Taem Blong Stap Wekap

“Gud nyus ya i mas go long olgeta man long wol fastaem. . . . Be man we i stanap strong gogo olgeta samting ya i finis, bambae God i sevem hem.”​—MAK 13:​10, 13.

1. ?From wanem yumi mas stanap strong mo no letem tingting blong yumi i foldaon?

!YES, yumi mas stanap strong long medel blong ol man blong naoia, we oli no gat bilif mo oli go krangke! Stat long 1914 i kam, ol man blong naoia oli kam fulap long kruked fasin, olsem long taem blong Jisas. Mo tede kruked fasin ya i kasem olgeta ples blong wol. Long ol ‘las dei ya,’ laef we aposol Pol i tokbaot se “bambae i kam strong tumas,” i stap kasem olgeta man. ‘Ol man nogud, mo ol man blong gyaman oli stap gohed blong kam nogud moa.’ I klia se, “olgeta man blong wol oli stap long paoa blong Setan,” we naoia i stap traehad laswan blong spolem wol. !Be yumi no mas letem tingting blong yumi i foldaon! I gat wan “bigfala trabol” i stap kam we bambae i karem gladtaem blong olwe long olgeta man we oli laekem stret fasin.​—2 Timote 3:​1-5, 13; 1 Jon 5:19; Revelesen 7:14.

2. ?Olsem wanem ol profet tok oli kamtru long 1914?

² Yumi glad tumas se, Jeova i putumap Masta Jisas Kraes finis olsem king long heven, blong mekem hem i rere blong karemaot olgeta samting we oli olsem enemi blong ol man, we oli stap mekem laef blong olgeta i strong tumas. (Revelesen 11:15) Long laswan handred yia, wan nambawan profet tok we Daniel i raetem i kamtru, olsem we wan profet tok blong hem i kamtru long taem we Mesaea i kam. Daniel 4:​16, 17, 32 i talem se hemia we i gat raet blong rul long wol ya, bambae i no moa rul gogo “seven taem” i pas. Taem profet tok ya i kamtru long fasin we i bigwan moa, ol seven taem ya oli minim seven yia, folem rul blong Baebol blong kaontem ol yia. Wanwan yia ya oli gat 360 ‘dei,’ no 2,520 yia long olgeta evriwan.a Ol yia ya oli stat long 607 B.K.T., taem Babilon i stat purumbut long kingdom blong Isrel, mo oli finis long yia 1914 K.T., taem Jisas i kam King long heven olsem Man we i gat raet blong rul long ol man. Nao “taem blong ol hiten man” i finis. (Luk 21:24) Be ol nesen oli no wantem obei long Kingdom blong Mesaea we i stanap blong rul.​—Ol Sam 2:​1-6, 10-12; 110:​1, 2.

3, 4. (a) ?Olsem wanem ol samting we oli hapen long faswan handred yia, oli sem mak long taem blong yumi? (b) ?Wanem sam impoten kwestin we yumi save askem?

³ Taem namba 70 wik blong ol yia (29-36 K.T.) i kam kolosap, mo bakegen taem yia 1914 i kam kolosap, ol man we oli fraetgud long God oli stap wet long Mesaea. !Mo i tru se hem i kam! Be, long tufala taem ya, fasin blong hem blong kamtru i defren long hemia we ol man oli stap tingbaot. Mo tu, afta we smoltaem i pas, “ol man we oli stap laef” long tufala taem ya, oli kasem panis folem oda blong God.​—Matyu 24:34.

⁴ Long laswan haf we yumi stadi long hem, yumi tokbaot olsem wanem ol rabis man Jyu we oli wantem se Jisas i ded, oli kasem en blong olgeta. ?Be, olsem wanem long ol man nogud long taem blong yumi, we oli stap agensem Jisas mo oli no wantem save long hem? ?Wetaem bambae jajmen i kamtru agensem ol man long taem blong yumi we oli no gat bilif?

“!Stap Lukaotgud!”

5. (a) Talem wan gudfala risen from wanem yumi no nid blong save stret ‘dei mo taem’ blong Jeova. (b) ?Gospel blong Mak i talem wanem waes advaes we Jisas i givim long en blong profet tok blong hem?

