Ol Blesing From Fasin Fraetgud Long Trufala God

‘Mi, Jeova, mi mi God blong yu, God ya we i stap tijim yu olsem wanem blong kasem blesing. Mi mi stap mekem yu yu wokbaot long rod we i stret.’​—AESEA 48:17.

1. ?Wanem trabol i no save hapen, sipos i bin gat fasin fraetgud long God?

SIPOS Adam i bin wokem fasin fraetgud long God, maet samting ya i save blokem hem blong i no mekem sin ya we i lidim hem i go long ded blong olwe, mo we i bin mekem ol man we oli kamaot biaen long hem oli safa blong plante taosen yia. Sipos ol man Isrel bifo oli bin folem tok blong Jeova blong fraetgud long hem mo laekem hem, oli no save go kalabus long Babilon. Mo oli no save sakemaot Pikinini blong God mo gat fol from ded blong hem. Sipos ol man long wol tede oli fraetgud long God, i no save gat ol gavman mo ol bisnes we oli foldaon, ol fasin blong brekem loa mo ol faet.​—Proveb 3:7.

2. ?Nating se wol raonabaot long yumi i olsem wanem, from wanem yumi mas wokem fasin fraetgud long Jeova?

² Nomata wanem ol man blong wol oli stap mekem raonabaot long yumi, be yumi, olsem ol wanwan man, ol famle, mo ol kongregesen blong ol man blong wok blong Jeova, yumi save kasem blesing sipos yumi wokem fasin fraetgud long trufala God. Hemia i laenap wetem toktok we Moses i talem blong mekem ol man Isrel oli tingbaot wan samting: ‘?Jeova, God blong yufala i askem wanem moa long yufala, bitim we yufala i mas fraet long Jeova, God blong yufala? Olsemia nao, bambae yufala i save wokbaot long ol rod blong hem, mo yufala i save laekem hem, mo bambae yufala i mekem wok blong Jeova, God blong yufala, wetem olgeta hat blong yufala mo wetem olgeta sol blong yufala. Jeova i askem long yufala blong holem ol loa blong hem . . . blong yufala i kasem blesing from.’ (Dutronome 10:​12, 13) ?Wanem sam blesing yumi save kasem taem yumi fraetgud long Jeova, trufala God?

Waes​—Moa Sas Bitim Gol

3. (a) ?Wanem faswan blesing we yumi save kasem? (b) ?Wanem mining blong Ol Sam 111:10?

³ Faswan blesing hemia trufala fasin waes. Ol Sam 111:10 i talem se: “Man we i wantem kam waes hem i mas fraetgud long Jeova.” ?Samting ya i minim wanem? Man we i waes, hem i save yusum save we hem i gat blong winim ol problem blong hem, blong blokem trabol, mo blong kasem sam mak long laef blong hem. Man we i waes i save mekem ol gudfala disisen tu. Fas haf, no stat, no faondesen blong fasin waes, hemia fasin fraetgud long Jeova. ?From wanem? From we hem i wokem olgeta samting. Oli dipen long hem. Hem i mekem man we hem i fri blong jusum ol samting we hem i wantem. Be Hem i no mekem man we hem i naf blong wokbaotgud hem wan we God i no lidim hem. (Josua 24:15; Jeremaea 10:23) Sipos yumi luksave ol bigfala samting ya long laef blong yumi mo laef folem olgeta ya, long rod ya nomo yumi save gat gudfala frut olwe. Sipos save blong yumi long Jeova i mekem yumi bilif strong se wil blong God bambae i sua blong kamtru, mo se hem i naf mo hem i sua blong holem promes blong hem blong givim pei long olgeta we oli holemstrong long bilif, ale fasin fraetgud long God bambae i pusum yumi blong wokbaot long waes fasin.​—Proveb 3:​21-26; Hibrus 11:6.

4, 5. (a) ?From wanem ol samting we wan yang man i lanem long yunivesiti i no givim tru waes long hem? (b) ?Olsem wanem man ya mo woman blong hem tufala i kasem trufala waes biaen, mo olsem wanem samting ya i jenisim laef blong tufala?

