Japta 8
?Olsem Wanem long Man Taem Hem i Ded?
1. ?Wanem ol kwestin ya long saed blong ol dedman plante taem ol man oli askem?
TAEM wan man we yu yu laekem hem tumas i ded, yu nao yu harem nogud. !Hat blong yu i hevi tumas from samting ya! Ating maet yu askem se: ?Wanem i hapen long man taem hem i ded? ?Hem i laef yet long wan narafala ples? ?Olgeta ya we oli ded, bambae oli save kambak samtaem blong stap wetem yumi long wol ya?
2. ?Wanem i hapen long faswan man ya Adam, taem hem i ded?
2 Blong faenemaot ansa blong ol kwestin ya, fastaem yumi mas save wanem i hapen long Adam taem hem i ded. Taem hem i mekem sin, God i talem long hem, i se: “Bambae yu gobak long graon, from we mi mi bin tekemaot yu long graon. Bodi blong yu i graon nomo, nao bambae yu mas gobak long graon.” (Jenesis 3:19) Tingbaot mining blong toktok ya. Taem God i no wokem Adam yet long graon, Adam i no stap. Nao taem hem i ded, Adam i gobak long graon, nao i olsem bifo bakegen, Adam i no stap.
3. (a) ?Ded i olsem wanem? (b) ?Eklesiastis 9:5, 10 i talem wanem long ol dedman?
3 Ded i narakaen olgeta long laef. Baebol i soemaot samting ya long Eklesiastis 9:5, 10. Long Authorized no King James Version, tufala vas ya i talem se: “Ol man we oli laef oli save se bambae oli mas ded; be ol dedman oli no save long wan samting, mo oli no moa save kasem pei; from we ol man oli fogetem olgeta finis. Wanem samting we han blong yu i faenem blong wokem, yu yu mas wokem long olgeta paoa blong yu, from we i no gat wok, no tingting, no save, no waes fasin, long beregraon, ples ya we bambae yu go long hem.”
4. (a) ?Olsem wanem long tingting blong man taem hem i ded? (b) ?Blong wanem man i no moa save harem, lukluk, tajem, smelem, no testem wan samting taem hem i ded?
4 Ol dedman oli no save mekem wan samting, mo oli no save harem wan samting. Tingting blong olgeta i finis. Baebol i talem se: “Yu yu no mas trastem pikinini blong king, no pikinini blong man, from we oli no save givhan long yu. Speret blong hem i goaot long hem, nao man ya i gobak long graon blong hem; long sem dei ya ol tingting blong hem oli finis.” (Sam 146:3, 4) Taem man i laef, hem i stap pulum win, blong speret, olsem paoa blong laef blong hem, i stap gud. Be taem man i ded, speret ya i “goaot long hem.” Speret ya i finis olgeta. Nao dedman ya i no save harem, lukluk, tajem, smelem, no testem wan samting. ?Blong wanem? From we ol dedman oli no moa gat tingting, oli no moa save mekem wan samting. Baebol i talem olsem.
5. (a) ?Olsem wanem Baebol i soemaot we ded blong ol anamol mo blong ol man, i sem mak nomo? (b) ?Wanem “speret” ya we i mekem ol man mo ol anamol oli laef?
5 Taem oli ded, man mo anamol i sem mak nomo. Oli no moa save mekem wan samting. Baebol i soemaot samting ya, i se: “Ded blong tufala i sem mak nomo; mo tufala i gat sem speret nomo. Olsem ya nao, i no gat man i hae moa long ol anamol, from we olgeta samting i nating nomo. Olgeta oli go long sem ples nomo. Oli kam long graon, mo oli gobak long graon.” (Eklesiastis 3:19, 20) “Speret” ya we i mekem ol anamol oli laef, i sem mak nomo long “speret” ya we i mekem ol man oli laef. Taem “speret” ya, no paoa blong laef we yumi no save luk, i goaot, man mo anamol tufala i gobak long graon ya we God i bin yusum blong wokem tufala.
SOL I SAVE DED
6. ?Olsem wanem Baebol i soemaot we ol anamol oli sol?
6 Samfala man oli talem we man i defren long ol anamol, from we man i gat wan sol, be ol anamol oli no gat. Be Jenesis 1:20 mo 30 i talem we God i bin wokem ol “laef sol” blong stap long wora, mo we ol anamol oli “sol we oli gat laef.” Long tufala vas ya, samfala Baebol oli no yusum tok ya “sol,” be oli talem se “anamol” no “laef.” Be long futnot blong olgeta, ol Baebol ya oli agri, se tok ya “sol” i stap long tufala vas ya long ol Baebol blong fastaem, we oli raetem long Hibru. Namba 31:28 i soemaot tu we ol anamol oli sol. Long vas ya i tokbaot “wan sol long evri faef handred sol blong ol man, mo blong ol buluk, mo blong ol dongki, mo blong ol sipsip.”
7. ?Baebol i talem wanem blong soemaot we sol we i anamol, mo sol we i man, i save ded?
7 From we ol anamol oli sol, taem oli ded, sol blong olgeta i ded. Baebol i talem se: “Olgeta laef sol blong solwora, oli ded.” (Revelesen 16:3) ?Be olsem wanem long sol blong man? Yumi lanem finis long laswan japta we God i no wokem man wetem wan sol. Man hem nao i sol. Taswe, taem man i ded, sol i ded. Plante taem Baebol i soemaot we samting ya i tru. Neva Baebol i talem we sol i no save ded. “Olgeta we oli gobak long graon bambae oli bendaon, mo i no gat wan we i save sevem sol blong hem i laef.” (Sam 22:29) “Sol we i mekem sin—hem bambae i mas ded.” (Esikel 18:4, 20) Mo long Josua 10:28-39 yu save faenem we seven taem i tokbaot ol sol we oli ded, from we oli bin kilim olgeta.
