Stadi 7
Stadi i Karem Gudfala Frut
1. ?Stadi i mekem yumi rere long wanem samting?
1 ?Yu yu wantem luk se bilif blong yu i gru moa, harem se lav blong yu long God i kam strong moa, luk se fasin luksave blong yu i kam moa gud mo kasem moa frut from yu stap traehad long minista wok? Blong yu stap gohed gud olsem, i dipen long samting we yu stap mekem long stadi blong yu wan mo stadi blong yu wetem famle. Stadi olsem i impoten haf blong laef blong yumi olsem ol Kristin. Hem i no givhan long yumi blong mekem wok blong God nomo, be hem i mekem yumi rere long laef ya long nyufala wol blong God. ?Yu yu stap stadi yu wan olsem yu mas mekem?—Mat. 4:4.
2, 3. ?Olsem wanem yumi save faenem taem blong yumi stadi?
2 Samtaem trabol i olsem se yu no faenem naf taem blong stadi. Be i no hadwok blong winim trabol ya. Sipos yu luksave se yu mas wok moa long program blong stadi blong yu, jekem gud program blong ol wok blong yu we yu stap mekem evri wik. Ating bambae yu yu luksave se yu yu no gat plante fri taem. Baebol i askem strong long yumi blong yumi ‘mas yusum evri jans we yumi kasem,’ yes, tekem sam taem we yumi stap yusum blong ronem ol narafala samting long laef blong yumi. (Efes. 5:15-17) Sipos yu gat wan video no televisin, i gud blong yu makemdaon taem we yu stap spenem blong lukluk evri wik. Maet yu yu sapraes long bigfala taem we yu spenem blong lukluk video no televisin. ?Hamas haoa yu spenem blong “toktok” long telefon, go luk ol fren mo ridim nyuspepa no ol magasin blong wol? ?Olsem wanem, yu save yusum taem ya blong ademap moa taem evri wik long stadi blong yu we i save givhan long yu blong olwe? Yu save mekem stadi olsem long dei, long naet, no long enitaem we yu ting se i stret long yu. Oltaem man i faenem taem blong mekem ol samting we hem i ting se oli impoten long hem. Mo i tru se stadi long Tok blong God i wan long olgeta “samting we oli impoten moa” long man we i tinghae long fasin frengud wetem Jeova.—Fil. 1:9-11, NW; Prov. 2:1-5.
3 Maet long stat bambae yu faenem i had blong putum tingting blong yu i strong long stadi, be sloslou hem i save kam isi moa long yu mo bambae yu yu haremgud moa long hem. Be yu mas luksave se hem i impoten tumas, tekem taem oltaem blong mekem stadi mo traehad long hem.
4, 5. ?Man we i stadi i mas mekem wanem? ?Blong wanem i stret blong statem stadi wetem prea?
4 Taem yu stadi yu mas tingbaot se bambae yu mas rimemba long samting we yu stadi long hem mo yu save eksplenem klia samting ya long narafala man. I tru se man i haremgud blong rid, be samting ya i no wan stadi. Fasin blong stadi i min se man i stadi dip blong faenem save, hem i tingting long save ya mo hem i mekem i wok. I no gud blong ridim plante pej wantaem from we stadi blong yu i no save dip mo i no save givhan long yu. Yu mas tekem taem blong stadi dip blong faenem save mo tingting dip long hem. Be i gud blong mekem plan blong stadi long plante save lelebet. Olsemia nao, bambae yu save luk se yu rili mekem wan samting.
5 Wan Kristin studen i no stap dipen long prapa save blong hem blong kasem ol dip samting long trutok blong God. Hem i luksave se hem i nidim tabu speret blong God, ogenaesesen blong God we ol man blong wok blong God oli stap long hem, mo Tok blong God hem wan. Taswe taem yumi wantem stadi, i stret nomo blong prea blong askem blesing blong God.—Jem. 1:5; Luk 11:9-13.
6, 7. ?Wanem gudfala advaes yu save folem blong kasem moa frut long Baebol riding we yu stap mekem long famle?