⁴ Tingbaot wan eksampel. Sam yia bifo, wan yangfala man i stap go long Yunivesiti blong Saskatjwan, long Kanada. Long program blong skul ya i gat baeoloji,a ale hem i lanem evolusen.b Afta we hem i pas, hem i stadi long saed blong ol atom, mo hem i kasem skolasip blong gohed blong skul long Yunivesiti blong Toronto. Taem hem i stap stadi, hem i luk nambawan oda mo plan blong ol atom. Be hem i no faenem ansa blong ol kwestin ya: ?Hu i wokem plan blong olgeta samting ya? ?Wetaem? ?From wanem? Sipos hem i no kasem ansa long ol kwestin ya, ?olsem wanem hem i save yusumgud waes blong hem long wan wol we long taem ya, i gat bigfala faet long hem? ?Wanem samting bambae i lidim hem​—strong tingting se kantri blong hem i moagud long ol narafala kantri? no ?strong tingting blong kasem plante mane mo sas samting from wok blong hem? ?Hem i rili faenem trufala waes?

⁵ Smoltaem afta we hem i kasem stefeket long yunivesiti, yangfala man ya mo woman blong hem tufala i stat stadi Baebol wetem Ol Wetnes blong Jeova. Tru long prapa Tok blong God, tufala i stat kasem ol ansa we bifo tufala i no save kasem long ol kwestin blong tufala. Tufala i stat blong save Man ya we i Wokem ol samting, Jeova God. Taem tufala i stadi long saed blong Moses long Red Si mo long saed blong Daniel mo ol fren blong hem long Babilon, tufala i lanem se i impoten blong fraetgud long God, i no long man. (Eksodas 14:​10-31; Daniel 3:​8-30) Fasin ya blong fraetgud long God i joen wetem tru lav long Jeova, ale samting ya i stat blong pusum tufala. I no longtaem ful laef blong tufala i jenis. Naoia yangfala man ya i save Man ya we i Wokem ol nambawan samting we hem i bin stadi long olgeta. Hem i stat blong kasem save long ol stampa tingting blong Man ya, we hem i bin luk waes blong hem long ol samting we hem i bin stadi long olgeta. Ale hem i no moa yusum save we hem i gat blong wokem ol tul we oli save kilim man i ded, be hem mo woman blong hem tufala i jusum blong givhan long ol narafala man blong laekem God mo laekem ol man raonabaot. Tufala i joen long wok blong talemaot Kingdom blong God fultaem. Biaen, tufala i go long Wajtaoa Baebol Skul blong Gilead mo tufala i kam misinari.

6. ?Sipos yumi gat waes we i stanap long fasin fraetgud long Jeova, bambae yumi no ronem wanem samting we oli blong smoltaem nomo, be bambae yumi mekem wanem narafala samting?

⁶ Tru ya, i no evriwan we i save kam wan misinari. Be yumi evriwan i save kasem waes we i stanap long fasin fraetgud long Jeova. Sipos yumi traehad blong kasem waes ya, bambae yumi no lesin long ol waes blong ol man blong wol ya we oli no save talem stret wanem ya mining blong laef. Bambae yumi yusum taem blong yumi long stadi blong Baebol, we i kamaot long Stampa blong laef, Jeova God, Man ya we i save givim laef blong olwe long yumi. (Ol Sam 36:9; Kolosi 2:8) Bambae yumi no kam slef blong ol bisnesman blong wol, we ol kampani blong olgeta oli save brokdaon enitaem. Be bambae yumi folem advaes blong Jeova, blong glad long kakae mo klos we oli naf long yumi, mo traem mekem fasin fren blong yumi wetem God i kam fasples long laef blong yumi. (1 Timote 6:​8-12) Yumi no mas traem kasem plante samting blong wol ya, olsem we ol samting ya oli save givim gudfala fyuja long yumi. Be yumi mas bilif long Tok blong Jeova we i talem se wol ya wetem ol samting we ol man blong hem oli wantem oli stap lus, be man we i mekem wil blong God bambae i no save lus samtaem.​—1 Jon 2:17.

