?Hu Ya Jeova?
LONG taem bifo, Jeova i talem long wan man we i bilif mo wosip long hem, i se: “Sipos wan man i luk fes blong mi, man ya bambae i ded from.” (Eksodas 33:20) “God, hem i Speret,” mo ol man oli no save luk hem wetem prapa ae blong olgeta. (Jon 4:24) Sipos yumi traem lukluk stret long san long medel dei, bambae yumi spolem ae blong yumi. Long sem fasin, yumi no naf blong lukluk bigbigfala Stampa blong paoa we i wokem strong san ya, mo we i wokem plante narafala san long skae tu.
Yumi glad se, yumi no nidim blong luk God blong kasem save long hem. Baebol i soemaot Man ya we i wokem nambawan presen ya, wol ya blong yumi, mo Baebol i tokbaot fasin blong hem. Taswe, i gud we yumi lukluk long Baebol blong kasem save long Papa ya we i givim laef long yumi, mo we i givim nambawan ples blong yumi stap long hem mo haremgud long laef ya.
Mining Blong Nem Blong Hem
Olgeta nem oli gat wan mining, nating se samfala tede oli no save mining blong nem blong olgeta. Tingbaot Engglis nem ya, David, we yumi savegud. Hem i kamaot long wan Hibru wod we i minim “Laekem Tumas.” Nem blong Man ya we i wokem heven mo wol, Jeova, i gat wan mining tu. ?Wanem mining blong nem blong hem? Long olfala lanwis Hibru we oli raetem Baebol long hem, fo leta ya YHWH, oli soem nem blong God, mo oli stap kolosap 7,000 taem long Hibru haf blong Baebol. Mining blong nem blong God, hemia se “Hem i Mekem i Kamaot.” Mining ya i soem se, wetem waes, Jeova i save jenisim fasin blong hem olsem we hem i wantem, blong mekem ol stampa tingting blong hem oli kamtru. Hem i Man blong wokem olgeta samting, Jaj, Man blong sevem man, Man blong sapotem laef, taswe hem i save mekem olgeta promes blong hem oli kamtru. Antap long hemia, long lanwis Hibru, oli raetem nem ya Jeova long sem fasin olsem oli raetem tok blong talem wan samting we i stap gohed yet. Yes, Jeova i stap jenisim fasin blong hem yet blong mekem ol stampa tingting blong hem oli kamtru. !Hem i God ya we i laef!
Ol Stampa Fasin Blong Jeova
Baebol i talem se Man ya we i wokem olgeta samting ‘i gat sore long man, mo i stap givhan long man long gladhat blong hem. Hem i no save kros kwik. Oltaem hem i stap soem lav mo kaengud fasin long ol man, mo i holemstrong long promes blong hem. Hem i stap soem lav mo kaengud fasin long ol man, wetem ol pikinini we oli stap kamaot biaen long olgeta. Hem i stap fogivim olgeta, mo i stap tekemaot ol rabis fasin blong olgeta mo ol sin blong olgeta.’ (Eksodas 34:6, 7) Tok ya ‘lav mo kaengud fasin’ i kamaot long wan Hibru wod we i gat bigfala mining. Hem i minim kaengud fasin mo lav we i pulum man blong fasgud long wan samting gogo samting ya i mekem wok blong hem fulwan. Wan narafala rod blong tanem Hibru tok ya, hemia se “lav we i stap tru oltaem.” Kaengud fasin mo lav blong Jeova i fasgud long ol laef samting we hem i wokem, mo i mekem nambawan stampa tingting blong hem i kamtru. I sua se yu tinghae long bigfala lav ya we Man we i givim laef long yu i soem, ?i tru no?
Jeova i no save kros kwik, mo hem i rere blong fogivim yumi from ol mastik blong yumi. Yumi haremgud blong stap kolosap long wan man olsem. Be, hemia i no min se Jeova i agri long ol nogud fasin. No gat. Hem i talem se: “Mi, Jeova, mi mi laekem stret fasin, mi no laekem nating fasin blong stil mo ol fasin we oli no stret.” (Aesea 61:8) From we God i laekem stret fasin, hem i no save letem ol rabis man we oli wantem gohed nomo blong mekem rabis fasin, oli stap blong olwe. Taswe, yumi save se long stret taem blong hem, Jeova bambae i stretem ol nogud fasin blong wol ya. Hem i no save tanem baksaed long man we i safa.
I no isi blong soem lav mo stret fasin tugeta. Sipos yu yu wan papa no mama, ating yu faenem i hadwok blong save wetaem, olsem wanem, mo long wanem fasin yu mas stretem pikinini blong yu we i mekem wan nogud samting. I nidim bigfala waes blong soem lav mo stret fasin tugeta. Be, Jeova i soemaot nambawan fasin ya oltaem long ol man. (Rom 11:33-36) Yes, yumi save luk waes blong Man ya we i wokem yumi long evri ples, olsem long ol nambawan samting we hem i wokem raonabaot long yumi.—Ol Sam 104:24; Proveb 3:19.
Be, i no naf blong gat waes nomo. Blong mekem ol tingting blong hem oli kamtru, Man ya we i wokem olgeta samting i mas gat paoa tu. Baebol i talem se hem i gat bigfala paoa, i se: “Yufala i lukluk i go long ol samting antap. ?Hu i wokem olgeta samting ya? Hemia Man ya we i mekem se olgeta oli kamaot olsem wan ami, hem i makem namba blong olgeta, mo hem i singaot olgeta evriwan long nem blong olgeta. Hem i strong long paoa blong hem, nao from strongfala paoa we i fulap long hem, i no gat wan long olgeta we i lus.” (Aesea 40:26) From we “strongfala paoa i fulap” long Jeova, hem i save mekem ol samting oli kamtru. ?Fasin olsem i pulum yu blong wantem kam kolosap long hem?
