?Yu Yu “Wantem” Halpem Ol Narafala?
1 Jisas i rili kea long ol narafala. Taem wan man we i gat sik ya leprosi i askem long Jisas blong halpem hem, Jisas i stretem han blong hem, i tajem man ya, nao i talem se: “Yes, mi mi wantem. !Yu klin!” (Mak 1:40-42) ?Olsem wanem yumi save folem fasin ya blong Jisas blong wantem halpem ol narafala?
2 Olgeta We Oli Intres: Evri memba blong kongregesen oli gat wok blong mekem blong halpem olgeta we oli intres, blong oli kam ol man blong wosip long Jeova. Taem ol niuwan oli kam long miting, yumi mas sekhan long olgeta mo traem save olgeta. Traem lukaot rod blong halpem olgeta blong gohed. Taem oli givim ansa, talem sam gudfala toktok blong leftemap tingting blong olgeta. Talem long olgeta olsem wanem i gud tumas we oli stap traehad blong folem ol rul blong Baebol long laef blong olgeta. Halpem olgeta blong luksave janis we oli gat blong faenem ol trufala fren insaed long kongregesen.
3 Ol Kristin Brata Mo Sista: Antap moa, yumi mas halpem “olgeta ya we oli brata mo sista blong yumi from we olgeta tu oli bilif long Kraes.” Yumi save mekem samting ya long plante rod. (Gal. 6:10) Plante long yumi oli stap siksik. Yu save go luk olgeta mo leftemap tingting blong olgeta. Olsem nao, oli gat janis blong joen wetem ol brata mo sista, wan samting we oli nidim tumas. Mo tu, maet yu save mekem sam smosmol wok blong givhan long olgeta. Sam narafala, oli kasem sam trabol long laef blong olgeta. Soemaot se yu wari long olgeta. Tektaem blong lesin long olgeta mo mekem olgeta oli kam strong bakegen. (1 Tes. 5:14) Ol elda tu, oli nidim we yumi wokgud wetem olgeta taem oli stap traehad blong mekem gud wok blong olgeta. (Hib. 13:17) Taem yumi soemaot se yumi glad blong givhan, yumi mekem ol Kristin brata mo sista blong yumi ‘oli harem gud tumas.’—Kol. 4:11.
4 Famle Blong Yumi: Insaed long famle tu, yumi mas traehad blong folem fasin blong Jisas blong tingbaot narafala. Ol papa mama oli wari long ol pikinini blong olgeta, taswe oli ‘stretem olgeta, mo tijim olgeta, olsem we Masta blong yumi i stap stretem yumi, i stap tijim yumi.’ (Efes. 6:4) Ol pikinini oli save givhan tu. Oli save rere long stret taem blong mekem famle stadi, go long ol miting, mo long wok blong prij. Ol pikinini we oli bigwan finis, oli save soemaot fasin sore olsem Jisas, taem oli givhan wetem lav long papa mama blong olgeta we maet tufala i stap kam olfala mo tufala i harem nogud long bodi blong tufala. Long ol rod ya mo long plante narafala rod, yumi evriwan i save mekem ‘nambawan wok ya blong ol Kristin man, blong lukaot gud long ol famle blong olgeta.’—1 Tim. 5:4.
5 Taem yumi folem eksampol blong Jisas blong halpem ol narafala, maet yumi save mekem we ol trabol blong olgeta oli no hevi tumas, mo yumi givhan long famle blong yumi mo long kongregesen, blong oli lavlavem olgeta. Be samting we i moa impoten se, yumi givim ona long “Papa blong yumi we i gat sore,” Jeova. —2 Kor. 1:3.