‘No Fraet Blong Talemaot Tok Blong God’
1 ?Samtaem yu yu fraet blong tokbaot bilif blong yu taem yu gat janis blong toktok long skul no long wok? ?I had long yu blong yusum janis we yu gat blong prij long ol famle mo ol man we oli stap raonabaot long yu, no maet long ol man we yu yu no save olgeta? ?Wanem samting we i save givhan long yumi evriwan blong ‘mekem tingting blong yumi i strong moa’ blong tekem janis blong ‘talemaot tok blong God’?—Fil. 1:14.
2 No Fraet Blong Toktok: ?Bambae yu yu fraet blong toktok sipos wan man i talem ol giaman tok long saed blong wan gudfala fren no wan famle blong yu? Jeova i bes Fren blong yumi, mo blong plante handred yia ol man oli talem ol giaman tok long saed blong hem. !Yumi gat wan nambawan janis blong givim witnes long saed blong gudfala God blong yumi! (Aes. 43:10-12) Sipos yumi sem no yumi fraet, bambae yumi no save toktok. Be bigfala lav we yumi gat long Jeova i save givhan long yumi blong winim sem mo fraet ya, mo i save pulum yumi blong toktok mo talemaot trutok wetem strong tingting.—Wok 4:26, 29, 31.
3 Yumi mas tingbaot se tok we yumi stap talemaot i wan gud nius. Sipos ol man oli harem gud nius ya, bambae oli kasem blesing blong olwe. Wok blong prij i impoten tumas mo yumi mas putum tingting blong yumi i stap strong long samting ya, be i no long yumi wan no long ol man we oli agensem yumi. Hemia bambae i givhan long yumi blong yumi no fraet blong prij.
4 Eksampol Blong Ol Narafala: Yumi save kasem paoa taem yumi luk ol narafala we tru long laef blong olgeta oli stap fasgud long God, mo we oli no fraet blong talemaot tok blong God. Olsem nao, Inok i no fraet blong talemaot jajmen blong Jeova long ol man we oli no obei long Hem. (Jud 14, 15) Noa i gohed oltaem blong prij long ol man we oli no intres nating. (Mat. 24:37-39) Ol Kristin blong faswan handred yia we oli ‘no gat nem mo oli no skulgud’ oli gohed blong prij, nating we oli kasem strong fasin agens. (Wok 4:13, 18-20) Plante taem long ol Wajtaoa mo Wekap! i gat ol laef stori blong ol Kristin long taem blong yumi we bilif blong olgeta long Jeova i givhan long olgeta blong winim fraet we oli gat long ol man, nao oli wok strong blong talemaot tok blong God.
5 Taem yumi tingting gud long laef blong ol gudfala man blong God long taem bifo we oli fesem ol strong traem, bambae yumi no save fraet. (1 King 19:2, 3; Mak 14:66-71) Oli letem ‘God blong yumi i mekem tingting blong olgeta i strong’ mo oli no fraet blong toktok. !Yumi tu yumi save mekem olsem!—1 Tes. 2:2.