Japta Faef

Stat Trenem Pikinini Blong Yu Taem Hem i Bebi Nomo

1, 2. ?Papa mama i mas lukluk i go long hu blong givhan long tufala blong trenem ol pikinini?

TRI taosen yia bifo, wan papa we i laekem tumas ol pikinini blong hem, i talem se: “Ol pikinini ya blong yumi, hemia wan presen we Hae God i givim long yumi.” (Ol Sam 127:3) Yes, pikinini i wan nambawan presen we God i givim, mo i save karem bigfala glad. Bighaf blong ol man mo woman we oli mared, oli save kasem presen ya. Be, taem oli gat pikinini, oli luksave kwiktaem nomo se, pikinini i no givim glad nomo, be i givim wok tu.

² Tede, i no isi nating blong tijim mo trenem ol pikinini. Nating se i olsem, plante papa mama oli luk gudfala frut from ol wok blong olgeta. Man blong raetem Sam ya we i kamaot long God, i soem rod blong mekemgud wok ya, i se: ‘Sipos Jeova i no bildim haos, wok blong ol man blong bildim haos i blong nating nomo.’ (Ol Sam 127:1) Moa yu traehad blong folem ol tijing blong Jeova, moa bambae yu kamgud long wok blong yu olsem papa no mama. Baebol i talem se: “Trastem Jeova long ful hat blong yu. Yu no mas stanap long prapa waes blong yu nomo.” (Proveb 3:5) ?Yu yu rere blong lesin long advaes blong Jeova taem yu mekem wok ya we i gohed blong 20 yia, hemia blong tijim mo trenem pikinini blong yu?

AGRI LONG TINGTING BLONG BAEBOL

3. ?Papa i gat wanem wok long saed blong ol pikinini?

³ Long plante famle raon long wol, ol man oli gat tingting se wok blong trenem pikinini, hemia wok blong woman. I tru, Tok blong God i talem se papa i mas wok blong kasem ol samting we famle i nidim. Be, hem i tokbaot wok we papa i gat insaed long famle tu, i se: “Mekemrere wok blong yu afsaed long haos, mo mekem i rere long yu wan long ples blong wokem garen. Biaen, yu mas bildimap famle blong yu tu.” (Proveb 24:27) God i wantem se papa mama i mas wok tugeta blong trenem pikinini.—Proveb 1:8, 9.

4. ?From wanem yumi no mas ting se ol pikinini boe oli moa gud long ol pikinini gel?

⁴ ?Wanem tingting blong yu long saed blong ol pikinini blong yu? Sam ripot oli talem se, long Esia “ol papa mama oli no glad taem oli gat wan bebi gel.” Tingting ya i stap yet long Latin Amerika tu, nating se “plante famle long ples ya oli skulgud.” Be i no tru se ol pikinini gel oli nogud. Jekob, wan papa blong bifo, i tokbaot olgeta pikinini blong hem, ol gel tu, i se: “God i mekem i gud tumas long mi. Hemia ol pikinini blong mi ya, we hem i givim long mi.” (Jenesis 33:1-5; 37:35) Long sem fasin, Jisas i blesem evri “pikinini” (ol boe mo ol gel tu) we ol man oli tekem olgeta oli kam long hem. (Matyu 19:13-15) Yumi save se Jisas i soemaot tingting blong Jeova long bisnes ya.—Dutronome 16:14.

5. ?Wanem ol samting we hasban mo waef i mas tingbaot, taem tufala i stap mekem disisen long hamas pikinini bambae tufala i gat?