⁵ Jisas i talem ol profet tok blong ol samting we oli mas hapen bifo long taem blong “bigfala trabol.” Nao hem i ademap se: “Dei blong samting ya, mo taem blong hem, i no gat man naoia we i save. Ol enjel blong heven, mo mi tu we mi Pikinini blong God, be mifala i no save. Papa blong mi, hem nomo i save.” (Matyu 24:​3-36; Mak 13:​3-32) Yumi no nid blong save stret taem blong ol samting we oli mas kamtru. Tingting blong yumi i mas stap long fasin blong lukaotgud. Yumi mas mekem bilif blong yumi i kam strong, mo stap bisi long wok blong Jeova, be i no blong traem faenemaot wan stret dei. Jisas i finisim bigfala profet tok blong hem se: “Yufala i mas stap lukaotgud, oltaem yufala i mas wekap, from we yufala i no save taem ya we olgeta samting ya bambae oli kam. . . . Yufala i mas lukaotgud . . . Tok ya we mi talem long yufala, mi stap talem long olgeta man, se ‘Yufala i mas stap lukaotgud.’” (Mak 13:​33-37, NW) I gat denja i stap long tudak blong wol ya. !Yumi mas stap wekap!​—Rom 13:​11-13.

6. (a) ?Bilif blong yumi i mas stanap strong long wanem samting? (b) ?Olsem wanem yumi save ‘kaontem ol dei blong yumi’? (c) ?Wanem stampa mining blong tok ya “ol man we oli stap laef naoia” we Jisas i yusum?

⁶ Yumi mas lesingud long ol profet tok blong Baebol long saed blong ol las dei blong rabis wol ya. Be tu, yumi mas mekem bilif blong yumi i stanap strong long gudfala sakrifaes blong Jisas Kraes, mo long ol nambawan promes blong God we bambae oli kamtru from sakrifaes ya. (Hibrus 6:​17-19; 9:14; 1 Pita 1:​18, 19; 2 Pita 1:​16-19) Ol man blong Jeova oli wantem tumas blong luk en blong rabis fasin blong wol ya. Taswe, samtaem oli bin traem blong makemaot stret taem blong “bigfala trabol” ya. Oli bin traem kaontem hamas yia ‘ol man blong naoia’ (generation), stat long 1914, bambae oli stap laef. Nao oli bin traem blong joenem samting ya wetem stret taem blong “bigfala trabol.” Be, yumi ‘soem wan tingting we i waes,’ taem yumi tingbaot moa olsem wanem yumi save ‘kaontem ol dei’ blong yumi blong presem Jeova wetem glad, i bitim we yumi traem makemaot hamas yia no dei i stap long laef blong ol man blong naoia. (Ol Sam 90:12) Taem Jisas i yusum tok ya “ol man we oli stap laef naoia,” hem i no stap givim wan rul blong folem blong makemaot taem. Be hem i stap tokbaot ol man blong wan stret taem long histri, wetem ol fasin blong olgeta.b

7. ?Wan tija blong histri i raetem wanem long saed blong “ol man we oli stap laef long 1914,” mo olsem wanem samting ya i joen wetem profet tok blong Jisas?

⁷ Folem toktok antap, wan tija blong histri, Robert Wohl, i raetem long buk blong hem The Generation of 1914, se: “Yumi no eksplenem wan stret taem long histri blong ol man, tru long dei mo yia we taem ya i stat mo i finis . . . Yumi no makemaot samting ya from ol namba nomo.” Be hem i poenemaot se Faswan Bigfala Faet Blong Wol “i seraotem laef blong bifo wetem laef blong tede, long bigfala fasin.” Mo hem i ademap se: “Olgeta man we oli laef tru long faet ya oli no save fogetem se long Ogis 1914, wan wol i finis mo wan nyuwan i stat.” !Samting ya i tru tumas! Toktok ya i makemaot stampa poen blong bisnes ya. Stat long 1914, ‘ol man blong naoia’ oli luk plante nogud jenis. Oli luk we blad blong plante milyan man i ron long wol ya. Ol faet, fasin blong traem kilimaot sam ful laen blong man, fasin blong sakem bom from politik, fasin blong kilim man i ded, mo fasin blong brekem loa, i kamaot long olgeta ples blong wol. Kakae i sot, sik, mo rabis fasin long saed blong seks, oli kavremap wol ya tu. Jisas i talemaot profet tok ya se: “Taem yufala [ol disaepol blong hem] i luk we ol samting ya oli kamtru, bambae yufala i save se nyufala wol ya we God i king long hem, bambae i no longtaem hem i kamtru. Tru mi talem long yufala, ol man we oli stap laef naoia bambae oli no save ded evriwan, gogo olgeta samting ya bambae oli kamtru.”​—Luk 21:​31, 32.

