Olgeta We Oli Faenem Trutok Oli Glad

WAN man Finlan i faenem wan buk long haos blong hem, long wan rum antap. Nem blong buk ya, The Divine Plan of the Ages. Wantaem nomo, hem i stat ridim buk ya. I no longtaem afta, hem i tingting se, ‘Hemia trutok. Hemia trutok ya.’ Afta we hem i kamdaon long rum antap, hem i talem long woman blong hem se, “Mi mi faenem trufala skul.”

Store ya i defren, from rod we man ya i faenem trutok long hem. Be plante narafala Wetnes blong Jeova oli save talem se oli bin gat sem tingting olsem man ya. Olgeta ya oli save talemaot long yu, glad we oli kasem taem oli faenem trutok. Ol store we oli kam biaen oli soemaot samting ya.

Ol Tru Tijing Blong Baebol Oli Karem Glad

Margarita Königer i gruap long Munik, Jemani, long taem blong Namba Tu Bigfala Faet blong Wol. Oltaem hem i luk ol bom we oli stap foldaon long ol haos, ale oli bon long faea. Brata blong hem i ded long faet ya. Hem i stap go long Katolik Jyos, mo hem i harem we oli stap prea from ol soldia blong Jemani, mo from lida blong olgeta, Hitler. Afta long faet ya, hem i kasem wan skolasipa blong go long wan yunivesiti long Yunaeted Stet, folem wan plan we ol kantri oli jenisim sam studen, blong oli gat jans blong skul long narafala kantri. Hem i faenem se ol man oli kaengud long hem. Taswe hem i stap tingting se, wanem nao i pusum ol man, we oli wantem blong laef long pis, blong no trastem mo no laekem nating ol narafala long taem blong faet. Afta we hem i gobak long Munik, hem i mitim Ol Wetnes blong Jeova. Hem i mekem Baebol stadi wetem olgeta, ale hem i faenem ansa long olgeta kwestin blong hem. Hem i talem se: “Oli soem long mi long Baebol se ol rabis speret man oli joen long bisnes ya . . . Baebol i kolem olgeta ya ol ‘lida blong wol,’ mo hem i talem tu se Setan i stap ‘lidim ol man blong wol ya oli go krangke.’ . . . Taem mi tingbaot ol wok blong ol nesen mo ol man, we oli soemaot fasin blong no ona long God mo fasin blong Setan, !ansa ya i stret mo i klia long mi!”​—Efesas 6:12; Revelesen 12:9.

Margarita i gohed se: “Mi mi glad tumas blong kasem save long rod blong God blong winim ol problem long wol. Yes, i no wan plan no gavman blong man we bambae i winim, olsem ol tija blong wol oli talem. Be, Baebol i soem se wan nyufala gavman long heven, bambae i tekem wok blong lukaot long ol samting long wol ya. . . . Jisas Kraes i tijim ol man blong hem blong prea olsem se: ‘Mekem Kingdom blong yu i kam.’ . . . Mi stat blong luksave se kingdom ya i wan tru gavman, mo se gavman ya nomo bambae i putum trufala pis long olgeta ples blong wol.” Long kolosap 30 yia nao, Margarita i wok olsem wan misinari long faef kantri blong Afrika. Ol 19 laswan yia, hem i stap talemaot trutok long ol man we oli gat tingting daon long Ouagadogo, Burkina Faso.

I no Margarita nomo we i gat wan store olsem. Plante narafala oli mekem sem mak, taem oli faenemaot se ol lida blong ol skul blong Krisendom long tufala saed blong faet, oli prea long God blong oli save win. Ol man we oli gat gud hat, oli luksave se ol tok blong Baebol oli tru, taem i eksplenem se God i no joen nating long ol faet blong man, be ol faet ya oli kamaot from we “olgeta man blong wol oli stap long paoa blong Setan.” Ol man ya blong lukaot trutok, oli lanem se ol tru Kristin oli no mas “man blong wol ya,” mo oli no mas joen long ol wok blong hem. Taem ol man we oli intres long trutok, oli luksave se Ol Wetnes blong Jeova oli folem fasin ya, tingting blong olgeta i kam strong moa se oli faenem trutok. Hop mo glad blong ol man olsem i kam bigwan, taem oli kasem ansa long kwestin ya, from wanem God i letem ol rabis fasin i stap yet, mo taem oli save se i no longtaem, bambae hem i putum pis mo stretfasin long wol, tru long Kingdom blong hem.​—1 Jon 5:19; Jon 17:16; Matyu 6:​9, 10.