7. (a) ?Olsem wanem Proveb 16:16 i halpem yumi blong gat stret tingting blong luksave ol samting we oli impoten? (b) ?Wanem blesing yumi save kasem sipos yumi mekem wil blong God i kam olsem bigfala samting long laef blong yumi?

⁷ Proveb 16:16 i leftemap tingting blong yumi taem hem i talem trutok ya, se: “!I moagud blong kasem waes [waes ya we i stat from fasin fraetgud long Jeova] bitim gol! Mo i moagud blong jusum dip save i bitim selva.” Waes fasin mo dip save olsem ya, i save pusum yumi blong mekem ol samting we God i wantem, oli kam bigfala samting long laef blong yumi. ?Wanem wok we God i givim long ol Wetnes blong hem long taem blong yumi? Hemia blong prij long saed blong Kingdom mo blong halpem ol man we oli gat gud hat blong kam ol tru disaepol blong Jisas Kraes. (Matyu 24:14; 28:​19, 20) Hemia wan wok we i givim pei long yumi. Pei ya, hemia trufala fasin blong haremgud mo bigfala glad. Taswe i gat gudfala risen from wanem Baebol i talem se: “Man we i faenem waes, hem i hapi.”​—Proveb 3:13.

Blokem Ol Fasin Nogud

8. (a) Talem seken blesing we yumi save kasem from fasin fraetgud long God. (b) ?Fasin fraetgud long God i blokem yumi blong yumi no mekem wanem rabis fasin? (c) ?Olsem wanem fasin fraetgud long God i save kam wan strong paoa we i pusum yumi?

⁸ Wan narafala blesing we yumi save kasem from fasin fraetgud long God, hemia se fasin ya i blokem yumi blong yumi no mekem nogud. Olgeta we oli gat dip respek long God, oli no mekem prapa disisen blong olgeta long wanem samting i gud mo wanem samting i nogud. Oli no lukluk nogud long ol samting we God i talem se oli gud, mo oli no tingbaot ol samting we God i talem se oli nogud, olsem se oli gud. (Ol Sam 37:​1, 27; Aesea 5:​20, 21) Antap moa, wan man we i letem fasin fraetgud long God i lidim hem, i no kasem save nomo long wanem we Jeova i talem se i gud mo i nogud. Wan man olsem i laekem tumas ol samting we Jeova i laekem mo i no laekem nating ol samting we Jeova i no laekem. From samting ya, olgeta samting we hem i mekem, oli laenap wetem ol loa blong God. Taswe, olsem Proveb 16:​6 i talem, “man we i fraet long Jeova, hem i ronwe long ol fasin nogud.” Fasin ya blong fraetgud long God i save kam olsem wan strong paoa we i pusum wan man, blong kasem sam mak we hem i no naf blong kasem long prapa paoa blong hem nomo.

9. ?Olsem wanem strong tingting blong no wantem mekem God i harem nogud i gat paoa long disisen blong wan woman Meksiko, mo wanem i kamaot from?

⁹ Nating se fasin fraetgud long God i jes stat gru insaed long wan man, hem i save mekem man ya i strong blong no mekem samting we i save harem nogud from, long ful laef blong hem biaen. I gat wan eksampel blong wan woman Meksiko we hem i gat bel, ale hem i askem wan Wetnes blong Jeova long saed blong fasin blong spolem pikinini long bel. Wetnes ya i ridim sam vas blong Baebol long woman ya, mo i eksplenem se: “Man ya we i Wokem olgeta samting, i tingbaot laef olsem wan samting we i impoten tumas, mo laef blong wan pikinini we i no bon yet i sem mak.” (Eksodas 21:​22, 23; Ol Sam 139:​13-16) Ol tes blong hospital oli soemaot se maet pikinini blong woman ya bambae i handikap. Be ol samting we hem i luk long Tok blong God oli lidim hem, ale hem i mekem disisen blong karem bebi blong hem. Dokta blong hem i no moa wantem luk hem bakegen, mo man blong hem i tok strong se bambae i lego hem, be hem i stanap strong. Samtaem biaen, hem i bonem wan gel​—we i strong long bodi, i no gat problem long hem, mo i naes tumas. From bigfala fasin tangkyu we hem i gat, hem i faenem ol Wetnes, mo oli statem wan Baebol stadi wetem hem. Long wan yia nomo, hem wetem hasban blong hem tufala i baptaes. Long wan distrik asembli sam yia biaen, oli glad blong mitim bakegen faswan Wetnes we i bin toktok wetem woman ya, mo oli soem long hem naesfala smol gel blong tufala, we naoia i gat fo yia. Stret respek long God mo strong tingting blong no wantem mekem samting we God i no laekem, oli rili save gat bigfala paoa long laef blong wan man.

