?Olsem Wanem Trutok i Mekem Yumi Fri Man?
1 Wan taem, Jisas i talem long ol man Jiu we oli bilif long hem se: “Bambae yufala i save trutok, mo trutok ya bambae i mekem yufala i fri man.” (Jon 8:32) Hem i stap tokbaot wan fasin fri we i bitim samting we enikaen loa i save givim long man. Hem i tokbaot fasin fri we evri man i save kasem—nomata we oli rij man no pua man, nomata we oli skulgud no oli no skulgud. Jisas i tijim trutok ya we bambae i mekem ol man oli fri, oli no moa slef, long sin mo ded. Yes, Jisas i eksplenem, se “olgeta man we oli mekem sin, be sin ya i olsem masta blong olgeta.” (Jon 8:34) !Tru, yumi wantem tumas blong luk taem ya we olgeta man we oli obei long God “bambae oli no moa mekem sin, panis ya bambae i finis, nao olgeta samting ya we God i mekem bambae oli fri olgeta, olsem ol pikinini blong hem”!—Rom 8:21.
2 Trutok long saed blong Jisas mo wok we hem i gat blong mekem stamba tingting blong God i kamtru, hemia nao i mekem man i fri. Trutok ya i minim tu se yumi gat save long saed blong ransom sakrefaes we hem i givim blong pemaot yumi. (Rom 3:24) Stat naoia finis, yumi save kam fri man. Yes, taem yumi obei mo letem trutok blong Baebol i lidim yumi, yumi no moa fraet, yumi gat hop, mo yumi lego olkaen nogud fasin we oli stap spolem yumi.
3 Yumi No Moa Fraet Mo Yumi Gat Hop: From we yumi gat hop, ol trabol we oli stap hapen long wol ya oli no mekem tingting blong yumi i foldaon. Yumi save from wanem rabis fasin i stap, mo yumi save se i no longtaem bambae ol rabis fasin ya oli finis olgeta. (Sam 37:10, 11; 2 Tim. 3:1; Rev. 12:12) Mo tu, trutok i mekem yumi fri long ol giaman tijing long saed blong ol dedman. Yumi save se ol dedman oli no save spolem yumi. Oli no stap safa long helfaea, mo God i no stap karemaot laef blong ol man long wol ya jes from we hem i wantem se oli kam enjel long heven. Nogat.—Prija 9:5; Wok 24:15.
4 Trutok ya nao i givim paoa bakegen long wan papa mo mama we pikinini blong tufala i ded long wan akseden. Mama ya i talem se: “I gat wan emti ples i stap long laef blong mitufala, mo i no gat wan narafala we i save tekem ples ya gogo kasem taem we boe blong mitufala i laef bakegen. Be mitufala i save se soa ya we mitufala i harem, bambae i no save stap olwe.”
5 Yumi Lego Olkaen Nogud Fasin We Oli Stap Spolem Yumi: Trutok blong Baebol i save jenisim tingting mo fasin blong man. Nao man ya i fri from we hem i no kasem ol problem we oli kamaot long ol nogud fasin ya. (Efes. 4:20-24) Fasin blong no giaman, no stil, mo wokhad, oli save halpem man blong blokem fasin pua. (Prov. 13:4) Fasin lav we i pusum man blong tingbaot narafala fastaem, i mekem ol man oli joengud. (Kol. 3:13, 14) Kristin fasin blong soem respek long hed blong famle i mekem pis i stap insaed long famle. (Efes. 5:33–6:1) Taem man i stap longwe long fasin blong drong, nogud fasin blong seks, smok tabak, mo drag, hem i no kasem olkaen sik we oli save spolem bodi.—Prov. 7:21-23; 23:29, 30; 2 Kor. 7:1.
6 Wan yangfala man i no naf blong lego ol drag we hem i stap tekem blong naen yia finis. Wan dei, hem i mitim wan pablisa we i stap prij long rod. Hem i agri blong tekem sam buk, mo pablisa i mekem plan blong kam luk man ya long haos blong hem. Pablisa i statem wan Baebol stadi wetem yangfala man ya. Tu manis biaen, man ya i stop blong tekem drag, mo eit manis afta we man ya i stat stadi, hem i tekem baptaes. Taem brata blong hem mo waef blong brata ya, tufala i luk olsem wanem we yangfala man ya i no moa tekem drag, tufala tu i stat stadi Baebol.
7 Halpem Ol Narafala Blong Kam Fri: Ol man we oli stap kalabus long ol giaman tijing longtaem finis, maet oli faenem i had blong kasem save olsem wanem Tok Blong God i save mekem man i fri. Maet hemia we i tija i nidim blong traehad bigwan mo rere gud, blong trutok i save kasem hat blong man olsem. (2 Tim. 4:2, 5) Naoia i no gat taem blong stap wok sloslo blong ‘talemaot long olgeta we oli stap wok slef, se oli save gofri.’ (Aes. 61:1) Fasin fri we ol Kristin oli kasem hem i rili sas. Man we i kasem fasin fri ya hem i save gat laef we i no save finis.—1 Tim. 4:16.