Baebol i Talem Wanem

?I Oraet Blong Man Mo Woman i Stap Tugeta We Tufala i No Mared?

?WANEM tingting blong yu? ?Yu ting se yu save pem wan traoses no wan dres we yu no traem fastaem? Plante man bambae oli no mekem olsem. From we, sipos yu faenemaot biaen se klos ya i no naf long yu, be yu westem taem mo mane blong yu finis.

Plante man oli tingting olsem long saed blong mared. Oli ting se i moa gud we man mo woman i stap tugeta we tufala i no mekem promes blong kam hasban mo waef. Oli ting se: ‘Sipos ol samting i no rongud, tufala ya i save seraot olsem nomo, we tufala i no nidim blong mekem divos, wan samting we i sas mo i fasfas tumas.’

Samfala we oli gat tingting ya oli luk trabol we wan fren we i mared i stap gotru long hem, maet i gat raf fasin insaed long mared. Mo ating oli luk olsem wanem wan hasban mo waef tufala i no lavem tufala ale samting ya i mekem se tufala i no harem gud long mared blong tufala. From samting ya, oli luk se i moa waes mo i save blokem plante problem sipos man mo woman i stap tugeta nomo we tufala i no mared.

?Baebol i talem wanem long saed ya? Blong faenemaot ansa, i gud yumi tingbaot samting we Tok blong God i talem long saed blong mared.

“Wan Bodi”

Baebol i pulum ol man blong tinghae long mared, mo hemia i no wan samting we yumi mas sapraes long hem, from we Jeova i givim raet long man mo woman blong mared mo hem nao i stanemap fasin ya blong mared. (Jenesis 2:21-24) Fastaem olgeta, Jeova i wantem se mared i mekem man mo woman tufala i kam “wan bodi” nomo. (Jenesis 2:24) Afta we Jisas i talem bakegen tok ya we i stap long Baebol, hem i se: “From we God i joenem tufala olsem, man i no mas brekem mared blong tufala.”—Matiu 19:6.

I tru se samfala we oli mared bambae oli divos biaen.a Taem oli divos, samting ya i no kamaot from we fasin blong mared we Jeova i stanemap i nogud, nogat. Samting ya i kamaot from we wan long tufala no tufala tugeta i no holemstrong long promes we tufala i mekem long dei we tufala i mared.

Traem tingbaot: Sipos man mo woman i gat wan trak, be tufala i no lukaotgud long hem folem advaes blong kampani we i wokem trak ya. Ale, from samting ya, trak ya i kam nogud. ?Hemia i fol blong hu? ?Hem i fol blong kampani we i wokem trak no hem i fol blong tufala we i pem trak ya, from we tufala i no folem gud advaes blong lukaotgud long trak ya?

Yumi save folem semfala rul ya taem yumi tingbaot mared. Bambae i no save gat divos sipos hasban mo waef i traehad oltaem blong lukaotgud long mared blong tufala, mo tufala i folem ol rul blong Baebol blong winim problem blong tufala. Taem man mo woman i mared, tufala i mekem promes long tufala, mo promes ya i mekem tufala i trastem tufala. Long fasin ya, mared i mekem se tufala i frengud tugeta mo tufala i lavlavem tufala.

“Yufala i No Mekem Rabis Fasin Long Saed Blong Seks”

Nating se i olsem, samfala oli stap tingting yet, se: ‘?Be from wanem mitufala i no save stap tugeta fastaem? ?Sipos mitufala i stap tugeta fastaem, mitufala i save luk se i olsem wanem bifo we mitufala i mared, ale long rod ya mitufala i save respektem fasin blong mared?’

Ansa blong Baebol i klia nomo. Pol i raetem se: “Yufala i no mekem rabis fasin long saed blong seks.” (1 Tesalonaeka 4:3, NW) Tok ya “rabis fasin long saed blong seks” i minim olkaen rabis fasin long saed blong seks wetem eni man no woman we yu no mared long hem. Hemia i min se olgeta we oli stap tugeta we oli no mared, oli stap mekem rabis fasin long saed blong seks, nating se oli gat tingting blong mared. Folem tingting ya blong Baebol, i no stret blong man mo woman i stap tugeta we tufala i no mared, nating se tufala i gat tingting ya blong mared samtaem.

