Serem Olting Blong Yumi Wetem Narafala
1 Jeova i yusum “slef” ya we i holem strong long Hem, blong givim ol kakae we yumi nidim long saed blong spirit. (Mat. 24:45-57, NW ) Oli givim bighaf blong ol kakae ya long yumi taem oli wokem ol buk, ol Baebol, ol baon volyum, ol video mo kaset, mo ol CD blong kompiuta blong mekem risej long Baebol. Ol samting we Jeova i givim oli naf oltaem, mo hem i no givimaot olbaot long fasin we i blong westem nomo. Hem i wantem we yumi serem ol samting ya wetem ol narafala, mo i wantem we evri man oli kasem, i no se samfala oli kasem plante be narafala i no kasem nating.
2 Sosaeti i spenem bigbigfala mane blong wokem mo sanemaot olgeta kakae ya long saed blong spirit. Hem i naf blong pem ol samting ya from presen mane we olgeta brata raon long wol oli givim. Hemia i tru moa stat long taem ya we Sosaeti i talemaot se bambae hem i no moa putum praes long ol buk. I min se naoia, wok ya i dipen fulwan long presen mane nomo. Antap long hemia, Sosaeti i letem plante branj ofis oli karem ol kakae ya long saed blong spirit long smol praes nomo. Rod ya i mekem se olgeta brata oli save kasem olgeta buk we oli nidim blong yusum long ol miting mo long wok blong prij nating se oli no gat plante mane.
3 ?Yumi Save Givhan Olsem Wanem?: Yumi save folem advaes blong Pol we hem i talem se i gud blong serem samting wetem ol narafala we “oli sot long sam samting.” (Rom 12:13) Taem yumi givim presen mane blong sapotem wok long fulwol, i olsem we yumi stap serem olting blong yumi wetem ol brata blong yumi raon long wol. Sam long yumi we oli tingbaot samting ya, oli mekem plan blong putum smol mane i stap evri manis blong sapotem wok long fulwol, olsem we oli stap mekem blong pem ol samting we Haos Kingdom blong olgeta i nidim. Oli luksave se mane ya i no jes blong prentem buk be i blong yusum long evri haf blong wok blong Kingdom. Tingbaot bigfala blesing we ol brata raon long wol oli save kasem sipos plante moa long yumi i mekem wan plan olsem.
4 Mo tu, yumi save serem olting blong yumi wetem ol narafala sipos yumi no tekem plante buk no magasin bitim mak. Sipos yumi oda nomo long wanem we yumi rili nidim, yumi mekem se ol brata long ol narafala ples tu oli save kasem kakae long saed blong spirit we oli nidim blong stap strong mo gohed long wok blong talemaot gud nius long ples blong olgeta.—Hib. 13:16.
5 Yumi mas tinghevi moa long samting ya taem yumi oda long ol samting we Sosaeti i mas spenem bigfala mane blong wokem. Olsem ol video kaset, ol CD blong kompiuta, ol bigfala refrens buk, ol baon volyum, mo sabskripsen blong Wajtaoa no Wekap! long kaset. ?Bitim we yu tekem plante kopi blong wanwan memba blong famle, maet evriwan long famle oli save serem wan kopi nomo? Sipos yumi no bitim mak long hamas samting we yumi tekem, yumi givim janis long narafala blong kasem ol gudfala samting we yumi stap harem gud long hem.—Fil. 2:4.
6 Presen mane we yumi putum long Haos Kingdom no presen mane we ol man we oli intres oli givim blong sapotem wok blong Sosaeti raon long wol, i save givhan blong wokem ol buk we yumi serem long wok blong prij. Be i gud blong tingbaot se i no ol man we yumi prij long olgeta we bambae oli givim presen mane we i nidim blong wokem ol samting olsem sing buk, Yearbook, ol Baebol we kava blong olgeta i sofsof, no narafala samting we yumi karem blong yumi wan i yusum. Ol man blong Jeova, olgeta ya fastaem oli stap givim presen mane blong wokem ol samting ya. Plante pablisa oli luksave samting ya, ale oli traem tingbaot se wanem praes nao we ol stoa oli putum long olkaen buk olsem, nao oli givim presen mane we i stret long praes ya. Eksampol, wan Baebol we kava blong hem i sofsof mo we saed blong hem i gol, yu save faenem long sam stoa we praes blong olgeta i kasem 2,000 VT. Sam refrens buk oli stat long 4,000 VT i go antap. Ol kalenda we i kala fulwan, samtaem ol stoa oli salem blong 500 VT. Ol diksonari no insaeklopedia we i stap long CD blong kompiuta, praes blong olgeta i save stat long 5,000 VT i go kasem bitim 10,000 VT. Plante taem, praes blong ol CD blong miusik hem i 2,000 VT, mo ol video kaset maet oli sas moa bakegen. Yes, sipos yumi no tingbaot blong givim inaf presen mane blong kavremap praes blong wokem ol samting we yumi tekem, maet bambae ogenaesesen i no save mekem plante samting blong wok blong Kingdom i go moa long olgeta ples blong wol.
7 Jisas i talem se ol man bambae oli luksave ol trufala man blong hem from we oli lavlavem olgeta. (Jon 13:34, 35) Yumi mas gat gladhat blong givim presen mo yumi no mas tingbaot yumi wan be yumi mas rere blong serem olting blong yumi wetem ol narafala stret olsem we oli nidim. Hemia nao sam gudfala fasin we oli soemaot se yumi trufala Kristin.