Eprel—Taem Blong ‘Stap Hadwok Mo Traehad Tumas’
1 Long ol wik klosap long Memoriol, ol man blong Jeova oli tingting dip. Oli stap tingbaot samting we ded blong Kraes i mekem long ol man, mo nambawan fiuja we God i promes long man from blad blong Jisas. Tingtingbak long Eprel 19 las yia. ?Yu yu rimemba wanem samting? ?Yu tingbaot yet ol man we yu bin luk long naet ya? Yu tingbaot olsem wanem Memoriol ya i mekem yumi haremgud long saed blong spirit? ?Yu rimemba ol gudfala tok blong Baebol mo ol prea we ol brata oli mekem wetem fulhat blong olgeta? Maet long taem ya, yu bin promes se bambae yu soemaot moa tangkiu long Jeova mo Jisas from lav we tufala i soem long yu. ?Ol samting ya we yu bin tingting dip long olgeta, naoia oli gat paoa long yu olsem wanem?
2 I klia se ol man blong Jeova oli no jes talem tangkiu nomo, oli mekem moa. (Kol. 3:15, 17) Las yia long Eprel, yumi prij plante. Long rod ya, yumi soemaot bigfala tangkiu long Jeova from ol samting we hem i mekem blong sevem yumi. Long Vanuatu, i bin gat 41 haftaem paenia long manis Eprel. Hadwok blong olgeta, wetem ol narafala man blong talemaot Kingdom, i mekem se yumi givimaot moa magasin mo mekem moa visit i bitim olgeta manis bifo. Mo tu, glad blong yumi i kam antap, taem yumi statem sam niufala Baebol stadi, mo yumi luk se namba blong ol man i kam antap bigwan long Memoriol.
3 Tru ya, gudfala fiuja we yumi sua long hem, i pusum yumi blong wok. I sem mak long samting we aposol Pol i talem se: “Yumi putum tingting blong yumi finis long God ya we i laef, i stap we i stap, mo we i save sevem olgeta man, be antap moa, hem i sevem yumi ya we yumi bilif long hem. From samting ya, yumi stap hadwok long ol wok blong hem we yumi stap traehad tumas.”—1 Tim. 4:10.
4 ?Klosap long Memoriol long yia ya, olsem wanem bambae yu yu soemaot bilif blong yu from samting we Jeova i mekem blong givim laef? Long Vanuatu long Eprel 1999, i bin gat bigfala namba blong 280 man we oli talemaot Kingdom. ?Yu ting se yumi save bitim namba ya long Eprel long yia ya? Yumi naf blong mekem olsem. Be, olgeta pablisa oli mas joen, nating se oli baptaes finis no no yet. Maet i gat plante niuwan tu we oli naf blong joenem yumi. Taswe, long ol plan blong yu blong hadwok mo traehad tumas long Eprel, tingbaot sam samting we yu save mekem blong pulum ol narafala, wetem ol niuwan mo olgeta we oli no prij plante yet.
5 Givhan Long Samfala Blong Prij Bakegen: Ating yu save samfala we oli no bin prij blong wan no tu manis. Yu save singaot olgeta mo pulum olgeta blong kam prij wetem yu. Sipos samfala long kongregesen oli no moa prij longtaem, ol elda bambae oli traehad tumas blong go luk olgeta mo leftemap tingting blong olgeta blong stat prij bakegen long Eprel.
6 Yumi evriwan i mas gohed nomo blong askem Jeova blong givim tabu spirit long yumi, blong yumi strong blong gohed long wok blong hem. (Luk 11:13) ?Blong kasem spirit ya, yumi mas mekem wanem? Ridim Tok blong God. (2 Tim. 3:16, 17) Mo tu, yumi mas go long ol faef miting evri wik, blong ‘lesin gud long tok we tabu spirit i stap talem long [kongregesen.]’ (Rev. 3:6) Naoia i wan janis blong givhan long olgeta we oli no moa prij blong smoltaem no longtaem, blong oli kamgud moa long prapa stadi blong olgeta, mo blong oli folem wan program blong kam oltaem long miting. (Sam 50:23) Taem yumi stap mekem samting ya, yumi mas lukaotgud se yumi wan i stap strong long saed blong bilif tu. Be i no hemia nomo.
