Ol Man Oli Sot Long Wota—?Baebol i Talem Wanem?
Yumi evriwan i nidim klin wota. Be António Guterres we i wan haeman blong Yunaeted Nesen, i talem se: “Naoia ol man oli stap yusum plante moa wota, taswe long fulwol ol man oli fesem bigfala problem blong wota.” Plante milian man raon long wol oli faenem i had blong kasem naf klin wota blong dring.
Strdel/AFP via Getty Images
?Long fiuja, bambae i gat naf wota blong evriwan? ?O bambae ol man oli gohed blong fesem problem blong wota? ?Baebol i talem wanem?
Promes blong Baebol long saed blong wota
Baebol i talem se wan dei bambae ol man oli no moa sot long wota, be oli gat plante klin wota.
“Ol wota bambae oli sut i kamaot long ol draeples, mo ol reva bambae oli ron long ples we i drae. Ol graon long ples we i hot mo i drae, bambae oli fulap long ol pul blong wota we i gat ol longlongfala gras long hem, mo ol graon we oli drae nogud, bambae i gat ol springwota.”—Aesea 35:6, 7.
?From wanem yumi save bilif long promes ya blong Baebol? Traem tingbaot olsem wanem God i wokem wol blong yumi.
Samting we Baebol i talem long saed blong wol mo wota
“[God] i no mekem [wol] blong i stap nating nomo, be i wokem blong man i stap long hem.”—Aesea 45:18.
God i wokem wol ya blong ol man mo ol animol oli save laef long hem, taswe hem i wokem wan rod blong i gat plante klin wota long wol.
“[God] i pulum ol drop blong wota i go antap, oli kam klaod mo oli jenis i kam ren. Ale ol klaod ya oli kafsaedem ren i kamdaon, nao oli folfoldaon i kamdaon long ol man.”—Job 36:27, 28.
Vas ya i stap tokbaot rod we God i wokem blong klinim wota mo mekem se fulwol i kasem naf wota. San i pulum ol drop blong wota i go antap, oli kam klaod, mo biaen oli foldaon olsem ren (wota saekol). Hemia i mekem se oltaem ol man mo ol animol oli gat plante klin wota.—Prija 1:7; Amos 5:8.
“Bambae mi mekem ren i kam long yufala long stret taem blong hem, mo graon bambae i givim plante kakae, mo ol tri long garen bambae oli karem frut.”—Levitikas 26:4.
God i promes long ol man Isrel se bambae i gat ren long stret taem blong hem, blong ol garen blong olgeta oli karem plante frut. Hem i save se ol kakae i nidim ren blong i save gru gud.
I no longtaem, God bambae i mekem sem samting ya long fulwol. (Aesea 30:23) Be naoia, long plante ples long wol, problem blong wota i stap kam antap. Mo hemia i stap hapen from plante risen, i no jes from we i no gat naf ren. ?Baebol i talem se God bambae i mekem wanem blong stretem ol problem blong wota?
Ol man bambae oli no moa sot long wota
Baebol i talem se Kingdom blong God bambae i finisim ol problem we oli stap spolem wol blong yumi, mo hemia i minim tu, problem blong wota. (Matiu 6:9, 10) Kingdom blong God i wan gavman long heven we bambae i rulum fulwol. (Daniel 2:44; Revelesen 11:15) Mo Kingdom ya bambae i finisim ol trabol we i mekem se ol man oli sot long wota. Hemia wan samting we ol gavman blong man oli no naf blong mekem.
Problem: Weta i jenis long fulwol, mo hemia tu i mekem problem blong wota i kam antap. Sam ples i drae we i drae from we i no gat ren, mo long sam narafala ples wota i ron bigwan, from i gat tumas ren mo from solwota i kam antap bitim mak.
Rod Blong Stretem: Kingdom blong God bambae i stretem ol problem blong weta, nao wol blong yumi bambae i kam gud bakegen. God i promes se: “!Yu luk! Mi mi stap mekem olgeta samting oli kam niuwan.” (Revelesen 21:5) Bambae hem i mekem se i gat plante wota long ol draeples, nao ol tri mo flaoa oli save gru long ol ples we naoia i no gat ol laef samting long hem. (Aesea 41:17-20) Jisas Kraes we i King blong Kingdom blong God, bambae i kontrolem weta fulwan.
Taem Jisas i stap long wol, hem i kwaetem wan strong win, blong soemaot bigfala paoa we God i givim long hem. (Mak 4:39, 41) Taswe taem Jisas i rulum wol, bambae i no moa gat ol disasta. Ol man bambae oli harem se oli sef mo oli stap long pis, from we oli no fraet se wan disasta bambae i kasem olgeta.
Problem: Ol man we oli tingbaot olgeta nomo, oli mekem wota i kam doti mo oli spolem ol reva, ol lek, mo ol wota aninit long graon. Hemia tu i mekem se ol man oli sot long klin wota.
Rod Blong Stretem: Bambae God i mekem se ol reva, ol lek, solwota, mo graon, i kam gud bakegen. Wol ya bambae i kam wan paradaes. Baebol i talem se: “Draeples mo graon we i drae we i drae bambae tufala i harem gud, mo draeples bambae i glad mo i gat plante flaoa long hem olsem flaoa ya safron.”—Aesea 35:1.
?Wanem bambae i hapen long ol man we oli stap spolem wol ya mo oli tingbaot olgeta nomo? God i promes “blong spolem ol man ya we oli stap spolem wol.”—Revelesen 11:18; Ol Proveb 2:21, 22.
Problem: Ol man oli westem tumas wota, mekem se i no moa gat naf klin wota blong evriwan.
Rod Blong Stretem: Kingdom bambae i mekem samting we God i wantem “i kamtru long wol ya,” be i no samting we ol man we oli tingbaot olgeta nomo, oli wantem. (Matiu 6:9, 10) Kingdom blong God bambae i tijim ol man long ol nambawan save blong God. Aesea 11:9 i talem se: “Bambae wol ya i mas fulap gud long save blong Jehova.”a Olgeta man bambae oli gat save ya, mo bambae oli lavem God mo ol samting we hem i wokem. Taswe bambae oli lukaot gud long olgeta samting long naesfala wol ya.
Blong kasem save moa long samting we Kingdom blong God bambae i mekem, yu luk atikol ya “?Kingdom Blong God Bambae i Mekem Wanem?”
Ridim Aesea japta 35 long Baebol, blong faenemaot olsem wanem God bambae i mekem wol ya i kam wan paradaes.
Wajem video ya ?God i Wokem Wol Ya Blong Wanem? blong kasem save moa long plan we God i gat long wol ya mo ol man.
a Jehova i prapa nem blong God. (Ol Sam 83:18) Luk atikol ya “?Hu Ya Jehova?”