Lanem Blong Ridgud

OL ANAMOL oli no save rid olsem yu yu stap mekem naoia. Wan long evri sikis man long wol oli no save rid, from we oli no skul. Mo sam man we oli save rid, oli no stap rid plante. Be fasin blong rid i impoten tumas. Taem yu ridim ol stori blong ol narafala ples, i olsem we yu yu wokbaot i go long ol ples ya, yu mitim ol man we oli save mekem yu yu harem gud moa long laef, mo yu kasem ol gudfala save we bambae i givhan long yu blong winim ol wari long laef.

Taem wan pikinini i save ridgud, samting ya i givhan bigwan long hem blong i kasem gud ol samting we hem i lanem long skul. Taem hem i kam bigwan mo i lukaot wok, maet bambae hem i kasem wan wok we i moa gud from we hem i save ridgud. Nao maet hem i no nid blong wok bitim mak blong winim naf mane blong pem ol samting we hem i nidim. Ol woman we oli ridgud, oli save lukaot gud long famle blong olgeta, from we oli save faenemaot wanem kakae i beswan, wanem we famle i mas mekem blong stap klin, mo ol rod blong blokem sik. Ol mama we oli ridgud, oli save givhan bigwan long ol pikinini blong olgeta, blong oli lanem plante samting.

Mo tu, fasin blong rid i save givhan long yu blong “faenem save blong God.” Hemia nambawan blesing we yu save kasem from fasin blong rid. (Prov. 2:5, NW) Long wosip we yumi mekem i go long God, yumi rid plante. Long ol miting blong kongregesen, yumi ridim Baebol mo ol buk we oli tokbaot Baebol. Sipos yu ridgud, yu save karem moa frut long wok blong prij. Mo tu, yu save ridim ol buk blong rere from ol wok ya. Yes, blong fren moa wetem Jehova, yu mas rid plante.

Yu Mas Tekem Janis Blong Lanem Blong Rid

Samfala we oli stap kasem save long ol rod blong God, oli no skul gud. Maet narafala i mas tijim olgeta blong rid, nao oli save stadi gud long Tok blong God. Maet oli save rid smol, be narafala i mas givhan long olgeta blong oli kam gud moa long fasin blong rid. Long sam kongregesen we plante man oli no save rid, oli stanemap wan skul blong tijim olgeta. Skul ya i givhan finis long plante taosen man. Yes, i impoten tumas blong ridgud. Long sam kongregesen, oli joenem skul ya wetem Tiokratik Skul. Long ol ples we i no gat wan skul olsem, man we i wantem kam gud moa long fasin blong rid, hem i mas makemaot taem evri dei blong rid long bigfala voes. Mo tu, hem i mas kam mo joen oltaem long Tiokratik Skul.

Sore tumas, plante man oli spenem tumas taem blong wajem televisin mo blong lukluk ol buk we oli gat pija nomo long olgeta. Olgeta ya oli no stap rid. Man we i wajem televisin tumas mo i no rid plante, hem i no save lanem blong ridgud, i no save tingting klia mo tingting dip, mo i no save eksplenem gud ol tingting blong hem.

‘Slef we i stret mo waes’ i wokem plante buk we oli givhan long yumi blong kasem save long Baebol. Ol buk ya oli givim plante impoten save blong God long yumi. (Mat. 24:45, NW; 1 Kor. 2:12, 13) Oli givhan long yumi tu blong save gud ol samting we oli stap hapen long wol, mo blong save mining blong ol samting ya. Ol buk ya oli givhan long yumi blong kasem plante save long saed blong ol samting we God i mekem long wol ya, mo oli tijim yumi se yumi mas mekem wanem blong winim ol wari blong laef. Antap long hemia, oli givhan long yumi blong wosipim God long fasin we hem i wantem mo i glad long hem. Taem yumi ridim ol gudfala buk olsem, yumi kasem ol tingting blong God.

Be fasin ya blong ridgud nomo i no naf blong givhan long yumi. Yumi mas yusum fasin ya long rod we i stret. Yumi mas jusum gud ol samting we yumi ridim, olsem we yumi jusum gud kakae blong yumi. ?Yu yu wantem kakae ol samting we oli no givhan long bodi blong yu, no we oli mekem yu yu sik? Hemia i sem mak long wanem we yu ridim. ?Yu yu wantem ridim ol buk we oli save spolem tingting mo hat blong yu? Ol rul blong Baebol oli mas lidim yu taem yu jusum ol buk we yu wantem ridim. I gud yu tingbaot ol vas olsem Prija 12:12, 13; Efesas 4:22-24; 5:3, 4; Filipae 4:8; Kolosi 2:8; 1 Jon 2:15-17; mo 2 Jon 10.