7 Aposol Pita i eksplenem se God i givim tabu spirit long “ol man we oli obei long hem.” (Wok 5:32) Olgeta ya we oli obei, oli folem tok ya blong ‘talemaot gud nius blong hem long ol man mo givim wan gudfala witnes.’ (Wok 1:8; 10:42) I tru se yumi nidim tabu spirit blong God blong givim paoa long yumi blong prij. Be, sipos yumi soem se yumi wantem tumas blong mekem Jeova i glad, bambae hem i givhan moa long yumi. Neva yumi mas ting nating long faswan impoten samting ya, hemia blong wantem obei.
8 Givhan Long Ol Yangfala: ?Ol papa mama, ol pikinini blong yufala oli mekem sam samting blong soemaot se oli glad blong tokbaot trutok long ol narafala? ?Oli stap folem yufala long wok blong prij? ?Oli gat gudfala fasin? Sipos yes, yu no mas wet. Go luk wan elda long kongregesen blong askem sipos pikinini blong yu i naf blong kam wan pablisa long Eprel. (Lukluk buk ya, Ol Rul pej 94 mo 95.) Yufala i mas save se, ol pikinini blong yufala oli save mekem wan bigfala wok blong presem Jeova long manis blong Memoriol.—Mat. 21:15, 16.
9 Wan Kristin mama long Georgia, Amerika, oltaem i leftemap tingting blong smol gel blong hem, blong tokbaot Jeova long ol narafala. Las yia, smol gel ya i stap folem mama blong hem long wok blong prij, nao hem i givim buklet ya Wanem long wan man, mo i toktok smoltaem long saed blong lis blong ol japta. Man ya i askem long hem se: “?Yu yu gat hamas yia?” Smol gel ya i talem se: “Seven.” Man ya i sapraes tumas we gel ya i save storian gud. Man ya i bin save smol long trutok taem hem i yangfala, be hem i neva folem long laef blong hem. I no longtaem, wan Baebol stadi i statem wetem man ya, woman blong hem, mo gel blong hem.
10 Plante yangfala oli pablisa finis. Yumi haremgud tumas blong kampani wetem olgeta long wok blong prij. Olgeta ya oli save pulum mo leftemap tingting blong ol narafala yangfala. Manis Eprel i wan gudfala manis tu blong ol wanwan famle oli joen tugeta long tabu wok blong God. Olsem nao, bambae oli laeklaekem olgeta moa, mo bambae oli kam strong moa long trutok. Ol hed blong famle oli save lidim famle blong olgeta long wok ya.—Prov. 24:27.
11 Givhan Long Ol Niuwan: ?Olsem wanem long olgeta we yumi stap stadi Baebol wetem olgeta? ?Maet olgeta ya tu oli save joen wetem yumi blong traehad tumas long Eprel? Taem yufala i bin stadi long Save buk, japta 2, haf 22, no japta 11, haf 14, ating oli bin talem se oli wantem tumas blong talemaot samting we oli stap lanem. Sipos oli stap klosap long en blong buk ya naoia, yu save mekemrere blong tok klia long olgeta, taem yufala i kasem japta 18, haf 8. Haf ya i talem se: “Ating yu wantem tumas blong storeyan long ol famle, ol fren, mo ol narafala, long ol samting we yu stap lanem. Maet yu mekem samting ya finis, olsem we Jisas i bin tekem evri jans blong talemaot gud nyus long ol narafala. (Luk 10:38, 39; Jon 4:6-15) Maet naoia yu wantem mekem moa.” ?Samting ya i stret long samfala we yu yu stadi wetem olgeta?
12 ?Hemia we yu stadi wetem hem, hem i bilif long Baebol? ?Hem i stap folem ol rul blong Baebol long laef blong hem? ?Hem i jenisim sam samting long laef blong hem blong mekem i laenap wetem ol tingting blong God? ?Hem i stap kam long ol miting blong kongregesen? ?Hem i wantem mekem wok blong Jeova God? Ale, i gud blong pulum hem blong storian wetem ol elda, nao oli save luk sipos hem i naf blong kam wan pablisa we i no baptaes yet, mo wok wetem yumi long Eprel. (Lukluk buk ya Ol Rul pej 92 kasem 94.) Olsemia nao, hem i save luk olsem wanem ol man blong Jeova bambae oli givhan long hem taem hem i traehad long wok blong Jeova.
13 I tru, samfala oli gohed moa strong i winim ol narafala. Plante long yumi i stap stadi long namba tu buk wetem samfala we oli intres gud, be oli bin nidim moa help blong joen long wok blong Jeova. Yumi mekem samting ya folem advaes we Kingdom Wok blong Jun 2000 i givim, long pej 4, haf 5 mo 6. Yumi no slakem strong tingting blong yumi se olgeta ya we hat blong olgeta i stret, bambae oli kam ol trufala man blong Kraes, nating se i tekem ‘smoltaem nomo no longtaem.’ (Wok 26:29) Maet yu bin stadi “longtaem” wetem samfala, be nating. Maet long manis blong Memoriol long yia ya i stret taem blong oli stat soemaot bigfala tangkiu from sakrefaes blong Kraes.
