Japta 17

Jisas i Tijim Nikodimas

LONG taem ya we Jisas i stap long Jerusalem blong mekem Lafet blong Pasova long 30 K.T., hem i mekem plante saen no merikel long paoa blong God. I gat plante man we oli luk ol saen ya, nao oli bilif long hem. Mo i gat wan man i stap, nem blong hem Nikodimas. Hem i wan memba blong hae kot blong ol man Isrel, nem blong kot ya Sanhedrin. Nikodimas i laekem ol samting we Jisas i mekem, ale hem i wantem faenemaot moa. Taswe wan taem, long naet, hem i kam blong toktok wetem Jisas. Ating hem i kam long tudak from we hem i fraet se ol lida blong ol man Isrel bambae oli luk hem, nao maet oli toktok tumas from.

Nikodimas i talem long Jisas se: “Tija, mifala i save we yu yu wan tija we God i sanem. From we i no gat man we i save mekem ol saen ya we yu yu stap mekem, sipos God i no stap wetem hem.” Jisas i ansa long Nikodimas, i talem long hem se sipos wan man i wantem kam insaed long Kingdom blong God, hem i mas “bon bakegen.”

?Olsem wanem wan man i save bon bakegen? Nikodimas i askem long Jisas se: “?Man we i kam bigman finis, hem i save bon bakegen olsem wanem? Hem i no save go insaed bakegen long bel blong mama blong hem, blong i bon bakegen.”

Yes, tok blong Nikodimas i stret. Be hemia i no prapa mining blong tok ya “bon bakegen.” Jisas i eksplenem long hem se: “Sipos man i no bon long wora mo long tabu speret, bambae hem i no save kam insaed long Kingdom blong God.” (NW) Taem Jisas i tekem baptaes mo tabu speret i kamdaon long hem, i olsem we hem i bon “long wora mo long tabu speret.” Long taem ya, voes blong God i kamaot long heven, i se: “Hemia pikinini blong mi, we mi laekem hem tumas. Tingting blong mi i harem gud tumas long hem.” Taem God i talem olsem, hem i minim se hem i mekem Jisas i kam wan pikinini blong hem long saed blong speret. Nao Jisas i save go insaed long Kingdom blong heven. Biaen, long Pentekos long 33 K.T., sam narafala we oli baptaes finis, oli kasem tabu speret tu. Ale i olsem we olgeta oli bon bakegen, oli kam pikinini blong God long saed blong speret.

Be Jisas i wan spesel pikinini blong God, we i gat wan impoten wok blong mekem long wol. Jisas i gohed blong talem long Nikodimas se: “Bifo, long drae ples, Moses i tekem wan snek we oli wokem long bras, i fasem long hed blong wan longfala pos, nao i leftemap. Mo long sem fasin, mi, mi Pikinini blong Man, bambae ol man oli leftemap mi, blong olgeta we oli bilif long mi bambae oli save kasem laef we i no save finis.” Yes, long taem bifo, oli wokem wan snek long bras, nao oli fasem hem long wan pos. Ale, sipos wan posen snek i kakae wan man Isrel, hem i mas lukluk i go long snek ya blong bambae hem i no ded. Long sem fasin, olgeta man we oli mas ded from sin, oli mas bilif long Pikinini blong God. Olsem nao, hem bambae i save sevem olgeta, blong oli no save ded samtaem.

Nao Jisas i soemaot se Jeova, we i gat bigfala lav, hem i wokem samting ya. Hem i talem long Nikodimas se: “God i laekem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” Ale, long Jerusalem, sikis manis nomo afta we Jisas i statem minista wok blong hem, hem i soemaot klia se hem i rod we bambae Jeova God i yusum blong sevem ol man.

Jisas i eksplenem moa long Nikodimas i se: “God i no sanem mi, mi Pikinini blong hem, mi kam long wol ya blong mi jajem ol man long wol.” Hem i minim se God i no sanem hem blong jajem ol man long wol, no blong tok nogud long olgeta, se bambae oli mas ded. No gat. Jisas i talem se God i sanem hem “blong mekem rod blong sevem olgeta.”

Nikodimas i bin kam luk Jisas long tudak, from we hem i fraet. Ating taswe Jisas i klosem toktok blong hem olsem, i se: “God i save jajem man from poen ya, we delaet [we Jisas i soemaot long laef mo ol tijing blong hem] i kam long wol finis, be ol man oli no laekem delaet, oli laekem tudak, from we fasin blong olgeta i no stret. Man we i stap mekem ol fasin we i no stret, hem i no laekem delaet, i agens long hem, mo i no save kam long delaet, from we delaet ya bambae i soemaot ol fasin blong hem. Be man we i stap mekem ol stret fasin nomo, hem i save kam long delaet, blong delaet ya i soemaot we ol fasin ya we hem i stap mekem, be God i bin givhan long hem blong i mekem olsem.” Jon 2:23 kasem 3:21; Matyu 3:16, 17; Ol Wok 2:1-4; Namba 21:9.

▪ ?From wanem Nikodimas i kam luk Jisas? ?From wanem hem i kam luk hem long naet?

▪ ?Taem man i “bon bakegen,” i minim wanem?

▪ ?Jisas i yusum wanem eksampel blong soemaot samting we bambae hem i mekem blong sevem ol man?

▪ ?Taem Jisas i talem se hem i no kam blong jajem wol, hem i minim wanem?