Japta Tri
Tu Impoten Fasin Blong Mekem Mared i Stap Longtaem
1, 2. (a) ?God i wokem mared blong i stap kasem wetaem? (b) ?Olsem wanem blong mekem se samting ya i kamtru?
TAEM God i joenem faswan man mo woman long mared, i no gat wan samting blong soem se fasin joen ya bambae i stap blong smoltaem nomo. Adam mo Iv i mas stap tugeta blong olwe. (Jenesis 2:24) Fasin blong mared we i stret long ae blong God, hemia se wan man mo wan woman i joen wanples. Baebol i givim wan risen nomo blong tufala i save divos mo mared bakegen wetem narafala: Hemia sipos wan long tufala no tufala tugeta i slip olbaot.—Matyu 5:32.
2 ?Wan man mo woman i save stap glad tugeta blong longtaem? Yes, Baebol i tokbaot tu impoten fasin, no rod, we oli save givhan long saed ya. Sipos hasban mo waef i folem tufala fasin ya, bambae tufala i kasem glad mo plante blesing. ?Wanem tufala impoten fasin ya?
FASWAN IMPOTEN FASIN
3. ?Wanem tri defren kaen lav we hasban mo waef i mas wokem?
3 Faswan fasin, hemia lav. Wan samting we i pulum intres blong yumi, hemia se Baebol i tokbaot ol defren kaen lav. Wan long olgeta, hemia spesel filing we yumi save gat long wan narafala. Hemia lav ya we yumi gat long ol gudfala fren blong yumi. (Jon 11:3) Narawan, hemia lav we yumi gat long ol memba blong famle blong yumi. (Rom 12:10) Namba tri, hemia lav we man i gat long woman. (Proveb 5:15-20) I tru se, hasban mo waef i mas gat olgeta lav ya evriwan. Be namba fo lav, hemia i moa impoten.
4. ?Wanem namba fo lav?
4 Long olfala lanwis blong Kristin Grik haf blong Baebol, oli yusum wod ya a·gaʹpe blong tokbaot namba fo lav ya. Tok ya i stap long 1 Jon 4:8. Long vas ya, Baebol i talem se: ‘God i stampa blong lav.’ Yes, “yumi mas laekem tumas ol man, from we God i laekem yumi tumas fastaem.” (1 Jon 4:19) Wan Kristin i mas gat lav ya long Jeova God fastaem, mo biaen long ol narafala man. (Mak 12:29-31) Tok ya a·gaʹpe i stap tu long Efesas 5:2, we i talem se: “Yufala i mas laekem ol man tumas, olsem we Kraes i laekem yumi tumas, i letem laef blong hem blong sevem yumi.” Jisas i talem se kaen lav ya bambae i makemaot ol trufala man blong hem, i se: “From we yufala i stap laeklaekem yufala [a·gaʹpe], bambae olgeta man oli luksave se yufala i man blong mi.” (Jon 13:35) Makem tu se a·gaʹpe i stap long 1 Korin 13:13 (NW), we i talem se: “I gat trifala fasin oli stap: bilif, hop mo lav. Be nambawan long trifala fasin ya, hemia lav [a·gaʹpe].”
5, 6. (a) ?From wanem lav i impoten moa long bilif mo hop? (b) ?From wanem yumi save talem se lav bambae i givhan blong mekem mared i stap longtaem?
