Ol Elda—Lukaotgud Long Samting We i Stap Long Han Blong Yufala
“Yufala i mas stap lukaotgud long yufala mo long ol man ya we Tabu Speret i putum olgeta oli stap finis long han blong yufala. Yufala i mas stap lukaot long ol man blong jyos blong God, olsem we man blong lukaot long sipsip i stap lukaot long ol sipsip blong hem. From we God i pemaot ol man ya finis long blad blong Pikinini blong hem.”—OL WOK 20:28.
1. ?Wanem sam samting we God i putum finis long han blong ol Kristin man?
JEOVA GOD i putum wan nambawan samting long han blong ol man we oli stap long ogenaesesen blong hem long wol. ?Taem wan man i putum wan samting long han blong narafala, samting ya i minim wanem? Samting we hem i putum long han blong narafala i gud tumas, taswe narafala i mas lukaot gud long hem, mo i mas talemaot long fes blong man ya olsem wanem hem i stap lukaot gud long samting ya. Samting we God i putum long han blong ol Kristin man, hemia “stret toktok we i blong soemaot rod” long yumi. Trutok ya i kamaot long Baebol nomo. Mo “slef we i stret mo waes” i stap givimaot trutok ya olsem we hem i “kakae long stret taem blong hem.” (2 Timote 1:13, 14; Matyu 24:45-47, NW) Samting we God i putum long han blong ol man blong hem i minim minista wok tu we i joen wetem trutok. Ol man blong God oli mas talemaot trutok insaed long kongregesen mo afsaed tu. (2 Timote 4:1-5) Ol elda we tabu speret i putumap olgeta, oli joen wetem ol narafala blong talemaot Kingdom tu. Olgeta evriwan oli mas tinghae long ol samting ya we God i putum long han blong olgeta, from we ol samting ya oli gud tumas.
2. ?God i putum wanem narafala samting long han blong ol elda? ?Pita i talem wanem long saed blong wok ya?
2 Be God i putum wan narafala samting tu long han blong ol Kristin elda. Hem i givim wok long olgeta blong lukaot gud long ol sipsip blong hem. Long saed blong wok ya, aposol Pita i talem se: “Mi mi wantem givim wan tok long yufala ol elda blong jyos. Mi tu mi wan elda, mo mi luk Kraes long ae blong mi, taem hem i harem nogud long bodi blong hem. Mo mi mi gat raet blong joen long gudfala laef blong heven, we Kraes bambae i tekem i kamtru. Mi wantem talem long yufala, se yufala i mas lukaotgud long ol man we God i givim long yufala, olsem we man blong lukaot long sipsip i stap lukaotgud long ol sipsip blong hem. Yufala i mas lukaotgud long olgeta, we tingting blong yufala i glad blong mekem, olsem we God i wantem. I nogud yufala i mekem wok ya we tingting blong yufala i no glad. Mo i nogud yufala i mekem blong kasem pei long hem. Yufala i mas mekem from we tingting blong yufala i glad long hem. Bambae yufala i no kam olsem bigfala masta blong olgeta ya we God i putum olgeta long han blong yufala. Yufala i mas soemaot ol stret fasin long ol man blong yufala blong oli save folem, olsem we ol sipsip oli folem man blong lukaot long olgeta. Nao taem hemia we i Nambawan Man blong Lukaot long Sipsip bambae i kamtru, bambae hem i flasem yufala olsem we oli flasem man we i win long faet, mo i leftemap nem blong yufala i go antap we bambae i no save finis samtaem.”—1 Pita 5:1-4.
3. ?Ol Kristin elda oli mas mekem se ol man blong kongregesen oli harem olsem wanem?