8. ?Olsem wanem ol profet blong Jeova oli soemaot se yumi nidim blong stap wekap?

⁸ !Yes, taem ya we bambae Kingdom blong Mesaea i win fulwan i kolosap nao! Taswe, ?yumi save winim wanem sipos yumi traem faenemaot ol stret dei, no makemaot hamas yia i stap long laef blong ol ‘man blong naoia’? !Yumi no winim wan samting! Habakuk 2:3 i talemaot klia se: “Vison ya bambae i kamtru long stret taem blong hem nomo. Bambae hem i hareap blong kasem en blong hem, mo hem i no save gyaman. Nating sipos hem i tektaem, be yu mas rere. From we bambae hem i kamtru. Hem i no save let.” Dei blong Jeova blong givim panis i stap spid, i kam kolosap moa.​—Jeremaea 25:​31-33; Malakae 4:1.

9. ?Wanem ol samting we oli stat blong kamaot long 1914 we oli soemaot se taem i sot?

⁹ Taem Kingdom blong Kraes i stat rul long 1914, hem i sakemaot Setan long heven i kamdaon long wol. Samting ya i minim ‘sore tumas long graon, from we Setan i kamdaon finis long yu mo hem i kros tumas, from we i save, i gat smol taem nomo blong hem i stap yet.’ (Revelesen 12:12) Tru tumas, taem ya i sot, taem yumi skelem wetem olgeta taosen yia blong rul blong Setan. !Kingdom i stap kolosap! !Dei blong Jeova mo stret taem we bambae hem i jajem ol rabis man blong naoia, i kolosap tu!​—Proveb 3:25; 10:​24, 25.

‘Ol Man Blong Naoia’ We Bambae Oli Lus

10. ?Olsem wanem “ol man we oli stap laef naoia” oli sem mak long ol man long taem blong Noa?

¹⁰ I gud yumi lukluk moa long tok blong Jisas long Matyu 24:​34, 35: “Tru mi talem long yufala, ol man we oli stap laef naoia, bambae oli no save ded evriwan, gogo olgeta samting ya bambae oli kamtru. Bambae skae mo graon, tufala i lus, be tok blong mi bambae i no save lus samtaem.” Ol tok blong Jisas we oli kam biaen oli soem se ‘i no gat man we i save dei no taem ya.’ Moa impoten, hem i soem se yumi mas stap longwe long ol trap raonabaot long yumi, long taem ya we ol man blong naoia oli stap laef long hem. Taswe Jisas i ademap se: “Olsem we long taem blong Noa, ol man oli no rere, oraet, long taem we mi, mi Pikinini blong Man bambae mi kamtru, bambae i olsem. Long taem ya bifo, taem we wora i no ron bigfala yet, ol man oli stap kakae, oli stap dring, oli stap mekem mared, kam kasem taem we Noa i go insaed long bigfala sip blong hem. Mo olgeta ya oli no save wan samting, kamkam we wora i ron bigfala, i tekemaot olgeta. Nao long taem ya we mi, mi Pikinini blong Man bambae mi kamtru, bambae i olsem.” (Matyu 24:​36-39) Long ples ya, Jisas i talem se ol man we oli laef long taem blong hem oli olsem ol man long taem blong Noa.​—Jenesis 6:​5, 9; futnot.

11. ?Olsem wanem Jisas i skelem ‘ol man we oli stap laef’ long tu defren taem long histri, olsem Matyu mo Luk i tokbaot?