?Olsem wanem? ?Tingting ya blong Baebol i wokgud tede? Maet samfala oli ting se nogat. Sipos yumi lukluk gud, long plante ples ol man oli ting se, sipos man mo woman i stap tugeta we tufala i no mared, hemia i oraet nomo, nating se tufala i gat tingting ya blong mared biaen, no nogat. Be tingbaot ol samting we i kamaot from. ?Olgeta ya we oli stap tugeta be oli no mared, oli faenem rod blong mekem wan gudfala famle? ?Olgeta ya oli glad moa i bitim olgeta we oli mared? Afta we ol man mo woman ya oli mared, ?oli stap tru long hasban mo waef blong olgeta, bitim ol man mo woman we oli no bin stap tugeta fastaem? Ol stadi we oli mekem long saed ya oli soemaot se ansa blong ol kwestin ya, hemia se nogat. Ol man mo woman we oli stap tugeta fastaem, oli gat moa problem taem oli mared mo plante moa long olgeta oli divos biaen.

Sam man blong hae save oli talem se i gat mastik long ol stadi ya. Wan woman we i stadi long tingting blong ol man i raetem se: “Ol man we oli jusum blong mared be oli no stap tugeta fastaem, oli gat wan tingting we i defren long ol man mo woman we oli jusum blong [stap tugeta] be oli no mared.” Woman ya i strong blong talem se bigfala samting we i mekem tufala grup ya i defren i no fasin blong stap tugeta, be fasin “blong tinghae long mared.”

Nating sipos samting we woman ya i talem i tru no nogat, be tok blong hem i soemaot from wanem i impoten tumas blong wokem tingting blong God long saed blong mared. Baebol i talem se: “Mared i wan fasin we yufala evriwan i mas tinghae long hem.” (Hibrus 13:4) Taem man mo woman i mekem promes blong kam wan bodi mo respektem fasin ya blong mared, tufala i gat wan fasin fren we i no save brok kwik.—Prija 4:12.

Ale, yumi gobak bakegen long pija tok ya we i statem storian blong yumi. I tru se yumi mas traem traoses no dres ya fastaem bifo we yumi pem. Be hemia i no sem mak long fasin ya blong man mo woman i stap tugeta we tufala i no mared. Pijatok ya i blong soemaot se, yu mas tekem taem blong save hemia we yu stap tingbaot se bambae hem i kam hasban no waef blong yu. Hemia nao samting we i impoten sipos yu wantem mekem wan gudfala famle, be plante man oli no tingbaot samting ya.

[Futnot]

?YU YU BIN TINGBAOT?

◼ ?From wanem Baebol i letem olgeta we oli mared nomo blong oli slip tugeta?—Ol Sam 84:11; 1 Korin 6:18, NW.

◼ ?Wanem ol gudgudfala fasin we yu mas faenem long man no woman we yu wantem mared long hem?—Rut 1:16, 17; Ol Proveb 31:10-31.

[Bokis blong pija long pej 29]

“SIN AGENS LONG BODI BLONG HEM NOMO”

Baebol i talem se: “Man we i stap mekem nogud fasin long saed blong seks, hem i stap mekem sin agens long bodi blong hem nomo.” (1 Korin 6:18, NW) Long ol yia we oli pas i no longtaem, plante milian man oli ded long sik ya AIDS mo ol narafala sik we man i kasem long saed blong seks. Samting ya i soemaot se ol tok ya blong Baebol i tru nomo. Be i no hemia nomo. Ol stadi oli soem se ol yangfala we oli slip tugeta, oltaem tingting blong olgeta i foldaon mo plante oli kilim olgeta wan i ded. Olgeta we oli slip olbaot oli save gat bel we oli no mared, mo samting ya i save pulum samfala blong kilim bebi we i stap yet long bel blong olgeta. Taem yumi luk ol nogud samting we i kamaot from fasin ya, yumi save talem se ol rul blong Baebol long saed blong seks oli no blong ol man blong bifo nomo, be oli stret gud tu long taem blong yumi.