⁵ ?Olsem wanem long ples blong yu? ?Ol man oli gat tingting se woman i mas karem plante pikinini? Hasban mo waef nao i mas jusum hamas pikinini tufala i wantem. ?Olsem wanem sipos tufala i no save pem kakae, klos, mo skul fi blong plante pikinini? Yes, tufala i mas tingbaot kwestin ya taem tufala i stap mekem disisen long hamas pikinini tufala i wantem. Sam hasban mo waef, oli no save lukaot long ol pikinini blong olgeta, ale, oli givim sam pikinini oli go long famle blong olgeta. ?Fasin ya i stret? No gat. Papa mama nao i gat wok blong lukaot long ol pikinini blong tufala. Baebol i talem se: “Man we i no wantem lukaot long olgeta famle blong hem, mo antap long hem, we i no save lukaot long olgeta we oli stap long haos blong hem, hem i soemaot we hem i no moa holem fasin blong bilif. Hem i stap longwe moa long God, i winim man we i no bilif nating.” (1 Timote 5:8) Hasban mo waef we i waes, tufala i mekem plan blong hamas pikinini tufala i wantem ‘long haos blong tufala.’ Olsem nao, bambae tufala i naf blong ‘lukaot long famle blong tufala.’ ?I stret we tufala i yusum sam rod blong blokem woman i no moa karem pikinini? Hemia tu i prapa disisen blong tufala. Sipos tufala i wantem mekem olsem, rod we tufala i yusum hem i bisnes blong tufala bakegen. “Evri man i gat basket blong hem blong karem.” (Galesia 6:5) Be, ol rul blong Baebol oli agensem enikaen rod we i kilim pikinini long bel blong mama. Jeova God i “stampa blong laef.” (Ol Sam 36:9) From samting ya, hemia we i kilim pikinini long bel i no soem respek nating long Jeova, mo i olsem se hem i kilim wan man i ded.—Eksodas 21:22, 23; Ol Sam 139:16; Jeremaea 1:5.

GIVIM OL SAMTING WE PIKININI I NIDIM

6. ?Wok blong trenem pikinini i mas stat wetaem?

⁶ Proveb 22:6 i talem se: “Tijim pikinini boe blong yu long rod we i stret blong hem.” Fasin blong trenem pikinini i wan long ol bigfala wok blong papa mama. ?Wetaem tufala i mas stat blong trenem pikinini? Taem pikinini i smol we i smol. Aposol Pol i talem se Timote i bin kasem trening ‘taem hem i bebi nomo.’ (2 Timote 3:15) Grik tok we hem i yusum long vas ya i minim wan smol bebi, no wan pikinini we i stap yet long bel blong mama blong hem. (Luk 1:41, 44; Ol Wok 7:18-20) Taswe, Timote i kasem trening stat long taem we hem i smol nomo—mo i stret olsem. Taem pikinini i bebi nomo, hemia nao stret taem blong stat trenem hem. Nating se wan bebi i smol nomo, hem i wantem save plante samting.

7. (a) ?From wanem i impoten we papa mama tugeta i frengud wetem bebi? (b) ?Bifo olgeta, olsem wanem Jeova i frengud wetem stret Pikinini blong hem?

⁷ Wan mama i talem se: “Faswan taem we mi luk bebi blong mi, wantaem nomo mi laekem hem tumas.” Bighaf blong ol mama oli gat filing ya. Nambawan fasin joen ya blong mama wetem bebi blong hem, i kam strong moa taem tufala i gohed blong spenem plante taem tugeta. Taem mama i givim titi long bebi, samting ya i mekem se tufala i laekem tufala moa. (Skelem wetem 1 Tesalonaeka 2:7.) I impoten tumas we mama i holem, kisim, mo toktok long bebi blong hem, blong mekem bebi i haremgud long filing blong hem. (Skelem wetem Aesea 66:12.) ?Olsem wanem long papa? Hem tu i mas traehad blong joengud wetem pikinini blong hem we i jes bon. Jeova hem wan i soem eksampel long saed ya. Long buk blong Proveb, yumi save luk olsem wanem Jeova i frengud wetem stret Pikinini blong hem. Vas ya i talemaot tok blong Pikinini ya, i se: “Bifo olgeta, taem Jeova i no wokem ol narafala samting yet, hem i wokem mi. . . . Mi nao we hem i laekem mi tumas evri dei.” (Proveb 8:22, 30; Jon 1:14) Long sem fasin, wan gudfala papa i laekem tumas mo i frengud wetem pikinini blong hem, stat taem pikinini i jes bon nomo. Wan papa i talem se: “Soem plante lav long pikinini blong yu. I no gat wan pikinini we i ded samtaem from we papa i holem hem mo kisim hem tumas.”

8. ?Papa mama i mas mekem wanem kwiktaem blong pulum bebi blong tufala blong yusum tingting blong hem?

