Soem Intres Long Ol Man—Jenisim Toktok Blong Yu
1 Aposol Pol i soemaot nambawan eksampol, taem hem i jenisim fasin blong hem blong talemaot gud nius, blong mekem i laenap oltaem wetem fasin mo tingting blong ol man we oli lesin long hem. (1 Kor. 9:19-23) Yumi mas traehad blong mekem sem mak. Sipos yumi tekem taem blong tingting gud, plante taem yumi save jenisim ol fastok we oli stap long Kingdom Wok Blong Yumi, blong mekem oli laenap wetem nid blong ol man long ples blong yumi. Taem yumi stap wokbaot i go long wan haos, maet yumi luk sam samting we oli soemaot wanem we man blong haos i intres long hem, nao yumi save putum ol samting ya i go insaed long toktok we bambae yumi talem. Be i gat wan narafala rod tu blong jenisim toktok blong yumi long wok blong prij.
2 Mekem Toktok Blong Yumi i Stanap Long Samting We Man Blong Haos i Talem: Taem yumi stap talemaot gud nius, plante taem yumi askem wan kwestin mo yumi wet long man blong haos blong givim ansa. ?Wanem tingting blong yu long ansa blong hem? ?Yu yu talem yes kwiktaem mo gohed long tok we yu rerem finis? ?No samting we yu yu talem i soemaot se yu stap tingbaot ansa we man blong haos i talem? Sipos yu lesingud long samting we ol narafala oli talem, yu save askem sam moa gudfala kwestin blong faenemaot samting we i rili stap long tingting blong olgeta. (Prov. 20:5) Long rod ya, yu save tokbaot ol blesing blong Kingdom we oli stret long nid mo wari blong man we i lesin.
3 Hemia i min se yumi mas rere blong tokbaot ol poen we oli defren long hemia we yumi bin rere long hem. Maet long stat blong tok blong yumi, yumi tokbaot wan problem we i kamaot long nius, be man blong haos i talem wan samting we i hapen long ples blong hem no long laef blong hem we hem i wari tumas from. Nao sipos yumi rili wantem givim samting we man ya i nidim, bambae yumi jenisim tok blong yumi we i stanap long Baebol, blong mekem i laenap wetem poen we hem i intres moa long hem.—Fil. 2:4.
4 Jenisim Wei Blong Yumi: Taem man blong haos i askem wan kwestin, maet i moagud we yumi kambak long wan narafala taem, afta we yumi faenemaot sam moa save long poen ya. Mo tu, yumi save givim buk long hem, we i givim moa save long saed blong poen ya. Ol samting ya i soemaot se yumi rili wantem givhan long ol narafala blong oli kasem save long Jeova.—2 Kor. 2:17.