Ol Trabol Blong Envaeronmen Oli Stap Spolem Wol ?Baebol i Talem Wanem?

“Ol man oli stap mekem plante nogud samting we bambae i lidim yumi i go long wan disasta long saed blong weta. Sam bigfala taon bambae oli draon. Ples bambae i hot bitim olgeta taem bifo. Bambae i gat ol bigbigfala hariken, mo plante ples bambae oli sot long wota. Milian plant mo animol bambae oli lus olgeta. Hemia i no wan giaman stori. Ol saentis oli talem se samting ya bambae i rili hapen, sipos ol gavman oli no jenisim fasin blong olgeta blong yusum ol gudfala samting long wol.”—Ol tok blong António Guterres, sekretari-jenerol blong Yunaeted Nesen, long saed blong ripot blong Intergovernmental Panel on Climate Change we i kamaot long 4 Eprel 2022.

“Ol saentis oli givim woning se long ol yia we i kam, ol disasta bambae oli kamaot from ol jenis long weta we i mekem wol i hot tumas, mo hemia i save spolem klosap olgeta evriwan long ol 423 nasnal pak [long Yunaeted Stet]. Ol nogud samting we oli save hapen oli saon olsem samting we maet Baebol i tokbaot: faea mo wota i kavremap evri samting, aes i ron, solwota i kam antap, mo ples i hot bitim mak.”—“Flooding Chaos in Yellowstone, a Sign of Crises to Come,” The New York Times, 15 Jun 2022.

?I gat rod blong stretem ol trabol ya long saed blong envaeronmen? ?Hu bambae i stretem? Traem tingbaot samting we Baebol i talem.

Baebol i talemaot ol trabol long saed blong envaeronmen

Baebol i talem se God bambae i “spolem ol man ya we oli stap spolem wol.” (Revelesen 11:18) Yumi lanem tri samting long vas ya:

1. 1. Samting we ol man nao oli mekem bambae i spolem wol ya.

2. 2. Ol trabol ya bambae oli finis.

3. 3. I no ol man, be God nomo, bambae i stretem ol trabol long saed blong envaeronmen.

Wol blong yumi i gat wan gudfala fiuja

Baebol i talem se “wol i stap blong olwe.” (Prija 1:4) Ol laef samting long wol bambae oli stap blong olwe.

• “Ol stret man bambae oli tekem wol ya i blong olgeta, mo bambae oli stap long hem blong olwe.”—Ol Sam 37:29.

Ol samting we i kam nogud long wol blong yumi bambae i kam gud bakegen.

• “Draeples mo graon we i drae we i drae bambae tufala i harem gud, mo draeples bambae i glad mo i gat plante flaoa long hem olsem flaoa ya safron.”—Aesea 35:1.