?Ol Oganaesesen Blong Holemtaet Pis Oli Save Putum Pis Long Fulwol?

Oltaem yumi harem nius blong ol faet mo wo long plante ples long wol. From samting ya, Yunaeted Nesen mo sam narafala grup we oli traem holemtaet pis,a oli sanem sam man we oli wok long bihaf blong olgeta, oli go long ol ples ya we i gat trabol. Oli hop se oli save mekem trabol i godaon mo stopem ol raf fasin long ol ples ya. Sekretari-Jenerol blong Yunaeted Nesen, António Guterres, i talem se: “Ol man we oli wok wetem Yunaeted Nesen blong holemtaet pis, oli moa impoten i bitim ol narafala samting we i givhan blong gat pis long wol.”

Long ol yia we i pas, sam wok blong holemtaet pis i karem gudfala frut. Wok ya i bin givhan blong protektem ol sitisen, i mekem rod blong sam refuji oli gobak long kantri blong olgeta, i givimaot kakae mo ol narafala samting we ol man oli nidim, mo i putumbak ol stamba samting olsem wota mo lektrik long ples we faet i spolem. Be ol grup we oli mekem wok ya oli fesem sam samting we oli had tumas blong winim. ?Olsem wanem? ?Bambae oli faenem rod blong mekem se wol ya i rili gat pis? ?Baebol i talem wanem?

Ol samting we i mekem i had blong holemtaet pis mo ansa we Baebol i givim

Samting we i had: Ol man oli no wok gud tugeta. I no isi blong mekem se plante grup blong ami mo ol narafala man we oli blong ol defdefren kantri, oli wok gud tugeta. Sam grup oli faenem i had blong wok wetem narafala grup from we oli no kasem save long tingting blong olgeta, mo oli gat defdefren tingting long samting we i impoten blong mekem.

Ansa we Baebol i givim: “God blong heven bambae i stanemap wan kingdom we . . . i finisim olgeta kingdom ya [ol gavman blong man], mo hem nomo bambae i stanap olwe.”—Daniel 2:44.

Samting we i had: i no gat naf mane mo naf man we oli gat save. Plante oganaesesen blong holemtaet pis oli no gat naf man, mane, mo ol narafala samting we oli nidim, mo hemia i blokem wok blong olgeta. Mo tu, oli wok long ol situesen we oli stap kam fasfas moa, mo i gat moa denja.

Ansa we Baebol i givim: “God ya we i God blong Masta blong yumi Jisas Kraes . . . i mekem [Jisas] i sidaon long raetsaed blong hem long heven, i mekem hem i hae moa long ol gavman, mo ol haeman, mo ol man we oli gat paoa.”—Efesas 1:17, 20, 21.

God ya we i gat olgeta paoa, Jehova,b i givim evri samting we Jisas, King blong Kingdom blong God, i nidim blong rul. (Daniel 7:13, 14c) God i givim paoa, save, waes, mo fasin luksave long Jisas, we i bigwan moa i bitim enikaen gavman o oganaesesen blong man. (Aesea 11:2) Mo tu, Jisas i gat wan ami blong ol strong enjel we hem i save yusum. (Revelesen 19:14) I no gat wan trabol we i fasfas tumas o i had tumas blong hem i stretem.

Samting we i had: ol loa. Plante taem ol loa oli mekem i had from we oli no klia o oli blokem rod mo aksen blong ol man we oli wok blong holemtaet pis. Ol loa ya oli mekem se oli no save protektem gud ol man o kasem mak we oli wantem kasem long wok blong olgeta.

Ansa we Baebol i givim: “God i givim paoa long [Jisas] long olgeta samting long heven mo long wol.”—Matiu 28:18.

God i talemaot klia long Jisas olsem wanem blong mekem pis long wol, mo i givim olgeta paoa we hem i nidim blong mekem samting ya i hapen. (Jon 5:22) Bambae Jisas i no save mekem samting we i no stret o mekem kruked fasin. (Aesea 11:3-5) Taswe Baebol i kolem Jisas se “Prins Blong Pis,” mo i talem se Kingdom blong hem i stanap long “jastis mo stret fasin.”—Aesea 9:6, 7.

Kingdom blong God bambae i mekem trufala pis i stap long wol

Ol oganaesesen blong man blong holemtaet pis oli save mekem samfala oli stap sef mo maet oli finisim faet long wanwan ples. Be oli no save tekemaot stamba blong ol raf fasin, hemia fasin blong no laekem narafala, we i stap long hat blong man.

Dennis Jett, we bifo i wok blong gavman blong Yunaeted Stet, i talem se: “Bigfala problem se i no gat pis blong holemtaet.”

Be Kingdom blong God i gat paoa blong wokem pis, from we i stap givhan long ol man blong oli rutumaot filing long hat blong olgeta blong no laekem narafala man. Makem olsem wanem ol toktok mo eksampol blong Jisas, i tijim ol man blong hem blong oli mekem pis mo oli soemaot lav long ol narafala.

Mo tu, Jisas i talem se samting we bambae i makemaot ol man we oli stap aninit long rul blong Kingdom blong God, hemia fasin blong olgeta blong lavlavem olgeta. Baebol i soemaot klia se ol man we oli no laekem ol narafala bambae oli no save laef aninit long Kingdom blong God:

Jehova God, we i wokem man fastaem, hem i save rod we bambae i wok gud, yes beswan rod, blong putum pis long fulwol. Kingdom blong hem i save mekem samting we ol man mo ol oganaesesen blong holemtaet pis, oli no save mekem.