10. ?Fasin fraetgud long God i save givim paoa long man blong kam fri long wanem nogud fasin?

¹⁰ Fasin fraetgud long God i mekem yumi strong blong agensem plante nogud fasin. (2 Korin 7:1) Taem yumi wokemgud fasin ya, hem i save givhan long yumi blong no moa mekem ol sin long fasin haed, ol sin we yumi mo Jeova nomo i save. Hem i save mekem yumi fri long fasin blong dring alkol bitim mak mo tekem ol drag, we oli save holem yumi kalabus. Wan man long Saot Afrika, we bifo i stap tekem drag, i ekplenem se: “Taem mi kasem save long saed blong God, mi lanem blong fraet blong mekem hem i harem nogud no i kros. Mi save se hem i stap lukluk mi, mo mi wantem tumas se fasin blong mi i stret long ae blong hem. Samting ya i pusum mi blong spolem olgeta drag we mi gat, mi sakem oli godaon long toelet.” Fasin fraetgud long God i halpem plante taosen man long ol rod olsem.​—Proveb 5:21; 15:3.

Blokem Fasin Blong Fraet Long Ol Man

11. ?Gudfala fasin fraet long Jeova i save blokem yumi blong yumi no foldaon long wanem trap?

¹¹ Gudfala fasin fraet long God i blokem yumi blong yumi no fraet long ol man. Bighaf blong ol man oli gat fasin fraet long ol narafala man, samfala oli fraet bigwan, samfala smol. Ol aposol blong Jisas Kraes oli lego hem mo ronwe taem ol soldia oli holem hem long garen blong Getsemane. Biaen, long yad blong haos blong hae pris, Pita i fraet tumas long ol man, ale hem i gyaman se hem i no wan disaepol blong Jisas mo i no save hem nating. (Mak 14:​48-50, 66-72; Jon 18:​15-27) Be ol aposol oli kasem help biaen blong mekem oli kam strong bakegen long saed blong speret. Defren olgeta, long taem blong King Jeoiakim, fasin fraet i winim Yuraeja we i pikinini blong Semaea, ale hem i lego wok blong hem olsem wan profet blong Jeova mo i aot long kantri, be biaen sam man oli kasem hem mo kilim hem i ded.​—Jeremaea 26:​20-23.

12. (a) ?Proveb 29:25 i tokbaot wanem fasin we i save blokem fraet long man? (b) ?Olsem wanem tras long God i save gru?

¹² ?Wanem samting i save givhan long yumi blong winim fasin fraet long man? Afta we Proveb 29:25 i givim woning ya se “fasin fraet long fes blong ol man, hemia nao i wan trap,” hem i gohed olsem: “Man we i trastem Jeova, bambae hem i stap sef.” Fasin blong trastem Jeova, hemia nao ansa. Tras ya i kamaot from save mo ekspiryens blong wan man. Tru long stadi blong Tok blong hem, yumi luk pruf se ol rod blong Jeova oli stret. Yumi kasem save long plante samting we hem i bin mekem we oli soem se man i save trastem hem, yumi save sua long ol promes blong hem (olsem hop blong laef bakegen), mo hem i gat lav mo bigfala paoa. Ale, taem yumi mekem save ya i wok, mekem ol samting we Jeova i talem, mo sakemaot olgeta fasin we hem i talem se oli nogud, yumi stat luksave long prapa laef blong yumi, fasin kea blong hem mo fasin we yumi save trastem hem. Yumi luk ol pruf wetem prapa ae blong yumi, se hem i stap yusum paoa blong hem blong mekem wil blong hem i kamtru. Tras we yumi gat long hem i stap gru, mo wetem tras ya, lav we yumi gat long hem mo strong tingting blong no mekem wan samting we i save mekem hem i harem nogud, i stap gru tu. Tras ya i stanap long wan strong faondesen. Hem i olsem wan strong stonwol we i blokem fasin fraet long ol narafala man.

