Respektem Olgeta We Oli Gat Paoa—?From Wanem i Impoten?

ATING yumi evriwan i glad se ol polis oli gat paoa blong holemtaet ol man nogud we oli stilim ol samting blong yumi no oli mekem famle blong yumi i fraet. Mo yumi gat tangkiu long ol kot tu, from we taem oli panisim ol rabis man, oli protektem komuniti blong yumi.

Maet yumi tingbaot tu ol narafala wok we gavman i mekem blong givhan long pablik, olsem fiksimap ol rod, mekem ples i klin, mo givim edukesen. Gavman i yusum takis blong pem olgeta samting we hem i nidim blong mekem ol wok ya. Hem i gat paoa blong mekem ol man i pem takis. Ol trufala Kristin oli faswan blong talem se i impoten blong respektem olgeta we oli gat paoa. ?Be fasin blong respek ya i save go kasem wanem mak? ?Mo hu nao olgeta we oli gat paoa long laef blong yumi, we yumi save respektem olgeta?

Oli Gat Paoa Insaed Long Komuniti

Baebol i talem long evri man nating we oli gat bilif no nogat, se oli mas respektem olgeta haeman. Olgeta ya nao oli stap wok blong mekem i gud long komuniti. Kristin ya aposol Pol i raet i go long ol brata sista blong hem long Rom long saed blong samting ya. Nao i gud yumi tingtinggud long ol tok we hem i talem, we oli stap long Rom 13:1-7, NW.

Pol i wan sitisen blong Rom, mo Rom i gavman ya we i gat paoa long wol long taem ya. Leta we Pol i raetem long ol Kristin long yia 56 K.T.,a i givim advaes long ol Kristin blong oli kam ol sitisen we oli soem gudfala eksampel. Biaen hem i raetem se: “Olgeta sol oli mas stap aninit long ol haeman we oli stap rul, from we i no gat man i save rul sipos God i no letem hem. Ol haeman we oli stap, oli stap long prapa ples blong olgeta from God.”

Long ples ya, Pol i stap eksplenem se man i no save gat paoa antap long narafala sipos God i no letem. Samting ya i min se ol haeman oli gat wan stret ples insaed long ol plan blong God. From samting ya, “man we i agensem ol haeman ya, hem i agensem plan blong God.”

Ol haeman blong gavman oli save leftemap ol sitisen we oli stap mekem i gud. Mo oli gat paoa tu blong panisim ol man we oli mekem ol rong samting. I stret we olgeta we oli stap mekem nogud oli fraet from raet we ol haeman oli gat “blong givimbak long man we i stap mekem nogud,” from we ol haeman oli stap “mekem wok blong God” nomo.

Nao Pol i finisim tok blong hem, i se: “From samting ya, i gat risen from wanem yufala i mas ona long hem [gavman ya], be i no from kros ya blong hem nomo, be from voes blong hat blong yufala tu. Taswe yufala i stap pem takis. From we God i stap yusum olgeta ya blong mekem wok ya blong hem we i blong givhan long olgeta man, mo oltaem oli stap mekem spesel wok ya.”

Hem i wok blong gavman blong putum takis long ol man olsem we hem i wantem, nao man we i pem takis i no save kontrolem samting ya. Ol Kristin oli holem stret fasin, nao voes blong hat blong olgeta i no stikim olgeta. Oli save se taem oli putum olgeta i stap daon aninit long ol haeman mo oli pem ol takis, oli stap givhan long komuniti we oli stap long hem. Mo tu, oli stap folem wan loa blong God.

Oli Gat Paoa Insaed Long Famle

?Olsem wanem long hemia we i gat paoa insaed long famle? Plante taem long ol faswan dei blong laef blong wan bebi, hem i krae no i singaot blong mekem man i save se hem i nidim wan samting. Be papa mama we i waes oli luksave wanem nao bebi ya i rili nidim, oli no letem wan pikinini i kros mo i krae, gogo hem i save bos long olgeta. Taem pikinini blong olgeta i gru moa, sam papa mama oli no blokem hem nating mo oli letem hem i fri nomo blong mekem ol fasin we hem i wantem. Be ol pikinini oli no ekspiriens tumas, taswe maet oli joen long ol raf fasin no oli mekem sam narafala rong samting, we i save spolem famle mo tu ful komuniti.

Rosalind Miles, we hem i raetem buk ya Children We Deserve i talem se: “Ol papa mama oli stat stretem pikinini taem we i let finis. Taem blong stat, hemia taem we pikinini i jes bon.” I stat long taem ya nao, ol papa mama oli mas toktok long voes we i soemaot we oli kaen, oli gat paoa blong kea long pikinini, mo oli holem promes blong olgeta oltaem. Sipos oli mekem olsem, bambae i no longtaem pikinini blong olgeta i luksave se oli gat paoa long hem, nao hem i glad blong oli stretem hem from we oli laekem hem.

