Jehova i No Save Lego Ol Man Blong Hem Mo Hem i Stap Fogivim Olgeta

1, 2. (1) ?From wanem yumi tinghae long ol fren we oli no save lego yumi, mo oli stap fogivim yumi? (2) ?Long stadi ya, bambae yumi ansa long wanem kwestin?

?LONG tingting blong yu, wan tru fren i olsem wanem? Wan sista we nem blong hem Ashley i talem se wan tru fren, hem i rere oltaem blong givhan long yu, mo taem yu mestem, hem i rere oltaem blong fogivim yu. Yumi evriwan i laekem ol fren olsem. Oli mekem yumi harem se oli lavem yumi, mo yumi sef.—Prov. 17:17.

² Jehova nomo i wan tru fren we i no save lego yumi mo i stap fogivim yumi. Hemia nao wanem we man blong raetem Sam i talem i se: “Yu yu gud tumas long mifala, yu stap fogivim mifala, yu stap tekemaot ol sin blong mifala. Ol man we oli stap mekem prea long yu, oltaem yu yu lavem olgeta tumas.” (Sam 86:5) ?Man we i no save lego narafala mo i stap fogivim ol man, hem i olsem wanem? ?Jehova i soemaot tufala fasin ya olsem wanem? ?Yumi save folem tufala fasin ya blong hem olsem wanem? Taem yumi kasem ansa blong trifala kwestin ya, bambae yumi lavem moa besfren blong yumi, hemia Jehova. Mo ansa blong ol kwestin ya bambae i mekem se yumi fren gud moa wetem ol brata mo sista blong yumi.—1 Jon 4:7, 8.

JEHOVA I NO SAVE LEGO OL MAN BLONG HEM

3. ?Wan man we i no save lego narafala, hem i olsem wanem?

³ Wan man we i no save lego narafala, hem i lavem hem. Hem i soemaot samting ya, taem hem i gohed blong givhan long hem mo long ol narafala man. Hem i mekem olsem long gudtaem mo long ol hadtaem tu. Baebol i tokbaot Jehova se hem i “no save lego” ol man blong hem. I no gat wan God we i olsem Jehova.—Rev. 16:5, NW.

4, 5. (1) ?Jehova i soemaot olsem wanem se hem i no save lego ol man blong hem? (2) ?Yu yu harem olsem wanem taem yu tingbaot se Jehova i no save lego ol man blong hem?

⁴ ?Jehova i soemaot olsem wanem se hem i no save lego ol man blong hem? Oltaem, hem i stap givhan long ol gudfala man blong hem. King Deved i wan long ol man ya we Jehova i givhan long hem. Taswe hem i leftemap nem blong Jehova from we Jehova i no lego hem. (Ridim 2 Samuel 22:26.) Long olgeta taem we Deved i stap long trabol, Jehova i no lego hem. Defren olgeta, Jehova i lidim hem, i lukaotgud long hem, mo i sevem hem. (2 Saml. 22:1) Ol samting we oli hapen long laef blong Deved, oli soemaot klia se Jehova i no talem nomo se hem i no save lego ol man blong hem, be hem i mekem samting blong givhan long olgeta. ?From wanem Jehova i no lego Deved? Hemia from we Deved i obei long hem. Yes, taem Jehova i luk we ol man blong hem oli putum tingting blong olgeta i stap strong long hem, hem lavem olgeta, mo hem i no save lego olgeta.—Prov. 2:6-8.

⁵ Yumi harem gud tumas taem yumi tingbaot se Jehova i no save lego ol man blong hem. Wan brata we nem blong hem Reed i talem se, hem i laekem tumas blong ridim ol stori blong Deved, we i soemaot olsem wanem Jehova i stap givhan long hem blong i winim ol trabol blong hem. Reed i talem se: “Nating we Deved i mas ronwe i go haed long ol hol blong ston, oltaem Jehova i lukaotgud long hem. !Stori ya i leftemap tingting blong mi bigwan! Mo i mekem mi mi tingbaot se, nomata wanem trabol i kasem mi, be Jehova bambae i gohed oltaem blong lukaotgud long mi, sipos mi mi obei gud long hem.” Ating yu tu yu gat sem tingting olsem.—Rom 8:38, 39.

6. ?Wanem sam rod we Jehova i soemaot se hem i no save lego ol man blong hem? ?Fasin ya i mekem i gud long yumi olsem wanem?