3 Ol Kristin elda “oli mas olsem wan samting we i save blokem bigfala win, mo olsem wan ples blong haed taem bigfala ren i foldaon. Oli mas olsem springwora long drae ples, olsem sado blong bigfala ston long ples we i hot tumas.” (Aesea 32:1, 2) Hemia i min se ol elda oli mas mekem se ol man blong God, we oli olsem sipsip blong hem, oli harem we oli stap sef gud, tingting blong olgeta i kwaet, oli no olbaot. Ol elda, no ol man blong lukaot long sipsip we oli wok aninit long han blong Bigfala Man blong Lukaot long Sipsip, oli mas mekem “plante samting moa,” i bitim ol narafala man, from we God i putum “plante samting long han blong” olgeta. (Luk 12:48) !Tru ya, samting we God i putum long han blong olgeta blong lukaot gud long hem, hem i gud tumas!
?From Wanem God i Putum Ol Samting Ya Long Han Blong Yufala?
4. ?From wanem ogenaesesen blong Jeova i nidim plante elda?
4 I gat moa long 63,000 kongregesen blong ol Wetnes blong Jeova i stap long olgeta ples long wol. Samting ya i minim se ogenaesesen blong Jeova i nidim plante taosen taosen man we oli naf long saed blong speret blong lukaot gud long ol sipsip blong God. I gat fulap elda long evri kantri long wol, mo yumi glad long samting ya. Long olgeta kongregesen wanwan long wol, i gat samwe long 60 man blong talemaot Kingdom. Taswe ol elda oli gat plante wok blong mekem.—1 Korin 15:58.
5. ?From wanem God i givim blesing long samfala insaed long kongregesen, nao hem i putumap olgeta olsem elda?
5 ?Sipos yu yu wan elda finis, from wanem God i givim bigfala blesing ya long yu? From we yu bin mekem sam samting blong kasem ol mak long saed blong speret, we i mekem se yu naf gud blong kam elda. Wan samting we yu mekem: Yu yu stap traehad blong stadi long Tok blong God oltaem. (Josua 1:7, 8) Yu yu stap wok strong long wok blong prij, mo yu givhan long ol narafala blong kasem mak we oli save talemaot Kingdom blong God tu. Kongregesen i ‘traem yu fastaem,’ ale yu holem wok blong wan man blong givhan insaed long kongregesen. Nao yu traehad from we yu ‘wantem kam’ naf blong mekem wok blong wan elda. Yu yu luksave se wok ya i “wan gudfala wok.” (1 Timote 3:1, 10) Olsem Timote, ol brata blong yu ‘oli stap talem se yu yu wan gudfala man.’ (Ol Wok 16:2) Taem kongregesen i wantem putumap yu olsem wan elda, ating yu gat kolosap 30 yia no yu gat moa, mo yu gat sam ekspiryens long laef. Kongregesen i gat respek long yu from we yu yu bigman long saed blong speret. Oli save se yu yu wan brata we yu yu naf blong givim gudfala advaes we i kamaot long Baebol long olgeta, mo oli save se bambae yu yu no talemaot samting we olgeta oli talem long yu nomo.—Proveb 25:9, 10.
Olsem Wanem Blong Lukaot Gud Long Samting We i Stap Long Han Blong Yufala
6, 7. ?Fas Timote 4:13-15 i givim wanem advaes blong givhan long ol elda blong lukaotgud long wok blong olgeta?
6 Yes, sipos yu yu wan elda finis, i gat plante gudfala risen from wanem God i givim wok ya long yu. !Mo yu yu mas harem gud tumas long bigfala blesing ya! ?Be olsem wanem yu save lukaot gud long samting we God i putum long han blong yu?
