Wan Kwestin

Jisas i talem se: “Yufala i mas traehad tumas blong pas long doa ya we i smol nomo, blong go insaed. From we i gat plante man we bambae oli traem go insaed, be oli no save go.” (Luk 13:​24, “NW”) ?Ol tok ya oli minim wanem, mo olsem wanem oli kamtru tede?

Bambae yumi kasem save moa long nambawan vas ya sipos yumi tingting long ol samting we oli hapen long taem we Jisas i talem ol tok ya. Kolosap sikis manis bifo we Jisas i ded, hem i stap long Jerusalem blong joen long lafet blong rimemba taem we oli dediketem bakegen haos blong God. Hem i talem se hem i man blong lukaot long ol sipsip blong God, be hem i soem se bigfala haf blong ol man Jyu oli no stap wetem ol sipsip ya from we oli no wantem lesin. Taem hem i talem se hem mo Papa blong hem, tufala i “wan nomo,” ol Jyu oli tekem ol ston blong stonem hem. Ale, hem i ronwe i go long Perea, narasaed long Jodan Reva.—Jon 10:​1-​40.

Long ples ya, wan man i askem se: “?Masta, God bambae i sevem plante man no smol nomo?” (Luk 13:​23, NW) Hemia wan kwestin we i stretgud, from we long taem ya ol Jyu oli ting se smol man nomo bambae oli save winim raet blong kasem laef. Ol fasin blong olgeta oli soem we oli ting se olgeta nomo bambae oli stap long smol grup ya. Be olsem ol tok biaen oli soem, !oli rong olgeta!

Long kolosap tu yia, Jisas i bin stap long medel blong olgeta, hem i tijim olgeta, i mekem plante merikel, mo hem i givim jans long olgeta blong kam ol man blong rul long Kingdom long heven. ?Wanem i kamaot long samting ya? Ol man Jyu, mo antap moa ol lida, oli flas blong stap long laen blong Ebraham, mo blong stap aninit long Loa blong God. (Matyu 23:2; Jon 8:​31-​44) Be oli no wantem luksave mo ansa long voes blong Gudfala Man blong lukaot long sipsip. I olsem we Jisas i openem wan doa long fored blong olgeta, mo sipos oli pastru long doa ya, oli save kasem nambawan praes blong kam memba blong Kingdom, be oli no wantem. Sam nomo, we kolosap olgeta evriwan oli puaman, oli lesin long mesej blong trutok we Jisas i talemaot, oli bilif, mo oli folem hem.—Luk 22:28-30; Jon 7:​47-​49.

Long dei blong Pentekos, long 33 K.T.,a ol puaman ya nao oli stret blong kasem tabu speret. (Ol Wok 2:​1-​38) Olgeta ya oli no stap long medel blong ol man we Jisas i tokbaot se, oli wokem ol samting we oli no stret, mo bambae oli krae mo oli kakae tut blong olgeta from we oli mestem jans we God i givim long olgeta.​—Luk 13:27, 28.

Taswe, long faswan handred yia, “plante man” ya blong Luk 13:​24, hemia bigfala haf blong ol Jyu, antap moa ol lida blong skul blong olgeta. Olgeta ya oli talemaot we oli wantem se God i glad long olgeta. Be oli folem ol prapa tingting mo rul blong olgeta nomo, oli no folem tingting blong God. Long defren fasin, “smol” man we oli soem se oli rili wantem stap long Kingdom, oli kasem tabu speret mo oli joen long Kristin kongregesen.b

Naoia i gud blong tingbaot olsem wanem vas ya i kamtru tede long wan fasin we i bigwan moa. Ol jyos blong Krisendomc oli tijim long plante, plante man se bambae oli go long heven. Be tingting ya i no stanap long stret tijing blong Baebol. Ol man ya oli sem mak long ol Jyu bifo, oli wantem se God i glad long olgeta, be oli folem prapa tingting blong olgeta nomo.

