Mekem Plan Fastaem—?Blong Mekem Wanem?
1 Yumi evriwan i tingting long ol plan we yumi gat long saed blong fiuja. Olgeta we oli gat hop blong laef long wol ya, oli stap wet blong laef foreva long niufala wol blong God we stret fasin nomo bambae i stap long hem. Be i gat sam samting we i save tekemaot hop ya long tingting blong olgeta. Taswe, yumi mas traehad blong mekem ol intres blong Kingdom oli stap fasples long laef blong yumi mo blokem ol samting blong wol ya we oli stap pulum tingting blong yumi.—1 Jon 2:15-17.
2 Ol man blong wol oli no save ol mak long saed blong spirit we ol man blong God oli wantem kasem. (1 Kor. 2:14) Ol man blong wol, oli stap traehad blong kasem haenem, paoa, mo ol rij samting. Be yumi, yumi stap traehad blong kasem ol rij samting long saed blong spirit. (Mat. 6:19-21) Sipos yumi mekem tingting blong yumi i laenap wetem tingting blong ol man blong wol long saed blong fiuja, bambae yumi neva kasem ol mak blong yumi long saed blong spirit. Nao sloslou, bambae hat blong yumi i stap nomo long ol samting long saed blong bodi. ?Olsem wanem blong blokem samting ya?
3 “Tekem Masta Blong Yumi Jisas Kraes”: Wan rod blong faenemaot sipos fiuja blong yumi i stanap long ol intres blong Kingdom, hemia blong jekemap ol toktok blong yumi. ?Oltaem yumi stap tokbaot ol samting long saed blong bodi? Sipos yes, yumi mas jekemap hat blong yumi blong luk sipos hem i stap yet long ol samting long saed blong spirit. Maet yumi mas traehad moa blong ‘tekem Masta blong yumi Jisas Kraes, we hem i olsem klos blong faet blong yumi, we i save blokem olgeta samting. Nao bambae yumi no moa tingbaot ol rabis fasin ya we tingting blong yumi i wantem, bambae yumi no moa folem ol fasin ya.’—Rom. 13:14.
4 Ol yangfala oli save “tekem Masta blong yumi” taem oli plan blong joen long fultaem paenia. Wan taem, wan yangfala i wantem kam wan fultaem paenia. Yangfala ya i gruap long wan ples we plante yangfala oli wantem gat plante mane, nao hem tu i joen fulwan long bisnes. Ale fasin blong hem blong go long ol miting mo wok blong prij i kam olsem wan kastom nomo. Hem i no rili mekem wetem fulhat blong hem. Nao biaen hem i stat blong trastem tok blong Jisas long Matiu 6:33, mo i aot long rod ya we hem i stap folem, nao hem i joen long fultaem paenia. Naoia, tingting blong hem i no moa stikim hem. Hem i talem se ‘hem i givim bes blong hem’ blong mekem wok blong Jeova.
5 Baebol i talem se i waes blong plan from fiuja. (Prov. 21:5) I gud we yumi evriwan i putum wil blong God fastaem long laef blong yumi taem yumi plan from fiuja.—Efes. 5:15-17.