Japta Tri

Holemtaet Long Tok Blong God

1. (a) ?Olsem wanem Isrel blong bifo i luksave se tok blong God i tru? (b) ?From wanem yumi intres long samting ya tu?

“YUFALA evriwan i savegud long tingting blong yufala we Hae God ya i givim ol gudgudfala samting ya long yumi, stret olsem we hem i promes bifo finis. Olgeta promes ya blong hem, hem i mekem oli kamtru evriwan.” ( Josua 23:14-16) Hemia nao tok we Josua i talem long ol olfala blong Isrel afta we oli kasem Promes Lan. Yes, i gat pruf se oli save trastem olgeta promes blong Jeova. Stori ya long Baebol—wetem ol narafala haf blong Baebol tu—oli stap gud kam kasem naoia blong givhan long yumi blong “yumi save gat hop.”—Rom 15:4, NW.

2. (a) ?Olsem wanem Baebol i “kamaot long God”? (b) ?From we yumi save se Baebol i kamaot long God, yumi mas mekem wanem?

² Nating se i gat samwe long 40 man we oli raetem Baebol, Jeova nomo i Stamba blong buk ya. ?Hemia i min se Jeova i lidim man blong raetem evri samting we i stap insaed long Baebol? Yes. Blong mekem olsem, hem i yusum tabu spirit, no paoa blong hem we i stap wok. Aposol Pol i tok tru taem hem i talem se: “Olgeta tok blong Baebol oli kamaot long God fastaem . . . God i givim blong bambae yumi ol man blong hem yumi save kam waes long olgeta samting, nao bambae yumi savegud ol rod blong mekem ol gudfala wok.” Ol man long evri ples we oli bilif long samting ya, oli lesin long wanem we Baebol i talem mo oli mekem laef blong olgeta i stanap long ol tok blong hem.—2 Timoti 3:16, 17; 1 Tesalonaeka 2:13.

Halpem Ol Narafala Blong Laekem Baebol

3. ?Wanem beswan rod blong givhan long ol man we oli no bilif se Baebol i Tok Blong God?

³ Plante man we yumi toktok wetem olgeta oli no gat tingting olsem yumi se Baebol i Tok Blong God. ?Olsem wanem yumi save givhan long olgeta ya? Plante taem, beswan rod blong mekem olsem, hemia blong openem Baebol mo soem sam tok blong hem long olgeta. “Tok blong God i wan samting we i laef, mo i stap wok, mo i sap we i sap i winim naef blong faet ya we i sap tu saed. Hem . . . i save jajem olgeta tingting blong man, mo ol samting we man i wantem long tingting blong hem.” (Hibrus 4:12) “Tok blong God” i no wan buk we i storebaot wanem we i hapen bifo nomo. Nogat. !Ol tok blong Baebol oli laef i stap! Ol promes blong Baebol bambae oli kamtru evriwan, we i no gat wan samting i save blokem. Tok Blong Baebol i save gat bigfala paoa long ol trufala filing insaed long hat blong man i bitim enikaen toktok we yumi save talem.

4. ?Wanem save blong Baebol we i mekem sam man oli jenisim tingting we oli gat long saed blong hem? ?From wanem?

⁴ Plante man oli wantem kasem moa save long Baebol taem oli luk nem blong God insaed long hem. Sam narafala man oli wantem stadi Baebol from we oli luk se hem i talemaot from wanem yumi laef, from wanem God i letem rabis fasin i stap, mo wanem mining blong ol samting we oli stap hapen long wol. Mo tu, oli lanem se man i gat janis blong kasem laef we i no save finis long wan paradaes long wol. Long plante kantri, sam kastom blong jos oli mekem ol man oli kasem plante trabol from ol rabis spirit. Be, ol tok blong Baebol oli soemaot wanem i stamba blong trabol ya mo olsem wanem blong kam fri long hem. Samting ya tu i save mekem ol man oli intres long Baebol. ?From wanem ol tok ya oli kasem tingting blong ol man we oli gat gudhat? From we Baebol nomo i givim save we man i save trastem long saed blong ol impoten poen ya.—Ol Sam 119:130.