Nating se i olsem, long taem blong yumi, i gat sam man we oli bilif wetem tingting daon long mesej blong Kingdom. Oli givim laef blong olgeta long Jeova mo oli wok long fasin we God i agri long olgeta. Olsem ya, oli kam “pikinini blong Kingdom.” (Matyu 13:​38, NW) Long Pentekos long 33 K.T., God i stat blong singaot ol “pikinini” ya we tabu speret i makemaot olgeta. Longtaem finis, ol Wetnes blong Jeova oli bilif se ol fasin blong God long ol man blong hem oli soem se hem i singaot finis olgeta memba blong grup we i go long heven. Taswe olgeta we oli kasem save long trutok blong Baebol long ol yia we oli jes pas, oli gat hop blong laef foreva long paradaes long wol. Namba blong olgeta ya i bitim namba blong ol tabu Kristin we oli gat hop blong go long heven, we oli no moa plante tumas naoia. Nating se Luk 13:24 i no tokbaot olgeta we oli gat hop blong laef long wol ya, olgeta ya oli save faenem waes advaes long vas ya.

Taem Jisas i talem se yumi mas ‘traehad tumas’, hem i no minim se hem, no Papa blong hem, tufala i stap mekem sam samting blong blokem yumi. Be yumi kasem save from ol tok blong Luk 13:​24, se olgeta we oli no traehad bambae oli no naf blong mekem ol samting we God i wantem. “Yufala i mas traehad tumas” i minim se yumi mas wokhad, yumi mas mekem evri samting we yumi naf blong mekem. Taswe yumi save tingbaot se: ‘?Mi mi stap mekem evri samting we mi naf blong mekem?’ Yumi save eksplenem Luk 13:24 olsem ya: ‘Mi mas traehad tumas blong pas long doa ya we i smol nomo, from we i gat plante man we bambae oli traem go insaed, be oli no save go. Taswe, ?mi mi rili stap traehad tumas? ?Mi mi sem mak long wan man blong spot long ol stad bifo, we i traehad wetem ful paoa blong hem blong winim praes? Wan man blong spot olsem ya i neva gat tingting we i hafhaf, hem i neva folem isi fasin. ?Mi mi stap folem isi fasin?’

Ol tok blong Jisas oli soem se ating samfala bambae oli traem ‘pastru long doa,’ be long fasin we olgeta nomo oli wantem folem, oli laekem moa blong go sloslou, oli no traehad. Ating sam Wetnes tu oli save gat tingting olsem ya. Samfala oli save tingting olsem, se: ‘Mi save sam Kristin we oli fasgud long God, we long plante yia oli mekem olgeta samting we oli naf blong mekem, mo oli lego plante samting we oli wantem blong mekem wok blong God. Be, oli ded finis, mo en blong nogud wol ya i no kam yet. Taswe, ating i moagud we mi go sloslou nomo, mo mi traem laef lelebet olsem ol narafala man.

I isi nomo blong tingting olsem ya. ?Be tingting ya i rili waes? Eksampel, ?ol aposol, oli tingting olsem? No gat. Oli yusum ful paoa blong olgeta blong mekem trufala wosip, go kasem taem we oli ded. Olsem nao, Pol i save talem se: ‘Yumi stap talemaot Kraes long olgeta man . . . From wok ya nao, mi mi stap traehad tumas. Mo oltaem mi stap yusum olgeta bigfala paoa ya we Kraes i stap givim long mi, blong mekem mi mi strong.’ Biaen bakegen, hem i raetem se: “Yumi putum tingting blong yumi finis long God ya we i laef, we i no save ded, mo we i stap sevem olgeta man, be antap moa, we i stap sevem ol man we oli bilif long hem. From samting ya, yumi stap traehad tumas, mo yumi stap hadwok long ol wok blong hem.”​—Kolosi 1:​28, 29; 1 Timote 4:​10.

Yumi save se Pol i rili soem wan nambawan eksampel long fasin blong hem blong traehad. I sua se bambae yumi wanwan i haremgud sipos yumi save talem olsem Pol, se: “Mi mi faet strong finis long gudfala faet ya we yumi stap faet long hem. Mi mi kamtru finis long en blong resis ya, mo mi stap holem yet fasin blong bilif.” (2 Timote 4:7) Taswe, folem ol tok blong Jisas long Luk 13:​24, yumi wanwan i save askem se: ‘?Mi mi stap soem fasin blong traehad mo wok strong? ?Mi mi soemaot oltaem se mi putum hat blong mi i stap strong long advaes blong Jisas we i talem se: “Yufala i mas traehad tumas blong pas long doa ya we i smol nomo”?’

[Ol futnot]