7 Blong lukaot gud long wok blong elda we God i givim long yu, yu mas gat strong tingting mo yu mas traehad blong mekem gud ol wok ya. Insaed long ogenaesesen blong Jeova, yumi evriwan i gat defren kaen wok blong mekem. Taswe yu mas lukaot gud long stret wok blong yu wan. Yu save harem gud sipos yu soemaot fasin we i “daon moa” long ol narafala. (Luk 9:46-48; skelem wetem Jajes 7:21.) Tinghae long wok blong yu, neva letem ‘han blong yu i kam slak long wok blong yu.’ (Proveb 10:4) Yu no mas stap sem mak nomo oltaem. From help we Jeova i givim long yu, yu mas gohed long olgeta haf blong minista wok blong yu. Traem folem advaes ya we Pol i givim long Timote, se: “Yu mas mekem we wok ya blong ridim Baebol long ol man, mo blong prij, mo blong tijim olgeta long ol trutok i nambawan wok blong yu. Long taem ya we ol profet oli givim tok long yu, mo ol elda oli putum han blong olgeta long hed blong yu, God i givim paoa long yu blong yu mekem wok blong hem. Bambae yu no livim paoa ya i stap nating nomo. Yu mas stap mekem ol wok ya. Yu mas putum tingting blong yu i stap strong blong mekem olgeta samting ya, blong bambae olgeta man oli save luk we yu stap gohed moa.”—1 Timote 4:13-15.
8. ?Wanem samting i save givhan long wan elda blong givim gudfala advaes mo blong serem sam gudfala samting long saed blong speret long ol miting?
8 Yu mas lukaot gud we yu holem wan gudfala program blong stadi yu wan. From we yu yu wan elda, i stret nomo we ol man oli wantem se yu givim advaes long olgeta we i kamaot stret long Baebol. Traem tingbaot: ?Yu yu bin ridim Baebol fulwan, mo yu bin tingting dip long hem? ?No ating yu bin mekem samting ya plante taem bakegen? (Proveb 15:28) ?Olsem wanem long ol tok we yu givim long kongregesen? Yu mas rerem gud ol tok ya, mo yu mas prea long Jeova blong hem i givhan long yu blong yu save serem sam gudfala samting long saed blong speret wetem olgeta we oli kam long ol miting. “Yufala i mas talem ol gudfala tok, we i save mekem ol man we oli slak oli kam strong moa. Tok olsem i save givhan moa long ol man we oli harem.” Samting ya i tru moa long ol elda.—Efesas 4:29; Rom 1:11.
9. ?Seken Timote 4:2 i talem se ol elda oli mas mekem wanem?
9 Sipos yu yu wan elda, yu mas harem advaes ya blong Pol, se: “Yu yu mas talemaot tok blong hem. Nating we ol man oli wantem harem tok ya no oli no wantem harem, be oltaem yu yu mas strong blong talemaot. Yu mas pulum ol man blong oli bilif long hem, yu mas tok strong long ol man we oli rong, yu mas mekem tingting blong ol man oli stanap strong, mo yu mas mekem tingting blong yu i longfala blong tijimgud olgeta.” (2 Timote 4:2) Pol i stap wari se fasin blong apostasi (man we i lego trutok, i agensem hem) bambae i kam insaed long kongregesen, from we i gat samfala we ‘oli stap rao from ol toktok nomo.’ Oli stap mekem ‘ol krangke rao we oli no save wokem wan samting,’ mo ‘oli agens long trutok.’ (2 Timote 2:14-18, 23-25; 3:8-13; 4:3, 4) Nating we kongregesen i stap pastru long wan hadtaem no no gat, be Timote i mas “talemaot tok blong God.” Samting ya bambae i mekem tingting blong ol brata blong hem i strong blong blokem fasin blong apostasi. Sem mak tede, ol elda oli mas talemaot tok no mesej blong God we i save kasem hat blong ol man, mo pulum olgeta blong onagud long ol rul blong Jeova.—Hibrus 4:12.
10. ?From wanem i impoten we wan elda i wok oltaem long wok blong prij wetem olgeta long famle blong hem mo ol narafala long kongregesen?