5 ?Wanem i mekem se lav ya a·gaʹpe i impoten moa i bitim bilif mo hop? Lav ya i stanap long ol rul—ol stret rul—we yumi faenem long Baebol. (Ol Sam 119:105) Man we i gat lav ya, hem i no tingbaot hem wan nomo. Hem i mekem i stret mo i gud long narafala olsem we God i wantem, nating se narafala ya i wan gudfala man no nogat. Lav ya i givhan long hasban mo waef blong folem advaes ya blong Baebol, se: “Yufala i mas stap givgivhan long yufala, mo taem wan long yufala i gat sam poen agens long narawan long yufala, tufala ya i mas fofogivim tufala. Yufala i mas fofogivim yufala, long sem fasin ya we Masta blong yumi i fogivim yufala.” (Kolosi 3:13) Hasban mo waef we tufala i laeklaekem tufala, oli was wokem mo holem ‘strongfala lav ya [a·gaʹpe], from we lav ya i save kavremap fulap sin.’ (1 Pita 4:8) Makemgud se lav ya i save pulum yumi blong fogetem mastik blong narafala. Hem i no save blokem ol mastik ya, from we i no gat wan sinman we i neva mestem samtaem.—Ol Sam 130:3, 4; Jemes 3:2.
6 Taem hasban mo waef i gat lav ya long tufala mo long God, bambae mared blong tufala i stap longtaem mo i hapi. Hemia from we “lav i neva save lus.” (1 Korin 13:8, NW) Lav “i save joenem olgeta samting, blong oli kam wan nomo stret.” (Kolosi 3:14) Sipos yu yu mared, ?olsem wanem yu wetem hasban no waef blong yu i save wokem lav ya? Yutufala i mas ridim mo tokbaot Baebol tugeta. Stadi long eksampel we Jisas i soem long saed blong lav, mo traehad blong folem. Traem tingting olsem hem, mo mekem ol samting long sem fasin olsem hem i bin mekem. Antap long hemia, yutufala i mas go long ol Kristin miting, blong kasem tijing long Tok blong God. Mo tu, prea long God blong askem hem blong givhan long yutufala blong wokem nambawan lav ya, we i wan frut blong tabu speret blong God.—Proveb 3:5, 6; Jon 17:3; Galesia 5:22; Hibrus 10:24, 25.
NAMBA TU IMPOTEN FASIN
7. ?Wanem ya respek, mo hu i mas soem respek insaed long mared?
7 Sipos hasban mo waef tufala i rili laeklaekem tufala, bambae tufala i soem respek long tufala. Respek i namba tu impoten fasin blong mekem wan hapi mared. Mining blong respek, hemia se, “fasin blong tingbaot narafala, mo ona long hem.” Tok blong God i givim advaes long olgeta Kristin, ol hasban mo waef tu, se: “Oltaem yufala i mas rere blong ona long yufala.” (Rom 12:10) Aposol Pita i raetem se: “Yufala man we i mared, yufala i mas tingtinggud long ol woman blong yufala, long ol laef blong yutufala long mared. Yufala i mas ona long ol woman blong yufala, from we oli no strong olsem yufala.” (1 Pita 3:7) Baebol i givim advaes long waef blong “onagud long man blong hem.” (Efesas 5:33) Sipos yu ona long wan man, hemia i minim se yu yu kaengud long hem, yu respektem hem mo ol tingting blong hem, mo yu rere blong mekem eni samting we hem i askem long yu.
8-10. ?Olsem wanem respek i save givhan blong mekem mared i stanap strong mo i hapi?
8 Ol man mo woman we oli wantem gat wan hapi mared, oli soem respek long hasban no waef blong olgeta. Blong mekem olsem, ‘oli no lukaot long ol bisnes blong olgeta nomo, be oli lukaotgud long ol bisnes blong hasban no waef blong olgeta tu.’ (Filipae 2:4) Oli no tingbaot samting we i gud long olgeta nomo—hemia fasin we man i tingbaot hem wan oltaem. Be, oli tingbaot samting we i gud tu long hasban no waef blong olgeta. Yes, oli tingbaot hasban no waef blong olgeta fastaem.
