Refrens Blong Kristin Wok Mo Laef Buk Blong Miting
1-7 JULAE
OL GUDGUDFALA SAMTING LONG BAEBOL | KOLOSI 1-4
“Tekemaot Olfala Fasin Mo Werem Niufala Fasin”
w11 1/3 pej 14 haf 12-13
Yu Mas Letem Spirit Blong God i Gat Paoa Long Yu, Be i No Spirit Blong Wol
12 ?Fasin blong mi i soemaot se mi mi letem weswan spirit i gat paoa long mi, spirit blong God no spirit blong wol? (Ridim Kolosi 3:8-10, 13.) Spirit blong wol i pulum ol man blong oli mekem ol samting we tingting blong olgeta nomo i wantem. (Gal. 5:19-21) Taem ol samting long laef blong yumi oli go gud, bambae yumi no luksave se weswan spirit nao i gat paoa long yumi. Be sipos yumi gat sam problem olsem, maet wan Kristin brata no sista i no wantem toktok long yumi, i mekem yumi harem nogud, no i sin agensem yumi, ale long taem ya nao bambae yumi luksave se weswan spirit i gat paoa long yumi. Mo tu, taem yumi stap yumi nomo long haos, yumi save luksave se weswan spirit nao i gat paoa long yumi. Maet yumi mas jekem gud ol fasin blong yumi. Yumi mas askem ol kwestin olsem: ‘?Long ol sikis manis we oli pas, fasin blong mi i kam moa olsem fasin blong Jisas? ?No mi stap tekembak sam rabis fasin blong mi, mo sam fasin blong toktok we oli nogud?’
13 Spirit blong God i save givhan long yumi blong ‘sakemaot olfala laef blong yumi wetem ol fasin blong hem,’ mo “putum niufala laef” olsem prapa klos blong yumi. Hemia bambae i givhan long yumi blong yumi lavem moa ol man mo yumi kaen long olgeta. Bambae yumi glad moa blong fogivim ol narafala, nating sipos oli mekem i no stret long yumi. Taem narafala i mekem i nogud long yumi, bambae yumi no moa ‘kros, yumi no holem kros, mo yumi no kros kwik. Mo taem yumi kros, yumi no sakem tok blong yumi i go antap, mo yumi no tok nogud.’ Defren olgeta, bambae yumi traehad blong “kaen gud long olgeta.”—Efes. 4:31, 32.
w13 15/9 pej 21 haf 18-19
?God i Jenisim Yu Finis?
18 Sipos yumi wantem se Tok blong God i jenisim yumi, yumi mas ridim mo letem hem i tijim yumi. Be i no hemia nomo. Plante man oli ridim Baebol mo oli save plante tok we i stap long hem. Maet yu mitim sam man olsem long wok blong prij. Samfala oli save talem sam vas blong Baebol baehat. Be plante taem, samting ya i no jenisim tingting mo laef blong olgeta. ?From wanem? From we Tok blong God i save jenisim man we i letem tok ya blong i kasem hat blong hem. (Gal. 6:6) Yumi mas tingting dip long samting we yumi lanem long Baebol. Yumi mas askem se: ‘?Mi mi bilif se hemia i no wan tijing blong jos nomo? ?I gat sam samting long laef blong mi we oli pruvum se hemia i trutok? ?Mi mi folem ol samting we mi lanem, be mi no tijim nomo long ol narafala? ?Mi mi bilif se samting we mi lanem i kam long Jehova, olsem we hem i stap toktok long mi wan?’ Sipos yumi tingting dip long ol kwestin olsem, bambae yumi kam klosap long Jehova. Taem samting we yumi lanem i tajem hat blong yumi, bambae i pulum yumi blong jenisim ol samting long laef blong yumi mo i save mekem God i glad.—Prov. 4:23; Luk 6:45.
19 Sipos yumi ridim Baebol oltaem mo yumi tingting dip long hem, hemia bambae i givhan long yumi blong gohed blong folem tok ya blong Pol we i talem se: ‘Yufala i sakemaot olfala laef ya blong yufala wetem ol fasin blong hem, mo yufala i putum niufala laef ya blong yufala, olsem prapa klos blong yufala.’ (Kol. 3:9, 10) Sipos yumi kasem save gud long samting we Baebol i tijim mo yumi folem long laef blong yumi, bambae yumi wantem blong gat ol niufala fasin we wan Kristin i mas gat. Samting ya bambae i protektem yumi long ol trap blong Setan.