Baebol i talem plante tok blong soemaot se hu i gat paoa insaed long famle. Long buk blong Ol Proveb, waes man ya Solomon i pulum tufala papa mama we oli fraet gud long God blong tufala i gat wan tingting taem tufala i stap fored long pikinini blong tufala. Hem i talem se: “Pikinini blong mi, plis yu lesin long papa blong yu taem hem i stretem yu. Mo yu no mas lego loa blong mama blong yu.” (Ol Proveb 1:8, NW) Taem papa no mama i toktok long ol pikinini, mo ol pikinini oli luk we toktok blong tufala i sem mak oltaem, ol pikinini bambae oli savegud ples blong olgeta insaed long famle. Maet oli traem blong tekem saed blong wan long tufala mo agensem narawan long tufala, blong bambae oli save folem prapa tingting blong olgeta. Be taem papa mama i joengud long wok ya blong gat paoa antap long pikinini blong tufala, ol yangfala ya oli no save kasem trabol.

Baebol i talem se hasban i mas lukaot gud long ol pikinini blong hem, mo long waef blong hem tu, blong olgeta bambae oli stap strong long saed blong spirit. Baebol i talem se hem i olsem hed blong famle, we i lidim hem. ?Olsem wanem nao hasban i save lidim gud famle blong hem? Pol i talem se, olsem we Kraes i Hed blong kongregesen, man i mas hed long waef blong hem long sem fasin. Pol i gohed i se: “Ol hasban, yufala i mas gohed blong laekem waef blong yufala, olsem we Kraes i laekem kongregesen [woman blong hem long saed blong spirit] tumas, ale, hem i givim laef blong hem blong sevem kongregesen ya.” (Efesas 5:25, NW) Taem man i folem eksampel blong Jisas mo i soemaot fasin blong hed wetem lav, bambae hem i kasem “bigfala respek” long waef blong hem. (Efesas 5:33, NW) Bambae samting ya i leftemap tingting blong ol pikinini insaed long famle olsem, blong akseptem impoten paoa ya we God i givim long papa mama blong olgeta.—Efesas 6:1-3.

?Olsem wanem nao long papa no mama we hem nomo i lukaot long pikinini, from we maet hasban no waef blong hem i ded no from wan narafala risen bakegen? ?Olgeta oli save lidimgud ol pikinini? Ol papa mo ol mama ya oli save askem Jeova mo Jisas Kraes blong tufala i givhan long olgeta. Oltaem toktok blong Jisas i gat paoa. Paoa ya i kam long Papa blong hem mo long tok blong hem Baebol.—Matiu 4:1-10; 7:29; Jon 5:19, 30; 8:28.

Baebol i givim plante gudfala rul blong givhan long ol pikinini we oli stap fesem ol problem. Taem papa mama oli ridim ol rul ya mo oli folem olgeta, bambae oli naf blong givim ol advaes we i givhan long ol pikinini. (Jenesis 6:22; Ol Proveb 13:20; Matiu 6:33; 1 Korin 15:33; Filipae 4:8, 9) Mo tu, papa mama oli save lukluk bakegen long ol buk we i stanap long Baebol, we ol buk ya oli stretgud blong givhan long olgeta blong oli save trenem ol pikinini blong olgeta. Long rod ya, ol pikinini bambae oli laekem mo oli respektem paoa blong Baebol long laef blong olgeta.b—Matiu 4:1-10; 7:29; Jon 5:19, 30; 8:28.

Oli Gat Paoa Long Kristin Kongregesen

“Hemia Pikinini blong mi, we mi lavem hem. Mi mi glad tumas long hem. Yufala i mas lesin gud long hem.” (Matiu 17:5) Ol tok ya we Jeova hem wan i talem, i olsem wan saen blong soemaot se Jisas i toktok wetem paoa we i kamaot long God. Ol samting we Jisas i talem i stap long stori blong ol fo Gospel we i isi blong yumi save faenem.

Jes bifo we hem i go antap long heven, Jisas i talem long ol disaepol blong hem se: “God i givim olgeta paoa long mi, long olgeta samting long heven mo long wol.” (Matiu 28:18) Jisas i hed long kongregesen blong hem. Hem i no stap wajemgud nomo olgeta we tabu spirit i makemaot, we oli stap folem sem step olsem hem. Be, long taem ya we tabu spirit i kamdaon long Pentekos 33 K.T., hem i yusum olgeta tu olsem wan “slef we i stret mo waes” blong oli karem trutok i go long ol man. (Matiu 24:45-47, NW; Ol Wok 2:1-36) ?Hem i mekem wanem blong blong mekem se Kristin kongregesen i kam strong olgeta? “Taem hem i go antap long ples we i hae we i hae, hem . . . i givim ol presen i go nomo long ol man.” (Efesas 4:8) Ol Kristin elda we tabu spirit i makemaot olgeta oli olsem “presen i go long ol man” mo oli gat paoa blong lukaot gud long ol brata mo sista blong olgeta long saed blong spirit.—Ol Wok 20:28.