5. (a) ?Taem wan man i talem se hem i no bilif long Baebol, ating hem i talem tok ya from wanem? (b) ?Yumi save mekem wanem blong halpem ol man olsem?

⁵ ?Be olsem wanem sipos sam man oli talem se oli no bilif long Baebol? ?Yumi save gohed blong toktok wetem olgeta? Yes, yumi mas gohed blong toktok sipos oli rere blong lesin mo tingting gud. Maet olgeta ya oli luk Baebol olsem wan buk blong ol Kristin skul nomo. Maet oli ting nogud long Baebol from we oli luk we ol skul ya oli gat tu fes, oli joen long politik, mo oli stap askem mane oltaem. I gud yumi askem long ol man ya sipos hemia nao tingting blong olgeta. Maet olgeta ya oli save intres sipos oli harem ol tok panis we Baebol i talem agensem nogud fasin blong ol giaman Kristin skul, wetem ol tok we hem i talem blong soemaot we trufala Kristin skul i defren.—Maeka 3:11, 12; Matiu 15:7-9; Jemes 4:4.

6. (a) ?Wanem samting i mekem yu yu bilif se Baebol i Tok Blong God? (b) ?Yumi save yusum wanem narafala pruf blong givhan long wan man blong luksave se Baebol i rili Tok Blong God?

⁶ Long sam man, i naf nomo blong toktok stret mo soem ol pruf se Baebol i kamaot long God. ?Wanem samting i pruvum klia long yu we Baebol i kamaot long Jeova God? ?Yu yu bilivim Baebol from ol toktok we hem wan i talem long saed blong stamba blong hem? ?No maet yu bilif from we i gat plante profet tok long Baebol we oli givim stret save long saed blong fiuja, mo samting ya i pruvum se God nomo i stamba blong ol profet tok ya? (2 Pita 1:20, 21) ?Ating yu sapraes we olgeta buk blong Baebol oli agri tugeta, nating se 40 defren man oli raetem, long wan taem we i olsem 1,600 yia? ?No maet yu luk we Baebol i defren olgeta long ol narafala buk we ol man bifo oli raetem, from we hem i laenap stret wetem samting we ol sayentis oli faenemaot? ?No maet hem i from fasin blong ol man we oli raetem Baebol we oli neva haedem wan samting? ?Ating yu sapraes tu we Baebol i stap gud kam kasem tede, nating we sam man oli traehad blong spolem hem fulwan? Eni samting long saed blong Baebol we yu wan yu faenem se i makem tingting blong yu, yu save yusum blong halpem ol narafala man.a

Baebol Riding Blong Yumi

7, 8. (a) ?Yumi mas mekem wanem wetem Baebol? (b) ?Antap long fasin blong ridim Baebol yumi wanwan, yumi mas mekem wanem? (c) ?Olsem wanem yu wan yu bin kasem klia save long stamba tingting blong Jeova?

⁷ I gud blong halpem ol narafala blong oli bilif long Baebol, be yumi wanwan i mas tekem taem tu blong ridim Baebol evri dei. ?Yu yu stap mekem olsem? Baebol hem i impoten moa i winim olgeta buk we man i wokem. Be, hemia i no min se sipos yumi ridim Baebol yumi wan, yumi no moa nidim wan narafala samting. Baebol i givim woning agensem fasin blong stap yumi wan nomo. Yumi no mas ting se yumi wan nomo bambae yumi naf blong faenem mining blong evri samting. Yumi nidim tufala samting ya, stadi wanwan mo go long ol miting blong ol man blong God. Long rod ya nao bambae yumi kam wan Kristin we i naf blong skelem gud olgeta samting.—Ol Proveb 18:1; Hibrus 10:24, 25.

