksin o givim ofring. Be yumi folem tok blong Jisas we i talem se: “Yufala i kasem fri nomo, mo yufala i mas givim fri nomo.” (Mat. 10:8) Mo tu, yumi save talem long ol man se oli no nid blong werem ol klos we oli sas blong kam long ol miting, from we God i stap lukluk hat blong man, be i no klos.—1 Saml. 16:7.

¹⁰ Sipos wan man i kam long miting, i gud yu welkamem gud hem. Yu save tekem hem i go talem halo long ol elda mo ol narafala pablisa. Sipos yu mekem olsem, bambae hem i glad blong kambak nekis taem. Mo sipos hem i no gat Baebol, i gud yu serem Baebol blong yu wetem hem mo givhan long hem blong kasemsave long ol tok, o long ol samting we yumi stadi long hem.

TAEM YU STAT BLONG STADI BAEBOL WETEM WAN MAN

11. ?Yumi soemaot olsem wanem se yumi respektem taem mo program blong man?

¹¹ ?Yumi mas tingbaot wanem taem yumi stat blong stadi Baebol wetem wan man? Yumi mas respektem taem mo program blong hem. Eksampol, sipos yu mekem plan wetem wan man, i gud yu go long stret taem, nating se ol man long ples blong yu oli no tinghae long taem. Mo tu, long faswan taem we yu stadi wetem hem, i gud yu tekem smoltaem nomo. Sam pablisa we oli gat ekspiriens oli talem se i moa gud yu finisim stadi eli, nating sipos man ya i wantem gohed moa. Mo tu, i impoten we yu no toktok tumas, be yu letem hem i talemaot ol tingting mo filing blong hem.—Prov. 10:19.

12. ?Wanem mak blong yumi taem yumi statem wan Baebol stadi?

¹² Taem yu stat blong stadi Baebol wetem wan man, mak blong yu i blong givhan long hem blong i save gud Jehova mo Jisas, mo i lavem tufala. Yu mekem olsem taem yu pulum tingting blong hem i go long Baebol, i bitim we yu talem nomo samting we yu save. (Wok 10:​25, 26) Taem aposol Pol i tijim ol man, plante taem hem i tokbaot Jisas Kraes, from we hem nao we Jehova i sanem hem i kam blong givhan long yumi blong yumi save Hem mo lavem Hem. (1 Kor. 2:​1, 2) Mo tu, Pol i halpem ol brata mo sista blong luksave se oli mas givhan long ol niufala disaepol blong oli wokem ol gudfala fasin, we oli olsem gol, silva, mo ol sas ston. (1 Kor. 3:​11-15) Hemia ol gudfala fasin olsem bilif, waes, fasin luksave, mo fasin ya blong fraet long Jehova. (Sam 19:​9, 10; Prov. 3:​13-15; 1 Pita 1:7) Yu save folem eksampol blong Pol, taem yu givhan long ol Baebol stadi blong yu blong oli gat strong bilif, mo oli fren gud wetem Papa blong olgeta long heven we i lavem olgeta.—2 Kor. 1:24.

13. ?Yumi soemaot olsem wanem se yumi gat longfala tingting, mo yumi kasemsave long filing blong man? (2 Korin 10:​4, 5) (Mo tu, yu luk pija.)

¹³ Yumi folem eksampol blong Jisas blong tij, taem yumi soemaot se yumi gat longfala tingting mo yumi kasemsave long filing blong man. Yumi mekem olsem, taem yumi no askem ol kwestin we i save mekem man i sem. Sipos yumi luk se i had blong Baebol stadi i kasemsave long wan poen, i gud yumi gohed nomo long narafala haf blong stadi, mo biaen yumi kambak long poen ya bakegen. Mo sipos yumi luk se hem i no rere blong akseptem wan tijing, i nogud yumi traem fosem hem, be i gud yumi givim taem long hem, blong hem i save tingting gud long tijing ya mo jenisim tingting blong hem. (Jon 16:12; Kol. 2:​6, 7) Baebol i talem se ol giaman tijing oli olsem ol strongfala haos we yumi stap traem blong brekemdaon. (Ridim 2 Korin 10:​4, 5) Maet i no isi blong wan stadi i lego wan bilif we hem i gat longtaem finis. Taswe, fastaem yumi mas givhan long hem blong bildim wan narafala strongfala haos, we i min se hem i mas trastem Jehova. Olsem nao, bambae i moa isi long hem blong lego giaman bilif we hem i gat.—Sam 91:9.