⁶ ?Wanem sam narafala rod we Jehova i soemaot se hem i no save lego ol man blong hem? Wan rod, hemia se oltaem hem i folem ol rul blong hem. (Aes. 46:4) Wan narafala rod, hemia se taem hem i mekem wan desisen, oltaem desisen blong hem i stanap long ol rul blong hem we oli no save jenis samtaem. (Mal. 3:6) Mo wan narafala rod bakegen, hemia se oltaem hem i mekem olgeta samting we hem i promes blong mekem. (Aes. 55:11) Fasin ya blong Jehova i mekem i gud long ol man blong hem. ?I mekem i gud long olgeta olsem wanem? Taem yumi traehad blong obei blong ol loa blong Jehova, yumi sua se Jehova bambae i blesem yumi olsem we hem i promes blong mekem.—Aes. 48:17, 18.

YUMI FOLEM FASIN BLONG JEHOVA WE HEM I NO LEGO OL MAN BLONG HEM

7. ?Yumi save mekem wanem blong folem fasin ya blong Jehova?

⁷ ?Yumi save folem fasin blong Jehova olsem wanem? Fas samting, hemia blong mekem i gud long olgeta we oli kasem trabol. (Prov. 3:27) ?Yu yu save wan brata no wan sista we tingting blong hem i foldaon from wan slak fasin blong hem, from we hem i sik, no from we ol famle oli agensem hem? Yu save givhan long hem taem yu talem ol gudfala tok long hem mo yu “leftemap tingting blong hem.” (Sek. 1:13)a Taem yu mekem olsem, yu soemaot se yu yu wan tru fren we yu no save lego ol narafala.—Prov. 18:24.

8. ?Man mo woman we i mared, tufala i soemaot olsem wanem se tufala i no save lego tufala?

⁸ Wan narafala samting we yumi save mekem blong folem fasin blong Jehova, hemia blong no lego olgeta we yumi lavem olgeta. Sipos yumi mared, yumi save se yumi no mas lego man no woman blong yumi. (Prov. 5:15-18) Taswe, yumi no mekem eni samting we i save pulum yumi blong go slip wetem man no woman blong narafala. (Mat. 5:28) Mo yumi no wantem lego ol brata mo sista blong yumi tu. Yumi mekem olsem, taem yumi no tokbaot nogud olgeta, mo yumi no talem ol giaman stori long saed blong olgeta. Mo yumi no mas lesin long narafala taem hem i tokbaot nogud wan brata no sista blong yumi.—Prov. 12:18.

9, 10. (1) ?Yumi no wantem nating blong lego hu? (2) Yu talem wan eksampol we i soemaot se i no isi oltaem blong obei long Jehova.

⁹ Yumi tu, yumi no wantem lego Jehova. ?Yumi soemaot samting olsem wanem? Hemia taem yumi laekem fasin we Jehova i laekem, mo no laekem nating fasin we hem i no laekem, mo yumi traehad blong mekem Jehova i glad long evri samting we yumi mekem long laef blong yumi. (Ridim Ol Sam 97:10.) Sipos yumi traehad oltaem blong tingting olsem Jehova, bambae i moa isi long yumi blong obei long hem.—Sam 119:104.

¹⁰ I tru se i no isi oltaem blong obei long Jehova, be yumi mas traehad. Sam yangfala Kristin oli wantem tumas blong mared, be oli no faenem wan brata no sista blong mared long hem. (1 Kor. 7:39) Yu traem tingbaot wan yangfala sista we maet i harem nogud blong stap hem wan. Ol man long ples blong wok blong hem we oli no witnes, oli traem faenem wan boefren blong hem. Nating se i olsem, hem i traehad blong obei long tok blong Jehova blong no fren mo no mared wetem wan man we i no wosipim Jehova. Sista ya i mekem olsem from we hem i no wantem lego Jehova. Ol Kristin we oli stanap strong olsem sista ya, oli soemaot wan gudfala eksampol long yumi. Jehova bambae i blesem ol man we oli holemstrong long hem, taem oli kasem trabol.—Hib. 11:6.

JEHOVA I STAP FOGIVIM OL MAN

11. ?Man we i fogivim narafala, hem i olsem wanem?

¹¹ Wan gudfala fasin blong Jehova, hemia se hem i stap fogivim ol man. ?Man we i fogivim narafala, hem i olsem wanem? Wan wan olsem, hem i no save kros long man we i mekem i nogud long hem. Be hemia i no min se taem hem i fogivim narafala, hem i traem pruvum se samting we narafala i mekem i rong, mo i no min se hem i traem mekem olsem we i nogat wan samting i hapen. Defren olgeta, hem i jusum blong no kam kros. Baebol i talem se Jehova i “stap fogivim” ol man we oli rili tanem tingting blong olgeta.—Sam 86:5.