Ol Stret Loa Blong Baebol Oli Karem Glad

Daniel Rosero blong Ekwado, i harem se laef i no gat mining, taswe hem i stat blong dring alkol bitim mak. Jyos we hem i joen long hem, i tijim hem se hem i save tingbaot wan samting nomo, se bambae hem i ded mo go long faea blong hel. Hem i talem se, “!Bambae mi bon long faea, ale letem mi mi dring naoia!” Hem i gat eit pikinini we hem i no lukaotgud long olgeta, mo oltaem hem i stap faet wetem woman blong hem, Delia. Long wan Sande moning, laef blong hem i jenis. Ol Wetnes blong Jeova oli visitim olgeta mo statem wan Baebol stadi. Fastaem we Daniel i joen long wan seket asembli blong ol Wetnes blong Jeova, hem i luksave se hem i faenem trutok. Hem i talem se: “Fasin blong olgeta blong folem oda i mekem mi mi sapraes. Ol man oli joengud, bigfala hif blong man, evriwan tugeta. Yu save haremsave bigfala lav we oli gat long olgeta. I no gat wan man we i smok. I no gat ol rabis tok. . . . Mi rimemba tingting blong mi long taem ya se, ‘!Hemia trutok ya!’ I no fasin blong fraet long ded no fraet se wol ya bambae i lus, we i pusum mi. Be, hem i klin fasin blong ogenaesesen ya.”

Fulwan famle Rosero i kam ol Wetnes blong Jeova. Famle laef blong olgeta mo problem long saed blong mane i kamgud, taem oli stap folem ol loa blong Baebol. Delia Rosero i talem se: “Yu save, trutok blong Baebol i mekem ol gudfala samting ya i kamaot long mi. Mi no save wanem bambae i hapen long ol pikinini blong mi sipos i no bin gat Tok blong God. Seven long olgeta oli baptaes finis mo oli gohedgud. Trutok i givim wan nyufala laef, nyufala fasin glad.”

I gat plante narafala store olsem hemia blong famle Rosero. Plante man long taem blong yumi, oli harem nogud from ol problem we oli fesem. Wan risen blong samting ya, se ol man oli no moa soem respek long ol stret loa blong Baebol long saed blong ol fasin blong laef, olsem ol man bifo oli stap mekem. Bighaf blong ol skul oli no moa gat respek ya tu, maet from we oli wantem mekem i isi long ol man, no from we wol i stap jenis, ale oli ting se ol fasin blong bifo oli no stret long yumi naoia. Taswe, olsem plante narafala, famle Rosero i stap pusum han olbaot, we oli no gat Baebol blong lidim olgeta. Be, taem ol man olsem we oli gat tingting daon, oli kasem save long tingting blong God long saed blong ol stret fasin mo famle laef, oli kwik blong folem samting we oli lanem. Ol store ya oli soem gudfala frut we i save kamaot, taem yumi mekem olsem.

Yumi Mas Wokem Fasin Glad

Be, samting ya i no minim se wan Kristin i stap haremgud oltaem. I klia se, ol Kristin tu oli kasem ol problem we evri man i kasem, olsem hadtaem blong faenem wok, ol sik, mo ded. Ol Kristin oli mas faet strong oltaem tu, agensem sin mo ol slak fasin blong olgeta. Store long Baebol i talem se, Lot i “harem nogud tumas from ol fasin nogud we ol rabis man oli stap mekem,” long taon blong Sodom. Ol Kristin we oli strong long bilif, oli kasem ol filing olsem, taem oli luk ol rabis fasin we i stap gohed.​—2 Pita 2:​7, 8.

Be, olgeta we oli faenem trutok, oli gat blesing. Wan eksampel, wan man blong bilif we i stap krae from wan man i ded, i no nid blong “harem nogud olsem ol narafala man we oli no gat hop.” Sore blong hem bambae i no bitim mak. Samting ya i tru long saed blong ol narafala problem tu. Man we i faenem trutok, i save se ol trabol blong naoia, oli blong smoltaem nomo. Hop i mekem se i moa isi blong stanap strong, tru long ol hadtaem ya. Taem man i no bitim mak long ol fasin blong hem, samting ya tu i givhan long hem.​—1 Tesalonaeka 4:13.

Pol i talem long ol Kristin se: “Yufala we i joen long Masta blong yumi, oltaem yufala i mas glad. Mi talem bakegen, yufala i mas glad.” (Filipae 4:4) Samting ya i soemaot se, nating se yumi evriwan i save glad, samtaem sam samting i blokem glad blong yumi. Ol wari blong laef naoia, oli save blokem yumi olsem. Mo tu, Baebol i talem se yumi mas traehad blong wokem fasin glad, we hem i wan frut blong tabu speret blong God. (Galesia 5:22) Sipos oltaem yu stap kasem ol save long saed blong trutok, mo tingbaot ol sas samting long saed blong speret we save ya i bin givim mo i stap givim long yu, glad blong yu i no save lus. Bambae hem i kam moa strong, taem yumi kam kolosap moa long dei we God “bambae i ravemaot wora” long ae blong ol man, mo we “i no moa gat man i krae no man we i harem nogud long bodi blong hem.”​—Revelesen 21:4.

[Futnot]

[Tok blong pija long pej 8]

Plante man oli sapraes blong luk fasin glad mo oda we i stap long ol asembli blong ol Wetnes blong Jeova