14 ?Olsem Wanem Blong Halpem Olgeta?: Sipos yumi luklukgud long wanem we Jisas i mekem blong tijim ol narafala, samting ya bambae i soemaot wanem we yumi save mekem blong halpem ol niuwan blong joen long wok blong prij. Jisas i no jes faenem wan hip man nao i talem long ol aposol blong hem blong stat storian long olgeta, nogat. Fastaem, hem i makem long tingting blong ol aposol from wanem i impoten blong prij, afta, hem i pulum olgeta blong prea oltaem long saed ya. Nao hem i givim tri stamba samting long olgeta: wan fren, wan ples blong prij, mo tok we oli mas talemaot. (Mat. 9:35-38; 10:5-7; Mak 6:7; Luk 9:2, 6) Yu yu save mekem i sem mak. Nomata sipos yu stap givhan long pikinini blong yu, wan Baebol stadi, no wan we i no moa prij, be i gud blong traehad blong folem ol step we bambae yumi tokbaot naoia.
15 Makem From Wanem i Impoten: Makemgud long tingting blong hemia we yu stap givhan long hem, from wanem i impoten blong prij. Yusum ol tok we i leftemap tingting blong hem. Tokbaot sam stori long wok blong prij we oli soemaot bigfala wok we kongregesen i stap mekem. Soemaot tingting we Jisas i tokbaot long Matiu 9:36-38. Traem pulum hemia we bambae i kam pablisa no we i no moa prij, blong i prea long saed blong wok blong prij blong hem wan, mo prea se wok blong prij i karem bigfala frut long ful wol.
16 Pulum Hem Blong Tingbaot Ol Janis Blong Prij: Talem long hem se hem i save joen wetem olgeta long buk stadi blong hem, blong prij long olgeta haos wanwan. Tokbaot ol janis we hem i gat blong storian wetem ol famle mo fren, mo long wok mo skul taem hem i spel long dina. Long bas no plen, plante taem yumi save statem wan storian wetem man we i sidaon klosap long yumi, sipos yumi soem nomo se yumi intres long hem. Sipos yumi toktok fastaem, hemia i save kam wan janis blong givim wan gudfala witnes. Tru ya, i gat plante janis “evri dei,” blong serem save blong gudfala fiuja blong yumi wetem ol narafala.—Sam 96:2, 3.
17 Be ating i gud we yu no wet longtaem tumas blong prij wetem niufala pablisa ya long evri haos wanwan. Sipos yu yu gat tingting blong prij moa long manis Eprel, askem long brata we i lukaot long teritori, blong givim wan ples blong prij we i klosap nomo. Olsem nao, yu save wokemgud teritori ya. Taem yu stap gobak long haos afta long wok blong prij, no taem yu stap wokbaot i go long miting no samples, maet yu luk se i gat man long wan haos we i no gat man taem yu bin prij, no long wan haos we yu bin faenem man we i intres. Sipos yu ting se i wan stret taem, go luk olgeta blong smoltaem. Samting ya i save mekem yu yu harem se yu no stap hadwok blong nating nomo, mo i save mekem yu yu glad blong prij.
18 Mekemrere Wan Storian We i Save Pulum Tingting Blong Man: Maet i isi nomo blong wan i wantem joen long wok blong talemaot Kingdom. Be i no isi blong hem i haremgud long fasin blong hem blong talemaot mesej ya, antap moa, sipos hem i niu no i no bin prij blong longtaem. I impoten we yumi spenem taem blong givhan long ol niuwan mo olgeta we oli no prij blong longtaem, blong oli mekemrere blong go prij. Hemia i no westem taem. Ol Miting Blong Kingdom Wok mo ol miting blong prij oli save givim sam gudfala advaes, be i no gat samting i save tekem ples blong taem we yumi spenem wetem olgeta, blong mekemrere long haos.
19 ?Olsem wanem yumi save givhan long ol niuwan blong mekemrere blong prij? Fastaem, i gud we oli seremaot ol magasin nomo. Talem ol isi tok we i sot nomo. Askem olgeta blong tingbaot wan samting we i jes kamaot long nius, we maet ol man long ples blong yumi oli wari long hem. Nao faenem wan smol haf long ol niufala magasin we i joengud wetem poen ya. Nao yutufala i save lanem tok ya blong seremaot ol magasin, yutufala nomo, long haos, mo no tektaem tumas blong yusum tok ya long wok blong prij.
