Baebol i Talem Wanem
?Ol Sin Blong Yumi Oli Fol Blong Setan Nomo?
FAS man we i sin hem i talem se i fol blong Setan. ‘Snek ya, hem nao i giaman long mi, nao mi kakae.’ (Jenesis 3:13) Stat long taem ya, ‘Bigfala algita ya, snek ya blong bifo, we hem i ‘Setan’ no ‘Man we i agensem man,’ i gohed yet blong wok agensem ol man. Hem i ‘satem tingting’ blong ol man mo ‘hem i lidim olgeta oli go krangke.’ (Revelesen 12:9; 2 Korin 4:4) I no gat wan man we i save ronwe long paoa we Setan i yusum. Be hemia i min se ?yumi no naf blong agensem paoa blong hem? Mo tu, ?evri taem we yumi sin i fol blong hem?
Baebol i eksplenem se Setan i bin giaman long Iv. (1 Timoti 2:14) Iv i ting se sipos hem i agens long loa blong God, bambae hem i kasem fasin luksave mo hem i naf blong jusum samting we hem wan i wantem. Be hemia wan giaman tingting nomo. (Jenesis 3:4, 5) Tingting ya i pusum hem blong mekem sin. Nating se i olsem, God i talem se i fol blong Iv mo i givim panis blong ded long hem. ?From wanem? From we nating se Setan i giaman long Iv, Iv i kasem save loa blong God. Setan i no bin fosem hem blong no obei. Antap moa, Iv i bos long ol aksin blong hem, mekem se hem i save agensem paoa blong Setan.
Agensem Devel
Ol man oli save agensem devel. Efesas 6:12 i talem se yumi “stap faet” agensem ‘ol rabis spirit paoa blong heven.’ Yes, God i askem long yumi blong faet agensem paoa blong Setan. Be, ?olsem wanem wan man i save faet agensem paoa ya blong Setan mo ol rabis spirit we i bigwan moa i bitim paoa blong man? ?God i save askem yumi blong faet sipos hem i save se bambae yumi lus? No gat, from we God i no askem yumi blong agensem Setan wetem prapa paoa blong yumi. Jeova i givim ol defren samting long yumi blong agensem mo winim ol trik blong Setan. Baebol i talem long yumi se Devel Setan hem i hu, wanem ol plan blong hem, mo olsem wanem yumi save blokem hem.—Jon 8:44; 2 Korin 2:11; 11:14.
Olsem Wanem Blong “Blokem Setan”
Baebol i givim tu advaes we yumi save folem blong agensem Setan. Hem i givim advaes ya se: “Nao from samting ya, yufala i mas putum yufala i stap daon, aninit long han blong God. Yufala i mas blokem Setan, nao hem bambae i ronwe long yufala.” (Jemes 4:7) Faswan samting we yumi mas mekem blong putum yumi i stap daon long God hemia blong obei long ol loa blong hem. Sipos yumi tingbaot se, God i rili stap, hem i gat kaen fasin, bigfala paoa, mo hem i gat raet blong rul, bambae ol samting ya oli givhan long yumi blong blokem Setan. Fasin blong stap prea oltaem, samting ya tu i impoten tumas.—Efesas 6:18.
Tingbaot taem ya we Setan i traem Jisas. Samting we i givhan long Jisas blong blokem Setan, hemia se hem i tingbaot bakegen mo talemaot sam loa blong God. Setan i no naf blong pulum Jisas blong foldaon long sin. Ale, Setan i lego hem. Biaen long traem ya, Jeova i yusum ol enjel blong hem blong givim moa paoa long Jisas. (Matiu 4:1-11) Taswe, Jisas i leftemap tingting blong ol disaepol blong hem se oli mas askem long God blong ‘blokem Setan i no kam spolem olgeta.’—Matiu 6:13.
Fasin blong God blong protektem yumi i no minim se hem i putum wan stonwol raonabaot long yumi. No gat. Hem i askem long yumi blong folem ol fasin blong hem, olsem trutok, stret fasin, pis, mo bilif. Ol fasin ya oli olsem ‘klos blong faet’ we oli givhan long yumi blong stap strong “taem Setan i stap wokem ol giaman trik blong hem.” (Efesas 6:11, 13-18) Yes, wetem help blong God yumi save winim ol traem blong Setan.
