Japta Tu
Leftemap Jeova, Hem Nomo i Trufala God
1. ?Hu ya nomo i trufala God?
BAEBOL i talem se nating sipos i gat plante god we ol man oli tokbaot, ‘yumi gat wan God nomo blong yumi, we hem i Papa blong yumi.’ (1 Korin 8:5, 6) “Wan God” ya nomo hem i Jeova, Man ya we i mekem olgeta samting. (Dutronome 6:4; Revelesen 4:11) Jisas i tokbaot hem se hem “i God blong mi mo i God blong yufala tu.” ( Jon 20:17) Hem i agri wetem Moses, we i bin talem se Jeova nomo “hem i God mo i no moa gat narafala god bakegen i stap.” (Dutronome 4:35) Jeova i hae moa i winim ol samting ya we man i wosipim, olsem ol aedol, ol haeman, mo enemi blong yumi tu, hemia Devel Setan we hem i “rabis god blong wol ya.” (2 Korin 4:3, 4) Jeova i defren long olgeta god ya. Jisas i talem se Jeova ‘nomo i tru God.’—Jon 17:3.
2. ?Taem save blong yumi long saed blong God i kam bigwan moa, wanem bambae i hapen long laef blong yumi?
2 Man bambae i harem se hem i wantem kam klosap moa long God taem hem i gat bigfala tangkiu from ol samting we hem i lanem olsem ol gudgudfala fasin blong God, wanem we God i mekem finis mo wanem we bambae hem i mekem yet long ol man. Taem man ya i stat lavem Jeova, bambae hem i wantem leftemap Jeova. ?Hem i save mekem samting ya olsem wanem? Taem hem i tokbaot Jeova long ol narafala man. Rom 10:10 (NW ) i talem se: “Wetem maot, yumi stap talemaot tok we bambae i sevem yumi.” Mo tu, hem i save mekem samting ya, taem hem i traehad blong mekem olsem God long ol toktok mo fasin blong hem. Efesas 5:1 i talem se: “Yufala i pikinini blong God, mo hem i lavem yufala tumas, nao from samting ya, yufala i mas traehad blong folem fasin blong hem.” Blong mekem samting ya fulwan, yumi mas save gud ol fasin blong Jeova.
3. ?Wanem ol stamba fasin blong God?
3 Long ful Baebol i gat plante toktok we oli givhan long yumi blong luksave ol nambawan fasin blong God. Ol fofala stamba fasin blong hem, hemia waes, stret fasin, paoa mo lav. “God i gat waes.” ( Job 12:13) “Ol wok blong hem oli stret gud olgeta.” (Dutronome 32:4, NW ) “Paoa blong hem i strong we i strong.” (Aesea 40:26) “God hem i lav.” (1 Jon 4:8, NW ) ?Be long ol fofala stamba fasin ya blong God, weswan nao i antap olgeta? ?Weswan nao i makemaot klia se God i olsem wanem?
“God Hem i Lav”
4. ?Weswan long ol fasin blong God we i pusum hem blong wokem heven mo wol wetem olgeta laef samting?
4 Tingbaot: ?Wanem i pusum Jeova blong wokem heven mo wol wetem ol spirit man mo ol man long wol ya we oli waes? ?Yu ting se paoa mo waes blong hem i pusum hem blong mekem olsem? I tru se God i yusum paoa mo waes blong hem blong wokem ol samting ya, be i no tufala samting ya we i pusum hem blong mekem olsem. Mo blong mekem i stret, hem i no nidim blong givim presen blong laef long olgeta samting blong heven mo wol. Bigfala lav blong God nao i pusum hem blong givim laef long ol man blong mekem oli glad. Lav i pusum hem blong wantem mekem se ol gudfala man we oli obei long hem oli laef olwe long Paradaes. ( Jenesis 1:28; 2:15) Lav i mekem we hem i faenem rod tu blong karemaot panis we i kasem olgeta man from sin blong Adam.
5. ?Folem wanem we Baebol i talem, Jeova i fulap long wanem fasin, mo from wanem?
5 Taswe, long olgeta fasin blong God, lav nao i namba wan. Hemia prapa fasin blong hem. Nating se waes, stret fasin, mo paoa oli impoten fasin blong Jeova, be neva Baebol i talem se Jeova hem i wan long ol fasin ya. Long saed blong lav nomo, Baebol i talem se Jeova hem i lav. Yes, Jeova hem i fulap long lav. Lav ya i stanap long ol rul, i no stanap long ol filing. Ol rul blong trutok mo stret fasin hemia nao samting we i lidim lav blong God. Lav ya i antap long ol narafala lav, mo Jeova God nomo i nambawan eksampol blong lav ya. Lav olsem, i kamaot from we hem i tingbaot narafala i no tingbaot hem wan, mo oltaem i gat ol gudfala wok we oli soemaot lav ya.
