!Ol Narafala Oli Harem Nogud Taem Yu No Stap!
1 Sam samtaem, maet yumi mestem miting blong kongregesen. Maet yumi tingting se, ‘i no gat wan we i save harem nogud from we mi no stap, mo ating oli no luk tu se mi no stap.’ !Hemia i no tru ya! Olsem ol wanwan haf blong prapa bodi blong yumi, yumi evriwan i givhan bigwan blong mekem kongregesen i rongud. (1 Kor. 12:12) Taem yumi mestem wan miting, ol narafala long miting oli no save haremgud fulwan long saed blong speret. Yu mas save se sipos yu no stap, !ol narafala oli harem nogud!
2 Impoten Wok Blong Yu: Pol i wantem tumas blong joen wetem ol Kristin brata blong hem. Rom 1:11, 12 i eksplenem from wanem hem i harem olsemia, i se: ‘Blong mi mi save givim wan presen long yufala long saed blong speret . . . mo, blong bambae bilif blong yufala i save givhan long mi, olsem we bilif blong mi tu i save givhan long yufala.’ Long sem fasin, ol ansa blong yumi, ol tok we yumi mekem long miting, mo fasin blong yumi blong go long ol miting tu, i save givhan bigwan blong bildimap bilif blong ol narafala, mo halpem olgeta blong holemstrong long God.—1 Tes. 5:11.
3 ?Yu yu wantem tumas blong joen wetem ol narafala long ol miting blong kongregesen? Ating yu lesingud long ol ansa blong olgeta mo yu haremgud long ol tok we oli yusum blong talemaot bilif blong olgeta. Ol presen ya we oli givim long saed blong speret, oli leftemap tingting blong yu. Sipos sam long olgeta oli no stap long miting, yu harem se yu mestem wan bigfala samting. Ol brata mo sista blong yu oli gat semfala filing taem yu yu no stap long miting.
4 Ol Miting Oli Impoten Tumas: Wan Wajtaoa i bin tokbaot ol miting, se oli impoten tumas blong givhan long yumi blong stanap strong long saed blong speret. Hem i se: “Long wan wol olsemia we i gat ol trabol mo ol rabis fasin, Kristin kongregesen i wan trufala ples blong haed long saed blong speret . . . , wan ples blong pis mo lav. Taswe, i gud blong yu stap go oltaem long ol miting.” (w93 8/15 11) Evri dei, yumi kasem sam problem we oli daonem yumi long saed blong speret. Sipos yumi no lukaotgud, yumi save tingting tumas long ol wari blong laef, mo fogetem ol samting long saed blong speret we oli moa impoten. Yumi wanwan i dipen long ol narafala blong leftemap tingting blong yumi, olsem yumi nidim blong stap joengud mo gohed strong long wok blong God.—Hib. 10:24, 25.
5 I impoten tumas we yumi go long olgeta miting. Maet wanwan taem yumi sik no wan narafala samting i blokem yumi. !Sipos no, yumi mas gat strong tingting blong stap oltaem long medel blong ol man we oli kam wanples blong presem Jeova!—Sam 26:12.