Ol Enjel Oli Stap Givhan Long Yumi
1 “Yufala i mas save se mi bambae mi stap wetem yufala oltaem, gogo wol ya i finis.” Tok ya i rili leftemap tingting blong ol man we oli stap folem oda ya blong Jisas se: “Yufala i mas go . . . pulum [ol man] oli kam man blong mi.” (Mat. 28:18-20) Wan bigfala rod we Jisas i yusum blong stap wetem ol trufala Kristin, hemia tru long ol enjel. (Mat. 13:36-43) !Yumi haremgud tumas blong joen wetem ol gudfala spirit man ya blong talemaot “gud nius ya we i blong stap oltaem nomo”!—Rev. 14:6, 7.
2 Long Wok Blong Prij: Baebol i talem se God i sanem ol enjel blong “oli kam givhan long ol man ya we bambae [God] i sevem olgeta.” (Hib. 1:14) Long faswan handred yia, ol enjel oli lidim ol man blong Jisas oli go long ol man we oli wantem harem trutok. (Wok 8:26) Tede tu, ol man blong God oli luksave se ol enjel oli stap lidim olgeta. Plante taem, oli faenem wan man long wok blong prij we i talem long olgeta se hem i stap prea long God blong i halpem hem, nao hem i sek we wan Witnes i noknok long doa blong hem. !Ol enjel oli glad tumas taem ol man ya oli lesin long tok blong Kingdom, mo yumi tu yumi glad tumas!—Luk 15:10.
3 Taem Samfala Oli Agensem Yumi: Daniel, trifala Hibru yangfala we oli fren blong hem, aposol Pita, mo plante narafala we oli winim ol bigfala traem, oli luk we Jeova i yusum ol enjel blong lukaotgud long olgeta. Ol enjel ya ‘oli strong, oli gat paoa.’ (Sam 103:20; Dan. 3:28; 6:21, 22; Wok 12:11) Maet samtaem yumi kasem fasin agens, nao yumi harem se yumi no naf blong stanap strong. Blong leftemap tingting blong yumi long taem olsem, yumi save tingbaot man blong wok blong Elisa, we i kasem save se ‘olgeta long saed blong hem oli plante moa, i winim olgeta we oli agensem hem.’ (2 King 6:15-17) Nating sipos ol man blong agens oli blokem yumi blong yumi no moa save joen wetem ol Kristin brata sista blong yumi, be yumi no mas letem tingting blong yumi i foldaon. Tok blong God i mekem promes ya se: “Oltaem enjel blong [Jeova] i stap lukaot gud long olgeta we oli ona long hem.”—Sam 34:7.
4 I no longtaem, bigfala ami blong ol enjel bambae oli raed i kam blong kilim i ded ol man we oli agensem King Jisas Kraes. (Rev. 19:14, 15) Go kasem taem ya, yumi mas gohed nomo blong presem God, we yumi no fraet nating. Yumi mas trastem fulwan, paoa blong bigfala ami blong ol enjel long heven we Kraes i stap lidim olgeta.—1 Pita 3:22.