12. (1) ?Jehova i stap fogivim ol man olsem wanem? (2) ?Pita i minim wanem taem hem i talem se God i save “tekemaot ol sin” blong man?

¹² ?Jehova i mekem wanem blong soemaot se hem i stap fogivim man? Baebol i talem se fasin blong Jehova blong fogivim man “i bigwan.” Hemia i min se Jehova i fogivim sin blong man fulwan mo blong olwe. (Aes. 55:7, NW) ?Jehova i fogivim man fulwan olsem wanem? I gud blong tingbaot toktok we i stap long Ol Wok 3:19. (Ridim.) Aposol Pita i talem long ol man we oli mekem sin se oli “mas tanem tingting” blong olgeta mo “oli mas luk long God [“tanraon,” NW].” Taem man i tanem tingting blong hem, i min se hem i rili sore from sin we hem i bin mekem. Mo hem i gat strong tingting blong i no mekem sin ya bakegen. (2 Kor. 7:10, 11) Biaen, hem i tanraon, i min se hem i no moa mekem sin ya bakegen, mo hem i mekem evri samting we hem i naf blong mekem blong God i glad long hem. Sipos hem i mekem olsem, God bambae i “tekemaot ol sin” blong hem. Hemia i min se Jehova bambae i no moa tingbaot ol sin blong man ya bakegen. I olsem we hem i wasemaot ol sin ya, i mekem man ya i klin. Olsem nao, Jehova i fogivim hem fulwan.—Hib. 10:22; 1 Jon 1:7.

13. ?Taem Jehova i talem se hem i “no moa save tingbaot” sin blong yumi, i minim wanem?

¹³ ?Wanem i soemaot se Jehova i stap fogivim man blong olwe? Yumi luksave se Jehova i save fogivim man blong olwe, taem yumi tingbaot profet tok we Jehova i talem long Jeremaea long saed blong ol Kristin we tabu spirit i makemaot olgeta. (Ridim Jeremaea 31:34.) Jehova i talem se: “Mi bambae mi fogivim yufala, mi tekemaot ol sin blong yufala, mo bambae mi no moa save tingbaot olgeta bakegen.” Taem Jehova i fogivim yumi, hemia i min se hem i no moa tingbaot ol sin ya blong yumi, blong bambae hem i save panisim yumi from, bakegen mo bakegen. Defren olgeta, hem i fogivim yumi blong olwe.—Rom 4:7, 8.

14. ?Taem yumi tingting dip long fasin blong Jehova blong fogivim man, yumi harem olsem wanem? Yu talem wan eksampol.

¹⁴ Taem yumi tingting dip long fasin blong Jehova blong fogivim man, yumi harem gud tumas. Yu traem tingbaot wan sista we nem blong hem Elaine. Blong sam yia i pas, kongregesen i bin putumaot hem. Sam yia biaen, kongregesen i tekembak hem. Elaine i talem se: “Nating we mi talem se Jehova i fogivim mi, be mi harem yet olsem se Jehova i lavem moa ol narafala, i bitim we i lavem mi.” Be Elaine i harem gud bakegen taem hem i tingting dip long ol tok blong Baebol, we oli tokbaot olsem wanem Jehova i stap fogivim ol man. Baebol i givhan long hem blong luksave se taem Jehova i fogivim ol sin blong yumi, i olsem we hem i wasemaot ol sin ya mo i mekem yumi klin. Yumi no mas harem nogud from ol sin we yumi bin mekem.b Elaine i gohed i talem se: “Mi luksave se Jehova i save fogivim sin blong mi fulwan. Mi mi ting se long ful laef blong mi, bambae mi stap harem nogud nomo from sin ya blong mi. Mi save se bambae i tekem longtaem blong tingting blong mi i kamgud bakegen, be stat naoia, mi harem se mi stap kam klosap moa long Jehova. Mo mi harem olsem se wan bigfala hevi samting i kamaot long mi.” !Yes, Jehova i wan God we i lavem ol man mo i stap fogivim olgeta!—Sam 103:9.

YUMI FOLEM FASIN BLONG JEHOVA BLONG FOGIVIM OL MAN

15. ?Olsem wanem yumi save folem fasin blong Jehova blong fogivim man?