8. ?Olsem wanem yumi save we man no sol ya Jisas Kraes, hem i ded?
8 Baebol i tok profet long Jisas Kraes, i se: “Hem i kafsaedem sol blong hem i go long ded . . . mo hem i karem sin blong plante man.” (Aesea 53:12) Baebol i tijim yumi we wan sol (Adam) i bin mekem sin, nao i mas gat wan narafala sol (wan man) we i stret long hem, we hem i mas olsem wan sakrafaes, blong pemaot ol man. Kraes i bin “kafsaedem sol blong hem i go long ded” blong pemaot yumi evriwan. Man ya Jisas, we hem i sol, hem i ded from.
9. ?Wanem mining blong tok ya se ‘speret i gobak long God’?
9 Yumi save finis we “speret” i narakaen samting long sol blong yumi. Speret i olsem paoa blong laef. Paoa blong laef ya i stap long ol cell blong bodi blong ol man mo anamol. Taem man no anamol i pulum win, samting ya i stap holem paoa blong laef ya, blong i no ded. ?Be wanem mining blong tok ya se “graon i gobak long graon . . . mo speret i gobak long tru God, we hem i bin givim speret ya fastaem”? (Eklesiastis 12:7) Taem man no anamol i ded, paoa blong laef bambae i aot long olgeta cell blong bodi, nao bodi ya i stat kam rotin. Be hemia i no minim se paoa blong laef ya blong yumi, i livim wol ya, i flae i go antap long God. Be taem speret ya i gobak long God, i min se fyuja laef blong yumi i stap long han blong God nomo. Paoa blong hem nomo i save givimbak speret, no paoa blong laef ya, blong bambae yumi save laef bakegen.—Sam 104:29, 30.
LASROS—MAN YA WE I DED BLONG FO DEI
10. ?Lasros i ded, be Jisas i talem wanem?
10 Store blong Lasros, we hem i ded blong fo dei, i save halpem yumi savegud moa long ol dedman oli stap olsem wanem. Jisas i talem long ol man blong hem, i se: “Gudfala fren ya blong yumi Lasros, hem i stap slip. Be bambae mi mi go blong wekemap hem.” Be ol man blong hem oli talem long hem se: “Masta, sipos hem i stap slip, bambae sik blong hem i finis, hem i save kamgud bakegen.” Nao Jisas i talemaot i klia, i se: “Lasros i ded finis.” ?Blong wanem Jisas i talem we Lasros i stap slip, be hem i rili ded?
11. ?Jisas i mekem wanem long Lasros ya we i ded?
11 Taem Jisas i kam kolosap long velej ya blong Lasros, hem i luk Mata, sista blong Lasros. Nao tufala, wetem plante narafala man tu, oli go long ples ya we oli berem Lasros. Hemia i wan hol long ston, mo oli blokem hol ya long wan narafala ston. Nao Jisas i talem se: “Yufala i tekemaot ston ya.” Nao Mata i talem se: “Masta, hemia i sting finis. Hemia i namba fo dei blong hem ya.” Be oli tekemaot ston, mo Jisas i singaot bigfala, i se: “Lasros, yu kamaot.” !Nao hem i kamaot ya! Hem i laef, mo ol kaliko ya we oli yusum blong kavremap bodi blong hem, oli stap yet long hem. Nao Jisas i se: “Yufala i tekemaot ol kaliko ya, blong i save wokbaot.”—Jon 11:11-44, NTB.
12, 13. (a) ?Blong wanem yumi save we Lasros hem i no save tingting, taem hem i ded? (b) ?Blong wanem Jisas i talem we Lasros i stap slip, taem hem i rili ded?
12 Tingbaot hemia: ?Bodi blong Lasros i stap olsem wanem taem hem i ded blong fo dei? ?Hem i bin go long heven? Hem i gud man ya. Be Lasros i no talem we hem i bin go long heven. Ating sipos hem i bin go long heven, hem i mas talem long olgeta. Be hem i no go long heven. Hem i ded tru, olsem Jisas i talem. ?Be blong wanem fastaem Jisas i talem long ol man blong hem we Lasros i stap slip nomo?
13 From we Jisas i save we Lasros i no moa gat tingting. Baebol i talem se: “Ol dedman oli no save long wan samting.” (Eklesiastis 9:5) Man we i laef, yumi save wekemap hem taem hem i stap slip. Olsem ya nao, Jisas i soemaot we long paoa blong God, hem i save wekemap fren ya blong hem Lasros, long ded.
14. ?From we yumi save we Kraes i gat paoa blong mekem ol dedman oli stanap oli laef bakegen, taswe yumi mas wantem blong mekem wanem?
14 Taem man i stap slip bigwan, hem i no save tingting long wan samting. I sem mak long ol dedman. Oli no save harem wan samting. Oli no moa stap. Be long stret taem we God i makem finis, ol dedman we God i bin pemaot, bambae oli stanap oli laef bakegen. (Jon 5:28) From samting ya, yumi mas wok blong traem mekem God i laekem yumi. Sipos yumi mekem olsem, nao bambae yumi ded, God bambae i no save foget long yumi. Hem bambae i mekem yumi i laef bakegen.—1 Tesalonaeka 4:13, 14.
[Tok blong pija long pej 76]
ADAM—i kam long graon . . . i gobak long graon
[Tok blong pija long pej 78]
?Lasros i stap olsem wanem bifo we Jisas i mekem hem i stanap i laef bakegen?