Namba tu advaes we Jemes 4:7 i givim se, “blokem Setan.” Hemia i min se yumi mas tekem strong aksin blong ronwe long rabis paoa blong Setan. Yumi no mas stap aninit long paoa blong hem we i save trikim yumi. Yumi mas sakemaot ol waes blong man long saed blong ol sas samting blong wol mo ol tingting we oli doti. Sipos yumi wantem faet agensem Setan, i impoten tumas blong blokem Setan oltaem mo blong givim ful laef blong yumi blong mekem samting we God nomo i wantem. ?Be i tru se olgeta sin we man i mekem oli kamaot long Setan?
Faet Blong Yumi Agensem Bodi Blong Yumi
Jemes we i raetem wan leta blong Baebol, i eksplenem se: “Ol samting we ol man wanwan oli wantem oli save traem mo pulum olgeta. Taem wan man i wantem tumas ol samting nogud, ol fasin nogud oli holem hem, nao hem i foldaon long sin.” (Jemes 1:14, 15, NW) Sore tumas, be yumi no save win fulwan agensem ol slak fasin mo sin we i stap long bodi blong yumi. (Rom 5:12) “I no gat man long wol ya se i no save mekem mastik, we oltaem i stap mekem i stret nomo.”—Prija 7:20.
Samting ya i no minim we yumi no save bos long sin. Samtaem, yumi mekem sam disisen we oli no stret, nao from samting ya yumi pulum ol traem oli kam long yumi wanwan. Taswe, nomata se wan rabis tingting i kamaot from we yumi sinman no from paoa blong Setan, be i stap long yumi wanwan nomo blong holem tingting ya no blong sakemaot rabis tingting ya. I stret we aposol Pol i raetem se: “I no gat man i save giaman long God. Wanem sid we man i planem fastaem long garen blong hem, be frut blong hem nomo, man ya bambae i mas kakae.”—Galesia 6:7.
Luksave Ol Sin We Yumi Mekem
Plante taem i had long ol man blong luksave ol slak fasin, mastik no fol blong olgeta wan. Yes, i no isi blong oli talem se oli bin mekem sin. (Ol Sam 36:2) Wan samting we i givhan blong yumi blong luksave se yumi sin, hemia taem yumi save se God i no askem yumi blong kam stret gud olgeta. Deved we i raetem Ol Sam i talem se: “Hem i no save panisim yumi stret long mak blong ol sin blong yumi, mo hem i no save givimbak ol fasin nogud ya long yumi we yumi stap mekem long hem.” (Ol Sam 103:10) Nating se God i fogivim yumi, hem i wantem se yumi gohed blong faet strong. Hem i wantem se yumi stretem yumi wan blong agensem ol trik blong Setan mo ol filing blong yumi we oli pusum yumi blong mekem sin.—1 Korin 9:27.
Yumi mas kasem save we God i luksave se Setan i traem lidim ol fasin blong yumi mo se hem i stamba blong ol sin blong ol man long wol. Be hemia i no mekem se yumi no gat fol from ol sin blong yumi. Taswe, Rom 14:12 i talem se: “Hemia i min se bambae yumi evriwan i mas talemaot olgeta fasin blong yumi long fes blong God.”
Tru ya, sipos yumi ‘no laekem nating ol rabis fasin’ mo yumi “holemstrong ol gudfala fasin,” bambae yumi winim faet ya fulwan agensem rabis fasin. (Rom 12:9, 21) Faswan woman, Iv, i mestem mak ya mo hem i kasem panis, from we hem i no obei. Hem i save agensem Setan mo obei long God. (Jenesis 3:16) Be God i no fogetem wok we Setan i bin mekem blong trikim Iv. Devel ya i kasem panis hemia se bambae hem i mas lus. (Jenesis 3:14, 15; Rom 16:20; Hibru 2:14) I no longtaem, bambae yumi no moa stap aninit long rabis paoa blong hem.—Revelesen 20:1-3, 10.
[Foto Credit Line blong pija long pej 28]
Erich Lessing/Art Resource, NY