6 Baebol stadi. Long Tiokratik Skul evri wik i gat wan haf blong Baebol we yumi mas ridim. Famle i save joen tugeta blong ridim wan no tu japta long Baebol long naet. Blong kasem gudfala samting long riding ya, afta long evri haf i gud we man we i rid no wan narafala man long grup ya i tokbaot stampa tingting blong haf ya. Sipos yu wan yu stap ridim haf ya, tekem smoltaem blong tingtinggud long stampa tingting we i stap, mo olsem wanem hem i laenap wetem japta mo olsem wanem i save givhan long yu wan.
7 Taem yu yu finisim Baebol riding, sipos i gat sam poen we oli no klia gud, i gud blong tekem sam taem blong stadi dip long olgeta. Maet mining blong wan vas long Baebol i no klia long yu. ?Olsem wanem yu save kasem moa save long hem? Faswan samting, maet yu save jekem indeks blong ol vas long Watch Tower Publications Indexes blong faenem ol ples we i eksplenem vas ya. Sipos yu gat wan kwestin long saed blong wan tok olsem se “tabu” no “Bigfala Babilon,” yu save faenem ol tok we i eksplenem long indeks blong ol tok long Watch Tower Publications Indexes. I sem mak sipos yu wantem save moa long wan man no wan ples we Baebol i tokbaot. Yu save faenem tu ol tok we i tokbaot ol man mo ol ples olsem taem yu lukluk long buk ya Insight on the Scriptures no long indeks biaen long Baebol blong yu mo yu jekemap ol vas long Baebol we i talem.
8, 9. ?Olsem wanem yu save faenem ansa blong wan kwestin long Baebol, mo wanem samting yumi mas lukaotem antap moa long ol ansa?
8 Stadi blong faenem ol ansa. Samtaem long ol visit no Baebol stadi, wan kwestin i save kamaot we yu no savegud olsem wanem blong ansa long hem. Yu save stadi gud long kwestin olsem taem yu mekem prapa Baebol stadi blong yu wan. Long rod ya bambae yu “wan man we yu stap tijim ol man long trutok blong God, long stret fasin nomo.” (2 Tim. 2:15) Taem yu traehad olsem yu save faenem stret ansa. Fastaem, sipos yu mas eksplenem wan vas blong Baebol, ridim ol vas we oli stap raonabaot long vas ya. ?Ol vas we oli stap raonabaot long vas ya oli tokbaot wanem? ?From samting ya, wanem bigfala tingting blong vas ya? Taem yu save samting ya, biaen yu save jekemap indeks blong ol vas long Watch Tower Publications Indexes blong givhan long yu moa. ?Olsem wanem, kwestin ya i tokbaot ol bilif no ol profet tok, no ol rul blong Baebol we wan studen i save mekem i wok long laef blong hem? Ol indeks blong ol tok mo ol vas long Watch Tower Publications Indexes oli save givhan long yu blong faenem ol save we yu nidim.
9 Taem yu faenem ansa blong ol kwestin ya, jekem sipos yu save pruvum ansa ya. ?Yu yu talem nomo ansa blong kwestin ya long man we i stap lesin long yu? ?No yu yu kasem save long ol risen we ol buk blong Sosaete oli givim blong ansa long kwestin ya? ?Yu save soemaot se oli tru? Man we yu mekem visit long hem maet hem i wantem se yu eksplenem ol risen ya no yu mas givim ol ansa we i kamaot long Baebol. ?Yu save soemaot ol poen ya long hem wetem ol pijatok? ?Yu yu save tingbaot ol kwestin we oli save givhan long studen blong yu blong hem i save kasem stret ansa? Stadi blong yu long wan kwestin olsem bambae i givhan long yu blong givim stret ansa.
10, 11. Talem olsem wanem blong mekemrere Wajtaoa stadi mo buk stadi blong kongregesen.
