Olsem Wanem Evriwan Long Famle Oli Wok Tugeta—Blong Joen Long Ol Miting Blong Kongregesen
1 Ol Kristin famle oli mas obei long oda ya blong joen wanples long miting blong kongregesen. (Hib. 10:24, 25) Wetem fasin blong wok gud tugeta, evriwan i save rere blong stap mo givim ansa long ol miting ya. Laef blong olgeta famle wanwan i defren. Be i gat sam samting we wan Kristin man, wan waef we i folem trufala bilif, no wan papa no mama we i lukaot pikinini hem wan, i save mekem blong sapotem fasin ya blong joen gud tugeta long ol wok long saed blong spirit, nomata i gat hamas pikinini long haos mo nomata wanem yia blong olgeta.—Prov. 1:8.
2 Tekem Taem Blong Rere: Ol memba blong famle oli wok gud tugeta blong mekem se evriwan i rere gud blong go long miting blong kongregesen. Plante famle oli rerem Wajtaoa Stadi tugeta, evri wik. Sam narafala famle oli rerem Buk Stadi no oli mekem Baebol riding blong wik tugeta. Mak i blong kasem ol impoten poen bifo we oli go long miting. Olsem ya, bambae i isi moa long evriwan blong kasem save long ol samting we oli harem mo bambae oli rere moa blong givim ansa taem i gat jans.—1 Tim. 4:15.
3 Mekem Plan Blong Ansa: Evriwan long famle i mas gat mak blong talemaot hop blong hem long fored blong ol man tru long ol ansa we hem i givim long miting. (Hib. 10:23) ?I gat wan memba blong famle we i nidim se narafala i halpem hem no leftemap tingting blong hem blong mekem samting ya? ?Wanem help we wanwan memba blong famle i nidim blong rerem ol tok blong Tiokratik Skul? Sam waef oli glad taem hasban blong olgeta i soem intres mo givim sam tingting we i save halpem olgeta blong faenem wan gudfala pijatok no wan fastok we i stret. Ol papa mama oli no mas ting se oli mas rerem olgeta tok blong pikinini blong olgeta. Fasin ya i save blokem olgeta blong tekem sam disisen long fiuja. Be ol papa mama oli save halpem pikinini blong olgeta mo lesin taem pikinini ya i mekem tok blong hem long fored blong olgeta.—Efes. 6:4.
4 Mekem Plan Blong Go Long Miting: Taem ol pikinini oli yang yet, oli mas lan blong werem klos blong olgeta wan mo rere blong lego haos blong kam long miting long stret taem. Olgeta memba blong famle oli save wok gud tugeta blong mekem ol defren wok long haos, olsem ya, bambae oli no kam let long miting.—Lukluk ol advaes long buk Family Happiness, pej 112, mo Young People Ask, pej 316-317.
5 Ol papa mama mo pikinini tu oli save mekem tok blong olfala Josua i kamtru, we i talem se: “Mi, wetem ol famle blong mi, bambae mifala i biaen long [Jeova].” !Taswe, tekem strong disisen blong wok gud tugeta blong joen fulwan long ol miting blong kongregesen!—Jos. 24:15.