9 Respek bambae i givhan long man mo woman blong lesin, taem hasban no waef blong hem i gat wan defren tingting. I no stret blong ting se tufala i save gat semfala tingting long evri samting. Samting we hasban i ting se i impoten, maet waef i no ting se i impoten. Mo samting we waef i laekem, maet hasban i no laekem. Be wanwan long tufala i mas respektem ol tingting mo disisen blong narawan, sipos oli laenap wetem ol loa mo rul blong Jeova. (1 Pita 2:16; skelem wetem Faelimon 14.) Mo tu, wanwan long tufala i mas respektem filing blong narawan. Wan i no mas talem ol strong tok no ol tok plei we i daonem narawan, nating se i long fes blong plante man no taem tufala nomo i stap.
10 Yes, hasban mo waef i mas gat lav long God mo long tufala bakegen, mo tufala i mas soem respek long tufala. Hemia nao tufala impoten fasin blong mekem wan gudfala mared. ?Olsem wanem hasban mo waef i save folem tufala fasin ya long sam haf blong mared laef we oli moa impoten?
HED LONG SEM FASIN OLSEM KRAES
11. ?Folem tok blong Baebol, hu ya i hed insaed long mared?
11 Baebol i talem se God i wokem man wetem ol fasin we oli mekem hem i naf blong kam wan gudfala hed blong famle. Olsem nao, Jeova i putum wok long hasban blong lukaotgud long waef mo ol pikinini blong hem, long saed blong speret mo long saed blong bodi. Hem i mas skelemgud ol samting mo mekem ol gudfala disisen we oli laenap wetem samting we Jeova i wantem. Mo hem i mas soem gudfala eksampel long saed blong ol fasin we God i glad long olgeta. ‘Yufala woman we i mared, yufala i mas ona long man blong yufala, olsem we yufala i stap ona long Masta blong yumi. From we man i hed blong woman blong hem, olsem we Kraes i hed blong kongregesen.’ (Efesas 5:22, 23) Be Baebol i talem se i gat Wan we i hed blong hasban tu, Wan we i gat paoa antap long hem. Aposol Pol i raetem se: “Mi wantem yufala i savegud long tok ya. Kraes i olsem hed blong olgeta man, mo man i olsem hed blong woman blong hem, mo God i olsem hed blong Kraes.” (1 Korin 11:3) Hasban we i waes, bambae i folem eksampel blong hemia we i hed blong hem, Jisas Kraes. Long rod ya, bambae hem i lanem olsem wanem blong mekemgud wok blong hem olsem hed blong famle.
12. ?Wanem nambawan eksampel we Jisas i soem long fasin blong obei long narafala mo fasin blong hed long narafala?
12 I gat wan we i hed blong Jisas tu, hemia Jeova. Mo Jisas i obeigud long Hem. Jisas i talem se: “Mi no traem mekem olsem we mi nomo mi wantem, mi stap traem mekem olsem we Papa blong mi we i sanem mi, hem i wantem.” (Jon 5:30) !Hemia i wan nambawan eksampel! Jisas i ‘faswan long olgeta samting we God i wokem.’ (Kolosi 1:15) Hem i kam Mesaea. Hem i kam Hed blong kongregesen blong ol tabu Kristin mo King we God i jusumaot blong rul long Kingdom blong hem, antap long olgeta enjel. (Filipae 2:9-11; Hibrus 1:4) Taem Jisas i stap long wol ya, hem i gat haenem, mo i gat hop blong kam hae moa. Be, hem i no mekem i strong tumas long narafala, hem i no had, mo i no askem narafala blong mekem samting we i no naf blong mekem. Hem i no mekem bigfala bos long ol disaepol blong hem, we oltaem i stap talem long olgeta blong obei long hem. Jisas i gat lav mo sore long ol man, antap moa, olgeta we ol narafala oli daonem olgeta tumas. Hem i talem se: “Yufala evriwan we yufala i stap hadwok tumas, yufala i stap karem ol hevi samting, yufala i kam long mi. Bambae mi mi givim spel long yufala. Yufala i mas putum yok blong mi long solda blong yufala, blong yufala i mekem wok blong mi. Mo yufala i mas lan long mi, from we mi mi wan kwaet man, tingting blong mi i stap daon. Nao bambae yufala i faenem we tingting blong yufala i gat spel. From we yok ya we bambae mi putum long yufala, wok blong hem i isi. Mo ol samting we mi givim long yufala blong yufala i karem, oli no hevi.” (Matyu 11:28-30) Yes, ol man oli glad tumas blong stap wanples wetem hem.