⁸ Be ol bebi oli nidim sam samting moa. Stat long taem we oli bon nomo, bren blong olgeta i rere blong kasem mo holem ol save, mo papa mama nao oli mas givim ol save ya long olgeta. Wan eksampel, hemia fasin blong toktok. Ol man blong stadi, oli bilif se fasin blong pikinini blong toktokgud mo ridgud, “i dipen bigwan long fasin blong papa mama blong joengud wetem hem taem hem i smol nomo.” Toktok mo ridim buk long pikinini blong yu taem hem i bebi nomo. I no longtaem, bambae hem i traem folem fasin blong yu, mo smoltaem biaen, bambae yu save tijim hem blong rid. Maet hem i save rid bifo we hem i go long skul. Samting ya i gud tumas, antap moa, sipos yu stap long wan kantri we i no gat plante tija, mo i gat plante tumas pikinini long wan klas.

9. ?Wanem faswan samting we ol papa mama oli mas wantem tijim long pikinini blong olgeta?

⁹ Faswan samting we ol Kristin papa mama oli mas tingbaot, hemia blong givim ol samting we pikinini i nidim long saed blong speret. (Lukluk Dutronome 8:3.) ?From wanem oli mas wantem givim samting ya long pikinini? Hemia blong givhan long pikinini blong folem fasin blong Kraes, yes, blong karem “nyufala fasin blong laef.” (Efesas 4:24, NW) Blong mekem samting ya, tufala i mas tingbaot ol samting we oli stret blong yusum, mo fasin we i stret blong folem, blong tijim hem.

TIJIM TRUTOK LONG PIKININI BLONG YU

10. ?Wanem ol fasin we ol pikinini oli mas wokem?

¹⁰ Man i save wokem wan strongfala haos sipos hem i yusum ol gudfala samting blong wokem haos ya. Aposol Pol i talem se ol beswan samting blong wokem gudfala Kristin fasin, hemia “gol mo selva mo ol gudfala ston.” (1 Korin 3:10-12) Hemia i minim ol fasin olsem bilif, waes, fasin luksave, fasin blong holemstrong long God, respek, mo fasin tangkyu wetem lav long Jeova mo ol loa blong hem. (Ol Sam 19:7-11; Proveb 2:1-6; 3:13, 14) ?Olsem wanem papa mama i save givhan long ol pikinini blong tufala, stat taem oli smol nomo, blong gat ol fasin ya? Tufala i mas folem advaes we ol man oli bin raetemdaon longtaem bifo.

11. ?Olsem wanem ol papa mama long Isrel oli bin givhan long ol pikinini blong olgeta blong gat ol gudfala fasin we God i glad long olgeta?

¹¹ Smoltaem bifo we nesen blong Isrel i go insaed long Promes Lan, Jeova i talem long ol papa mama se: “Ol tok ya we mi mi stap talem long yu tede, yu mas fasem olgeta long hat blong yu. Mo yu mas tijim pikinini blong yu long hem, mo yu mas tokbaot ol samting ya taem yu stap sidaon long haos blong yu, taem yu wokbaot long rod, taem yu go slip, mo taem yu girap.” (Dutronome 6:6, 7) Yes, ol papa mama, oli mas soem eksampel long ol pikinini blong olgeta, frengud mo storeyan wetem olgeta, mo tijim olgeta.

12. ?From wanem i impoten we papa mama i soem gudfala eksampel?

¹² Soem eksampel long pikinini. Faswan samting we Jeova i talem, hemia se: “Ol tok ya . . . yu mas fasem olgeta long hat blong yu.” Biaen, hem i gohed se: “Yu mas tijim pikinini blong yu long hem.” Ale, ol gudfala fasin oli mas stap long hat blong papa mama fastaem. Tufala i mas laekem mo folem trutok. Long rod ya nomo, tufala i save kasem hat blong pikinini. (Proveb 20:7) ?From wanem i olsem? From we ol pikinini oli folem moa ol samting we oli luk i bitim samting we oli harem.—Luk 6:40; 1 Korin 11:1.

13. ?Olsem wanem ol papa mama oli save folem eksampel blong Jisas blong soem lav long ol pikinini?

