‘Plante Bodi Blong Ol Tabu Man Oli Girap’

“GRAON i seksek, mo ol bigbigfala ston oli splet. Long beregraon, ol gref oli open, mo plante bodi blong ol tabu man we oli stap slip oli girap, (mo taem hem i girap bakegen finis, sam man we oli stap wokbaot i go long medel blong ol gref oli kamaot, oli go insaed long tabu taon) mo plante man oli luk olgeta.” (Matyu 27:​51-53, NW) Karl Staab, wan Katolik we i mekem wok blong talemaot mining blong Baebol, i talem se samting we i kamaot taem Jisas i ded i “wan samting we i had tumas blong save long hem.” ?Be wanem samting i hapen tru?

Epiphanius mo sam narafala ‘Papa’ blong jyos oli talem long ol man blong olgeta se ol tabu man blong God oli girap bakegen long ded mo oli go long heven wetem Jisas we i girap bakegen long ded finis. Augustine, Theophylactus, mo Zigabenus oli bilif se ol dedman ya oli girap bakegen long ded blong smoltaem nomo, be afta, oli gobak bakegen long gref blong olgeta. Erich Fascher, wan man we i mekem wok blong givim mining blong Baebol i talem se “bighaf blong ol man oli no agri” long tingting ya. Taem we oli tanem ol tok blong Matyu 27:​52, 53, plante Baebol oli mekem olsem we ol dedman ya oli girap bakegen long ded. New World Translation i no mekem olsem, hem i tokbaot ol samting we i hapen taem graon i seksek. ?From wanem?

Faswan samting: Nating we ol “tabu man” oli hu, Matyu i no talem se olgeta nao oli girap bakegen, be hem i talem se bodi, no dedbodi blong olgeta nao i girap bakegen. Namba tu samting: Hem i no talem se ol bodi ya oli kasem laef bakegen, be hem i talem se oli girap. Grik tok ya e·geiʹro, we i min se “girap,” i no minim oltaem fasin blong girap bakegen long ded. Samtaem, tok ya i min tu se man i “tekemaot” wan samting long wan hol daon, no wan man we i stap long graon i “stanap.” (Matyu 12:11; 17:7; Luk 1:69) Etkwek we i hapen long taem we Jisas i ded i openem ol gref, mo i slingim ol dedbodi i kam afsaed. Wan man Gris we i raetem ol buk, Aelius Aristides i talem se samting olsem i hapen long yia 200 K.T.a mo i no longtaem, stret long 1962, samting olsem i hapen long Kolombia.

Samting ya i stret wetem ol tijing blong Baebol. Long 1 Korin japta 15, aposol Pol i soemaot wetem sam gudfala pruf se ol dedman oli save girap bakegen long ded, be hem i no store nating long Matyu 27:​52, 53. Ol narafala man we oli raetem Baebol oli mekem sem mak nomo. (Ol Wok 2:​32, 34) Mo tu, ol dedbodi we oli kamaot long taem blong ded blong Jisas oli no save kasem laef bakegen, olsem we Epiphanius i talem, from we Jisas ‘hem i faswan we i laef bakegen long ded,’ be hem i girap tri dei nomo afta. (Kolosi 1:18) Antap bakegen, ol Kristin we tabu speret i makemaot, olgeta ya tu we oli “ol tabu man,” oli kasem promes se bambae God i mekem olgeta oli laef bakegen long ded fastaem, stret long taem we Kraes i kambak i “stap finis,” be i no long faswan handred yia.​—1 Tesalonaeka 3:​13; 4:​14-17.

Ol man we oli gat bigfala save long Baebol oli faenem i had blong eksplen long vas 53. Be samfala oli tanem vas 52 blong soemaot se etkwek i openem ol gref, nao bodi blong ol man we oli jes berem olgeta i kamaot, i stap long open ples. Wan eksampel: Wan man Jemani we i mekem wok blong givim mining blong Baebol, nem blong hem Theobald Daechsel, i tanem vas ya olsem: “Mo ol gref oli open mo plante dedbodi blong ol tabu man we oli stap ledaon oli kam antap.”

?Longtaem afta we Jisas i girap bakegen long ded, hu nao olgeta we ‘oli go insaed long tabu taon?’ Hemia i no ol dedbodi. Olsem we yumi talem finis, ol dedbodi oli kamaot long graon be oli stap nomo mo oli no mekem wan samting nating. Taswe Matyu i stap tokbaot ol man we oli kam lukluk ol gref mo oli go talemaot nyus ya long Jerusalem. From samting ya, New World Translation i tanem vas ya long wan wei we i mekem save blong yumi long Baebol i kam klia moa mo man we i ridim Baebol ya i no meksap nating long fasin blong girap bakegen long ded.

[Futnot]