10 Mekemrere stadi blong “Wajtaoa”. Long sam kantri we gavman i agensem wok blong ol Wetnes blong Jeova, ol man oli no save kasem Wajtaoa oltaem. Long ol kantri ya, ol brata oli lukluk bakegen ol Wajtaoa blong bifo no oli mas tingbaot nomo ol samting we oli stadi bifo. ?Yu yu save tingbaot ol bigfala poen long ol Wajtaoa we yu jes stadi long olgeta? Yumi mas stadi blong rimemba ol tingting blong ol stadi ya blong yumi save mekem i wok long laef blong yumi wanwan no long wok blong prij.
11 Taem yu jes kasem wan magasin, i gud blong ridim magasin ya stat long fas haf i go kasem las haf blong hem. Long rod ya yu kasem bigfala tingting long ful Wajtaoa. Nao, samtaem bifo we kongregesen i stadi long wan haf blong hem, i gud blong stadi bakegen long hem yu wan no wetem famle. Taem yu mekem olsem, fastaem yu mas tingbaot nem blong haf ya, stampa vas blong hem mo nem blong ol smosmol haf we oli stap long hem. Samting ya bambae i givhan long yu blong luksave wanem i stap insaed long stadi ya mo olsem wanem ol haf insaed long stadi oli joengud. Biaen yu save ridim ol haf wanwan, faenem ol ansa blong ol kwestin mo makem ol bigfala poen blong yu save yusum bakegen long fyuja. Taem yu finisim wan haf, mo sipos yu faenemaot se yu no save ansa long kwestin long prapa tok blong yu, i gud blong ridim haf ya bakegen gogo yu save mekem samting ya. Tingbaot olsem wanem ol vas blong Baebol oli sapotem ol ansa, jekem ol vas we oli stap long haf ya mo makem ol vas we yu wantem yusum taem yu givim ansa long miting. Taem yu finisim ol haf long wan stampa poen, yu save stop smoltaem mo tingtingbak olsem wanem ol save ya oli joen wetem bigfala tingting long stadi ya. Mekem olsem bakegen taem yu finisim ol haf. Tingbaot olsem wanem bambae yu save yusum ol samting we yu lanem finis, olsem wanem oli gat paoa long laef blong yu mo olsem wanem yu save eksplenem olgeta long narafala man. Long rod ya bambae yu yu no stap makem ol ansa nomo, be yu stap kasem waes fasin mo dip save tu. (Prov. 4:7) Nao bambae yu yu haremgud moa blong stap long Wajtaoa stadi long kongregesen. Folem sem rod ya blong rere buk stadi long kongregesen.
12-14. ?From wanem stadi long famle i impoten tumas, mo yumi save stadi long wanem?
12 Famle stadi. Antap moa, mekem plan se yu save stadi wetem ful famle blong yu blong mekem se evriwan i save kasem gudfala samting from. ?Sipos hed blong famle i stadi gud be waef mo ol pikinini blong hem oli hanggri long saed blong speret, samting ya i soemaot lav? Hed blong famle i no mas “lukaot long olgeta famle blong hem” long saed blong bodi nomo be hem i mas lukaotem gud olgeta long saed blong speret tu. (1 Tim. 5:8) Advaes long Proveb 22:6 i soemaot se i waes blong trenem ol pikinini long saed blong Baebol taem oli smol nomo, i se: “Tijim pikinini boe blong yu long rod ya we i stret blong hem. Taem bambae hem i kam olfala, be hem i no save lego rod ya samtaem.” Yu no mas ting se pikinini blong yu i smol tumas blong hem i save kasem ol gudfala samting from stadi. Taem we oli smosmol pikinini yet, oli stat blong lanem samting finis. (2 Tim. 3:15) Ol memba blong famle we oli gohed gud long saed blong speret hemia olgeta we oltaem oli stap mekem riding no stadi long famle. Fasin blong mekem oltaem hem i impoten tumas.