⁸ Baebol i givhan long yumi blong kasem save samting ya taem hem i storebaot wan haeman blong Itiopia we i stap ridim profet tok blong Aesea. Wan enjel i pulum Filip, we i wan Kristin man blong talemaot gud nius, blong i askem man Itiopia ya se: “?Yu yu save mining blong tok ya we yu stap ridim?” Man Itiopia ya i ansa wetem tingting daon se: “?Bambae mi mi save olsem wanem? I no gat man blong i talemaot mining blong hem long mi.” Ale hem i askem Filip blong eksplenem haf ya blong Baebol long hem. Filip i no jes ridim Baebol hem wan mo givim prapa tingting blong hem blong eksplenem. Nogat. Hem i stap wok wetem ogenaesesen blong God long wol ya. Taswe, hem i save halpem man Itiopia ya blong kasem stret tijing we Jeova i givim tru long ogenaesesen blong hem. (Ol Wok 6:5, 6; 8:5, 26-35) Tede, i sem mak. I no gat man we, hem wan nomo, i naf blong faenemaot ol stamba tingting blong Jeova. Yumi evriwan i nidim help we Jeova i givim tru long ogenaesesen blong hem long wol ya.

9. ?Wanem program blong ridim Baebol i save givhangud long yumi evriwan?

⁹ Ogenaesesen blong Jeova i halpem yumi blong kasem save long Baebol. Blong mekem olsem, hem i givim plante gudfala buk we oli tokbaot Baebol. Antap long hemia, i gat wan program blong ridim Baebol evri wik long Tiokratik Skul long ol kongregesen blong ol Witnes Blong Jeova raon long wol. Yumi save kasem plante gudgudfala samting sipos yumi tekem taem blong ridim Tabu Baebol. (Ol Sam 1:1-3; 19:7, 8) Traem bes blong yu blong ridim Baebol evri dei. Maet yu no kasem save long evri samting, be sipos yu kasem bigfala tingting long wanem we yu ridim, hemia i save givhan bigwan long yu. Tingbaot: Sipos yu ridim fo no faef pej nomo evri dei, bambae i tekem wan yia nomo blong yu ridim Baebol fulwan.

10. (a) ?Wetaem yu yu stap ridim Baebol? (b) ?Hu i save joenem yumi long Baebol riding, mo from wanem i impoten blong mekem riding ya oltaem?

¹⁰ ?Wetaem yu save mekem Baebol riding blong yu? Sipos yu tekem 10 no 15 menet nomo evri dei, samting ya i save mekem i gud bigwan long yu. Sipos yu no save mekem olsem, be yu mas mekem wan program wetem ol stret taem blong mekem riding ya evri wik, mo fasgud long program ya. Sipos yu mared finis, yu save ridim Baebol wetem hasban no waef blong yu. Sipos yu gat sam pikinini we oli naf blong rid, yu save seraotem ol vas, blong wanwan long olgeta i ridim long bigfala voes. Fasin blong ridim Baebol i mas kam wan kastom long laef blong yu, olsem we yumi gat kastom ya blong kakae evri dei. Yumi save finis se sipos wan man i no kakae gud evri dei, bambae hem i no strong long bodi. Long sem fasin, blong stap strong long saed blong spirit, mo blong laef olwe, yumi mas tekem kakae oltaem long “evri tok we God i talem.”—Matiu 4:4.

Mak We Yumi Wantem Kasem

11. ?Yumi wantem kasem wanem taem yumi ridim Baebol?

¹¹ ?Taem yumi ridim Baebol yumi wantem kasem wanem? Mak blong yumi i no blong ridim plante pej nomo. Samting we i mas pusum yumi blong ridim Baebol hemia se yumi wantem save gud God blong bambae yumi lavem hem moa mo mekem wosip long fasin we i hem i glad long hem. ( Jon 5:39-42) Tingting blong yumi i mas sem mak long tingting blong man ya we i raetem toktok ya long Baebol se: “Hae God. Plis yu tijim mi long ol fasin blong yu, yu mekem mi mi savegud ol rod blong yu.”—Ol Sam 25:4.

