?Devel Setan i Stap Wea?

Ansa we Baebol i givim

Setan i wan spirit mo hem i laef long ples we i spirit. Be hemia i no min se hem i stap long helfaea mo i stap mekem ol rabis man oli safa, olsem pija long haf ya i soemaot.

‘Bigfala faet long heven’

Bifo, Devel Setan i go long eni ples we hem i wantem go long hem, mo hem i go joen tu wetem ol narafala gudfala enjel taem oli go stanap long fes blong God. (Job 1:6) Be Baebol i talemaot se bambae i gat wan “bigfala faet i stat long heven,” nao bambae oli sakemaot Setan i “kamdaon long wol” ya. (Revelesen 12:7-9) Ol yia we Baebol i tokbaot mo ol samting we oli hapen long wol ya, oli soemaot klia se faet ya i hapen finis. Naoia Devel Setan i stap long wol ya.

?Hemia i min se Setan i gat wan prapa ples blong hem long wol ya? Traem tingbaot, bifo Baebol i talem se taon blong Pegamam i ‘ples we bigfala jea blong Setan i stap long hem’ mo hem i ‘ples ya we Setan i stap long hem.’ (Revelesen 2:13) Be i klia se ol tok ya oli tokbaot ol samting we ol man long taon ya oli mekem, blong wosipim Setan. Baebol i talem se Setan i rul long “olgeta kantri long wol ya,” taswe hem i no stap long wan ples no kantri long wol ya, be hem i stap klosap long wol.—Luk 4:5, 6.