13. ?Olsem wanem fasin fraetgud long God i save halpem yumi long wok blong yumi long haos mo long skul?

¹³ Fasin blong trastem Jeova, wetem fasin fraetgud long God, i save mekem yumi stanap strong long stretfasin, taem bos blong yumi i wantem sakemaot yumi long wok blong yumi from we yumi no wantem joen long eni fasin blong stil long saed blong bisnes. (Skelem wetem Maeka 6:​11, 12.) Fasin ya blong fraetgud long God i givhan long plante taosen Kristin blong holemstrong long tru wosip, taem ol memba blong famle blong olgeta we oli no bilif, oli agensem olgeta. Hem i givhan long ol yangfala tu, we oli go long skul yet, blong no fraet blong talemaot se oli Wetnes blong Jeova, mo i mekem se oli stanap strong nating se ol narafala yangfala long skul, we oli no tinghevi long ol loa blong Baebol, oli jikim olgeta. Wan yangfala Wetnes i talem se: “Tingting blong ol yangfala ya blong wol i no impoten. Tingting blong Jeova i moa impoten.”

14. ?Olsem wanem ol man blong wok blong Jeova oli save win taem laef blong olgeta i stap long denja?

¹⁴ Sem bilif ya i givim paoa long ol tru Kristin blong holemstrong long ol rod blong Jeova taem laef blong olgeta i stap long denja. Oli save se ol man blong wol ya bambae oli mekem trabol long olgeta. Oli save se ol rabis man oli bin wipim ol aposol bifo, mo oli bin mekem Jisas Kraes i harem nogud long bodi blong hem mo kilim hem i ded. (Mak 14:65; 15:​15-39; Ol Wok 5:40; skelem wetem Daniel 3:​16-18.) Be ol man blong wok blong Jeova oli gat ful tras se hem i save givim paoa long olgeta blong stanap strong, oli save win wetem help blong God, mo Jeova bambae i sua blong givim pei long olgeta we oli stap tru long hem​—nating sipos hem i mas mekem olgeta oli laef bakegen long nyufala wol. Lav we oli gat long God wetem fasin fraetgud long hem i pusum olgeta strong, blong blokem eni samting we i save mekem hem i no glad.

15. ?Wanem i givhan long Ol Wetnes blong Jeova blong holemstrong long bilif blong olgeta long ol nogud kalabus blong ol Nasi?

¹⁵ Strong tingting ya i givhan long Ol Wetnes blong Jeova blong stanap strong tru long ol nogud samting we ol Nasi oli mekem long olgeta, long ol rabis kalabus long ol yia biaen 1930 mo 1940. Oli obei long tok blong Jisas long Luk 12:​4, 5 se: “Ol fren. Mi mi talem long yufala, bambae yufala i no fraet long olgeta ya we oli save kilim yufala i ded, be biaen oli no moa save mekem wan samting nogud long yufala bakegen. Be mi mi talemaot man ya long yufala, we i stret blong yufala i fraet long hem. Yufala i mas fraet long God, we taem i kilim man i ded, biaen i gat paoa blong sakem hem i go long seken ded. Yes, mi mi talem long yufala, bambae yufala i fraet long hem.” Olsemia nao, Gustav Auschner, wan Wetnes we i bin stap long wan rabis kalabus long Saksenhaosen, biaen hem i raetem se: ‘Ol SS oli sutum August Dickmann wetem masket. Mo oli talem se bambae oli sutum mifala evriwan, sipos mifala i no saenem wan pepa we i talem se mifala i lego bilif blong mifala. I no gat wan long mifala we i saen. Mifala i fraet moa blong mekem Jeova i harem nogud i bitim we mifala i fraet long ol bolet.’ Fraet long ol man i save lidim man blong foldaon, be fasin fraetgud long God i mekem man i stanap strong long stretfasin.