6. ?Wanem i mekem we yumi save folem fasin blong God, nating se hem i hae moa long yumi?
6 Gudgudfala fasin ya lav, hem nao i givhan long yumi blong folem fasin blong God. From we yumi sinman, mo yumi mestem plante taem, maet yumi ting se neva bambae yumi naf blong folem fasin blong God. Be long taem olsem, Jeova i soem bigfala lav blong hem. Hem i luksave se yumi no naf blong mekem evri samting mo i no askem yumi blong mekem ol samting we oli stret gud evriwan. Hem i save se yumi stap longwe yet long fasin ya we yumi stret gud olgeta. (Ol Sam 51:5) From samting ya, Ol Sam 130:3, 4 i talem se: “?Sipos yu yu stap raetemdaon ol sin blong mifala, hu bambae i save stanap long fes blong yu, we yu yu no save jajem hem? Be yu yu stap fogivim mifala, yu stap tekemaot ol sin blong mifala.” Yes, Jeova i wan “God we i gat sore mo gladhat, hem i slo blong kam kros, mo hem i fulap long kaen fasin.” (Eksodas 34:6, NW ) “Yu yu gud, O Jeova, mo yu yu rere blong fogif.” (Ol Sam 86:5, NW ) !Ol tok ya oli rili leftemap tingting! !I gud tumas blong mekem wok blong nambawan God ya mo blong harem gud long lav, fasin sore mo kea blong hem!
7. ?Olsem wanem ol samting we Jeova i wokem oli soemaot we hem i gat lav?
7 Ol samting we Jeova i wokem raonabaot long yumi, olgeta tu oli soemaot we hem i gat lav. Tingbaot ol gudfala samting we Jeova i givim long yumi blong mekem yumi harem gud long laef, olsem ol naesfala hil, ol bus, reva mo solwota. Hem i givim plante defdefren kaen kakae long yumi we tes blong olgeta i mekem yumi harem gud mo oli givim paoa long yumi. Mo tu, Jeova i wokem plante naesfala flaoa we smel blong olgeta i gud, mo plante defdefren kaen anamol we oli pulum ae blong yumi. Hem i no nidim blong mekem ol samting ya, be hem i mekem from we hem i wantem we ol man oli glad. I tru se laef long rabis wol ya mo sin we i stap long yumi, oli mekem we yumi no save harem gud fulwan long ol samting ya we Jeova i wokem. (Rom 8:22) !Be traem tingbaot wanem we Jeova bambae i mekem long yumi long Paradaes! Man blong raetem Sam i mekem yumi sua long samting ya taem hem i talem se: “Yu openem han blong yu, nao yu mekem we olgeta samting we i laef oli harem gud, from we oli kasem ol samting we oli wantem tumas.”—Ol Sam 145:16, NW.
8. ?Wanem beswan samting we Jeova i mekem blong soemaot se hem i rili lavem yumi?
8 ?Be wanem beswan samting we Jeova i mekem we i soemaot se hem i rili lavem ol man? Baebol i talem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” ( Jon 3:16) ?Jeova i mekem olsem from we ol man oli mekem i stret? Rom 5:8 i givim ansa se: “God i lavem yumi tumas, mo i soemaot samting ya long yumi long fasin ya we Kraes i ded blong sevem yumi, long taem ya we yumi stap mekem i nogud yet.” Yes, God i sanem Pikinini blong hem we i stretgud olgeta, i kam long wol blong givim laef blong hem olsem wan ransom sakrefaes blong pemaot yumi long panis blong sin mo ded. (Matiu 20:28) Hemia i mekem rod blong ol man we oli lavem God oli save kasem laef we i no save finis. Tangkiu tumas long God we i mekem lav blong hem i kasem eni man we i wantem mekem wok blong hem. Baebol i talem se: “God i stap mekem i sem mak nomo long olgeta man. Hemia wan trutok ya. Sipos wan man i ona long God, mo i mekem ol samting we i stret long fes blong hem, bambae God i glad long hem.”—Ol Wok 10:34, 35.
9. ?From we Jeova i givim Pikinini blong hem olsem wan ransom blong pemaot yumi, yumi mas mekem wanem?