20 Givhan Long Olgeta We Oli Save Joen Wetem Yumi Yet: Las yia, i gat bitim 14.8 milian man long wol we oli joen long Memoriol. Long taem ya, i gat bitim sikis milian pablisa. Hemia i min se 8.8 milian man oli gat intres, nao oli kam lesin long spesel tok ya we i eksplenem wan bigfala tijing blong Baebol. Oli bin sekhan long plante blong yumi, mo ating oli glad blong storian wetem yumi. Plante long olgeta oli stap toktok gud long saed blong yumi, maet oli givim presen mane blong halpem wok blong yumi long fulwol, mo oli ansabak long man we i tok agensem yumi. Plante long ol man ya oli save joen wetem yumi yet. ?Yumi save mekem wanem blong halpem olgeta blong gohed moa?
21 Plante man oli kam long Memoriol, from we wan long yumi i bin singaot olgeta. Hemia i min se oli save wan man finis long Haos Kingdom. Be sipos wan we yumi singaot hem, i kam, naoia yumi gat wok blong mekem hem i haremgud, mo givhan long hem blong kasem plante gudfala samting long miting ya. Bambae i gat plante man long Haos Kingdom, taswe yu save givhan long hem blong faenem wan jea. Givim wan Baebol long hem, mo serem singsing buk blong yu wetem hem. Ansa long ol kwestin we hem i askem. Sipos yu lukaotgud long hem, samting ya i save givhan bigwan blong pulum hem blong intres moa. I tru, yumi evriwan i gat wok blong mekem. Sipos yu luk wan niufala man no woman, go sekhan long hem mo storian smol blong traem save hem lelebet.
22 Memoriol i save gat bigfala paoa long tingting blong wan man. Ating hem i stap long miting ya from we hem i no faenem trutok yet, mo maet hem i harem se hem i mas lukluk moa long skul blong yumi. Wan man we i no save bigfala lav blong Jeova yet, i save sapraes tumas long ol tok we i eksplenem nambawan sakrefaes blong Jisas Kraes. Maet wantaem nomo, hem i luksave se yumi defren, yumi wosip wetem fulhat, yumi frengud tugeta, yumi gat lav mo respek. Ating Haos Kingdom i defren olgeta long ol jos we hem i bin luk, we i gat ol pija long olgeta mo we oli folem ol kastom we oli no gat mining. Ol niuwan bambae oli luksave se ol man long Haos Kingdom oli kamaot long ol defdefren laen, mo se i no gat kleksin. Ol samting ya i save gat paoa blong halpem olgeta blong kambak bakegen.
23 Afta long Memoriol, yumi mas gobak long evri niuwan blong givhan moa long olgeta. Sipos yu yu bin singaot sam man oli kam, yu yu gat wan spesel wok. Bifo we oli aot long Haos Kingdom, meksua se oli save stret taem blong ol narafala miting. Talem nem blong nekiswan pablik tok long olgeta. Talem stret taem mo ples blong Buk Stadi we i klosap long haos blong olgeta. Samtaem biaen, givim buk long olgeta we yumi stap stadi long hem, mo soem nekiswan japta we bambae yumi mekem. Storian wetem olgeta from wanem ful kongregesen i stap mekemrere blong go long distrik asembli long yia ya.
24 Putum wan stret taem blong go luk olgeta. Meksua se oli gat buklet ya Wanem mo Save buk, we oli eksplenem ol stamba tijing blong Baebol. Sipos oli no stap stadi yet, talem long olgeta se yu yu glad blong mekem stadi wetem olgeta. Traem pulum olgeta blong ridim buklet ya Ol Wetnes Blong Jeova, we i soemaot klia olsem wanem yumi stap wok olsem wan grup. Askem olgeta blong kam luk sam video kaset blong yumi, olsem hemia, Our Whole Association of Brothers. Mekem plan blong oli mitim sam narafala long kongregesen. Long ol manis we bambae oli kam, yu mas go luk ol niuwan; singaot olgeta oli kam long miting taem seket elda i visit, no taem i gat seket asembli mo spesel asembli dei. Mekem evri samting blong givim janis long olgeta blong soemaot se oli “stret blong kasem laef blong olwe.”—Wok 13:48, NW.