¹³ Frengud wetem pikinini. Jeova i talem long ol papa mama long Isrel se: ‘Toktok long pikinini blong yu taem yu stap sidaon long haos blong yu, mo taem yu wokbaot long rod.’ Samting ya i minim se ol papa mama oli mas spenem taem wetem ol pikinini blong olgeta, nating se oli bisi tumas. I klia we Jisas i ting se i impoten blong spenem taem wetem ol pikinini. Long ol laswan dei we hem i mekem wok blong hem long wol ya, ‘sam man oli tekem ol pikinini blong olgeta oli kam long hem.’ ?Jisas i mekem wanem? “Hem i putum han blong hem i goraon long ol pikinini ya, nao i putum han blong hem long olgeta, i blesem olgeta.” (Mak 10:13, 16) Traem tingbaot, hemia sam haoa nomo bifo we Jisas i ded. Nating se i olsem, hem i spenem taem wetem ol pikinini ya mo i soem lav long olgeta. !Hemia i rili wan nambawan eksampel!

14. ?From wanem i gud we papa mama i spenem taem wetem pikinini blong tufala?

¹⁴ Storeyan wetem pikinini. Sipos yu spenem taem wetem pikinini blong yu, bambae yu faenem se i isi moa blong storeyan wetem hem. Taem yu storeyan plante wetem hem, bambae yu luksave moa wanem kaen fasin hem i stap wokem. Be tingbaot se, storeyan i no minim fasin blong toktok nomo. Wan mama long Brasil i talem se: “Mi bin traehad blong wokem fasin blong lesingud, hemia blong lesin wetem hat blong mi.” Longfala tingting blong hem i karem frut taem boe blong hem i stat blong talemaot ol filing blong hem.

15. ?Papa mama i mas tingbaot wanem long saed blong ol pleplei?

¹⁵ Ol pikinini oli nidim “wan taem blong laf . . . mo wan taem blong resis olbaot,” yes, wan taem blong pleplei. (Eklesiastis 3:1, 4; Sekaraea 8:5) Sipos papa mama mo ol pikinini oli pleplei tugeta, samting ya i save givhan bigwan long famle. Sore tumas, plante famle oli yusum taem ya blong lukluk televisin. Maet sam store long televisin oli gud, be i gat plante we oli daonem ol gudfala fasin. Mo taem famle i lukluk tumas televisin, oli no moa gat taem blong storeyan. Taswe, i moa gud blong joen wetem ol pikinini, blong mekem wan samting we oli mas yusum tingting blong olgeta blong mekem. Singsing, pleplei, joen wetem sam gudfala fren, visitim ol ples we oli mekem famle i haremgud. Ol samting ya oli givhan blong mekem fasin blong storeyangud tugeta i kam antap moa.

16. ?Wanem samting long saed blong Jeova we papa mama i mas tijim long ol pikinini blong tufala, mo tufala i mas yusum wanem rod blong mekem samting ya?

¹⁶ Tijim pikinini. Jeova i talem se: ‘Yu mas tijim ol tok ya long pikinini blong yu.’ Ol tok raonabaot long vas ya oli soem wanem we yu mas tijim, mo olsem wanem blong tijim pikinini. Fastaem, “yu mas laekem Jeova we i God blong yu long olgeta hat blong yu, mo long olgeta laef blong yu, mo long olgeta paoa blong yu.” (Dutronome 6:5) Biaen, “yu mas tijim . . . ol tok ya.” Tijim pikinini blong yu blong laekem Jeova mo ol loa blong Hem wetem ful laef blong hem. (Skelem wetem Hibrus 8:10.) Tok ya “tijim” i minim, talem bakegen mo bakegen. Taswe, i olsem we Jeova i talem long yu se faswan rod blong halpem ol pikinini blong yu blong gat gudfala fasin, i blong tokbaot Hem oltaem. Samting ya i minim se yu mas stadi Baebol wetem olgeta oltaem.

17. ?Ol papa mama oli mas givhan long pikinini blong olgeta blong gat wanem fasin? ?From wanem?