12. (a) ?From wanem i impoten blong kasem “stret save”? ?Blong kasem save ya, wanem samting we maet yumi mas traehad blong mekem taem yumi rid? (b) ?Wanem fofala poen we oli save givhan long yumi taem yumi ridim Baebol? (Lukluk bokis long pej 30.) (c) Soemaot olsem wanem fofala poen ya oli save wok, taem yu ansarem ol kwestin we oli stap wetem paragraf ya. Jekem ol vas blong Baebol we oli no raetem toktok blong olgeta long ples ya.

¹² Taem yumi letem Jeova i tijim yumi, yumi mas wantem kasem “stret save.” Sipos yumi no gat stret save bambae yumi no save mekem Tok Blong God i wok long laef blong yumi, mo bambae yumi no naf blong eksplenem stret ol tok blong hem long narafala. (Kolosi 3:10, NW; 2 Timoti 2:15) Blong kasem stret save yumi mas tingting gud long samting we yumi stap ridim. Sipos wan haf we yumi ridim i had blong kasem save, maet yumi mas ridim bakegen mo bakegen gogo yumi kasem mining blong hem. Mo tu, bambae yumi mekem i gud long yumi sipos yumi tektaem blong tingting dip long wanem we yumi ridim, mo tingbaot ol defdefren poen we maet oli joen wetem haf ya. Long pej 30 i gat wan lis blong fo defren wei we yumi save folem blong tingting gud long samting we yumi ridim. Plante haf blong Baebol oli save givhan bigwan long yumi sipos yumi folem wan long ol fofala poen ya. Bambae yu luk olsem wanem blong mekem olsem, taem yu ansarem ol kwestin we oli stap biaen.

(1) Plante taem, wan haf we yumi ridim long Baebol i givim save long yumi long saed blong ol gudgudfala fasin blong Jeova. Eksampol, long Ol Sam 139:13, 14, yumi lanem se God i kea long ol bebi we oli no bon yet: “Taem mi stap yet long bel blong mama blong mi, yu yu mekem evri haf blong bodi blong mi, mo yu mekem olgeta oli joen gud. Yu yu mekem mi long fasin we i narafala, mo i nambawan olgeta. Mi mi ona long yu, mo mi presem nem blong yu from. Olgeta samting we yu yu mekem oli gud we i gud tumas. Samting ya, mi mi save we, mi savegud.” !Ol samting we Jeova i wokem oli nambawan tumas! Wei we hem i wokem yumi i pruvum se hem i lavem yumi tumas.

Taem yumi ridim ol stori we oli soemaot fasin blong Jisas long ol man, i olsem we yumi stap luk fasin we Jeova hem wan i save mekem long ol man. Hemia samting we Jon 14:9, 10 i talem. Tingbaot poen ya taem yu ridim Luk 5:12, 13 mo Luk 7:11-15 mo ansarem kwestin ya: ?Wanem samting we yumi lanem long saed blong Jeova?

(2) Tingbaot olsem wanem stori we yu ridim i laenap long stamba tok ya blong Baebol se: Kingdom blong Jisas Kraes, we hem i laen ya we Baebol i promes long hem, bambae i mekem we hae rul blong Jeova i win mo bambae i leftemap nem blong hem.

?Olsem wanem ol tok blong Esikel mo Daniel, oli makem gud stamba tok blong Baebol? (Esikel 38:21-23; Daniel 2:44; 4:17; 7:9-14)

?Olsem wanem Baebol i soemaot klia we Jisas nao hem i laen ya we Baebol i promes long hem? (Galesia 3:16)

?Olsem wanem Revelesen i tokbaot taem ya we bambae Kingdom i kasem fulmak blong hem? (Revelesen 11:15; 12:7-10; 17:16-18; 19:11-16; 20:1-3; 21:1-5)