25 ?Ol Elda Oli Save Mekem Wanem?: Gudfala frut we i kamaot long hadwok blong yumi long Eprel, bambae i dipen bigwan long ol elda. Sipos yu yu stap lidim wan buk stadi, mekem lis blong olgeta samting we yu yu save mekem blong givhan long wanwan long grup blong yu, blong oli joen long spesel wok ya. ?I gat sam yangfala long grup blong yu, sam niuwan, sam we oli no moa prij blong smoltaem no blong longtaem? Traem faenemaot fastaem sipos ol papa mama, ol paenia no sam narafala pablisa oli stap mekem wan samting blong halpem olgeta. Givhan long olgeta long wanem rod we yu wan yu naf blong mekem. Wan sista i bin prij wanwan taem nomo long tu yia, be las yia long Eprel, hem i prij blong 50 aoa. ?Wanem samting i givhan long hem? Hem i talem se ol gudfala toktok blong ol elda we oli kam storian long hem oli leftemap tingting.
26 Ol elda mo ol man blong givhan oli mas wokgud tugeta blong meksua se i gat naf teritori, magasin, mo buk blong manis Eprel. ?Maet i save gat sam moa miting blong prij? Sipos yes, talemaot ol spesel plan ya long kongregesen. Antap long ol samting ya, long ol prea blong yufala wanwan mo long kongregesen, askem long Jeova blong blesem manis ya blong spesel wok blong talemaot Kingdom.—Rom 15:30, 31; 2 Tes. 3:1.
27 Long Eprel las yia, ol elda long wan kongregesen long Not Carolina oli traehad tumas blong pulum olgeta brata mo sista blong wok moa. Long ol miting, oli talem long ol pablisa blong prea long Jeova blong tokbaot sipos olgeta wanwan oli save joen long wok blong haftaem paenia. Ol elda mo man blong givhan oli tekem evri janis blong toktok wetem glad long saed blong manis Eprel, se bambae yumi bitim ol narafala yia bifo. From samting ya, 58 pesen blong olgeta pablisa long kongregesen ya, wetem olgeta elda mo man blong givhan tu, oli joen long wok blong paenia long Eprel.
28 Joen Fulwan Mo Kasem Glad: ?Wanem ol blesing we oli kamaot taem yumi ‘stap hadwok mo traehad tumas’? (1 Tim. 4:10) Ol elda we yumi jes tokbaot, oli raetem wan leta blong tokbaot hadwok blong kongregesen blong olgeta long Eprel las yia, oli se: “Plante taem, ol brata mo sista oli tokbaot olsem wanem oli laeklaekem olgeta moa, mo olsem wanem oli harem se oli fren moa tugeta naoia we oli wok strong moa long wok blong prij.”
29 Wan yangfala brata we i no save wokbaot gud, i wantem tumas blong joen long spesel wok long Eprel las yia. Ale, hem i mekem wan gudfala plan, mo mama blong hem wetem ol Kristin brata mo sista blong hem oli givhan gud long hem. Hem i haremgud tumas long frut we hem i kasem long wok blong haftaem paenia long manis ya. ?Wanem tingting blong hem? Hem i talem se: “Hemia i fastaem long laef blong mi we mi harem se bodi blong mi i strong gud.”
30 I klia nomo se Jeova i stap givim bigfala blesing long olgeta we oli tinghae long janis blong tokbaot hem olsem King. (Sam 145:11, 12) Taem yumi tingbaot ded blong Masta blong yumi, yumi kasem save se long fiuja, olgeta we oli onagud long God bambae oli kasem blesing we i bigwan moa. Aposol Pol i wantem tumas blong kasem praes ya blong laef we i no save finis. Be, hem i save se bambae hem i no kasem praes ya sipos hem i jes sidaon, slakem hem, mo tingting nomo. Hem i raetem se: “From wok ya nao, mi mi stap hadwok tumas. Mo oltaem, mi stap yusum bigfala paoa ya we Kraes i stap givim long mi, blong mekem mi mi strong.” (Kol. 1:29) Jeova i yusum Jisas blong givim paoa long Pol, nao hem i naf blong finisim wok we bambae i sevem laef blong plante man. I sem mak long yumi tede. ?Olsem wanem? ?Bambae yu yu haremsave paoa ya long Eprel?
[Tok blong pija long pej 3]
?Yu Yu Save Givhan Long Hu Blong Oli Kam Wan Pablisa Long Eprel?
?Pikinini blong yu?
?Wan Baebol studen?
?Wan we i no moa prij longtaem?