¹⁷ Bighaf blong ol papa mama, oli save se i no isi nating blong mekem ol save oli kasem hat blong pikinini. Aposol Pita i talem long ol Kristin, se: ‘Yufala i mas wokem fasin olsem smol pikinini we i jes bon we i wantem titi tumas. Yufala i mas wantem melek ya we i klin gud, we i blong tingting blong yufala.’ (1 Pita 2:2) Tok ya ‘wokem fasin blong wantem’ i soem se plante man oli no hanggri long saed blong speret. Maet ol papa mama oli mas faenem rod blong givhan long pikinini blong wokem fasin ya blong wantem ol kakae ya.

18. ?Wanem sam fasin we Jisas i yusum blong tijim ol man, we papa mama i save folem?

¹⁸ Jisas i kasem hat blong ol man taem hem i yusum ol pijatok. (Mak 13:34; Luk 10:29-37) Fasin ya i gud tumas blong tijim ol pikinini tu. Yusum ol naesfala pija, mo ol store we oli pulum tingting blong olgeta, maet ol store long buk ya My Book of Bible Stories.a Pulum ol pikinini blong joen plante long storeyan ya. Askem long olgeta blong dro sam pija mo mekem sam pleplei blong soemaot ol store blong Baebol. Jisas i yusum ol kwestin tu. (Matyu 17:24-27) Folem fasin blong hem long famle stadi blong yufala. Bitim we yu jes talem wan loa blong God, traem askem ol kwestin olsem, ?From wanem Jeova i givim loa ya long yumi? ?Wanem frut bambae i kamaot sipos yumi folem? ?Wanem frut bambae i kamaot sipos yumi no folem? Ol kwestin olsem oli givhan long pikinini blong tingtinggud, mo blong luksave se ol loa blong God oli rili wok mo oli gud.—Dutronome 10:13.

19. ?Fasin blong folem ol rul blong Baebol blong trenem pikinini i save givhan long pikinini long wanem rod?

¹⁹ Taem yu soem gudfala eksampel, frengud, storeyan, mo tijim pikinini blong yu, yu save halpem hem, stat long ol faswan yia blong laef blong hem, blong frengud wetem Jeova God. Fasin fren ya bambae i givhan long hem blong folem Kristin fasin wetem glad. Bambae hem i traehad blong holemstrong long bilif blong hem, nating se ol fren blong hem oli traem pulum hem, mo nating se hem i kasem ol traem. Givhan long hem oltaem blong gat tangkyu from nambawan fasin fren ya wetem God.—Proveb 27:11.

I IMPOTEN BLONG STRETEM PIKININI

20. ?Wanem ya fasin stretem, mo olsem wanem blong stretem pikinini?

²⁰ Fasin stretem, hem i trening we i stretem tingting mo hat. Ol pikinini oli nidim samting ya oltaem. Pol i givim advaes long ol papa se oli mas “gohed blong stretem [ol pikinini blong olgeta], mo trenem tingting blong olgeta olsem we Jeova i wantem.” (Efesas 6:4, NW) Ol papa mama oli mas stretem pikinini wetem lav, olsem Jeova i stap mekem long yumi. (Hibrus 12:4-11) Blong stretem pikinini wetem lav, yumi traem mekem hem i tingtinggud. Taswe, Baebol i yusum tok ya, ‘lesin long fasin stretem.’ (Proveb 8:33) Ale, ?olsem wanem blong stretem pikinini?

21. ?Wanem ol rul we papa mama i mas tingbaot taem tufala i stap stretem pikinini?

²¹ Sam papa mama oli ting se fasin blong stretem pikinini i minim tok strong, singaot, mo daonem hem. Be long saed ya, Pol i givim woning se: ‘Ol papa, yufala i no mas agensem ol pikinini blong yufala oltaem. Fasin ya bambae i mekem olgeta oli kros.’ (Efesas 6:4) Advaes i go long olgeta Kristin blong ‘mekem i gud long olgeta man, mo stretem ol man we oli agens long olgeta, long fasin we i kwaet nomo.’ (2 Timote 2:24, 25) Ol Kristin papa mama oli mas traehad blong folem tok ya taem oli stretem pikinini blong olgeta, nating se samtaem oli mas strong lelebet long hem. Be samtaem, ol tok nomo blong mekem pikinini i tingtinggud, i no naf. Maet hem i nidim blong kasem sam kaen panis.—Proveb 22:15.