13, 14. ?Olsem wanem hasban we i gat lav i save hed long waef blong hem long fasin we Jisas i soemaot?
13 Hasban we i wantem gat wan hapi famle, i mas tingting dip long ol nambawan fasin blong Jisas. Wan gudfala hasban i no strong tumas we i mekem bigfala bos oltaem. Hem i no yusum haenem ya we hem i hed blong famle long fasin we i nogud, olsem wan stik blong kilim waef blong hem. No gat. Hem i soem lav mo ona long waef blong hem. Sipos Jisas, we i no save mekem mastik, i gat tingting we ‘i stap daon,’ hasban we i stap mekem plante mastik, i gat moa risen blong mekem tingting blong hem i stap daon. Taem hasban i mestem, bambae hem i wantem se waef blong hem i fogivim hem. Taswe, hasban we i gat tingtingdaon bambae i talemaot ol mastik blong hem, nating se maet i hadwok long hem blong talem se: “Mi mi sore, tingting blong yu i stret ya.” Bambae waef i faenem se i moa isi blong respektem hasban olsem hed blong famle, sipos hasban i gat tingting daon mo i talemaot ol mastik blong hem, i bitim we hem i flas mo i stronghed. Nao, waef ya we i gat respek, bambae hem tu i talem sore taem hem i mekem mastik.
14 God i wokem woman wetem ol nambawan fasin we hem i save yusum blong mekem wan hapi mared. Hasban we i waes bambae i luksave samting ya, mo bambae i no blokem waef blong hem tumas. Plante woman oli gat bigfala sore mo fasin blong haremsave filing blong narafala, ol fasin ya we oli nidim blong lukaotgud long famle mo blong mekem famle i joengud. Kolosap oltaem, oli gat gudhan blong flasem haos mo mekem i kam wan naesfala ples we famle i haremgud blong stap long hem. “Gudfala waef” we Proveb japta 31 i tokbaot, i gat plante nambawan fasin mo save we hem i yusum blong givhan bigwan long famle blong hem. ?From wanem i olsem? From we hat blong hasban blong hem “i trastem hem.”—Proveb 31:10, 11.
15. Folem eksampel blong Kraes, ?olsem wanem hasban i save soem lav mo respek long waef blong hem?
15 Sam hasban oli bitim mak long fasin blong olgeta blong hed long famle. Long sam kantri, sipos waef i askem kwestin long hasban blong hem, hem i no gat respek. I olsem se, hasban i mekem waef blong hem i kam wan slef. Taem hem i hed long fasin we i no stret olsemia, hem i no save frengud wetem waef blong hem. Be i no hemia nomo, hem i no save frengud wetem God tu. (Skelem wetem 1 Jon 4:20, 21.) Sam hasban oli mekem narafala fasin. Oli no wantem lidim famle blong olgeta, nao oli letem waef blong olgeta i bos long famle. Hasban we i rili obei long Kraes, i no save spolem waef blong hem, no sakemaot ona we waef i gat raet blong kasem. Hem i folem eksampel blong lav we Jisas i soem, ale, hem i rere blong lego samting we hem i wantem, blong mekem i gud long waef blong hem. Mo tu, bambae hem i mekem olsem Pol i talem, se: ‘Yufala man we i mared, yufala i mas laekem woman blong yufala tumas, olsem we Kraes i laekem kongregesen ya tumas. Taswe hem i letem laef blong hem, blong sevem kongregesen ya.’ (Efesas 5:25) Jisas Kraes i laekem tumas ol man blong hem, taswe hem i ded blong sevem olgeta. Wan gudfala hasban bambae i traem folem eksampel ya mo tingbaot waef blong hem fastaem, bitim we hem i tingbaot hem wan nomo. Bambae hem i traem mekem i gud long waef blong hem oltaem, bitim we hem i strong tumas mo i askem hem blong mekem tumas samting. Taem hasban i obei long Kraes mo i soem lav mo respek olsem Kraes i bin soem, bambae waef blong hem i glad blong obei long hem.—Efesas 5:28, 29, 33.
