Japta 61

Jisas i Ronemaot Devel Long Wan Boe

JISAS wetem Pita mo Jemes mo Jon oli stap antap long wan hil. Ating hem i hil ya we oli kolem Hemon. Nao ol narafala disaepol oli kasem wan trabol. Taem Jisas i kamdaon, wantaem nomo hem i luk we oli gat wan trabol. I gat plante man we oli stap wetem olgeta, mo sam tija blong Loa oli stap rao wetem ol man blong Jisas. Taem olgeta man ya oli luk Jisas, oli sek long hem, oli resis i kam long hem, oli sekhan long hem. Nao Jisas i askem long ol man ya, i se: “?Yufala i stap rao wetem olgeta ya from wanem?”

Wan man i kamaot long medel blong bigfala hif blong ol man ya, hem i nildaon, nao hem i talem long Jisas: “Tija, mi mi tekem pikinini blong mi i kam long yu from we i gat wan devel i stap long hem, we i mekem hem i no save tok. Taem devel ya i kam strong long hem, i mekem hem i foldaon long graon, nao spet blong hem i kamaot olsem sop, hem i kakae tut blong hem mo bodi blong hem i kam strong tumas. Mi askem finis long ol man blong yu blong oli ronem devel ya, be oli no save mekem.”

Ol tija blong Loa oli stap jikim ol disaepol blong Jisas, from we oli stap traehad blong ronemaot devel ya, be oli no save mekem. Long taem ya nao, Jisas i kamtru. Nao Jisas i talem long olgeta, i se: “A, yufala man blong naoia, yufala i no bilif nating. ?Hamas taem bambae mi mi mas stap bakegen wetem yufala? ?Hamas dei bambae mi mi mas givhan bakegen long yufala?”

Jisas i stap talem tok ya long ol man, be hem i wantem moa we ol tija blong Loa oli harem tok blong hem, from we olgeta nao oli stap rao wetem ol disaepol blong hem. Ale, Jisas i gohed i se: “Yufala i tekem pikinini ya i kam.” Nao taem pikinini ya i stap kam long Jisas, devel ya i sakem hem i foldaon long graon, i mekem bodi blong hem i seksek. Hem i stap rol olbaot long graon, mo spet blong hem i kam olsem sop.

Jisas i askem long papa blong pikinini ya, i se: “?Hamas yia finis hem i stap mekem olsemia?”

Papa blong hem i ansa, i se: “Samting ya i stat taem we hem i smol pikinini yet. Plante taem devel ya i traem mekem hem i foldaon long faea mo long wora blong kilim hem.” Nao papa blong boe ya i askem strong long Jisas, i se: “Sipos yu save mekem, plis yu sore long mifala, yu givhan long mifala.”

Ating plante yia finis papa blong boe ya i stap lukaot wan man we i save givhan long hem. Ol disaepol blong Jisas tu oli no save mekem boe ya i kamgud bakegen. Taswe man ya i stap harem nogud tumas. Jisas i luksave samting ya, nao hem i tok blong leftemap tingting blong man ya, i se: “?Weswe yu talem se ‘Sipos yu save mekem’? Man we i bilif, hem i save kasem evri samting.”

Wantaem nomo, papa blong pikinini ya i krae long hem, i se: “Mi mi bilif, be bilif blong mi i smol. Plis yu givhan long mi.”

Jisas i luk we olgeta man oli stap ron i kam kolosap long hem, nao i tok strong long devel ya, i se: “Yu devel we sora blong yu i fas mo yu no save tok, mi talem long yu stret. Yu aot long pikinini ya mo bambae yu no kambak long hem samtaem.” Taem devel ya i stap kamaot long pikinini, i mekem hem i singaot strong, i hafded, we bodi blong hem i seksek tumas. Ol man oli luk we boe ya i slip long graon, olsem we hem i ded, nao bighaf blong olgeta i talem se: “Hem i ded finis.” Be Jisas i holem han blong boe ya, i givhan long hem blong i girap, nao hem i stanap.

Taem Jisas i sanemaot ol disaepol blong hem fastaem blong prij long ol man, olgeta oli bin ronemaot sam devel long sam man. Be naoia oli no save mekem. Taswe taem oli go insaed long haos, mo ol disaepol blong Jisas nomo oli stap wetem hem, oli askem long hem se: “?Mifala i no save ronemaot devel ya from wanem?”

Jisas i soemaot long olgeta se samting ya i kamaot from we olgeta oli sot long bilif. Nao hem i ansa, i se: “Ol devel olsem hemia, prea nomo i save ronemaot olgeta.” Yes, oli mas mekem sam samting fastaem blong oli naf blong ronemaot devel ya we i strong tumas. Oli nidim bigfala bilif mo oli mas prea long God blong askem hem blong givim paoa we hem i naf blong ronemaot devel ya.

Taswe Jisas i talem long olgeta se: “Tru mi talem long yufala, sipos bilif blong yufala i olsem sid ya blong nambangga we i smol tumas, bambae yufala i save talem long bigfala hil ya se ‘Yu gowe,’ nao bambae hem i mas gowe. Bambae i no gat wan samting we yufala i no save mekem.” !Tru tumas, bilif i gat paoa!

Ol traem we yumi kasem mo ol trabol we oli save blokem yumi long wok blong Jeova, samtaem oli olsem wan bigfala hil we i stap blokem rod blong yumi. Mo maet yumi ting se yumi no naf blong winim. Be Jisas i soemaot se bilif i olsem wan sid we yumi planem, nao yumi stap wasem oltaem blong mekem hem i gru. Sipos yumi wokem bilif long hat blong yumi, mo yumi mekem i gru moa, bambae bilif ya i save kam bigwan. Hem i save mekem se yumi naf blong winim ol trabol mo traem we oli big olsem ol bigfala hil. Mak 9:14-29; Matyu 17:19, 20; Luk 9:37-43.

▪ ?Taem Jisas i kamdaon long bigfala hil blong Hemon, hem i luk we ol man oli stap mekem wanem?

▪ ?Olsem wanem Jisas i leftemap tingting blong papa blong boe ya we i gat wan devel i stap long hem?

▪ ?From wanem ol disaepol blong Jisas oli no save ronemaot devel ya?

▪ ?Jisas i soemaot se bilif blong yumi i save kam bigwan, nao yumi naf blong mekem wanem?