9 Jeova God i givim Pikinini blong hem olsem wan ransom sakrefaes blong pemaot yumi mo mekem rod blong yumi kasem laef we i no save finis. ?Hemia i mas pusum yumi blong wantem mekem wanem long laef blong yumi naoia? Hem i mas mekem we lav blong yumi long trufala God, Jeova, i kam bigwan moa. Mo long semtaem, hem i mas mekem we yumi wantem lesin long Jisas we hem i stret pija blong God. “[ Jisas] i ded blong olgeta man, blong bambae olgeta we oli laef oli no moa laef blong mekem ol wok blong olgeta nomo, be blong bambae oli mekem ol wok blong hemia we i ded finis blong sevem olgeta.” (2 Korin 5:15, NW ) !Yumi glad blong biaen long Jisas, from we hem i soemaot gud olsem wanem blong folem fasin lav mo sore blong Jeova! Yumi luk samting ya long toktok we Jisas i talem long olgeta we oli gat tingting daon. Hem i se: “Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud. Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala. Yufala i mas mekem olsem, from we yok ya we mi bambae mi putum long yufala, wok blong hem i isi nomo, mo ol samting we bambae mi givim long yufala blong yufala i karem, oli no hevi.”—Matiu 11:28-30.
Soem Lav Long Ol Narafala
10. ?Wanem sam rod blong soemaot lav long ol Kristin brata sista blong yumi?
10 ?Olsem wanem yumi save soem lav long ol Kristin brata sista blong yumi, long sem fasin we Jeova mo Jisas oli soem lav long yumi? I gat plante rod blong mekem olsem. Tingbaot sam long ol rod ya: “Man we i stap lavem man, tingting blong hem i longfala, mo hem i gat sore long man. Man olsem, hem i no save jalus, mo i no save mekem tingting blong hem i go antap, mo i no save flas. Hem i no save jikim man, mo i no save tingbaot hem nomo. Hem i no save kros kwik, mo i no save stap kros longtaem. Sipos hem i luk we wan narafala man i mekem i no stret, be hem i no save glad from, hem i save glad long ol trutok nomo. Hem i no save letem wan samting i daonem tingting blong hem, oltaem hem i stap bilif strong long God, mo i stap putum tingting blong hem i strong long hem. Maet bigfala trabol i save kasem hem, be tingting blong hem i no save foldaon. Fasin ya we oltaem man i lavem man, bambae i no save finis samtaem.”—1 Korin 13:4-8; 1 Jon 3:14-18; 4:7-12.
11. ?Yumi mas soemaot lav long hu bakegen, mo yumi mekem samting ya olsem wanem?
11 ?Yumi mas soemaot lav long hu bakegen? ?Mo yumi mekem samting ya olsem wanem? Jisas i talem se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit. Mo yufala i mas tijim olgeta blong oli folem olgeta tok ya we mi mi givim finis long yufala.” (Matiu 28:19, 20) Hemia i min se yumi mas talemaot gud nius long olgeta we oli no ol Kristin brata sista blong yumi yet. Yumi mas tokbaot niufala wol blong God, hemia paradaes, we bambae i kam i no longtaem. Jisas i soem klia se, i no ol Kristin brata sista nomo we yumi mas lavem olgeta, from we hem i se: “?Yufala i ting se sipos yufala i stap lavem olgeta ya nomo we oli stap lavem yufala, God bambae i givim pei long yufala from? !Ol man blong tekem mane blong takis, olgeta tu oli stap mekem fasin ya! Sipos yufala i stap toktok wetem ol fren blong yufala nomo, hemia yufala i no mekem wan samting we i gud moa i winim ol narafala man. Ol hiten man tu oli stap mekem fasin ya.”—Matiu 5:46, 47; 24:14; Galesia 6:10.
“Wokbaot Long Nem Blong Jeova”
12. ?From wanem nem ya Jeova i stret long trufala God nomo?
12 I gat wan narafala impoten samting we yumi save mekem blong leftemap trufala God. Hemia long saed blong spesel nem blong God, Jeova. Yumi mas save nem ya, yusum, mo tijim ol narafala long hem. Man blong raetem Sam i talemaot wanem we hem i wantem tumas i se: “I gud olgeta man oli save yu, we nem blong yu Jeova, yu nomo yu Hae Moa long olgeta samting long wol.” (Ol Sam 83:18, NW ) Nem ya Jeova i minim “Hem i Mekem i Kamaot.” Hem i Bigfala Man we i jusum wanem we hem i wantem mekem, mo oltaem hem i stap mekem ol stamba tingting blong hem oli kamtru. I stret we trufala God nomo i holem nem ya, from we ol man oli no save sua se ol plan blong olgeta bambae oli kamtru no nogat. ( Jemes 4:13, 14) Jeova nomo i save talem se tok blong hem bambae i ‘mekem evri samting we hem i sanem hem blong i mekem.’ (Aesea 55:11) Plante man oli glad bigwan taem oli luk nem blong God long Baebol blong olgeta mo taem oli lanem mining blong nem ya. (Eksodas 6:3) Be save ya bambae i karem blesing nomo sipos oli “wokbaot long nem blong Jeova . . . gogo i no save finis.”—Maeka 4:5, NW.