¹⁵ Taem yumi fogivim narafala, yumi stap folem fasin blong Jehova. (Ridim Luk 17:3, 4.) Yumi mas tingbaot se taem Jehova i fogivim yumi, hem i no stap tingbaot samting we yumi mekem. Taswe, taem yumi fogivim narafala, yumi no mas tingbaot ol samting we oli mekem long yumi, mo yumi no mas tokbaot ol mastik blong olgeta bakegen.

16. (1) ?Taem man i fogivim narafala, hemia i no minim wanem, be hem i minim wanem? (2) ?Sipos yumi wantem se Jehova i fogivim yumi, yumi mas mekem wanem?

¹⁶ Taem yumi fogivim narafala, hemia i no min se yumi traem pruvum se samting we narafala i mekem i rong, no yumi wantem soemaot long narafala se samting we yumi mekem i stret. Nogat. Be i min se yumi jusum blong no kros long olgeta. Yumi mas tingbaot se sipos yumi wantem we Jehova i fogivim yumi, yumi tu yumi mas fogivim narafala. (Mat. 6:14, 15) Jehova i tingbaot we “yumi kamaot long asis nomo.” Hem i save se yumi sinman. (Sam 103:14) From samting ya, sipos ol narafala oli mekem i nogud long yumi, no oli talem wan samting we i no stret long yumi, yumi mas tingbaot se olgeta tu oli sinman, mo yumi mas fogivim olgeta.—Efes. 4:32; Kol. 3:13.

17. ?Wanem i save givhan long yumi blong fogivim olgeta we oli mekem yumi harem nogud?

¹⁷ I tru se samtaem i had blong fogivim narafala. Long taem blong aposol Pol tu, ol Kristin we tabu spirit i makemaot olgeta, oli mas stretem sam trabol bitwin olgeta. (Fil. 4:2) Sipos wan brata no wan sista i mekem yu yu harem nogud, ?wanem i save givhan long yu blong yu fogivim hem? I gud blong tingbaot samting we i hapen long Job. Elifas, Bildad, mo Jofara oli ol fren blong Job. Be oli tok nogud long Job, mo oli talem long hem se hem i kasem trabol from we hem i bin mekem wan samting we i nogud. Toktok blong olgeta i mekem Job i harem nogud tumas. (Job 10:1; 19:2) Biaen, Jehova i talem long trifala se samting we trifala i mekem i no stret. Mo hem i talem long trifala se trifala i mas go luk Job, mo trifala i mas mekem sakrefaes blong tekemaot sin blong trifala. (Job 42:7-9) Be Jehova i talem long Job tu blong i mekem wan samting. ?Wanem samting ya? Hem i talem se Job i mas prea from trifala ya. Ale, Job i mekem olsem we Jehova i talem, nao Jehova i blesem hem mo i fogivim hem. (Ridim Job 42:10, 12, 16, 17.) ?Yumi lanem wanem long stori ya? Sipos yumi prea from wan man we i mekem i nogud long yumi, hemia i save mekem se yumi no moa kros long man ya.

YU MAS GOHED BLONG TINGHAE LONG OL FASIN BLONG JEHOVA

18, 19. ?Yumi wantem gohed blong mekem wanem?

¹⁸ Taem yumi lanem moa ol fasin blong Jehova, yumi glad tumas. Yumi lanem se Jehova i wan God we ol man oli no fraet blong kam long hem, hem i mekem i sem mak long olgeta man, hem i givim samting long man long gladhat blong hem, hem i no mekem i strong tumas long ol man, hem i no lego ol man blong hem, mo hem i stap fogivim ol man. Be i gat plante samting yet we yumi save lanem long saed blong Jehova gogo i no save finis. (Pri. 3:11) Yumi gat sem tingting olsem aposol Pol we i raetem se: “!Fasin blong God blong givhan long ol man, i gud tumas! !Waes blong hem, mo save blong hem i bigfala tumas, i bitim mak!” Yumi save talem sem toktok olsem, from fasin blong Jehova blong lavem ol man, mo from ol sikis narafala fasin blong hem we yumi lanem long ol stadi ya.—Rom 11:33.

¹⁹ Taswe, i gud yumi gohed blong lanem moa ol fasin blong Jehova. Yumi tingting dip long olgeta, mo yumi traehad blong folem long laef blong yumi. (Efes. 5:1) Sipos yumi mekem olsem, bambae yumi lavem Jehova moa, mo bambae yumi harem se yumi kam moa klosap long hem. Bambae yumi save talem bakegen mo bakegen olsem man blong raetem Sam we i talem se: “Taem we mi mi kam stap klosap long yu, mi harem se i gud tumas long mi.”—Sam 73:28.