Sefti Blong Ol Woman​—Samting We Baebol i Talem

“Taem mi smol, bigfala brata blong mi i stap mekem i nogud long mi mo tok nogud long mi evri dei. Mo afta we mi mared, mama blong hasban blong mi i gohed blong spolem mi. Hem mo hasban blong hem tufala i tritim mi olsem wan slef. Hemia i mekem se mi wantem kilim mi wan i ded.”—Madhu,a India.

Wol Helt Oganaesesen i talem se: “Fasin ya blong mekem i nogud long ol woman i stap long evri ples.” Oli faenemaot se klosap 30 pesen blong ol woman oli bin fesem problem ya we narafala i mekem i nogud long olgeta o i repem olgeta.

Sipos samting olsem i bin hapen long yu, hemia i save mekem yu fraet se long eni ples we yu go long hem bambae narafala i save tok nogud long yu, i kilim yu, o i repem yu. From we fasin ya i stap kam antap, hemia i save mekem yu gat tingting ya se ol woman oli no impoten. ?Be wanem tingting blong God?

Tingting we God i gat long ol woman

Vas: “[God] i mekem wan man mo wan woman.”—Jenesis 1:27.

Mining: God i mekem ol man mo ol woman tu, taswe hem i luk se tufala tugeta i impoten. Mo tu, God i wantem se wan hasban i “lavem waef blong hem olsem we hem i lavem hem wan,” taswe hem i no mas tok nogud long waef blong hem mo kilim hem blong kontrolem hem. (Efesas 5:33; Kolosi 3:19) Yes, God i wantem se ol woman oli stap sef.

“Taem mi smol, sam long ol famle blong mi oli repem mi. Mo taem mi gat 17 yia, bos blong mi i talem se bambae i sakemaot mi long wok sipos mi no slip wetem hem. Taem mi kam bigman, hasban blong mi, ol perens blong mi, mo ol neba blong mi oli talem ol tok blong daonem mi. Biaen mi stat blong save Jehova,b God Ya We i Wokem yumi. Mi lanem se hem i kea long ol woman. Hemia i mekem mi haremsave se hem i lavem mi mo se mi sas long ae blong hem.”—Maria, Ajentina.

?Wanem i save givhan long yu blong harem gud bakegen?

Vas: “I gat wan fren we i klosap moa long yu i winim ol brata blong yu.”—Ol Proveb 18:24.

Mining: Wan trufala fren bambae i sapotem yu. Sipos yu harem nogud, talemaot ol filing blong yu long wan we yu save trastem.

“Blong 20 yia, mi no talemaot long eni wan se oli bin repem mi. Taswe mi no moa glad, mi wari, mo tingting blong mi i foldaon. Be taem mi talemaot ol filing blong mi long wan we i glad blong lesin, hemia i mekem mi harem gud bakegen.”—Elif, Teki.

Vas: “Yufala i mas lego ol wari blong yufala long [God], from we hem i kea long yufala.”—1 Pita 5:7.

Mining: Taem yu prea, God i stap lesin long yu. (Ol Sam 55:22; 65:2) From we hem i kea long yu, hem i save halpem yu blong luksave se yu sas long ae blong hem.

“Taem mi lanem moa long saed blong Jehova, hemia i givhan long mi blong winim filing ya blong harem nogud bitim mak. Naoia mi save prea long God mo talemaot ol filing blong mi. Hem i olsem wan gudfala fren we i kasemsave long ol filing blong mi.”—Ana, Belis.

?Bambae God i finisim fasin ya we man i mekem i nogud long ol woman?

Vas: ‘Bambae Jehova i mekem se ol pikinini we oli no gat papa wetem olgeta we oli harem nogud bitim mak, oli kasem jastis, olsem nao ol man ya long wol we oli nating nomo, oli no moa save mekem olgeta oli fraet.’—Ol Sam 10:​17, 18.

Mining: I no longtaem, God bambae i finisim fasin blong spolem narafala, nao bambae i no moa gat fasin ya blong tritim nogud ol woman.

“Taem mi lanem se Jehova bambae i finisim fasin ya blong mekem i nogud long ol woman mo ol gel, hemia i olsem wan meresin we i mekem mi harem gud mo mi gat pis long tingting blong mi.”—Roberta, Meksiko.

Blong kasemsave long hop we Baebol i givim, from wanem yu save trastem ol promes blong Baebol, mo olsem wanem ol Witnes blong Jehova oli save yusum Baebol blong givhan long yu, askem wan fri Baebol stadi.