Givim Mining Blong Baebol—?Paoa Ya i Kamaot Long Hu?

WAN mining blong tok ya “givim mining,” hemia se “talemaot folem wanwan bilif, tingting, no wanem we i hapen long laef.” (Webster’s New Collegiate Dictionary) Taswe, plante taem, fasin blong givim mining blong wan samting i dipen long fasin blong laef we man i gruap long hem, edukesen blong hem, mo trening we hem i kasem taem hem i smol.

?Be, olsem wanem long fasin blong givim mining blong Baebol? ?Yumi gat raet blong eksplenem ol vas blong Baebol folem prapa “bilif blong yumi, tingting blong yumi, no samting we i hapen long laef blong yumi”? Bighaf blong ol man blong mekem dip stadi long Baebol mo ol man blong tanem Baebol i go long narafala lanwis, oli talem se olgeta oli no mekem olsem, be God nomo i lidim olgeta.

Wan eksampel, hemia futnot blong Jon 1:1 long Baebol ya A New Version of the Four Gospels, we John Lingard i prentem long 1836 aninit long nem ya “Wan Katolik.” Futnot ya i talem se: “Ol man blong evri skul oli faenem pruf blong ol defren bilif blong olgeta long Tabu Baebol: Samting we i tru se, i no Baebol we i talemaot samting ya long olgeta, be olgeta oli talem mining blong Baebol folem prapa tingting blong olgeta nomo.”

Tok ya i tru, be ?wanem i stap long tingting blong man we i raetem? Tok blong hem i sapotem fasin we hem i folem blong givim mining blong vas ya. Hem i tanem vas ya olsem se: “Bifo we bifo olgeta, ‘tok ya’ i stap; mo ‘tok ya’ i stap wetem God; mo ‘tok ya’ i God.” Man ya i tanem vas ya folem bilif blong Triniti.

?Wanem i pulum man ya blong tanem Jon 1:1 long rod we i sapotem tijing blong Triniti? ?Hem i “Baebol we i talem” long hem blong mekem olsem? No gat, from we tijing blong Triniti i no stap nating long Baebol. Makemgud wanem we buk ya The New Encyclopædia Britannica i talem long saed ya: “Wod ya Triniti mo klia tijing blong hem i no stap nating long Niu Testeman.” Antap long samting ya, E. Washburn Hopkins, we i wan tija blong Yale Yunivesiti, i talem se: “Jisas mo Pol, tufala i no save nating long tijing blong triniti; . . . tufala i no talem wan samting nating long saed blong tijing ya.”

?Yumi save talem wanem long saed blong olgeta we oli givim mining blong Jon 1:​1, no ol narafala vas blong Baebol long fasin we i sapotem Triniti? Yumi save talem olsem we Mr. Lingard i bin talem se, “i no Baebol we i talem samting ya long olgeta, be olgeta oli talem mining blong Baebol folem prapa tingting blong olgeta nomo.”

Yumi glad tumas we yumi gat Tok blong God blong lidim yumi long saed ya. Aposol Pita i talem se: “Wan bigfala samting we yufala i mas tingbaot i olsem. Wok blong talemaot mining blong tok blong ol profet we i stap long Baebol, hem i no wan wok we man i save mekem, hem wan, from we i no gat tok blong profet we i kamaot long tingting blong man nomo. Taem tok blong profet i kamaot, ol profet oli talem, be Tabu Spirit i stap givim tok long olgeta, nao oli talemaot tok we i kamaot long God.”​—2 Pita 1:​20, 21.