Traem Faenem Ol Gudfala Samting Ya
it-2 pej 169 haf 3-5
Kingdom Blong God
“Kingdom blong Pikinini blong hem we Hem i lavem tumas.” Ten dei afta we Jisas i go antap long heven, long dei blong Pentekos blong yia 33 K.T., ol disaepol blong hem oli gat pruf se hem “sidaon long raet saed blong God” taem Jisas i kafsaedem tabu spirit long olgeta. (Wok 1:8, 9; 2:1-4, 29-33) Long taem ya “niufala kontrak” i stat blong wok long ol disaepol, mo oli faswan niufala “tabu neson,” blong Isrel long saed blong spirit.—Hib 12:22-24; 1Pi 2:9, 10; Ga 6:16.
Naoia Kraes i stap sidaon long raet saed blong Papa blong hem mo hem i Hed blong kongregesen ya. (Ef 5:23; Hib 1:3; Fil 2:9-11) Plante vas oli soemaot se stat long dei blong Pentekos long yia 33 K.T. i go, Jisas i stat blong rulum ol disaepol blong hem. Taem aposol Pol i raet i go long ol Kristin long Kolosi, hem i tokbaot Kraes se i kasem kingdom finis, i se: “[God] i sevem yumi, i tekemaot yumi long paoa blong olgeta we oli stap long tudak, nao i putum yumi i go long kingdom blong Pikinini blong hem we hem i lavem tumas.”—Kol 1:13; skelem wetem Wok 17:6, 7.
Long dei blong Pentekos long yia 33 K.T., kingdom blong Kraes i stat blong rulum Isrel long saed blong spirit, we hemia i ol Kristin we tabu spirit i makemaot olgeta blong kam ol spirit pikinini blong God. (Jon 3:3, 5, 6) Taem ol tabu Kristin ya oli kasem praes blong olgeta blong laef long heven, bambae oli no stap aninit long rul blong Kraes taem Kraes bambae i rulum wol ya. Be bambae oli rul olsem ol king wetem Kraes long heven.—Re 5:9, 10.
w08 1/8 pej 32 haf 7
Ol Bigfala Poen Long Ol Leta Long Ol Man Galesia, Efesas, Filipae, Mo Kolosi
2:8—?Wanem ‘ol tingting blong wol’ we Pol i givim woning agens long olgeta? Hemia ol samting blong wol blong Setan—ol stamba samting mo ol stamba rul blong wol ya, we oli lidim no pulum ol man blong mekem samting. (1 Jon 2:16) Sam long ol samting ya, hemia ol waes blong man, fasin blong ronem ol sas samting, mo ol giaman skul blong wol ya.
8-14 JULAE
OL GUDGUDFALA SAMTING LONG BAEBOL | 1 TESALONAEKA 1-5
“Gohed Blong Leftemap Tingting Mo Givgivhan Long Yufala”
w11 1/6 pej 30 haf 12
‘Yufala i Ona Gud Long Olgeta Ya We Oli Stap Wok Had Wetem Yufala’
12 Be ol elda we oli “lidim” ol wok insaed long kongregesen oli no tijim kongregesen nomo. Long 1 Timoti 3:4, Pol i talem se wan elda i mas “wan man we i save lukaot gud long famle blong hem, mo i mas wan man we i save mekem ol pikinini blong hem oli harem tok blong hem, mo oli ona gud long hem.” Long vas ya, tok ya “lukaot gud” i no minim nomo se hem i tijim ol pikinini blong hem, be i min se hem i lidim famle blong hem mo hem i “mekem se ol pikinini blong hem oli harem tok blong hem.” Yes, ol elda oli lidim ol wok long kongregesen mo oli halpem ol Kristin blong oli harem tok blong Jehova mo ona long Jehova.—1 Tim. 3:5.
