Ripot Long Wok Blong Kingdom

“Nem Blong Jeova i Olsem Wan Strong Haos”

YUMI stap long taem we ol samting oli olbaot. Laef blong yumi we i luk olsem se i rongud, i save jenis long wan naet nomo, mo samfala we oli no bin kasem woning oli faenem se oli stap long bigfala denja bifo we oli luksave denja ya. Denja i save kamaot from trabol long saed blong politik, man blong kilim man, disasta we man i no mekem, no bigfala sik. Long wanem samting we i kamaot, ?wan Kristin i save lukluk i go weples taem laef blong hem i stap long denja?

David, wan misinari we i stap long wan branj blong Watch Tower Society, i lanem ansa blong kwestin ya long wan ekspiryens we i mekem hem i fraet tumas. Hem i wok olsem wan draeva, ale hem i aot eli long wan moning blong karem sam brata sista we oli wok long Betel be oli stap longwe (ol volontia we oli stap afsaed long branj). Ples i tudak yet. Hem i tekem Rosalia finis mo i ron pas long wan polis stesen taem hem i harem faswan noes blong masket we i faerap.

Naoia ol samting oli stap hapen kwiktaem. Hem i harem wan noes olsem wan bigfala samting i faerap mo i haremsave se win i stap kamaot long wan long ol wil. Wantaem nomo hem i luk wan soldia i stap stanap long medel blong rod, i stap poentem masket i go stret long hem. Trifala samting ya kolosap i hapen long semtaem nomo: Oli sutum saed blong trak plante taem, ol windo oli brobrok; David mo Rosalia tufala i bendaon; soldia ya i sut i gotru long glas we i stap long fored stret long level blong ae.

Taem oli sutum trak ya plante taem bakegen, David i traem bes blong hem blong stopem trak taem hem i stap bendaon yet. David mo Rosalia tufala i ting se bambae tufala i ded. Tufala i prea long Jeova wetem bigfala voes, oli askem hem blong lukaot long tufala. !Biaen Rosalia i talem se, long ol menet ya hem i stap tingbaot se ol famle blong hem bambae oli mekem wanem taem oli harem se hem i ded!

!Tufala i Laef Yet!

Ale noes blong masket i stop mo ol glas oli no moa flae olbaot, mo David i lukluk strong i go long Rosalia. Taem hem i luk wan smol raon mak blong blad long baksaed blong Rosalia, hem i seksek tumas. Be wan pis glas we i flae i katem, i no wan bolet. Blad i stap ron long tufala leg blong Rosalia from ol glas we oli brok oli katem, be i luk olsem se hem i oraet nomo.

Ol man we oli putum ol klos blong soldia we i gat waet strap long han blong olgeta oli kam kolosap long trak mo oli talem long tufala blong leftemap han mo kamaot long trak. Wan long olgeta, we i luk olsem wan lida, i lukluk long wan soldia mo i talem se: “Mi talem long yufala finis se yufala i no mas sutum ol man we oli no joen long faet.” Soldia ya i mekem eskyus, hem i talem se hem i harem noes blong masket mo i ting se ol noes ya oli kamaot long trak ya.

Taem David i talemaot se Rosalia mo hem, tufala i Wetnes blong Jeova, oli agri long fasin blong tufala. Hem i eksplenem samting we hem i bin stap mekem, be ol soldia oli wantem yet blong stopem tufala. Ating samting we i kamaot se, eli long moning ya, wan grup blong ol ami oli aotem gavman, mo ol soldia ya oli tekem ples blong ol polis long wan polis stesen taem David mo Rosalia tufala i stap pas long trak.

Rosalia i seksek tumas be hem i stap kwaet nomo taem David i askem blong letem tufala i go. Biaen oli letem tufala i go​—tufala i no tekem trak. Tufala i mas wokbaot i go long rod we i stap kolosap blong kasem wan bas blong go long branj, nao Rosalia i go long rum blong ol sikman.

Paoa Blong Prea

David i lanem wan samting long ekspiryens ya​—neva tingting nating long paoa blong prea we yu mekem wetem ful hat blong yu, mo neva fogetem se fasin blong no fraet blong talem se yu wan Wetnes blong Jeova, plante taem fasin ya i protektem yu. Maet i kamtru long saed blong prapa laef blong yu se “nem blong Jeova i olsem wan strong haos. Ol stret man oli resis blong go haed long hem, nao hem i lukaot long olgeta.”​—Proveb 15:29; 18:10; Filipae 4:6.

[Foto Credit Line blong pija long pej 19]

Fotografía de Publicaciones Capriles, Caracas, Venezuela