10 Blong mekem se tok blong wan elda i gat paoa, fasin blong laef blong hem i mas laenap wetem Tok blong God. Sipos hem i ‘talemaot tok blong God’ insaed long kongregesen nomo, hem i no stap lukaotgud long wok we God i putum long han blong hem. Long sem japta, Pol i gohed blong talem long Timote se: “Yu mas mekem wok ya blong talemaot gud nyus.” Blong ‘finisim olgeta wok we God i givim long’ wan elda, hem i mas talemaot tok blong God ‘long fes blong ol man, mo long ol haos wanwan.’ (2 Timote 4:5; Ol Wok 20:20, 21) Ale, yu mas joen long wok blong prij wetem ol famle blong yu. Samting ya bambae i mekem se yu wetem waef blong yu yutufala i joen gud moa long saed blong speret. Mo tu samting ya bambae i givhan long ol pikinini blong yutufala tu. Mo yu mas spenem sam taem wetem ol narafala long kongregesen blong mekem wok blong prij wetem olgeta. Samting ya bambae i mekem se yu joen gud moa wetem olgeta, mo lav bambae i kam strong moa insaed long kongregesen. (Jon 13:34, 35) Oltaem wan elda i mas traehad blong skelem gud taem blong hem, blong hem i spenem naf taem wetem famle blong hem mo wetem kongregesen tu. Sipos hem i yusum fasin luksave blong hem, samting ya bambae i blokem hem blong hem i no spenem tumas taem long wansaed mo fogetem narasaed.
11. ?From wanem wan elda i mas traehad blong kam gud moa long wok blong tija?
11 Mo tu, blong wan elda i lukaotgud long wok we God i putum long han blong hem, hem i mas traehad blong kam moa gud long wok blong tij. Pol i talem se sipos wok blong hem i blong tij, ‘hem i mas tij.’ Sipos wok blong hem i blong leftemap tingting blong narafala man, ‘hem i mas mekem olsem.’ (Rom 12:7, 8) Taem wan tija i stanap fored long ol man mo i stap tijim olgeta, ol man we oli stap lesin long hem oli ting se hem i stap tijim olgeta i stret. Sipos wan elda i tijim samting we i rong olgeta, mo samting ya i mekem trabol long ol brata blong hem, God i save jajem hem from. Yes, taem God bambae i jajem ol tija, ‘bambae hem i save mekem i strong moa long olgeta, i winim fasin we bambae i mekem blong jajem ol narafala man.’ (Jemes 3:1, 2; Matyu 12:36, 37) Taswe ol elda oli mas stadi gud long Tok blong God, tinghevi long hem, mo mekem i wok long laef blong olgeta. Olsem ya nao, taem oli tijim ol brata mo sista long ol trutok blong Baebol, mo fasin blong olgeta i laenap wetem ol trutok ya, ol brata bambae oli tinghae tumas long tijing blong olgeta. Mo tu, fasin ya bambae i blokem ol nogud fasin olsem apostasi, blong oli no save kam insaed long kongregesen.
Blokem Ol Samting We Yu Save Foldaon From
12. ?Wanem advaes we i kamaot long Wajtaoa bifo i save givhan long ol elda blong blokem fasin blong yusum tang long wan nogud wei?
12 Ol elda oli save lukaotgud long wok we God i putum long han blong olgeta sipos oli blokem ol samting we oli save foldaon from. Wan samting ya: Rong fasin blong yusum tang, taem oli stap tij. Plante taem finis, ogenaesesen blong Jeova i talem long ol elda se oli mas blokem fasin ya. Wan eksampel: Wajtaoa blong Mei 15, 1897, i storebaot Jemes 3:1-13, mo hem i talem long ol elda se: “Sipos olgeta oli gat fasin blong toktok isi, samting ya i wan rod blong kasem bigfala blesing. Oli save pulum plante man oli kam long Masta, long trutok, blong folem rod blong stret fasin. Be sipos toktok blong olgeta i no stret, tang blong olgeta i save mekem i nogud tumas long ol narafala. Hem i save spolem bilif blong narafala, fasin blong narafala mo ol gudfala wok blong hem tu. Yes, i tru tumas se man we i tekem wok blong wan tija, hem i gat bigfala responsabiliti moa long fes blong God mo ol man . . . Man we i givim wora blong trutok long Baebol, mo i givim blesing mo paoa long ol man, i mekem olgeta oli harem gud, hem i mas lukaot se wora ya i no konkon. Hem i mas lukaot we toktok blong hem i no gyaman we i save spolem bilif blong ol man, mo i save spolem nem blong God mo jenisim trutok blong hem. Taem kongregesen i jusumaot ol brata we oli lidim ol miting, oli mas skelem fasin blong olgeta blong luk sipos oli yusum ‘tang’ blong ol long gudfala fasin. Oli no mas jusumaot man we tang blong hem i olsem faea. Oli mas jusumaot man we hem i gat tingting daon moa, kwaet fasin, we hem i save ‘blokem’ maot blong hem, mo traehad oltaem blong ‘talemaot tok blong God’ nomo.” !Tru ya, i impoten tumas we ol elda oli yusum tang blong olgeta long stret fasin!