w11 1/6 pej 32 haf 19
‘Yufala i Ona Gud Long Olgeta Ya We Oli Stap Wok Had Wetem Yufala’
19 ?Yu yu harem olsem wanem taem wan man i givim wan presen long yu? Ating bambae yu talem tangkiu from presen ya mo bambae yu yusum. Jehova i yusum Jisas blong givim “ol man we oli olsem presen” long yumi. Wan rod blong talem tangkiu from ol presen ya, hemia taem yumi lesin gud long ol tok we ol elda oli givim mo yumi traehad blong mekem ol poen long ol tok ya oli wok long laef blong yumi. Yu save soemaot tu se yu glad, hemia taem yu givim ol gudfala ansa long ol miting. Yu mas sapotem ol plan we ol elda oli stanemap long saed blong wok blong prij. Sipos advaes blong wan elda i mekem yu yu harem gud, i gud yu talem long elda ya. Antap long samting ya, i gud blong soemaot se yu glad long famle blong elda ya. Yu mas tingbaot se, blong wan elda i save wok had long kongregesen, famle blong hem i lego taem we oli wantem spenem wetem hem.
Soemaot Lav We i Tru Long Ol Wok Blong Yumi
13 Givhan long olgeta we oli no strong. Baebol i talem se: “Yufala i mas givhan long olgeta we oli no strong, mo yufala i mas gat longfala tingting long evriwan.” Samting ya bambae i soemaot sipos lav blong yumi i tru. (1 Tesalonaeka 5:14) Plante brata we bilif blong olgeta i slak, oli kam strong bakegen kwiktaem, be sam narafala, yumi mas gohed longtaem blong soemaot longfala tingting mo lav long olgeta. ?Yumi save mekem wanem? Yumi save yusum Baebol blong leftemap tingting blong olgeta, mekem plan blong prij wetem olgeta, mo lesin taem oli tokbaot ol trabol blong olgeta. Mo tu, yumi no mas tingbaot ol brata mo sista se oli “strong” o oli “slak,” be yumi mas luksave se yumi evriwan, yumi strong long sam samting, mo yumi slak long sam samting. Aposol Pol tu i talem se i gat sam samting we hem i no naf blong mekem. (2 Korin 12:9, 10) Taswe, yumi evriwan yumi nidim we narafala i givhan long yumi, mo i leftemap tingting blong yumi.
w15 15/2 pej 8 haf 16
Jisas i Gat Tingting Daon Mo i Kaen
16 Ol toktok blong yumi. From we yumi lavem narafala tumas mo yumi kaen long olgeta, samting ya bambae i pusum yumi blong “toktok gud blong leftemap tingting blong olgeta we oli harem nogud oltaem from we tingting blong olgeta i foldaon.” (1 Tesalonaeka 5:14) ?Yumi save talem wanem blong leftemap tingting blong olgeta? Yumi save talem long olgeta, se yumi lavem olgeta bigwan. Yumi talem ol gudfala toktok long olgeta. Yumi givhan long olgeta blong oli luk ol gudfala fasin mo ol gudfala wok blong olgeta. Yumi save talem long olgeta se oli spesel long ae blong Jehova from we Jehova nao i givhan long olgeta blong oli faenem trutok. (Jon 6:44) Mo tu, yumi save talem long olgeta se, Jehova i kea bigwan long ol man blong hem we “tingting blong olgeta i kam nogud” no “tingting blong olgeta i foldaon olgeta.” (Ol Sam 34:18) Ol toktok blong yumi we oli kaen, oli save leftemap tingting blong man we i harem nogud.—Ol Proveb 16:24.