22. ?Sipos papa mama i mas panisim pikinini, tufala i mas givhan long hem blong kasem save long wanem samting?

²² Ol pikinini wanwan oli nidim ol defren kaen fasin blong stretem olgeta. Long samfala, “toktok nomo” i no naf blong stretem olgeta. Long saed blong olgeta ya, panis we oli kasem sam samtaem from we oli no obei, i save sevem laef blong olgeta. (Proveb 17:10; 23:13, 14; 29:19) Be, pikinini i mas kasem save from wanem yu yu panisim hem. “Stik blong panis mo tok blong stretem, tufala samting ya bambae oli givim waes.” (Proveb 29:15; Job 6:24) Mo tu, panis i no mas bitim mak. Jeova i talem long ol man blong hem se: “Bambae mi panisim yufala go kasem wan stret mak.” (Jeremaea 46:28b) Baebol i no agri nating long fasin blong wipim mo kilim nogud pikinini from kros, we i mekem bodi blong hem i solap mo i givim bigfala kil long hem.—Proveb 16:32.

23. ?Pikinini i mas luksave wanem samting taem papa mama i panisim hem?

²³ Taem Jeova i givim woning long ol man blong hem se bambae hem i stretem olgeta, fastaem hem i talem se: “Yufala i no fraet . . . mi mi stap wetem yufala.” (Jeremaea 46:28a) Sem mak nao, nomata wanem rod papa mama i yusum blong stretem pikinini, hem i neva mas harem se tufala i no moa laekem hem. (Kolosi 3:21) Be, hem i mas kasem save se papa mama i stretem hem from we tufala i stap ‘wetem hem,’ tufala i no agensem hem.

MEKSUA SE PIKININI BLONG YU I STAP SEF

24, 25. ?Papa mama i mas meksua se pikinini blong tufala i stap sef long wanem nogud trabol we i kamaot plante naoia?

²⁴ Plante bigman oli glad blong tingtingbak long taem we oli pikinini, from we hem i wan hapi taem. Oli tingbaot gudfala filing blong stap sef we oli bin gat, from we oli save se papa mama blong olgeta bambae tufala i lukaotgud long olgeta nomata wanem samting i hapen. Olgeta papa mama oli wantem se pikinini blong olgeta i gat semfala filing ya. Be long wol tede, we ol gudfala fasin oli stap lus, i moa had bitim bifo blong mekem ol pikinini oli stap sef.

²⁵ Wan rabis samting we i kam antap bigwan long ol yia we oli jes pas, hemia fasin blong mekem nogud long pikinini long saed blong seks. Long Malesia, ol ripot oli soem se, namba blong ol pikinini we narafala i mekem i nogud long olgeta long saed long seks, i fo taem antap long ten yia bifo. Long Jemani, evri yia i gat 300,000 pikinini we narafala i mekem nogud long olgeta long saed blong seks. !Long wan kantri long Saot Amerika, wan stadi i soem se evri yia i gat samwe long 9 milyan pikinini olsem! Sore tumas, bighaf blong ol pikinini ya oli kasem trabol ya long prapa haos blong olgeta, mo hemia we i mekem nogud long olgeta, hem i wan man we oli savegud hem mo trastem hem. Be ol pikinini oli mas save se papa mama i stap blong lukaotgud long olgeta. ?Olsem wanem papa mama i save mekem samting ya?

26. ?Wanem sam rod we papa mama i save folem blong meksua se pikinini blong tufala i stap sef, mo olsem wanem save bambae i givhan long pikinini blong stap sef?

