Baebol i Talem Wanem
?Wanem i Hapen Long Man Taem Hem i Ded?
FASTAEM ol man oli ol pikinini blong God, hem i no wantem se oli ded. (Rom 8:20, 21) Faswan taem we Jeova i tokbaot ded long Adam, hem i no talem se hem i wokem ol man blong oli ded. Nogat. Hem i talem se ded i panis blong man we i no obei long hem. (Jenesis 2:17) Adam i save se ded i olsem wanem from hem i luk we ol anamol oli stap ded.
Adam i mekem sin, mo hem i kakae frut blong sin ya taem hem i ded. Hem i gat 930 yia blong hem taem hem i ded. (Jenesis 5:5; Rom 6:23) From we Adam i no obei long God, God i putumaot Adam long famle blong hem, mo stat long taem ya, hem i no moa tingbaot Adam olsem wan pikinini blong hem. (Dutronome 32:5) Baebol i tokbaot nogud frut we sin ya i karem long olgeta man, i se: “Wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded.”—Rom 5:12.
?Wanem i Hapen Long Tingting Blong Yumi?
Baebol i talem se: “Man mo anamol, tufala i sem mak nomo. Man i no save talem se hem i moa gud, i winim anamol, from we laef blong tufala i blong nating nomo. Rod blong ded i stap wet long tufala. Bambae tufala tugeta i mas ded. Bambae tufala tugeta i mas gobak long graon. Tufala i kamaot long graon, mo bambae tufala i gobak long hem bakegen.” (Prija 3:19, 20) ?I minim wanem se oli gobak long graon bakegen?
Tok ya “gobak bakegen long graon” i mekem yumi tingbaot tok we God i talem long faswan man, se: “Mi mi wokem yu long graon fastaem, mo bambae yu yu kam graon bakegen.” (Jenesis 3:19) Hemia i min se ol man, mo ol anamol tu, oli blong laef long wol ya. Yumi no ol spirit man we yumi laef insaed long ol bodi blong mit mo blad. Tingting blong yumi i no moa save wok sipos bodi blong yumi i lus. Baebol i tokbaot taem man i ded, i se: “Hem i pulum laswan win blong hem, hem i gobak long graon bakegen, mo long sem dei ya, hem i no moa save tingting.”—Ol Sam 146:4, The New English Bible.
?From we samting ya i hapen, i min se ol dedman oli stap olsem wanem? Tok blong God i ansa klia, i se: “Ol man we oli laef yet oli save se bambae oli ded, be ol man we oli ded finis oli no moa save wan samting.” (Prija 9:5) Baebol i no tokbaot ded olsem wan fren we i kam tekem yumi i go long wan gudfala laef samples. Nogat. Hem i tokbaot ded olsem “laswan blong ol enemi,” from we taem yumi ded ol wok blong yumi oli finis. (1 Korin 15:26; Prija 9:10) ?Olsem wanem? ?Samting ya i min se i no gat rod blong winim ded?
Gud Nius Long Saed Blong Ded
Ol milian man ya we oli ded finis, oli stap slip nomo mo wan dei bambae oli wekap. Jisas i bin toktok wetem ol disaepol blong hem long saed blong wan fren blong olgeta we i ded, hem i talem long olgeta se: “Gudfala fren ya blong yumi Lasaros hem i stap slip. Be bambae mi mi go blong wekemap hem.” Taem Jisas i stap go long beregraon, hem i mitim wan bigfala hip blong ol man we oli stap krae. Taem hem i kasem beregraon hem i askem ol man blong karemaot ston we i blokem hol ya we oli bin berem Lasaros long hem, mo hem i singaot se: “!Lasaros! !Yu kamaot!” Man ya we i bin ded fo dei finis, i kamaot. (Jon 11:11-14, 39, 43, 44) From we bodi blong Lasaros i stat blong roten finis, Jisas i soemaot se God i save rimemba olgeta samting long saed blong ol man we oli ded—ol prapa fasin blong wanwan man, ol memori blong olgeta, mo lukluk blong olgeta. Hem i save mekem olgeta oli laef bakegen. Long wan narafala taem Jisas i talem se: “I gat taem i stap kam we ol dedman bambae oli harem voes blong mi [Jisas], nao bambae oli aot long beregraon blong olgeta.”—Jon 5:28, 29.
Baebol i gohed blong talem sam moa gud nius long saed blong ded, i se: “Mo laswan blong ol enemi ya we God bambae i winim olgeta, hemia ded.” (1 Korin 15:26) Ol man bambae oli no moa harem nogud from we oli mas go long beregraon blong berem wan man we oli lavem hem tumas. Baebol i talem se: “Bambae i no moa gat ded.” (Revelesen 21:4) Yes wanem we Baebol i talem long saed blong ded i leftemap tingting blong yumi.
?YU YU BIN TINGBAOT?
◼ ?Ol dedman oli save tingting?—Prija 9:5.
◼ ?Olsem wanem? ?I no gat rod blong winim ded?—Jon 5:28, 29.
[Tok blong makem poen long pej 19]
“Hem i pulum laswan win blong hem, hem i gobak long graon bakegen, mo long sem dei ya, hem i no moa save tingting.”—Ol Sam 146:4, “The New English Bible”