?Yu Yu Rimemba?

?Yu bin faenem se ol Wajtaoa we oli jes kamaot oli givhan long yu? Nao maet i gud blong traem memori blong yu wetem ol kwestin ya:

▫ ?Sipos rabis tingting blong seks i kam insaed long tingting blong yumi, yumi mas mekem wanem?

Yumi mas jenisim samting ya long tingting blong yumi, go wokbaot, ridim sam samting, no mekem sam wok long haos. Prea tu i wan bigfala help long taem olsem. (Ol Sam 62:8)​—4/15, pej 17.

▫ ?From wanem ol yangfala oli mas lukaotgud long kaen myusek we oli stap lesin long hem?

Myusek i gat paoa blong pusum filing, pulum tingting, mo blong gat paoa long laef blong man. Plante long ol singsing we ol man oli laekem, oli stap tokbaot fasin blong seks mo ol tokhaed blong fasin blong seks, from samting ya i klia se ol yangfala oli mas lukaotgud taem oli jusum ol kaset no ol disk blong myusek.​—4/15, pej 20-21.

▫ ?Wanem mining blong tok ya “Jisas Kraes Masta blong yumi i stap finis”? (1 Tesalonaeka 5:23, NW)

Tok ya i stret long Masta Jisas Kraes we hem i tekem jea olsem King, stat long 1914 kam kasem naoia afta we hem i kam King finis long heven. (Ol Sam 110:​1, 2)​—5/1, pej 11.

▫ ?From wanem Jeova i klinim tempel blong hem long saed blong speret? (Malakae 3:​1-4)

Jeova i wantem se haos prea blong hem i mas stap long wan fasin we i klin blong mekem se taem bigfala namba blong ol man blong wosip long Jeova we oli gat hop blong laef long wol ya bambae oli kam long hem, oli save faenem ples we i gat respek long hae rul blong hem, ples we oli save holem nem blong God i tabu, mo oli save obei long ol stret loa blong hem.​—5/1, pej 16.

▫ ?Wanem ya “olgeta samting” we Jisas Kraes i givim long slef ya blong hem we hem i bin putumap hem? (Matyu 24:​45-47)

“Olgeta samting” ya, hemia olgeta samting long saed blong speret we oli stap long wol we oli blong Kraes from we hem i rul olsem King long heven. Hemia i minim tu wok blong pulum ol man long olgeta ples long wol blong oli kam disaepol blong Kraes. (Matyu 28:​19, 20)​—5/1, pej 17.

▫ ?Olsem wanem ol Kristin elda oli soem fasin ‘glad’ taem oli mekem wok blong lukaot long sipsip, olsem Pita i talem long 1 Pita 5:2?

Wan Kristin elda we i kea long sipsip bambae hem i glad nomo blong mekem wok blong lukaot long sipsip, i no from we man i fosem hem, be hem i mekem wok ya aninit long Gudfala man ya blong lukaot long sipsip, Jisas Kraes. Glad blong mekem wok i minim tu se wan Kristin man blong lukaot sipsip i stap aninit long rul blong Jeova mo hem i respektem tiokratik rod we i stap.​—5/15, pej 20.

▫ ?Jisas i minim wanem taem hem i talem se man we i wantem biaen long hem i mas “blokem ol samting we hem nomo i wantem”? (Matyu 16:24)

Blong ‘blokem ol samting we yu nomo yu wantem’ i min se yu letem Jeova i bos long yu. (1 Korin 6:​19, 20) I min se yu yu stap laef i no blong mekem yu wan yu stap haremgud be blong mekem Jeova i glad. (Rom 14:8)​—6/1, pej 9.

▫ ?Wanem samting i save mekem man i glad?

Fasin blong haremgud long gudfala fasin fren wetem Jeova, mo stap bisi long wok blong hem, oli givim trufala glad long laef blong man.​—6/1, pej 22.

▫ ?From wanem Jeova i letem Ebraham i save toktok wetem hem long plan ya blong Hem blong spolem Sodom? (Jenesis 18:​22-32)

Wan risen se Ebraham i fren blong God. (Jemes 2:23) Mo tu, Jeova i luksave ol trabol filing blong Ebraham. God i save se Lot, nefiu blong Ebraham i stap long Sodom mo Ebraham i wantem tumas blong hem i stap sef. From ol risen ya Jeova i rere blong ansa long ol kwestin blong Ebraham long saed blong plan blong Hem blong spolem Sodom.​—6/15, pej 16.

▫ ?Ol Protestan Refomesen blong ol yia 1500 i makem se oli kambak long trufala Kristin rod?

!No gat ya! Oli no mekem wan jenis i kambak long trufala Kristin rod, be Refomesen i mekem se i gat plante jyos blong nesen mo teritori we oli stap fren wetem politik blong winim sam samting mo oli stap sapotem olgeta long faet.​—7/1, pej 10-11.

▫ ?Wanem ya ol ‘gudgudfala samting long heven’ we Jisas i stap tokbaot long Matyu 6:20?

Hemia ol gudgudfala samting we neva bambae oli lus samtaem, olsem wan gudfala nem wetem Jeova mo fasin blong holemstrong long Kristin wok. Hemia sam long ol samting ya we Jeova i no save fogetem. (Hibrus 6:10)​—7/1, pej 32.

▫ ?Pita i tokbaot ol wanem fasin we oli impoten tumas long bilif blong yumi? (2 Pita 1:​5-7)

Pita i talem se yumi mas joenem, stret fasin, waes, fasin blong bos long tingting, fasin blong stanap strong longtaem, fasin fasgud long God, fasin blong laekem tumas ol brata mo laekem tumas olgeta man wetem bilif blong yumi.​—7/15, pej 13.

▫ ?Wanem woning long ol man blong God we i stap long store blong Deved we i mekem sin wetem Bat-siba? (2 Samuel 11:​2-4)

Nating se Deved i haremgud long mared blong hem, hem i letem nogud tingting blong seks i stap gru long hem. Taem hem i luk we waef blong Uria i naes, hem i no moa blokem tingting​—mo plan​—blong haremgud long seks wetem hem. Samting ya i save hapen tu long eni man blong God sipos hem i no sakem rabis tingting ya blong wantem evri samting. (Jemes 1:​14, 15)​—8/1, pej 14.