WAEF I MAS OBEI LONG HED BLONG FAMLE
16. ?Waef i mas mekem wanem fasin long hasban blong hem?
16 Samtaem afta we Jeova God i wokem Adam, “hem i talem se: ‘I nogud we man ya i stap hem wan nomo. Bambae mi mekem wan fren we i stret long hem, blong givhan long hem.’ ” (Jenesis 2:18, NW) Ale, God i wokem Iv olsem ‘wan fren blong givhan long Adam,’ i no blong traem winim Adam. Hem i no wantem se mared i olsem wan sip we i gat tu kapten, we tufala i stap traem blong winim tufala oltaem. No gat. Hasban i mas hed long waef blong hem wetem lav. Mo waef i mas soem lav, respek, mo i mas glad blong obei long hasban blong hem.
17, 18. ?Long wanem rod waef i save givhan bigwan long hasban blong hem?
17 Be, wan gudfala waef i no jes obei nomo long hasban blong hem. Hem i rili traehad blong givhan long hasban blong hem tu, mo sapotem hem long olgeta disisen we hem i mekem. I tru se, i moa isi long waef blong mekem samting ya taem hem i agri wetem ol disisen blong hasban blong hem. Be nating se hem i no agri, sipos hem i soem se hem i sapotem hasban blong hem, hem i save givhan blong mekem ol disisen ya oli karem gudfala frut.
18 Waef i save givhan long hasban long sam narafala rod tu, blong hem i kam wan gudfala hed blong famle. Hem i save talem tangkyu from ol traehad blong hem blong lidim famle. Be hem i no mas tok agensem hasban blong hem mo mekem hem i harem se wok blong hem i no naf blong mekem waef i glad. Long saed blong fasin blong sapotem gud hasban, waef i mas tingbaot se ‘God i tinghae tumas long fasin we i kwaet mo kaen,’ i no hasban blong hem nomo we i tinghae long fasin ya. (1 Pita 3:3, 4; Kolosi 3:12) ?Olsem wanem sipos hasban i no folem Kristin bilif? Nating se hem i wan man blong bilif no nogat, Baebol i pulum ol waef blong ‘laekem tumas man blong olgeta wetem ol pikinini blong olgeta, oli mas ol kwaet woman, we laef blong olgeta i klin gud, oli mas lukaotgud long haos blong olgeta, mekem i gud long ol narafala, mo ona long man blong olgeta. Nao bambae i no gat man i save tok nogud long tok blong God.’ (Taetas 2:4, 5) Maet hasban we i no wan Kristin, i talem long waef blong hem blong mekem wan samting we tingting blong waef bambae i jajem hem from, nao waef i no wantem mekem. Hasban ya bambae i respektem tingting blong waef blong hem moa, sipos waef i tokbaot bisnes ya long “kwaet fasin, we i gat ona long hem.” Sam hasban we fastaem oli no bilif, oli kasem bilif from ‘fasin nomo blong waef blong olgeta. Taem oli luk we fasin blong waef blong olgeta i klingud, mo i blong ona nomo, hemia i naf blong pulum olgeta.’—1 Pita 3:1, 2, 15; 1 Korin 7:13-16.
19. ?Olsem wanem sipos hasban i askem waef blong hem blong brekem loa blong God?