13. ?Save nem blong Jeova mo wokbaot long nem blong hem, tufala tok ya i minim wanem?
13 Ol Sam 9:10 (NW ) i tokbaot nem blong God, i se: “!Olgeta we oli save nem blong yu, bambae oli trastem yu, from we yu no save lego olgeta we oli stap lukaot yu, O Jeova!” Hemia i no min se i naf blong save nomo se nem blong God hem i Jeova. Maet wan man i save nem ya be hem i no trastem Jeova. Olgeta we oli save nem blong God, oli kasem save long ol fasin blong Jeova, oli agri se hem i gat raet blong lidim man, oli obei long ol loa blong hem, mo oli trastem hem long evri samting. (Ol Proveb 3:5, 6) Long sem fasin, taem yumi wokbaot long nem blong Jeova, yumi givim laef blong yumi long hem, yumi mekem ol fasin we oli soemaot se yumi man blong hem, mo yumi yusum laef blong yumi fulwan olsem we God i wantem. (Luk 10:27) ?Yu yu stap mekem olsem?
14. ?Sipos yumi wantem mekem wok blong Jeova blong olwe, yumi nidim wanem fasin?
14 Sipos yumi fosem yumi nomo blong mekem wok blong Jeova, bambae yumi no save gohed olwe long wok ya. Aposol Pol i talem long Timoti, we i bin mekem wok blong Jeova plante yia finis, se: “Yu mas trenem yu, blong yu save kasem mak ya we yu fasgud long God.” (1 Timoti 4:7, NW ) Fasin fasgud i kamaot taem hat blong yumi i fulap long tangkiu long hemia we yumi fasgud long hem. Fasin blong “fasgud long God,” hemia dip ona we yumi gat long Jeova hem wan. Yumi holemfas long hem from we yumi tinghae long hem mo ol rod blong hem. Fasin ya i mekem se yumi wantem we olgeta man oli mas tinghae long nem blong hem. Sipos yumi wantem wokbaot olwe long nem blong trufala God ya, Jeova, yumi mas wokem fasin fasgud long Hem long laef blong yumi.—Ol Sam 37:4; 2 Pita 3:11.
15. ?Olsem wanem yumi save mekem wosip long God nomo?
15 Blong mekem we God i glad long wosip blong yumi, yumi mas givim wosip i go long hem nomo. ‘God i no save letem yumi mekem wosip long narafala god bakegen.’ (Eksodas 20:5) Yumi no save lavem God mo long semtaem yumi lavem rabis wol ya, we Setan i god blong hem. ( Jemes 4:4; 1 Jon 2:15-17) Jeova i save gud yumi mo i save ol fasin we yumi stap traehad blong kasem. ( Jeremaea 17:10) Sipos hem i luk se yumi rili laekem stretfasin, bambae hem i halpem yumi blong stanap strong mo winim ol traem we yumi fesem evri dei. Hem i yusum tabu spirit blong hem blong mekem yumi naf blong winim ol rabis fasin we oli kam antap bigwan long wol. (2 Korin 4:7) Mo tu, hem i save halpem yumi blong no lusum strongfala tingting ya long promes blong laef olwe long wan paradaes long wol. !Fiuja ya i nambawan tumas! Yumi mas gat bigfala tangkiu from promes ya mo yumi mas glad blong mekem wok blong trufala God, Jeova, we hem nao i wokem rod blong yumi save kasem laef.
16. ?Wanem samting we yumi mas wantem mekem wetem ol milian narafala man ya?
16 Plante milian man raon long wol oli glad blong lesin long tok ya we man blong raetem Sam i raetem se: “Yufala i kam joen wetem mi, yumi talemaot we Hae God i hae we i hae, yumi leftemap hae nem blong hem.” (Ol Sam 34:3) Jeova i singaot yu blong joen wetem bigfala hip ya blong ol man long olgeta nesen we oli stap leftemap nem blong Hem.
Tingtingbak
• ?Jeova i wanem kaen God? ?Wanem gudfala frut i kamaot taem yumi kasem klia save long ol gudgudfala fasin blong hem?
• ?Yumi save mekem wanem blong halpem ol narafala man blong lanem trutok long saed blong God?
• ?Save nem blong Jeova mo wokbaot long nem blong hem, tufala tok ya i minim wanem?
[Tok blong pija long pej 14]
From we Jeova i gat bigfala lav, bambae hem i ‘openem han blong hem, mo mekem we olgeta laef samting oli harem gud’