?Pikinini Blong Yu i Naf Blong Tekem Wan Impoten Desisen?
1. ?Wanem desisen we sam yangfala Witnes oli tekem long saed blong blad? Talem wan eksampol.
1 ?Wanem impoten desisen? Desisen long saed blong blad. Long Wajtaoa blong Jun 15, 1991 (Franis/Inglis), i gat wan haf we nem blong hem, “Walk as Instructed by Jehovah” (“Wokbaot Long Wei We Jeova i Tijim Yumi Long Hem”). Haf ya i tokbaot sam pikinini we papa mama blong olgeta oli Witnes blong Jeova, mo we oli mekem desisen blong obei long loa blong God long saed blong blad. Long tingting blong olgeta, desisen ya i impoten, olsem we i impoten long tingting blong papa mama blong olgeta. ?Olsem wanem? ?Pikinini blong yu i rere blong tekem wan desisen olsem sipos hem i mas?
2. ?Wan kot i givim wanem raet long wan yangfala we i gat 17 yia mo i no wantem tekem blad, mo wanem samting ol Kristin papa mama wetem ol pikinini blong olgeta oli save lanem from?
2 ?Loa i Talem Wanem? Long Yunaeted Stet, Saprim Kot blong Illinois i tekem disisen se ol yangfala we oli no kasem 18 yia yet be oli bigman long tingting blong olgeta, oli gat raet blong mekem prapa jus blong olgeta blong no tekem blad. Taem kot ya i lukluk bakegen long kes blong wan sista we i gat 17 yia, hem i givim oda ya: “Sipos i gat klia mo strong pruf se yangfala ya i naf long tingting blong hem blong kasem save long samting we i save kamaot folem desisen blong hem, [mo] blong skelem samting olsem bigman, ale loa i givim raet long hem blong agri long tritmen we hospital i wantem givim long hem no blong no akseptem tritmen ya.” Taswe, blong kasem save sipos wan pikinini i naf blong mekem prapa desisen blong hem, maet sam dokta no sam haeman oli askem kwestin long hem, blong harem prapa toktok blong hem blong eksplenem from wanem hem i no wantem tekem blad. Yangfala ya i mas kasem save se sik blong hem i bigwan olsem wanem, mo wanem samting i save hapen long hem sipos hem i jusum ol defren meresin we hospital i save givim long hem. Mo hem i mas talemaot wetem strong tingting mo long klia fasin, prapa bilif blong hem we i stanap long loa blong God long saed blong blad.
3. ?Wanem ol kwestin we ol papa mama oli mas tingting gud long olgeta, mo from wanem?
3 ?Pikinini Blong Yu Bambae i Talem Wanem? ?Olsem wanem? ?Ol pikinini blong yu oli naf blong talemaot prapa desisen blong olgeta long saed ya? ?Olgeta oli bilif wetem fulhat blong olgeta se loa ya blong ‘no kakae blad’ hem i loa blong God? (Wok 15:29; 21:25) ?Oli naf blong eksplenem bilif blong olgeta wetem Baebol? ?Bambae oli no fraet blong holemstrong long desisen blong olgeta long saed blong blad sipos dokta i ting se laef blong olgeta i stap long denja, mo sipos papa mama blong olgeta i no stap? From we “samting we yumi no tingbaot, i save kamaot long yumi enitaem nomo,” olsem wanem yu save rerem ol pikinini blong yu from wan trabol we i save traem bilif blong olgeta?—Pri. 9:11, NW, Efes. 6:4.
4, 5. (a) ?Wanem impoten wok we ol papa mama oli gat, mo olsem wanem oli save mekem gud wok ya? (b) ?Wanem samting we i save givhan long ol papa mama?
4 ?Papa Mama, Wanem Samting Yutufala i Save Mekem? Yutufala i gat impoten wok ya blong tijim ol pikinini blong yutufala blong oli save long tingting blong God long saed blong blad. (2 Tim. 3:14, 15) Ol klia tok blong eksplenem samting ya i stap long Reasoning buk, pej 70-74 (Franis pej 359-362). Stadi gud long haf ya wetem famle blong yutufala. Yusum haf ya: “Sipos Wan Man i Talem Se—” long pej 74-76 (Franis pej 362-364), mo mekem pleplei wetem ol pikinini blong yutufala blong givhan long olgeta blong oli lanem blong eksplenem bilif blong olgeta mo from wanem oli bilif olsem. (1 Pita 3:15) Narafala samting we i save givhan blong tijim yumi long saed blong blad, hemia buklet ya How Can Blood Save Your Life? mo Wajtaoa blong Jun 15, 2004, pej 14-24. Mo tu, i gat ol vidio kaset ya Transfusion-Alternative Health Care—Meeting Patient Needs and Rights mo No Blood—Medicine Meets the Challenge, we naoia oli stap long DVD ya Transfusion Alternatives— Documentary Series. Olgeta ya oli givim plante save blong soem from wanem i stret mo i moagud blong yusum ol meresin we oli no gat blad long olgeta mo blong ol dokta oli katem man we oli no yusum blad. ?Famle blong yu i bin wajem mo tokbaot ol vidio kaset ya finis?
5 Givhan long ol pikinini blong yutufala blong oli “jusumaot ol fasin we God i wantem, wanem i gud, mo wanem hem i glad long hem, mo wanem i stret gud blong mekem” long saed blong blad. Biaen, oli save tekem wan gudfala desisen we Jeova i glad long hem.—Rom 12:2.