?Wanem Samting We i Impoten Long Laef Blong Yu?
1 Plante skul oli ting se i impoten blong wokem ol skul blong pikinini no ol hospital blong givhan long ol man. Be ol Witnes blong Jeova oli defren. I tru, oli tingbaot oltaem se oli mas ‘mekem ol gudfala fasin, mo givhan long narafala,’ be impoten samting long laef blong olgeta hemia blong halpem ol man long saed blong spirit.—Hib. 13:16.
2 Folem Fasin Blong Ol Faswan Kristin: Jisas i mekem plante gudfala wok taem hem i stap long wol. Be bigfala wok blong hem hemia blong talemaot trutok. (Luk 4:43; Jon 18:37; Wok 10:38) Hem i givim oda ya long ol man blong hem se oli “mas go long ol man long olgeta ples long wol, blong pulum olgeta oli kam man blong [hem] . . . [mo oli] mas tijim olgeta.” (Mat. 28:19, 20) Mo hem i talem se ol man we oli bilif long hem bambae oli mekem wok we i bigwan moa i winim ol wok ya we hem i bin mekem. (Jon 14:12) Jisas i tinghae moa long wok blong prij from we rod ya nao i save sevem ol man.—Jon 17:3.
3 Aposol Pol i tingbaot wok blong prij olsem wan samting we hem i “mas mekem.” Hem i no save ting nating long wok ya. (1 Kor. 9:16, 17) Hem i rere blong lego eni samting, fesem eni traem, safa long eni trabol, blong hem i save finisim wok ya. (Wok 20:22-24) Aposol Pita mo ol fren blong hem oli gat semfala tingting. Nating se oli go kalabus no ol man oli kilim olgeta, “oli stap tijim ol man, mo oli stap talemaot gud nius ya blong Jisas.”—Wok 5:40-42.
4 ?Olsem wanem long yumi? ?Wok blong talemaot gud nius blong Kingdom mo pulum man i kam disaepol hem i wan impoten wok long laef blong yumi? ?Yumi gat filing olsem Jisas we i rili kea long ol man we “oli no moa gat paoa, oli olsem ol sipsip we i no gat man blong lukaot long olgeta”? (Mat. 9:36) !Ol samting we oli stap hapen long wol mo ol profet tok blong Baebol oli soemaot klia se smoltaem nomo i stap bifo we rabis wol ya i lus! Sipos i kliagud long tingting blong yumi se wok blong prij i impoten tumas, bambae yumi wantem gohed strong long wok ya.
5 Luklukgud Long Laef Blong Yu: Laef blong yumi i stap jenis oltaem. Taswe, i gud we wanwan taem yumi tingbaot sipos yumi save stretem sam samting long laef blong yumi blong mekem se yumi joen moa long wok blong prij. Wan sista i bin mekem wok blong fultaem paenia long ol yia 1950 go kasem ol yia 1970. Nao hem i mas stop from we hem i stap siksik plante. Be biaen, helt blong hem i stat kam gud sloslo, ale, hem i skelem laef blong hem mo i luksave se hem i save stat blong paenia bakegen. !Hem i glad tumas we hem i gat janis blong joen long Paenia Skul taem hem i gat 90 yia! ?Olsem wanem long yu? ?Klosap nao bambae yu ritae long wok no yu finis long skul? ?Long taem ya we laef blong yu bambae i jenis, yu ting se yu save mekem wok blong paenia?
6 Taem Jisas i luk se Mata “i stap harem nogud from we i gat tumas wok blong hem,” hem i tok long kaen fasin long hem i se, sipos hem i no tingbaot plante samting tumas, bambae hem i save kasem plante moa blesing. (Luk 10:40-42) ?Yu yu save mekem we laef blong yu i no fasfas wetem plante tumas samting? ?I rili nidim we hasban mo waef tugeta i wok blong kasem mane? ?I gat sam jenis we yufala i save mekem blong famle i save laef long pei blong wan man nomo? Plante brata sista oli bin harem gud moa long saed blong spirit taem oli stretem sam samting long laef blong olgeta blong oli save joen moa long wok blong prij.
7 !I gud we yumi evriwan i folem fasin blong Jisas mo ol aposol blong hem! Yumi sua se bambae Jeova i blesem yumi sipos yumi rili traehad blong joen fulwan long impoten wok ya blong talemaot gud nius blong Kingdom.—Luk 9:57-62.