¹¹ Hemia i no fastaem we ol aposol oli harem Jisas i skelem tufala ‘taem ya we ol man oli stap laef long hem.’ Sam dei bifo, hem i tokbaot hem wan se: “Pikinini blong Man bambae i harem nogud long plante samting. Ol man we oli laef naoia bambae oli agens long hem. Olsem we long taem blong Noa, ol man oli no rere, nao long taem blong Pikinini blong Man, bambae i olsem.” (Luk 17:​24-26) Taswe, Matyu japta 24 mo Luk japta 17 oli yusum sem fasin blong skelem tufala taem ya. Long taem blong Noa, “wol [we] i kam nogud tumas from ol rabis fasin blong ol man ya” mo we i lus taem Bigfala Wora i ron, hemia nao “ol man we oli laef naoia.” Long taem blong Jisas, ol man Jyu we oli lego tru bilif, mo we oli sakemaot Jisas, olgeta ya nao oli “ol man we oli laef naoia.”​—Jenesis 6:​11, 12; 7:1.

12, 13. (a) ?Tede, hu ya “ol man we oli stap laef naoia” we oli mas lus? (b) ?Olsem wanem ol man blong Jeova naoia oli stap stanap strong long medel blong “ol man we oli gat ol krangke fasin, mo oli agens long evri samting”?

¹² Taswe, tede, taem profet tok blong Jisas i kamtru laswan, “ol man we oli laef naoia” i minim ol man blong wol ya we oli luk saen blong pruvum se Kraes i stap finis, be oli no jenisim laef blong olgeta. Yumi ol disaepol blong Jisas, yumi no wantem joen long fasin blong laef blong ‘ol man blong naoia.’ Nating se yumi stap long wol ya, yumi no mas joen long hem, “from taem blong ol samting ya i kam kolosap.” (Revelesen 1:3; Jon 17:16) Aposol Pol i givim advaes long yumi se: “Yufala i mas mekem olgeta samting, be long fasin ya we yufala i no moa tok, yufala i no tok agens long ol samting ya. Nao long fasin ya, bambae tingting blong yufala i klin gud, mo i no gat man we i gat poen long yufala. Bambae yufala i olsem ol pikinini blong God we yufala i stret gud olgeta, be yufala i stap long medel blong ol man [generation] we oli gat ol krangke fasin, mo oli agens long evri samting. Long medel blong olgeta ya, bambae yufala i saenaot olsem ol sta we oli stap saenaot long skae.”​—Filipae 2:​14, 15; Kolosi 3:​5-10; 1 Jon 2:​15-17.

¹³ Blong “saenaot olsem ol sta,” yumi mas soemaot ol klin Kristin fasin. Be, moa impoten, yumi mas mekem wok we profet tok blong Jisas i tokbaot se: “Gud nyus ya blong kingdom, bambae oli talemaot long olgeta ples long wol we i gat man long hem, blong oli wetnes long olgeta nesen. Nao biaen, en bambae i kam.” (Matyu 24:14, NW) I no gat wan man we i save talem stret taem we en ya bambae i kam. Be, yumi save se en blong ‘ol rabis man blong naoia’ bambae i kamtru taem wok blong givim wetnes long “olgeta ples long wol” i kasem mak we God i wantem.​—Ol Wok 1:8.

‘Dei Mo Taem Ya’

14. ?Jisas mo Pol i givim wanem advaes long saed blong ol ‘dei mo taem,’ mo yumi mas mekem wanem from?

¹⁴ Taem wok blong givim wetnes long olgeta ples blong wol i go kasem mak we Jeova i wantem, hemia nao i stret ‘dei mo taem’ blong hem i finisim rabis fasin blong wol ya. Yumi no nid blong save stret dei ya bifo we i kamaot. Taswe, folem eksampel blong Jisas, aposol Pol i givim advaes ya se: “Ol brata, long saed blong ol dei mo taem blong ol samting ya, yufala i no gat nid se mi raet i go long yufala. From we yufala i save gud finis we dei blong Jeova i stap kam stret olsem man blong stil i kam long naet. Taem bambae ol man oli talem se: ‘!Pis mo seftaem!’ long taem ya nao, bambae trabol i kam blong spolem ol man ya olgeta. Bambae trabol ya i kam long olgeta wantaem nomo, olsem woman we i gat bel, taem hem i harem nogud blong bonem pikinini. Mo olgeta bambae oli no save ronwe nating.” Makemgud we Pol i pulum tingting blong yumi se: ‘Taem ol man oli stap talem se.’ Yes, taem oli stap tokbaot “pis mo seftaem,” wantaem nomo bambae jajmen blong God i kamtru. Hemia wan taem we ol man oli no stap tingbaot nating se bambae i kamtru. Advaes ya blong Pol i stret nomo se: “I no stret blong yumi stap slip olsem ol narafala man. I stret blong yumi wekap, we hed blong yumi i klia gud.”​—1 Tesalonaeka 5:​1-3, 6, NW; lukluk ol vas 7-11 tu; Ol Wok 1:7.