19 ?Olsem wanem sipos hasban i askem waef blong hem blong mekem samting we God i putum tabu long hem? Waef i mas tingbaot se God nao i faswan we i stap Rul long hem. Hem i mas mekem olsem ol aposol, taem ol haeman blong gavman oli talem long olgeta blong brekem loa blong God. Ol Wok 5:29 i talem se: “Pita i ansa long nem blong hem wetem ol narafala aposol, i se ‘Mifala i mas obei long God, mifala i no save obei long ol man nomo.’ ”
GUDFALA FASIN BLONG TOKTOK TUGETA
20. ?I impoten blong soem lav mo respek long wanem haf blong mared?
20 Lav mo respek oli impoten tumas long wan narafala haf blong mared tu—hemia fasin blong toktok tugeta. Hasban we i gat lav bambae i storeyan long ol wok mo problem blong waef blong hem, mo ol tingting we waef blong hem i gat long ol defren samting. Waef i nidim samting ya. Hasban we i tekem taem blong toktok mo lesingud long waef blong hem, i soem se hem i gat lav mo respek. (Jemes 1:19) Sam waef oli toktok smol agensem hasban blong olgeta se hem i spenem smoltaem nomo blong storeyan wetem olgeta. I nogud we hasban i mekem olsem. I tru, naoia we laef i bisi tumas, maet hasban i mas wok plante haoa afsaed long haos. Mo from we i hadwok blong winim mane, maet waef tu i mas wok. Be hasban mo waef i mas makemaot taem blong joen wanples. Sipos no, sloslou tufala i save seraot. Bigfala trabol i save kamaot sipos tufala i harem se tufala i mas go luk ol narafala fren blong tufala blong storeyan wetem olgeta.
21. ?Olsem wanem ol gudfala toktok i save givhan blong mekem wan mared i hapi oltaem?
21 Fasin we waef mo hasban i folem blong toktok tugeta i impoten tumas. “Ol gudfala toktok . . . oli swit long man mo oli mekem ol bun blong hem oli kam strong bakegen.” (Proveb 16:24) Nating se hasban no waef blong yumi i gat bilif no nogat, yumi save folem advaes blong Baebol we i talem se: “Yufala i mas tok gud wetem [narafala], olsem we yufala i ademap sol long toktok blong yufala,” hemia i min se ol tok we oli mekem narafala i haremgud. (Kolosi 4:6, NW) Long en blong wan dei we hasban no waef blong yu i bin fesem plante trabol, ol tok we yu talem wetem kaen fasin mo filing, oli save mekem hem i haremgud tumas. ‘Wan tok we man i talem long stret taem, i olsem gol apol long wan plet selva.’ (Proveb 25:11) Voes blong yumi mo ol stret toktok oli impoten tumas. Eksampel, maet yumi kros nao yumi tok strong long hasban no waef blong yumi se: “!E, yu satem doa ya!” Be i moa gud blong ‘ademap sol’ long tok blong yumi. Yumi mekem olsem taem yumi talem long wan voes we i kaengud mo i kwaet, se “?Plis, yu save satem doa?”
22. ?Wanem ol fasin we hasban mo waef i mas folem blong toktokgud tugeta?
22 Tufala i save toktokgud tugeta sipos tufala i tok long voes we i kwaet, sipos fes mo ol fasin blong tufala oli soemaot se tufala i glad long tufala, sipos tufala i kaengud, tufala i traem kasem save long tufala, mo sipos tufala i soem filing. Taem tufala i wok strong blong holem gudfala fasin blong toktok tugeta, i isi long tufala evriwan blong talemaot nid blong tufala. Mo tufala i save leftemap tingting mo givgivhan long tufala taem tingting i foldaon mo taem tufala i gat wari. Tok blong God i talem se: “Yufala i mas toktok gud blong leftemap tingting blong olgeta we oli harem nogud.” (1 Tesalonaeka 5:14, NW) Bambae i gat sam taem we tingting blong hasban i foldaon, mo sam taem we tingting blong waef i foldaon. Tufala wanwan i save “toktok gud” blong leftemap tingting blong narawan.—Rom 15:2.