Taem Yu Rid, Yu Mas Gat Stret Tingting

Ol Gospel oli soemaot klia se, taem yumi rid, i impoten tumas we yumi gat stret tingting. Gospel blong Matiu i talem sam kwestin we Jisas i askem long ol lida blong skul we oli gat plante save. Hem i askem se: “?Yufala i no ridim long Baebol?” mo “?Yufala i no ridim wan tok long Baebol?” Afta, Jisas i yusum Baebol blong ansarem ol kwestin we oli askem blong traem trikim hem. (Mat. 12:3, 5; 19:4; 21:16, 42; 22:31) Samting ya i soemaot se sipos yumi no gat stret tingting taem yumi rid, bambae yumi no kasem ol poen we yumi ridim, mo maet yumi kasem rong mining blong ol save ya tu. Ol Farisi oli ridim Baebol from we oli ting se sipos oli mekem olsem, bambae oli kasem laef we i no save finis. Be Jisas i soemaot se sipos man i wantem kasem laef we i no save finis, hem i mas lavem God mo i mas bilif long rod ya we God i yusum blong sevem man. (Jon 5:39-43) Ol Farisi oli wantem nomo blong kasem samting blong olgeta, taswe plante taem, oli no kasem stret mining blong ol tok we oli ridim.

Taem yumi lavem Jehova, yumi harem se yumi wantem ridim Tok blong hem. Yumi glad blong lanem wanem we hem i wantem. Man we i lavem God, “hem i save glad long ol trutok nomo.” (1 Kor. 13:6) Maet bifo, yumi no laekem blong rid. Be sipos yumi lavem Jehova long “olgeta tingting” blong yumi, bambae yumi traehad bigwan blong yusum tingting blong yumi blong kasem ol save blong God. (Mat. 22:37) Yumi wantem save hem moa. Mo fasin ya blong wantem save moa i givhan long yumi blong lanem plante samting long saed blong hem.

Yu Mas Skelem Spid Blong Riding

Fasin blong rid i joen wetem fasin blong luksave samting. Taem yu stap ridim japta ya, yu stap luksave ol tok mo yu stap tingbaot mining blong olgeta. Yu save rid moa kwik sipos yu traem luksave ol wod long grup. I moa gud yu lukluk plante wod wantaem, i bitim we yu stop blong lukluk ol wod wanwan. Sipos yu lanem blong ridim ol wod long grup, bambae yu kasem save moa long wanem we yu stap ridim.

Be taem yu ridim ol buk we i had blong kasem save long olgeta, maet yu mas folem wan narafala rod. Jehova i givim advaes long Josua long saed blong fasin blong ridim Baebol, i se: “Oltaem yu mas talemaot ol tok blong buk ya blong loa, mo yu mas ridim long smol voes.” (Jos. 1:8, NW) Plante taem, man i toktok long smol voes taem hem i stap tingting. Taswe, Hibru tok we oli tanem i kam “ridim long smol voes,” samtaem oli tanem i kam “tingting dip.” (Sam 63:6; 77:12; 143:5, NW) Taem man i tingting dip, hem i tektaem, hem i no hareap. Tok blong God bambae i gat moa paoa long tingting mo hat blong man, sipos hem i tingting long samting we hem i stap ridim. Long Baebol, i gat ol profet tok, ol advaes, ol waestok, ol naesfala vas, ol tok panis blong God, ol stamba tingting blong Jehova, mo stori blong laef blong plante man. Olgeta samting ya oli impoten tumas long man we i wantem wokbaot long ol rod blong Jehova. Taem yu ridim Baebol, yu mas putum ol save ya i stap gud long tingting mo hat blong yu. !Sipos yu mekem olsem, bambae save ya i givhan bigwan long yu!

Yu No Mas Letem Tingting i Flae Olbaot

Taem yu rid, i gud yu traem mekem olsem we yu yu stap wetem ol man long stori we yu ridim. Yu traem mekem wan pija blong ol man ya long tingting blong yu, mo yu traem kasem save long tingting blong olgeta. I isi lelebet blong mekem olsem taem yu stap ridim ol stori olsem hemia long 1 Samuel japta 17, long saed blong Deved mo Golaeat. Be yu save mekem sem mak taem yu ridim ol save we i had moa, olsem hemia long Eksodas mo Levitikas, long saed blong wok blong bildim haos prea mo putumap ol pris. Stori ya i laef taem yu traem mekem wan pija long tingting blong yu blong bigfala haos prea ya mo ol defren samting we oli yusum blong wokem haos ya. Mo yu traem harem smel blong insens, ol sid we oli rusum, mo ol anamol we oli bonem blong mekem sakrefaes. Yu save tingbaot ol pris, mo yu tingbaot wok we oli mekem wetem bigfala respek. (Luk 1:8-10) Taem yu putum yu wan insaed long ol stori olsem, bambae yu kasem save long bigfala tingting we i stap long ol tok we yu ridim, mo bambae yu rimemba ol samting we yu ridim.