13. ?Ol elda oli mas lukaot olsem wanem long fasin blong pleplei?
13 Tumas pleplei i save mekem wan elda i foldaon tu. Hem i mas blokem fasin ya. Pleplei i blong leftemap tingting blong man mo mekem hem i harem gud. Hem i no blong tekemaot paoa long bodi blong man mo pulum hem i lego Kristin rod. Mo tu, ol elda oli mas “no bitim mak long fasin blong olgeta.” (1 Timote 3:2, NW) Long saed blong ol pleplei, yu no mas bitim mak. Fasin ya bambae i lukaotgud long yu mo famle blong yu, mo bambae i givim wan gudfala eksampel long olgeta long kongregesen. Sipos oltaem yu wokbaot long wiken blong go pleplei samples, be ol brata blong yu oli stap wok had long wok blong prij, yu yu no stap givim wan eksampel long olgeta. Wok blong talemaot gud nyus i mas gohed. Mo ol elda oli mas lidim wok ya, oli mas wok strong blong talemaot Kingdom.—Mak 13:10; Taetas 2:14.
14. (a) ?Wanem sam eksampel long Baebol we oli soemaot se ol elda oli mas blokem rabis fasin long saed blong seks? (b) ?Taem ol elda oli givhan long ol sista long saed blong speret, oli mas lesin long wanem advaes?
14 Ol elda oli mas blokem rabis fasin long saed blong seks, blong oli no foldaon long hem. Fasin blong ol man blong wol i stap kam moa nogud oltaem. Samting ya i save gat paoa long wan elda tu, sipos hem i no blokem ol samting we Setan i yusum blong traem brekemdaon bilif blong ol man blong God. (Skelem tok ya wetem Matyu 4:1-11; 6:9, 13.) Tingbaot eksampel blong profet Balam. Hem i yusum plante rod blong traem blokem blesing blong Jeova long ol man Isrel, be hem i no save blokem. Afta, hem i ting se sipos hem i save pulum olgeta blong joen long wosip we i leftemap rabis fasin long saed blong seks, Jeova nomo bambae i tekemaot blesing blong hem long olgeta. Ale Balam i tijim wan king blong ol man Moab, Balak, “blong putum wan samting long rod blong ol man Isrel, blong oli foldaon long hem. Hem i pulum olgeta blong kakae ol kakae we oli yusum blong mekem wosip long ol gyaman god finis, mo blong mekem rabis fasin long saed blong seks.” ?Ol man Isrel oli winim traem ya? No gat. Jeova i panisim 24,000 man Isrel, oli ded from wan sik, from we oli slip wetem ol woman Moab, mo oli mekem wosip long ol gyaman god blong olgeta. (Revelesen 2:14; Namba 25:1-9) Mo tu, yumi no mas fogetem Deved. Hem i ‘wan man we God i harem gud long hem.’ Be hem i foldaon long trap ya, hem i mekem rabis fasin long saed blong seks. (1 Samuel 13:14; 2 Samuel 11:2-4) Taswe wan elda i mas lesin long advaes we “slef we i stret” i talem bakegen plante taem. Hem i neva mas traem givhan long wan sista long saed blong speret, hem wan nomo. Taem hem i lukaot long wok ya, i mas gat wan narafala elda i stap tu.—Luk 12:42.