Rod Blong Sevem Laef

16. ?Wanem i givhan long Noa blong wokbaot long stret rod blong plante yia gogo kasem taem we bigfala wora i ron, mo wanem samting i kamaot long hem mo famle blong hem?

¹⁶ Noa i laef long ol las dei blong wol bifo we bigfala wora i ron. Jeova i mekem disisen blong spolem rabis wol long taem ya from rabis fasin blong ol man. Be Noa i stap long wol ya we i fulap long ol raf fasin, ol rabis fasin long saed blong seks, mo ol man we oli no wantem save long wil blong God. Nating se Noa i prij long saed blong stretfasin, “oli no save wan samting, kamkam we wora i ron bigfala, i tekemaot olgeta.” (Matyu 24:39) Be, Noa i no letem tingting blong hem i kam slak long wok we God i givim long hem. Hem i mekem “olgeta samting ya, stret olsem we God i givim oda long hem. Hem i mekem olsem nomo.” (Jenesis 6:22) ?Wanem i halpem Noa blong gohed blong mekem ol stret samting evri yia gogo Bigfala Wora i ron? Hibrus 11:7 i ansa se: ‘From we Noa i stap bilif long God, taswe hem i harem tok ya blong God, taem God i talemaot ol samting ya long hem fastaem, we i no gat man i luk yet. Taswe hem i fraetgud long God.’ Ale from samting ya, hem mo woman blong hem mo ol boe blong hem wetem ol woman blong olgeta, oli sef tru long Bigfala Wora.

17. (a) ?Nomata wanem samting ol man raonabaot oli stap mekem, yumi mas mekem wanem? (b) ?From wanem olgeta we oli fraetgud long Jeova oli rili glad?

¹⁷ Long plante fasin, taem blong yumi i sem mak long taem blong Noa. (Luk 17:​26, 27) Bakegen, wan woning i stap goaot. Revelesen 14:​6, 7 i tokbaot wan enjel we i stap flae antap long heven, mo i stap pusum ol man blong evri nesen mo laen mo lanwis blong oli “fraetgud long God mo leftemap nem blong hem.” Nating se ol man blong wol we oli stap raonabaot long yu oli stap mekem wanem, yu mas folem ol tok ya, mo singaotem ol narafala man tu blong mekem olsem. Olsem Noa, mekem olgeta samting from bilif mo soemaot fasin fraetgud long God. Sipos yu mekem olsem, bambae samting ya i save lidim yu blong sevem laef blong yu mo plante narafala bakegen. Taem yumi tingbaot ol blesing we olgeta we oli fraetgud long trufala God oli kasem, yumi agri nomo long singsing blong man blong raetem Ol Sam se: ‘Man we i fraetgud long Jeova, mo i glad tumas blong obei long ol loa blong hem, man ya nao i harem gud.’​—Ol Sam 112:1.

[Ol futnot]

?Bambae Yu Yu Ansa Olsem Wanem?

◻ ?Wanem sam nambawan blesing we oli kamaot from fasin fraetgud long trufala God?

◻ ?Olsem wanem waes we i stanap long fasin fraetgud long God, i save lukaotgud long yumi?

◻ ?From wanem fasin fraetgud long God i mekem yumi stap longwe long rabis fasin?

◻ ?Olsem wanem fasin fraetgud long God i blokem fasin blong fraet long ol man?

◻ ?Fasin fraetgud long God i save mekem se yumi kasem wanem long fyuja?

[Tok blong pija long pej 16, 17]

‘Man we i fraetgud long Jeova, mo i glad tumas blong obei long ol loa blong hem, man ya nao i harem gud.’​—Ol Sam 112:1