Be yu mas lukaot gud. Taem yu stap rid, tingting blong yu i save flae olbaot. Maet ae blong yu i stap lukluk buk, be tingting blong yu i stap long narafala samting. Maet miusik no televisin i stap plei, no maet ol famle raonabaot long yu oli stap toktok. I gud yu rid long wan ples we i no gat noes. Be samtaem, tingting blong yu nomo i mekem se yu no stap tingbaot samting we yu ridim. Maet yu bin mekem plante wok long dei. !I isi nomo blong tingtingbak long ol wok ya! I gud yu tingtingbak long ol samting we oli hapen long dei, be yu no mas tingbaot ol samting ya taem yu stap rid. Taem yu stat blong rid, maet tingting blong yu i stap long riding blong yu, mo maet yu prea tu bifo we yu stat blong rid. Be taem yu gohed, maet tingting blong yu i go long ol narafala samting. Sipos i olsem, i gud yu traem bakegen. Yu mas bos long tingting blong yu, mo yu mas putum tingting blong yu i stap strong long wanem we yu ridim. Sloslo bambae yu luk se tingting blong yu i no moa flae olbaot.

?Yu yu mekem wanem taem yu ridim wan wod we yu no save mining blong hem? Maet buk we yu ridim i eksplenem mining blong sam wod olsem. Samtaem yu kasem mining blong wan wod from ol tok raonabaot long hem. Sipos i gat wan wod we mining blong hem i no klia, yu save jekemap wod ya long diksonari. Sipos no, yu save makem wod ya, mo biaen yu askem long narafala blong i talem mining blong wod ya. Samting ya bambae i mekem se yu lanem plante moa wod, mo yu kasem save long samting we yu stap ridim.

Taem Yu Rid Long Fored Blong Ol Man

Aposol Pol i talem long Timoti se hem i mas mekem fasin blong ridim Baebol i kam nambawan fasin blong hem. Long ples ya, Pol i stap tokbaot fasin blong ridim Baebol long ol man. (1 Tim. 4:13) Blong ridgud long fored blong ol man, i no naf blong ridim ol tok long bigfala voes nomo. Yu mas kasem mining blong ol wod we yu ridim, mo yu mas kasem ol tingting we oli stap long riding ya. Long rod ya nomo, yu save soemaot gud long riding blong yu, ol tingting we oli stap mo ol fasin blong ol man long stori ya. Taswe, yu mas ridim bakegen mo bakegen. Pol i talem se: “Yu mas mekem we wok ya blong ridim Baebol long ol man . . . i kam nambawan wok blong yu.” Tiokratik Skul bambae i givhan bigwan long yu long saed ya.

Yu Mas Makemaot Taem Blong Rid

“Man we i mekem gudfala plan mo i stap wok strong long hem, hem i save kasem plante samting, be man we i stap wok hareap, neva hem i save kasem i naf.” (Prov. 21:5) !Samting ya i tru tumas taem yumi wantem rid! Sipos yumi wantem “kasem plante samting” long riding blong yumi, yumi mas mekem wan gudfala plan. Sipos yumi folem gud plan ya, ol narafala samting oli no save spolem taem ya we yumi makemaot blong rid.

?Yu yu stap rid long wanem taem? ?Yu yu harem gud blong rid long eli moning? ?No yu faenem se tingting blong yu i wekap moa long dei? Sipos yu makemaot 15 no 20 minit evri dei blong rid, bambae yu sapraes blong luk we yu save ridim plante samting. Be i impoten blong mekem samting ya evri dei.

?From wanem Jehova i mekem se oli raetemdaon ol stamba tingting blong hem long wan buk? Hemia blong mekem se ol man oli save ridim Tok blong hem. Long rod ya, oli save faenemaot ol nambawan wok blong Hem, nao oli save talemaot long ol pikinini blong olgeta, mo tu, oli save rimemba ol samting we God i mekem. (Sam 78:5-7) Taem yumi mekem we fasin blong ridim Baebol i kam nambawan fasin blong yumi, yumi soemaot se yumi tinghae long gudfala fasin blong Jehova, we hem i givim Baebol long yumi.