15. ?Olsem wanem famle blong elda oli save givhan long hem blong hem i no foldaon long trap ya blong wantem plante samting tumas?
15 Mo tu, wan elda i mas lukaot we hem i no foldaon long trap blong wantem tumas samting long laef. Sipos hem i gat ol samting we hem i nidim nomo, hem i save harem gud, from we hem i save se Jeova bambae i givim inaf long hem. (Matyu 6:25-33; Hibrus 13:5) Trenem famle blong yu blong yusum gud ol samting we yufala i gat finis. Fasin blong westem ol samting i stilim taem mo i mekem i hadwok long yu blong givhan insaed long famle, long wok blong prij, blong leftemap tingting blong kongregesen, mo blong mekem wok blong Kingdom i go moa. Sipos famle blong elda oli wok gud wetem hem long saed ya, elda ya i save harem gud. Mo hem i glad long olgeta from we oli no mekem i strong long hem blong kasem ol samting we oli no rili nidim. Yes, “i moa gud we yu gat smol nomo wetem fasin fraetgud long Jeova, bitim we yu gat plante samting wetem fasin olbaot nomo.”—Proveb 15:16.
“Lukaotgud Long Yufala”
16. ?Pol i givim wanem advaes long ol elda blong Efesas?
16 Blong lukaotgud long samting we God i putum long han blong olgeta, ol elda oli mas harem advaes we Pol i givim long ol elda blong Efesas. Hem i talem se: “Yufala i mas stap lukaotgud long yufala mo long ol man we Tabu Speret i putum olgeta oli stap finis long han blong yufala. Yufala i mas stap lukaot long ol man blong jyos blong God, olsem we man blong lukaot long sipsip i stap lukaot long ol sipsip blong hem. From we God i pemaot ol man ya finis long blad blong Pikinini blong hem. Mi mi save finis, se bambae, taem mi mi aot long yufala, olgeta ya we oli olsem wael dog nomo, bambae oli kam long yufala, mo bambae oli ronem yufala man blong Jisas, olsem we yufala i sipsip nomo. Yes, i gat taem i stap kam, we sam man blong yufala bambae oli save girap, oli gyaman nomo blong lidim ol man blong Jisas oli biaen long olgeta, oli go krangke. Oraet, yufala i mas lukaot gud. Mo yufala i mas stap tingbaot we long tri fulyia, long dei mo long naet, mi mi stap tijim yufala we mi no save spel, mo we wora blong ae blong mi i stap ron from yufala.”—Ol Wok 20:28-31.
17, 18. ?Wanem advaes we Wajtaoa i prentem samwe long 80 yia bifo, i stret yet long ol Kristin elda tede?
17 Bitim 80 yia finis, Wajtaoa (Maj 1, 1909, Engglis) i talem bakegen ol advaes ya blong Pol, long ol elda long ol kongregesen. Afta, hem i gohed i se: “Long olgeta ples, ol Elda oli mas lesingud. From we olgeta we oli gat bigfala blesing moa mo oli mekem bigfala wok moa, evri taem oli kasem traem we i bigfala moa tu. Taswe [Jemes] i talem se: ‘Ol brata. I nogud plante man blong yufala bambae oli kam tija, from we yufala i save, man olsem ya bambae i kasem traem i strong moa.’ Taswe, mifala i talem strong long ol Elda we hat blong olgeta i klin mo oli stap blokem ol samting we olgeta nomo oli wantem, se oli mas stap soemaot lav mo gudfala fasin nomo long ol man. Oli mas traehad blong wokem moa ol frut blong tabu Speret, mo oli mas lukaotgud long ol sipsip blong God. Yufala i no mas fogetem se ol sipsip oli blong Masta blong yumi nomo. Yufala i gat wan wok blong mekem long fes blong Masta ya, mo long fes blong olgeta tu. Mo yufala i no mas fogetem tu se yufala i mas lukaot long laef blong olgeta (mo ol ‘intres’ long laef blong olgeta), from we yufala i mas talemaot ol samting ya long fored long Nambawan Man blong Lukaot long ol Sipsip. Mo yufala i mas tingbaot se long olgeta samting, yufala i mas soemaot lav. Yufala i no mas fogetem ol stret tijing, be samting we i impoten moa, yufala i mas leftemap Speret blong Masta long medel blong olgeta memba blong kongregesen. Olsem nao, oli save ‘joen blong kasem presen blong ol enjel we oli stap long laet.’ Mo stret long wil blong God, oli no save foldaon long trabol taem ya. Be from we oli mekem wok blong God finis, oli save stanap strong olsem wan Bodi we i Joen long Kraes, oli Memba blong Hem, oli Givim Laef blong Olgeta olsem Hem, mo oli Joen wetem Hem blong Rul.”