23, 24. ?Olsem wanem lav mo respek i save givhan taem hasban mo waef i no agri? Talem wan eksampel.
23 I save gat sam taem we hasban mo waef i no agri. Be sipos tufala i gat lav mo respek, bambae tufala i no luk samting ya olsem wan bigfala problem. Bambae wanwan long tufala i traehad blong no kam “kros” long narawan. (Kolosi 3:19, NW) Tufala i mas tingbaot se ‘wan ansa we i kwaet, i save mekem kros i godaon.’ (Proveb 15:1) Yu mas lukaotgud blong no daonem mo jajem waef no hasban blong yu, taem hem i talemaot ol filing we oli stap long hat blong hem. Traem tingbaot ol tok ya olsem rod blong kasem save long tingting blong hem. Tugeta, hasban mo waef i mas traem faenem wan rod blong stretem tingting we tufala i no agri long hem, blong mekem se tufala i save joengud.
24 Tingbaot taem ya we Sera i talemaot tingting blong hem long hasban blong hem, Ebraham. Hem i talem rod blong stretem wan problem, mo Ebraham i no agri. Be God i talem long Ebraham se: “Yu lesin long toktok blong hem.” (Jenesis 21:9-12) Ebraham i lesin, nao hem i kasem blesing from. I sem mak, sipos waef i talem wan samting we i defren long tingting blong hasban, hasban i mas lesin. Long sem taem, waef i no mas toktok tumas, be hem i mas lesin tu long samting we hasban i talem. (Proveb 25:24) Sipos wan long tufala i traem fosem narawan blong folem prapa tingting blong hem oltaem, hem i no gat lav mo respek.
25. ?Olsem wanem gudfala fasin blong toktok tugeta long saed blong seks i save karem glad long mared?
25 I impoten tu we hasban mo waef i toktokgud tugeta long saed blong seks. Sipos wanwan long tufala i tingbaot hem wan nomo mo i no bos long ol filing blong hem, samting ya i save spolem haf ya blong mared we i blong tufala nomo. Tufala i mas no fraet blong toktok tru, mo tufala i mas gat longfala tingting. Taem wanwan long tufala i tingbaot narawan fastaem, mo i wantem mekem i gud long narawan, seks i no wan bigfala problem. Olsem long ol narafala samting, long saed blong seks tu, ‘i nogud yumi stap lukaot rod we i save givhan long yumi nomo. Yumi mas lukaot rod blong givhan long narafala.’—1 Korin 7:3-5; 10:24.
26. Nating se evri mared i gat taem blong glad mo taem blong trabol, ?olsem wanem fasin blong lesin long Tok blong God i save givhan long ol hasban mo waef blong faenem glad?
26 !Tok blong God i givim nambawan advaes! I tru, evri mared i gat ol taem blong glad mo ol taem blong trabol. Be sipos hasban mo waef i folem tingting blong God we i stap long Baebol, mo tufala i mekem mared blong tufala i stanap long trufala lav mo respek, tufala i save sua se mared blong tufala bambae i stap longtaem mo i hapi. Olsem nao, bambae tufala i soem ona long tufala, be i no long tufala nomo. Bambae tufala i soem ona long Hemia we i Stampa blong mared tu, Jeova God.
?OLSEM WANEM OL RUL YA BLONG BAEBOL OLI SAVE GIVHAN . . . LONG HASBAN MO WAEF BLONG MEKEM MARED I STAP LONGTAEM MO I HAPI?
Ol trufala Kristin oli laeklaekem olgeta.—Jon 13:35.
Ol Kristin oli rere blong fofogivim olgeta.—Kolosi 3:13.
I gat wan stret plan long saed blong hu nao i hed.—1 Korin 11:3.
I impoten blong talem ol stret tok, mo blong tok long gudfala fasin.—Proveb 25:11.
[Tok Blong Pija Long Pej 28]
Taem hasban mo waef tugeta i gat lav mo respek, tufala i save mekem wan gudfala mared