From risen ya Pol i talem se: “Bambae yufala i mas tingbaot ol man ya we oli stap lidim yufala, we oli stap talemaot Tok blong God long yufala. Yufala i mas stap lukluk fasin blong olgeta, we laef blong olgeta i olsem wanem, mo i karem wanem kaen frut. Nao yufala i mas biaenem olgeta, long fasin blong bilif blong olgeta.” Olgeta ya oli gat strong bilif mo oli folem gud ol step blong Jisas. Taswe hem i wan waes rod blong biaenem olgeta long fasin blong bilif blong olgeta. Biaen Pol i gohed i se: “Yufala i mas ona long olgeta we oli stap lidim yufala, mo yufala i mas stap aninit long olgeta [“gohed oltaem blong luksave se oli gat paoa antap long yu,” The Amplified Bible]. Olgeta ya oli stap lukaot oltaem long ol sol blong yufala, mo bambae oli mas talemaot long God we oli holem wok ya olsem wanem. Nao bambae oli save harem gud long wok ya blong olgeta. Sipos yufala i stap mekem olgeta i taed long wok ya, fasin ya bambae i save mekem trabol long yufala tu.”—Hibrus 13:7, 17, NW.

?Wanem i save hapen taem ol man oli tanem baksaed long ol rul olsem? Sam memba blong faswan Kristin kongregesen oli mekem olsem, mo oli kam olsem ol man blong apostasi. Baebol i tokbaot tufala ya Haemenaeas mo Faelitas we oli spolem fasin blong bilif blong sam brata long kongregesen mo krangke toktok blong tufala i ‘spolem wanem we i tabu.’ Wan long ol strong tok blong tufala se, laef bakegen long ded i hapen finis. Maet tufala i talem se samting ya i kamtru long saed blong spirit no maet oli talem se hem i olsem wan pijatok nomo. Be i klia se tufala ya i no bilif se bambae ol dedman oli laef bakegen long fiuja, aninit long Kingdom blong God.—2 Timoti 2:16-18, NW.

Ale olgeta we oli gat wok blong lidim kongregesen oli givhan long ol brata. Ol Kristin elda ya oli oli wok long nem blong Jisas, oli yusum paoa blong Baebol blong pruvum se ol kaen toktok olsem oli giaman nomo. (2 Timoti 3:16, 17) Samting ya i sem mak tede insaed long Kristin kongregesen, we Baebol i talem se hem i “olsem bigfala pos blong mekem trutok i stap strong, mo i sapotem trutok.” (1 Timoti 3:15, NW) Bambae ol elda oli no save letem ol giaman tijing oli spolem “ol tok ya we i stret gud,” we oli stap yet long Baebol mo oli save mekem bilif blong yumi i strong.—2 Timoti 1:13, 14.

Ol man long wol oli no moa stap respektem olgeta we oli gat paoa long olgeta. Nating se i olsem, yumi ol Kristin yumi luksave se olgeta we i stret blong gat paoa long komuniti, insaed long famle, mo long Kristin kongregesen oli stanap blong givhan long yumi. Fasin blong respektem olgeta we oli gat paoa i impoten. Samting ya i givhan long yumi long saed blong bodi, filing, mo long saed blong spirit. I gud yumi gat ona mo respek long olgeta we God i givim paoa long olgeta. Taem yumi mekem olsem, bambae Jeova God mo Jisas Kraes we tufala nao i gat bigfala paoa, oli lukaot gud se yumi stap sef blong olwe.—Ol Sam 119:165; Hibrus 12:9.

[Ol futnot]

[Tok blong makem poen long pej 5]

Baebol i givim fulap save long saed blong paoa we papa mama oli gat insaed long famle

[Tok blong pija long pej 6]

Papa no mama we hem nomo i lukaot long pikinini, i save askem help long tufala we i gat paoa long yumi, Jeova God mo Jisas Kraes

[Tok blong pija long pej 7]

Ol Kristin oli luksave se olgeta we i stret blong oli gat paoa insaed long famle, long Kristin kongregesen, mo long komuniti, oli stanap blong givhan long olgeta

[Credit Line blong pija long pej 4]

Photo by Josh Mathes, Collection of the Supreme Court of the United States