?From Wanem Oli Mekem Olsem?

¹ Wan profet tok i talem long saed blong Kraes se, ‘strong tingting long saed blong haos blong God i stap wok insaed long hem, olsem faea we i stap laet.’ (Sam 69:9) Strong tingting blong Jisas long saed blong trufala wosip blong Jeova, i pusum hem blong putum wok blong prij i stap long fasples. (Luk 4:​43; Jon 18:37) Ol Wetnes blong Jeova tede oli stap soemaot semfala strong tingting ya, blong wetnes long saed blong trutok. Las yia, 645,509 Wetnes oli joen long wok blong paenia evri manis. Blong holem promes we yumi mekem taem yumi givim laef blong yumi i go long God, yumi evriwan i mas prea mo tingting dip sipos yumi save jenisim sam samting long laef blong yumi blong haftaem paenia no blong fultaem paenia.​—Sam 110:3; Ekles. 12:1; Rom 12:1.

² Long wol ya we yumi stap long hem, ol man oli tingbaot olgeta nomo mo oli stap ronem ol sas samting. Taswe, plante man blong wol oli faenem i hadwok blong kasem save, from wanem wan man i wantem wok had long wok blong prij, taem hem i no kasem vatu no haenem from. Yes, ?from wanem ol paenia oli mekem olsem? Oli save se oli stap mekem wan wok blong sevem laef blong ol man. Bigfala lav long Jeova mo long ol narafala man i pusum olgeta, taswe olgeta wanwan, oli harem se oli gat wan bigfala responsabiliti blong traem sevem laef blong ol man. (Rom 1:​14-​16; 1 Tim. 2:4; 4:​16) Wan man mo woman blong hem we tufala i paenia, oli talem long klia fasin se: “?From wanem mitufala i stap paenia? Sipos mitufala i no paenia, ?olsem wanem mitufala i save eksplenem long Jeova from wanem mitufala i mekem olsem?”

³ Wan narafala sista i raet blong tokbaot disisen blong hem blong paenia, i se: “Mi mo hasban blong mi i mekem wan plan blong stap laef long mane we hem nomo i winim. Samting ya i minim se mitufala i save pem ol samting we mitufala i nidim nomo. Be, Jeova i blesem mitufala bigwan, hem i neva livim mitufala we mitufala i sot long plante samting no wetem bigfala nid. . . . Mi mi faenem wan trufala risen blong laef​—hemia blong halpem olgeta we oli gat nid long saed blong speret, blong oli kasem save se Jeova, trufala God, i no stap longwe tumas long olgeta we oli traem faenem hem.” Ol paenia oli luksave se, taem we yumi stap long hem naoia i impoten tumas, taswe oli glad blong kasem ol samting we oli nidim nomo long laef. Oli traehad moa blong kasem ol sas samting long saed blong speret we bambae oli stap blong olwe.​—1 Tim. 6:​8, 18, 19.

⁴ Sipos yu wan yu save stretem ol samting long laef blong yu, i gud yu joen wetem ol handred taosen brata mo sista long olgeta ples blong wol we oli stap paenia. Long rod ya, yu tu yu save kasem semfala glad ya.