God Blong Olgeta Nesen
Maet yu tingting se: ‘Be Jeova i God blong “Oltesteman,” God blong ol man Isrel bifo.’ I tru se Jeova i bin soemaot ol fasin blong hem long ol man Isrel. Be, from we Jeova i wokem faswan man mo woman, hem i God we “olgeta famle . . . long wol oli stap tekem nem blong olgeta long hem.” (Efesas 3:15, NW) Sipos yu yu bilif se i stret blong respektem ol olfala blong yu bifo, ?yu no ting se i stret blong ona long Hemia we i givim laef long faswan man, long faswan olfala blong yumi we i stampa blong olgeta laen blong man long wol tede?
Man we i wokem olgeta man i no jes laekem wan nesen nomo. I tru se bifo, hem i gat wan spesel fasin fren wetem nesen blong Isrel. Be, hem i agri long ol narafala man tu we oli singaot long nem blong hem. Wan waes king blong Isrel i prea long Jeova i se: “Long man we i strenja, we i no blong ol man blong yu ol man Isrel, be hem i aot long wan kantri farawe, i kam from nem blong yu . . . , yu we yu stap long heven, . . . plis yu lesin. Mo plis, yu yu mas mekem olgeta samting we strenja ya i stap singaot yu from. Long fasin ya, bambae olgeta man long wol oli save nem blong yu.” (1 King 8:41-43) Tede tu, ol man long olgeta nesen oli gat jans blong kasem save long Jeova mo frengud wetem hem. ?Be olsem wanem ol samting ya i joen wetem laef blong yu?
Ol Blesing From Fasin Blong Save Jeova
Tingbaot pijatok we yumi bin tokbaot long faswan store. Sipos yu kasem wan presen we oli kavremapgud wetem naesfala pepa, bambae yu wantem save olsem wanem blong yusum presen ya. ?Bambae yu mekem wanem wetem hem, mo olsem wanem bambae yu lukaotgud long hem? Long sem fasin, yumi wantem save tingting we God i gat taem hem i mekemrere wol ya blong yumi. Baebol i talem se, “hem i no mekem wol ya blong nating nomo, be hem i mekem blong ol man oli save stap long hem.”—Aesea 45:18.
Be, bighaf blong ol man oli no lukaotgud long presen ya we Man we i wokem yumi i givim. Oli stap spolem wol ya, mo Jeova i no glad nating long fasin ya. Be, stret long mining blong nem blong Jeova, hem i gat strong tingting blong mekem stampa tingting blong hem i kamtru long saed blong ol man mo wol ya. (Ol Sam 115:16; Revelesen 11:18) Bambae hem i mekem wol ya i kamgud bakegen, mo bambae hem i givim wol ya olsem wan presen long olgeta man we oli wantem stap long hem, mo we oli glad blong obei long God olsem ol pikinini blong hem.—Matyu 5:5.
Laswan buk blong Baebol i tokbaot wol ya long fyuja, i se: “!Yu luk! Naoia God i mekem ples blong hem wetem ol man. Hem bambae i stap oltaem wetem olgeta, nao olgeta bambae oli man blong hem. . . . Hem bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.” (Revelesen 21:3, 4) Long taem ya, bambae i no moa gat man i krae from we hem i harem nogud, no from we wan we hem i laekem tumas i ded. Bambae i no moa gat wan man i krae long narafala blong halpem hem from we hem i harem se i no moa gat hop, no wan man we i safa mo i soa tumas from wan rabis sik. “Samting ya ded” tu, “God bambae i winim.” (1 Korin 15:26; Aesea 25:8; 33:24) Hemia nao kaen laef we Jeova i bin wantem se yumi haremgud long hem, taem hem i wokem faswan papa mama blong yumi.
Yu save luk samting olsem paradaes ya naoia, long medel blong ol man we oli wosipim Jeova. Hem i talem long olgeta se: “Mi, Jeova, mi mi God blong yufala, God ya we i stap tijim yufala blong karem gudfala frut long laef blong yufala. Mi mi stap mekem yufala i wokbaot long rod we i stret.” (Aesea 48:17) Jeova i wan Papa we i gat kaengud fasin, mo i tijim yumi, ol pikinini blong hem, blong folem beswan fasin blong laef. Ol rul we hem i givim, oli no blong blokem yumi tumas, be oli blong lukaotgud long yumi wetem lav. Sipos yumi folem ol rul ya, bambae yumi gat trufala fasin fri mo glad, olsem Baebol i talem se: ‘Nao Jeova hem i Speret. Mo taem speret blong Jeova i stap wetem man, hem i stap mekem man i fri.’ (2 Korin 3:17) Ol man we oli glad blong stap aninit long rul blong God, oli folem ol advaes blong Baebol. From samting ya, oli gat pis long tingting blong olgeta, hemia semkaen pis we olgeta man long wol bambae oli gat long fyuja.—Filipae 4:7.
!Jeova i rili wan gudfala Papa! ?Yu yu glad blong lanem moa long saed blong Man ya we i stampa blong olgeta nambawan samting raonabaot long yumi? Ol man we oli rere blong mekem olsem, oli save kasem fulap blesing naoia. Mo long fyuja, bambae oli kasem ol blesing gogo i no save finis.
[Tok Blong Pija Long Pej 5]
Fo Hibru leta blong soem nem blong God oli stap long stonwol blong plante olfala jyos haos