15, 16. (a) ?From wanem yumi no mas ting se Amageden i stap longwe yet long fyuja bitim we yumi bin tingbaot? (b) ?Olsem wanem rul blong Jeova bambae i kam hae moa i no longtaem?

¹⁵ ?Olsem wanem nao long save ya we i kam moa klia long saed blong “ol man we oli stap laef naoia”? ?I minim se Amageden i stap longwe moa bitim we yumi bin tingbaot? !No gat! Nating se yumi no bin save stret ‘dei mo taem’ blong hem, be Jeova God i bin save taem ya olwe, mo hem i no save jenis samtaem. (Malakae 3:6) I klia se, wol ya i stap kam moa nogud mo i stap kam kolosap moa long taem ya we bambae hem i lus. Nid ya blong stap wekap i moa impoten naoia bitim ol narafala taem bifo. Jeova i soemaot long yumi finis “ol samting we bambae i no longtaem, oli kamtru.” Taswe, yumi mas soem se yumi bilif fulwan we yumi mas hareap blong mekem wok blong hem.​—Revelesen 1:1; 11:18; 16:​14, 16.

¹⁶ !Naoia we en ya i kam kolosap moa, yu mas stap wekap, from we Jeova i rere blong spolemgud olgeta wol ya blong Setan! (Jeremaea 25:​29-31) Jeova i talem se: “Bambae mi mi mekem we mi hae moa, mi tabu. Mo plante nesen bambae oli lukluk, nao oli save mi. Mo tru, bambae oli save se mi mi Jeova.” (Esikel 38:23) !Bigfala ‘dei blong Jeova’ we hem i jusum finis blong spolem rabis fasin blong wol ya, i stap kam kolosap tumas!​—Joel 1:15; 2:​1, 2; Emos 5:​18-20; Sefanaea 2:​2, 3.

“Nyufala Skae Mo Nyufala Wol” We i Gat Stret Fasin Nomo Long Hem

17, 18. (a) ?Folem tok blong Jisas mo Pita, olsem wanem “ol man we oli stap laef naoia” bambae oli lus? (b) ?From wanem yumi mas stap lukaotgud long saed blong ol fasin mo ol wok we oli joen wetem fasin fasgud long God?

¹⁷ Long saed blong ‘ol samting we bambae oli kamtru,’ Jisas i talem se: “Bambae skae mo graon, tufala i lus, be tok blong mi bambae i no save lus samtaem.” (Matyu 24:​34, 35) Ating Jisas i stap tingbaot “skae mo graon” blong ‘ol man blong naoia.’ Hemia ol rula blong wol mo ol man we oli stap aninit long olgeta ya. Aposol Pita i yusum semfala tok ya taem hem i tokbaot “skae mo graon we i stap naoia.” Oli stap ‘wet blong bambae faea i kasem tufala, mo blong bigfala Dei we God bambae i jajem ol man we oli no obei long hem, nao oli lus.’ Nao, hem i talem se ‘dei blong Jeova bambae i kam olsem wan man blong stil, mo skae [ol gavman] bambae i lus’ wetem olgeta rabis man, no “graon,” mo ol nogud wok blong olgeta. Biaen, aposol ya i pulum yumi blong ‘stap tabu, olsem ol man blong God, mo mekem ol fasin we hem i wantem, taem yumi stap wet long dei blong Jeova, we yumi stap wok blong mekem i kamtru kwik. Long dei ya, bambae faea i kakae skae we i finis olgeta, mo ol sta bambae oli ronaot long faea ya we i hot tumas.’ ?Wanem samting bambae i kamaot biaen? Pita i pulum tingting blong yumi i go long wan “nyufala skae mo nyufala wol, we stret fasin nomo bambae i stap long hem.”​—2 Pita 3:​7, 10-13.c