(3) Tingbaot olsem wanem yu yu save mekem samting we yu ridim i wok long laef blong yu. Eksampol, taem yumi ridim stori blong ol man Isrel long ol buk blong Eksodas kasem Dutronome, yumi luk we oli mekem ol nogud fasin long saed blong seks mo oli stronghed. Yumi lanem we fasin mo tingting ya blong olgeta, i karem trabol i kam long olgeta. Taswe, yumi no mas folem nogud eksampol blong ol man Isrel, be yumi mas wantem mekem Jeova i glad. “Olgeta trabol ya we ol man ya oli kasem, i blong tijim olgeta. Mo oli raetem stori blong hem long buk, blong wekemap yumi ya we yumi stap laef tede, we Lasdei blong wol i klosap.”—1 Korin 10:11.

?Yumi lanem wanem long stori blong Ken we i kilim Ebel i ded? ( Jenesis 4:3-12; Hibrus 11:4; 1 Jon 3:10-15; 4:20, 21)

?Ol advaes we oli go long ol Kristin we bambae oli go long heven, i stret tu long olgeta we bambae oli laef olwe long wol? (Namba 15:16; Jon 10:16)

?Nating se yumi gat gudnem long Kristin kongregesen, from wanem yumi mas traem faenem rod blong gohed moa blong folem ol advaes blong Baebol we yumi save finis? (2 Korin 13:5; 1 Tesalonaeka 4:1)

(4) Tingbaot olsem wanem yu save yusum ol samting we yu ridim blong halpem ol narafala. Klosap olgeta man oli wari long saed blong helt. Taswe yumi save soem long olgeta ya wanem we Jisas i bin mekem blong soemaot ol samting we bambae hem i mekem long ful wol taem hem i rul long Kingdom: “Plante man oli karem ol sikman i kam long hem. Hemia ol man we leg blong olgeta i nogud, mo olgeta we oli blaen, mo olgeta we samting i rong long bodi blong olgeta, mo olgeta we oli no save toktok, mo plante narafala sikman bakegen . . . nao hem i mekem olgeta evriwan oli gud bakegen.”—Matiu 15:30.

?Yumi save yusum stori blong pikinini gel blong Jaeras we i laef bakegen long ded, blong givhan long hu? (Luk 8:41, 42, 49-56)

13. ?Yumi save kasem wanem gudfala frut taem yumi holem program blong yumi blong ridim Baebol mo stadi wetem ogenaesesen blong Jeova?

¹³ !Baebol riding i save karem plante blesing i kam long laef blong yumi sipos yumi tingting gud long ol fofala poen antap! I tru, i no isi blong ridim Baebol. Be ol blesing we oli kamaot from, oli save stap long ful laef blong yumi, from we taem yumi ridim Baebol, yumi kam strong moa oltaem long saed blong spirit. Fasin blong ridim Baebol evri dei bambae i pulum yumi i kam klosap moa long Papa blong yumi, Jeova, we hem i gat lav, mo i mekem yumi kam klosap moa tu long ol Kristin brata blong yumi. Fasin ya bambae i halpem yumi blong folem advaes ya blong “holemtaet tok blong laef.”—Filipae 2:16, NW.

[Futnot]

Tingtingbak

• ?From wanem oli raetem Baebol, mo from wanem hem i stap gud kam kasem taem blong yumi?

• ?Olsem wanem yumi save halpem ol narafala man blong laekem Baebol?

• ?Olsem wanem fasin blong ridim Baebol evri dei i save mekem i gud long yumi? ?Wanem fofala poen we oli save givhan long yumi taem yumi ridim Baebol?

[Bokis blong pija long pej 30]

TAEM YU RIDIM WAN HAF BLONG BAEBOL, TINGBAOT SAMTING YA

?Yu lanem wanem long saed blong ol gudgudfala fasin blong Jeova?

?Olsem wanem haf ya i joen wetem stamba tok blong Baebol?

?Wanem we haf ya i save mekem long laef blong yu?

?Olsem wanem yu save yusum haf ya blong halpem ol narafala?