?I Posibol Blong Mekem i Sem Mak Long Ol Man We Oli Gat Defdefren Kala Blong Skin? ?Baebol i Talem Wanem?

Plante man oli ting se i no posibol blong mekem i sem mak long ol man we oli gat defdefren kala blong skin.

• “Raon long wol, fasin ya blong no laekem narafala from kala blong skin blong hem, i olsem wan posen we i stap spolem ol oganaesesen, ol komuniti, mo laef blong ol man. Fasin ya i pulum ol man blong oli no mekem i sem mak long ol man we kala blong skin blong olgeta i defren.”—António Guterres, Sekretari-Jenerol Blong Yunaeted Nesen.

?I posibol se wan dei, ol man bambae oli mekem i sem mak long ol man we kala blong skin blong olgeta i defren? ?Baebol i talem wanem?

Tingting blong God long ol man we oli gat defdefren kala blong skin

Baebol i tokbaot tingting we God i gat long ol man we oli gat defdefren kala blong skin.

• “[God] i mekem wan man nomo, nao olgeta man long wol oli kamaot long man ya, mo hem i putum olgeta oli stap long evri ples long wol.”—Ol Wok 17:26.

• “God i stap mekem i sem mak nomo long olgeta man. Sipos wan man i fraet long God mo i mekem samting we i stret, God i glad long hem nating se hem i blong defren nesen.”—Ol Wok 10:34, 35.

Baebol i soemaot se olgeta man oli kamaot long wan man nomo, mo se God i glad long olgeta man nating se kala blong skin blong olgeta i defdefren.

?Wanem bambae i mekem se i posibol blong ol man oli mekem i sem mak long ol man we oli gat defdefren kala blong skin?

Kingdom blong God nomo we i stap long heven bambae i naf blong mekem se ol man oli mekem i sem mak long olgeta man. Gavman ya bambae i tijim ol man olsem wanem blong tritim ol narafala long fasin we i stret. Mo tu ol man bambae oli lanem blong sakemaot nogud filing ya blong no laekem man we i gat defren kala blong skin.

• “Ol man we oli stap long graon ya [bambae] oli lanem mining blong stret fasin.”—Aesea 26:9.

• “Samting we bambae i kamaot from trufala stret fasin hemia pis, mo frut blong trufala stret fasin, hemia se bambae olgeta samting i kwaet olwe mo oli sefgud.”—Aesea 32:17.

Tede, Baebol i givhan long plante milian man blong oli lanem olsem wanem blong tinghae mo respektem ol narafala.

• Blong save moa, yu save ridim Wekap! magasin ya “?Yu Yu Kasem Vaeras Ya?”

• Ridim atikol ya “Storian Wetem Pikinini Long Fasin Blong Agensem Man From Kala Blong Skin o Kalja,” blong luk olsem wanem ol perens oli save tokbaot topik ya wetem ol pikinini blong olgeta.