Yumi Lesin Gud Mo Yumi Lanem Samting
1. ?From wanem i no isi blong lesin gud mo lanem samting long asembli blong tri dei?
1 I no longtaem ol asembli blong tri dei long 2013 bambae oli stat. Ol brata oli wok had blong mekemrere program blong ol asembli ya from we oli wantem givhan long evriwan raon long wol. ?Olsem wanem? ?Yu yu mekem plan finis blong stap long trifala dei ya? Long ol bigfala asembli blong yumi, i gat plante samting we oli save pulum tingting blong yumi. Taswe yumi mas traehad blong lesin gud long ol tok. Program blong asembli i longwan moa i bitim ol miting long Haos Kingdom. Taswe i isi blong tingting blong yumi i flae. Mo tu, maet yumi taed from we yumi wokbaot longwe blong kam, no maet narafala samting i mekem we yumi taed. ?Wanem i save givhan long yumi blong yumi no slip be yumi lesin gud mo lanem samting?—Dut. 31:12.
2. ?Wanem i save givhan long yumi blong yumi wantem go long asembli?
2 Bifo Long Asembli: Long Websaet blong yumi www.pr2711.com, i gat program blong asembli i stap. Program ya i talemaot nem blong olgeta tok blong asembli wetem wan no tu stamba vas blong olgeta tok ya wanwan. Sipos yumi gat Intenet, i gud yumi lukluk program ya. Samting ya i save pulum yumi blong yumi wantem harem ol tok ya. (Esra 7:10) I gud yumi tokbaot program ya wetem famle blong yumi long naet blong Famle Wosip. Olsem nao, famle blong yumi bambae i wantem tumas blong go long asembli ya.
3. ?Wanem i save givhan long yumi blong lesin gud?
3 Long Taem Blong Asembli: Sipos yumi gat janis, i gud yumi go long toelet bifo we program i stat. I gud yumi ofem mobaelfon blong yumi. Olsem nao, fon blong yumi bambae i no ring long taem blong miting, mo bambae i no pulum yumi blong wantem sanem mesej i go long ol fren. Sipos i stret we yumi onem fon blong yumi from wan impoten risen, plis yumi mekem we hem i no ring strong. Sipos yumi stap yusum wan electronic tablet long taem blong program, i gud yumi no pulum ae blong ol man raonabaot long yumi. Mo tu, i gud sipos yumi no kakae mo dring taem ol brata oli stap givim tok. (Pri. 3:1) Mo taem ol brata oli stap mekem tok, i gud yumi lukluk stret long olgeta, mo yumi jekem ol vas long Baebol blong yumi. Yumi save raetemdaon ol bigfala tingting we yumi harem long ol tok.
4. ?Ol papa mo mama oli save mekem wanem blong pikinini blong olgeta i lesin gud mo lanem samting?
4 Yumi wantem we ol pikinini blong yumi tu oli lesin gud mo oli lanem samting. Ol Proveb 29:15 i talem se: “Pikinini we papa blong hem i no stretem hem, i letem hem i stap mekemhed, . . . hem bambae i mekem papa mo mama blong hem, tufala i sem bigwan.” Taswe, i gud we wan famle i sidaon wanples. Olsem nao, ol papa mo mama oli save lukluk long ol pikinini sipos oli stap lesin no oli stap storian, sanem mesej long mobaelfon, mo wokbaot olbaot. I tru se taem pikinini i smol, i had long hem blong kasem save long evri samting we i stap kamaot long asembli. Nating se i olsem, pikinini i save lanem blong no slip mo sidaon kwaet.
5. ?From wanem i gud blong tingtingbak long ol tok blong asembli? ?Yumi save mekem samting ya olsem wanem?
5 Afta We Program Blong Dei i Finis: I nogud yumi wekap let. Sipos yumi slip eli, yumi save harem gud long nekis dei. Taem yumi tingtingbak long ol samting we yumi harem, samting ya i save halpem yumi blong yumi no fogetem. Taswe, evri naet, i gud yumi storian wetem famle blong yumi long saed blong ol tok we yumi harem long dei. Sipos yumi go kakae wetem sam fren long naet, i gud yumi tekem notbuk blong yumi, olsem nao bambae yumi save serem wan no tu poen we yumi laekem long ol tok. Taem asembli i finis mo yumi gobak long ples blong yumi, i gud yumi jusum wan naet blong Famle Wosip blong tokbaot ol samting we yumi lanem long asembli. Yumi save tokbaot olsem wanem blong mekem ol samting ya i wok long laef blong yumi. Sipos i gat sam niufala buk i kamaot long asembli, i gud yumi putum wan taem blong ridim.
6. ?Yu ting se sipos yumi stap long asembli, hemia nomo i naf blong givhan long yumi? Eksplenem.
6 Sipos yumi gat plante kakae be yumi no tekem, bambae ol kakae ya oli no givhan long yumi nating. Hemia i sem mak long ol tok we yumi harem long ol asembli. Ol tok ya oli olsem ol gudfala kakae. Sipos yumi wantem we oli givhan gud long yumi, yumi mas lesin gud, mo yumi traehad blong folem ol samting we yumi lanem.