¹⁸ “Nyufala skae” ya, we i minim rul blong Jisas Kraes mo ol narafala we oli rul wetem hem long Kingdom, bambae i mekem plante blesing i kamaot long “nyufala wol,” we i minim ol man blong stret fasin long wol. ?Bambae yu yu joen wetem ol man ya? !Sipos yes, yu yu gat gudfala risen blong glad bigwan from nambawan fyuja we bambae i kam!​—Aesea 65:​17-19; Revelesen 21:​1-5.

19. ?Wanem nambawan blesing we yumi gat naoia?

¹⁹ Yes, wan kampani blong man we oli gat stret fasin, we oli kamaot long “ol man we oli stap laef naoia,” oli stap hivap naoia. Tede ‘slef we i stret mo waes’ we tabu speret blong God i makemaot finis, i stap givimaot tijing blong God, stret olsem ol tok blong Ol Sam 78:​1, 4 i talem, se: “Ol man blong mi, yufala i lesin long tok ya blong mi we bambae mi tijim yufala long hem, yufala i lesingud long ol samting ya we bambae mi talem. Bambae yumi no haedem long ol pikinini blong yumi, we Hae God i gat paoa, mo we hem i stap mekem ol merikel mo ol bigbigfala wok.” (Matyu 24:​45-47) Long yia ya, long Epril 14, twelef milyan man long wol oli joen long bitim 75,500 kongregesen long samwe 230 kantri, blong mekem Memoriol blong ded blong Kraes. ?Yu yu bin stap wetem olgeta ya? I gud yu bilif strong long Jisas Kraes mo ‘singaot long nem blong Jeova blong kasem sef.’​—Rom 10:​10-13.

20. ?From we “i no gat plante taem i stap yet,” olsem wanem yumi mas stap wekap, mo yumi mas gat wanem tingting long saed blong fyuja?

²⁰ Aposol Pol i talem se: “Yumi no gat plante taem i stap yet.” Taswe, naoia i taem blong stap wekap moa bitim bifo, mo stap bisi long wok blong Jeova. Long semtaem, yumi stap stanap strong tru long ol traem mo fasin agens we ol rabis man blong naoia oli stap mekem long yumi. (1 Korin 7:29; Matyu 10:22; 24:​13, 14) Yumi mas gohed blong lukaotgud, mo blong luksave olgeta samting we Baebol i talem se oli mas kamaot long “ol man we oli stap laef naoia.” (Luk 21:​31-33) Sipos yumi ronwe long olgeta samting ya, mo yumi stanap long fored blong Pikinini blong Man long fasin we God i agri long yumi, bambae yumi save kasem presen ya, laef we i no save finis.

[Ol futnot]

Ol Kwestin Blong Tingtingbak:

◻ Taem yumi luk olsem wanem ol tok blong Daniel 4:​32 oli bin kamtru, ?yumi mas mekem wanem naoia blong “stap lukaotgud”?

◻ ?Gospel blong Matyu mo Luk oli soem se “ol man we oli stap laef naoia” i minim hu?

◻ Taem yumi stap wet long ‘dei mo taem’ ya, ?yumi stap luk wanem samting, mo wanem samting we yumi mas mekem?

◻ Taem yumi tingbaot “nyufala skae mo nyufala wol,” we stret fasin nomo bambae i stap long hem, ?samting ya i mas pulum yumi blong mekem wanem?

[Tok blong pija long pej 17]

I no longtaem, ol man we oli stap safa bambae oli haremgud, taem ol rabis man blong naoia we oli raf, bambae oli lus

[Credit Line]

Alexandra Boulat/Sipa Press

[Credit Line]

Left and below: Luc Delahaye/Sipa Press

[Tok blong pija long pej 18]

Nambawan “nyufala skae mo nyufala wol”i stap jes long fored blong olgeta laen blong man