²⁶ Ol ripot oli soem se ol pikinini we narafala i mekem nogud long olgeta, oli gat smol save nomo long saed blong seks. Taswe, wan nambawan rod blong blokem trabol ya i blong tijim pikinini long saed ya, nating se hem i smol nomo. Gudfala save bambae i givhan long hem blong no folem “rabis rod, mo ol man we oli stap tokbaot ol samting nogud.” (Proveb 2:10-12) ?Gudfala save long saed blong wanem? Long saed blong ol rul blong Baebol, hemia ol fasin we oli stret mo ol fasin we oli no stret. Mo tu, hem i mas save se sam bigman oli mekem rabis fasin, mo se hem i no nidim blong obei long wan bigman we i traem pulum hem blong mekem nogud. (Skelem wetem Daniel 1:4, 8; 3:16-18.) Yu no mas ting se i naf blong tijim pikinini blong yu wan taem nomo long samting ya. Bighaf blong ol pikinini oli mas lanem samting plante taem bakegen, bifo we oli rimemba. Taem ol pikinini oli kam bigwan moa, papa i mas respektem raet blong gel blong hem blong gat wan prapa rum blong hem. Mo mama tu i mas respektem raet blong boe blong hem long saed ya. Samting ya bambae i halpem pikinini blong luksave moa wanem fasin i stret. Mo tu, wan nambawan rod blong meksua se pikinini i stap sef mo narafala i no mekem nogud long hem, hemia se papa mama i mas savegud oltaem weples hem i stap mo wanem we hem i stap mekem.

ASKEM GOD BLONG LIDIM YU

27, 28. ?Hu ya nambawan Man blong givhan long ol papa mama taem oli stap mekem hadwok ya blong trenem ol pikinini?

²⁷ I tru, fasin blong trenem pikinini stat taem hem i bebi nomo, i no isi. Be ol papa mama we oli gat strong bilif, oli no mekem hadwok ya olgeta nomo. Manoa we i laef long taem blong ol Jaj, i harem nyus se bambae hem i kam wan papa, nao hem i askem Jeova blong lidim hem blong tijim mo trenem pikinini blong hem. Jeova i ansa long prea blong hem.—Jajes 13:8, 12, 24.

²⁸ Long sem fasin, ol papa mama tede we oli gat strong bilif, oli save toktok long Jeova long prea taem oli stap tijim mo trenem ol pikinini blong olgeta. I no isi nating blong mekem wok blong wan papa no mama, be i gat plante bigfala blesing oli save kamaot from. Wan Kristin hasban mo waef long Hawai oli talem se: “I gat 12 yia blong trenem pikinini bifo we hem i kasem ol strong traem blong yang taem. Sipos yumi wokhad blong folem ol rul blong Baebol, bambae yumi kasem glad mo pis taem hem i tekem disisen blong mekem wok blong Jeova wetem fulhat blong hem.” (Proveb 23:15, 16) Taem ol pikinini blong yu oli mekem disisen ya, yu tu bambae yu talem se: “Ol pikinini [boe mo gel] blong yumi, hemia wan presen we Hae God i givim long yumi.”

[Futnot]

?OLSEM WANEM OL RUL YA BLONG BAEBOL OLI SAVE GIVHAN . . . LONG PAPA MAMA BLONG TRENEM PIKININI BLONG TUFALA?

Trastem Jeova.—Proveb 3:5.

Tinghevi long wok blong trenem pikinini.—1 Timote 5:8.

Jeova i wan Papa we i gat lav.—Proveb 8:22, 30.

Papa mama nao i mas tijim pikinini.—Dutronome 6:6, 7.

Pikinini i nidim fasin stretem.—Efesas 6:4.

[Bokis blong pija long pej 61]

GUDFALA FASIN BLONG STRETEM

Wan fasin blong stretem pikinini we i save gat bigfala mining long tingting blong hem, hemia blong mekem se hem i kasem frut blong nogud fasin we hem i mekem. (Galesia 6:7; skelem wetem Eksodas 34:6, 7.) Eksampel, maet pikinini blong yu i mekem ples i doti. Nao sipos yu talem long hem blong klinim ples ya bakegen, samting ya i save makem wan bigfala lesen long tingting blong hem. ?Hem i mekem i no stret long wan man? Sipos hem i mas talem sore, samting ya i save tijim hem blong no mekem rong fasin ya bakegen. Narafala rod blong stretem pikinini, i blong blokem hem long sam gudfala samting blong smoltaem. Hemia i save tijim hem long samting we hem i nidim blong lanem. Olsem nao, bambae pikinini i kasem save se i waes blong folem ol stret rul.

[Tok Blong Pija Long Pej 57]

Papa mama, soem eksampel, frengud, storeyan, mo tijim pikinini blong yu