13 ?Olsem wanem, yu yu tokbaot vas blong dei wetem famle blong yu, yu letem olgeta oli givim ol ansa mo yu askem ol kwestin long olgeta blong luksave sipos oli kasem save? Samting ya i save givim gudfala kakae long saed blong speret long famle blong yu. Plante famle oli mekem olsem taem oli kakae. Antap moa, ol famle wanwan oli mas gat plan blong evri wik oli stadi dip moa long Baebol. Maet oli save mekem long naet no long wan taem we i stret long olgeta. I tekem taem blong kasem gudfala save long ol stampa tok blong Baebol, faenemaot ol smosmol haf blong ol poen ya mo mekem olgeta oli stap long hat. Taem ol famle oli stadi tugeta oltaem, evriwan insaed long famle oli save haremgud from. ?Yu yu stap mekem wan famle stadi olsem ya? Sipos yu no stap mekem oltaem, yu save tokbaot samting ya wetem famle blong yu tede mo mekem plan blong stadi i kam olsem wan haf blong famle laef blong yufala.—Efes. 6:4; Dut. 6:4-7.
14 Sipos ol pikinini blong yu oli smol nomo, i gud blong stadi long ol samting we oli save kasem save long olgeta mo givhan long olgeta. Nating se stadi ya i strong tumas, be yu save askem ol kwestin we oli isi long ol poen we oli save kasem save long olgeta. Olsem nao, ol pikinini oli save intres long stadi. Plante famle oli mekemrere Wajtaoa taem oli stadi tugeta olsem famle. Be ol famle oli save yusum eni buk nomo blong oli save stadi long hem, folem nid blong olgeta. Trening olsem i mekem ol famle oli joengud moa mo oli save gat dip save long ol samting long saed blong speret.
15-17. ?Wanem frut yu save kasem from we yu traehad blong stadi oltaem?
15 Kasem ol frut from we yu traehad. Wan frut we yu kasem kwik from we yu stap traehad long stadi hemia: Fasin blong yu blong rimemba ol samting i kamgud moa from we yu yu stap yusum tingting blong yu. Long wok blong prij mo long ol miting blong kongregesen i isi moa blong tingbaot bakegen mo ansa long ol poen we yu stadi long olgeta finis. Yumi save tingbaot ansa long ol kwestin blong ol man we oli jes intres long trutok, mo yumi save faenem kwiktaem ol vas blong Baebol blong sapotem ol ansa blong yumi. Be antap long ol samting ya, stadi i givhan long yumi blong kasem gudfala save long Tok blong God. Hem i mekem bilif blong yumi i kam strong moa, yumi gat klia tingting long ol rul blong Baebol mo i mekem se yumi glad moa long wok blong Jeova.—Hib. 5:14.
16 Ol waes man oli putum ol samting long saed blong speret oli stap long fas ples long laef blong olgeta. Sipos oli no gat plante taem, bambae oli livim ol samting we oli no impoten tumas. Be oli no save lego fasin blong stadi long Tok ya we i givim laef. Long olgeta we oli mekem olsem, Jeova i promes se ‘bambae mi mi mekem se yu yu faenem mi.’ (1 Kron. 28:9) Samting ya i tru moa sipos taem yu stadi, i no blong mekem hed blong yu i fulap long ol save nomo, be i blong fulumap hat blong yu. !Letem lav mo fasin tangkyu blong yu long Jeova from ol gudfala wok blong hem oli gru moa taem yu stap stadi long Tok blong hem!
17 Risen from wanem ol minista blong God oli stadi, i klia nomo long prea ya blong aposol Pol long Kolosi 1:9, 10 se: “From samting ya, oltaem mifala i stap prea from yufala, i stat long taem ya we mifala i kasem nyus blong yufala fastaem. Mifala i stap askem long God blong Tabu Speret i mekem yufala i waes, yufala i man blong luksave, blong bambae yufala i savegud olgeta samting we God i wantem. Nao bambae yufala i save mekem laef blong yufala i kam olsem we Masta blong yumi i wantem. Oltaem bambae yufala i save mekem ol fasin we hem i glad long hem. Nao bambae yufala i gat frut long laef blong yufala, we yufala i stap mekem ol gudgudfala wok, mo bambae yufala i save kam we yufala i save God moa.”