TAEM WAN MAN I KAM FASWAN TAEM LONG MITING

14. ?Wanem fasin we yumi mas soemaot long ol man we oli kam faswan taem long ol miting?

¹⁴ Jehova i wantem we yumi mekem i sem mak long olgeta man, we hemia i minim tu ol niuwan we oli kam long ol miting, nating se oli gat ol defren kalja, kala blong skin, o bakgraon. (Jem. 2:​1-4, 9) Taswe, ?olsem wanem yumi save soemaot lav long ol man we oli kam faswan taem long ol miting?

15-16. ?Yumi save mekem wanem blong welkamem gud ol niuwan we oli kam long miting?

¹⁵ Maet sam man oli kam long ol miting blong yumi from we oli wantem save nomo se yumi stap mekem ol miting olsem wanem, o maet wan man we i stap long wan narafala ples i sanem olgeta i kam. Taswe yumi no mas fraet blong go talem halo long olgeta. I gud yumi glad blong welkamem olgeta mo askem olgeta blong sidaon wetem yumi. Yumi save serem Baebol mo ol buk we yumi stadi long hem wetem olgeta, o maet yumi save givim wan kopi long olgeta. Mo tu, i gud yumi tingbaot filing blong olgeta. Wan man we i bin kam long wan Haos Kingdom i talem long brata we i welkamem hem se, hem i sem from we hem i werem ol klos we i no naes tumas. Be brata ya i toktok gud long hem mo i eksplenem se yumi ol Witnes blong Jehova, yumi sem mak long ol narafala man. Samtaem biaen, man ya i kam wan Witnes blong Jehova, be hem i neva fogetem gudfala fasin we brata ya i soemaot long hem. Taem yumi welkamem ol niuwan we oli kam long miting, yumi mas lukaot gud se yumi no askem ol kwestin long saed blong prapa bisnes blong olgeta, we i save mekem se oli sem.—1 Pita 4:15.

¹⁶ Yumi save welkamem gud ol niuwan tu, sipos yumi lukaot gud long ol samting we yumi talem taem yumi storian, yumi ansa, o yumi mekem wan haf long miting we i tokbaot ol man we oli no Witnes o bilif blong olgeta. Yumi mas lukaot blong no talem ol tok we i save mekem oli harem nogud, o oli no moa wantem kam long miting. (Taet. 2:8; 3:2) Eksampol, bambae yumi no talem ol samting we i daonem bilif blong olgeta. (2 Kor. 6:3) Hemia nao from wanem ol brata we oli givim ol pablik tok, oli mas lukaot gud taem oli stap rerem tok blong olgeta. Mo tu, oli soemaot se oli tingbaot ol man we oli no Witnes, taem oli traehad blong yusum ol isi tok we ol man ya tu oli naf blong kasemsave long hem.

17. ?Wanem mak blong yumi taem yumi faenem ol man we “oli soemaot se oli stret blong kasem laef”?

¹⁷ Evri dei, wok ya we yumi mekem blong pulum man i kam disaepol i stap kam impoten moa, mo yumi gohed blong faenem ol man we “oli soemaot se oli stret blong kasem laef we i no save finis.” (Wok 13:48) Taswe, yumi no mas fraet blong askem olgeta blong stadi Baebol o singaot olgeta i kam long ol miting. Sipos yumi mekem olsem, yumi save givhan long olgeta blong oli tekem faswan step blong folem ‘rod ya we i lidim man i go long laef.’—Mat. 7:14.