18 Ol tok ya oli go stret long ol elda we tabu speret i makemaot olgeta mo ol narafala brata we tingting blong olgeta i laenap wetem ogenaesesen blong Jeova long taem ya. !Be advaes ya i stret long yumi tede tu! Olgeta Kristin elda, nating we bambae oli laef long heven long fyuja no long wol nomo, oli mas lukaotgud long olgeta. Mo oli mas lukaotgud long samting we God i putum finis long han blong olgeta, oli mas kea gud long ol sipsip blong God.
Bambae Fulap Glad i Kamaot From
19, 20. ?From wanem yumi save talem se bigfala glad i kamaot taem ol elda oli lukaotgud long wok we God i putum long han blong olgeta?
19 Taem wan Kristin elda i stap lukaot gud long samting we God i putum long han blong hem, hem i save harem gud, hat blong hem i save glad. Wok ya i hevi, be sipos yu mekem gud, bambae yu harem gud. Taswe yu mas keaful, yu mas prea oltaem, mo yu mas traehad long wok blong yu. Lukaot gud long wok blong elda we God i putum finis long han blong yu. Sipos yu mekem olsem, bambae long fyuja yu save talem olsem man ya we i karem pen blong makemaot ol man, i se: “Mi mi finisim olgeta wok ya olsem we yu yu talem long mi.”—Esikel 9:3, 4, 11.
20 Yes, sipos yu yu wan elda, wok strong long wok blong yu mo stap gohed long fasin ya. Olsem ya nao, ol man oli save talem olsem we oli bin talem long saed blong Noa, se: “Hem i mekem olsem [we God i talem].” (Jenesis 6:22) From hadwok blong yu, kongregesen bambae i kasem plante blesing. Be antap long ol samting ya, ol kongregesen we oli wok strong mo oli bisi long wok blong God, mo ol gudfala elda oli stap lukaot long olgeta, oli leftemap Jeova mo oli givim ona long hem. Be sipos yu yu wantem se Masta i talem long yu se: “Ei, wan gudfala wok ya. Yu yu wan gudfala man,” i gat sam samting moa we yu yu mas mekem. (Luk 19:17) From we yu yu wan elda, yu mas lukaot long sipsip blong God long kaengud fasin nomo.
?Bambae Yu Yu Talem Wanem?
◻ ?Antap long wok blong ol Kristin man, God i putum wanem samting long han blong ol elda?
◻ ?Wanem sam samting we wan elda i save mekem blong lukaotgud long ol samting we God i putum long han blong hem?
◻ ?Blong lukaotgud long wok blong hem, wanem sam samting we elda i mas blokem, blong hem i no foldaon long olgeta?
◻ ?From wanem i gat bigfala glad i kamaot taem ol elda oli lukaotgud long wok blong olgeta?
[Tok Blong Pija Long Pej 18]
Ol Kristin elda oli mas olsem “wan ples blong haed, taem bigfala ren i foldaon”
[Tok Blong Pija Long Pej 20]
Sipos yu yu wan elda, yu mas wok oltaem long wok blong prij wetem famle blong yu mo ol narafala tu
[Tok Blong Pija Long Pej 21]
Sipos yu yu elda, mo yu yu lukaotgud long wok blong yu, kongregesen bambae i kasem blesing from