Traem Faenem Ol Gudfala Samting Ya
it-1 pej 863-864
Doti Fasin Blong Seks
Kongregesen i save putumaot wan man we i mekem enikaen doti fasin blong seks. (1Ko 5:9-13; Hib 12:15, 16) Aposol Pol i eksplenem i se wan Kristin we i mekem doti fasin blong seks, hem i mekem sin agensem prapa bodi blong hem, from we hem i yusum ol tabu haf blong bodi blong hem blong mekem samting we i no stret. Hemia i save afektem hem bigwan long saed blong spirit, i save spolem kongregesen, mo hem i save kasem ol rabis sik we i kamaot from nogud fasin blong seks. (1Ko 6:18, 19) Hem i spolem raet blong ol narafala Kristin (1Te 4:3-7) taem hem i (1) mekem fasin we i doti mo ol krangke fasin we man i sek from, i kam insaed long kongregesen (Hib 12:15, 16), (2) hem i spolem gudfala fasin blong narafala we hem i mekem doti fasin blong seks wetem hem mo, sipos hem i singel, man ya i spolem hem blong i mared olsem wan vejin, (3) hem i spolem nem blong famle blong hem, mo hemia i minim tu (4) papa mo mama, hasban, o boe we i blokem hem finis blong i mared wetem hem, i mekem nogud fasin blong seks wetem hem. Taem man i mekem fasin ya, hem i no stap go agensem ol loa we ol man oli stanemap long saed blong rabis fasin blong seks, be hem i stap go agensem God ya we bambae i panisim hem from ol sin blong hem.—1Te 4:8.
w15 15/7 pej 14 haf 14-15
!‘Bambae i No Longtaem Yufala i Fri’!
14 ?Wanem bambae i hapen afta we King Gogo i stat blong spolem ol man blong God? Baebol i talem se Pikinini blong man bambae i ‘sanemaot ol enjel, blong oli go tekem ol man we hem i jusumaot olgeta finis, oli kam wanples. Bambae ol enjel ya oli mas go long evri ples long wol, mo long olgeta ples long heven, blong tekem olgeta oli kam.’ (Mak 13:27; Matiu 24:31) Wok ya blong tekem ol man oli kam wanples, i no minim taem we Jehova bambae i jusumaot ol faswan tabu Kristin. Mo tu, i no min se ol tabu Kristin we oli laef yet, bambae oli kasem laswan mak blong olgeta. (Matiu 13:37, 38) Laswan mak we ol tabu Kristin we oli laef yet bambae oli kasem, hemia bifo long stat blong Bigfala trabol. (Revelesen 7:1-4) Taswe, ?wok ya blong tekem ol man oli kam wanples, hem i minim wanem? Hemia taem we ol tabu Kristin we oli laef yet long wol, bambae oli kasem praes blong olgeta mo oli go long heven. (1 Tesalonaeka 4:15-17; Revelesen 14:1) Ol samting ya bambae oli hapen samtaem afta we King Gogo i stat blong mekem trabol long ol man blong God. (Esikel 38:11) Biaen long samting ya, Jisas i talem se: “Ol stret man bambae oli go long niufala wol ya we Papa blong olgeta i king long hem, nao long ples ya bambae oli saen olsem san.”—Matiu 13:43.
15 ?Hemia i min se ol tabu Kristin bambae oli go long heven long fasin we oli kolem “rapja”? Plante giaman skul oli talem se ol Kristin bambae oli go long heven wetem bodi blong man, we i gat mit mo blad. Mo tu oli ting se bambae oli luk Jisas wetem prapa ae blong olgeta, we hem i kambak blong rulum wol. Be Baebol i talemaot klia se Jisas bambae i kambak long fasin we man i no save luk. Hem i talem se: “Saen blong mi, mi Pikinini blong Man, bambae i kamaot long skae” mo Jisas bambae i “kamaot long klaod long skae.” (Matiu 24:30) Mo tu, Baebol i talem se: “Bodi blong yumi we i gat mit mo blad blong hem, bambae i no save go insaed long niufala wol ya we God i king long hem.” Taswe olgeta we bambae oli go long heven, fastaem bodi blong olgeta i mas jenis. Baebol i talem se: ‘Taem bigfala pupu ya blong Lasdei i krae, wantaem nomo God bambae i jenisim bodi blong olgeta evriwan.’ (Ridim 1 Korin 15:50-53.) Yumi no yusum tok ya “rapja” long ples ya blong tokbaot taem ya, from we tok ya i joen wetem giaman tijing blong ol giaman skul. Nating se i olsem, ol tabu Kristin we oli laef yet long wol, bambae oli kam wanples wantaem nomo.
15-21 JULAE
OL GUDGUDFALA SAMTING LONG BAEBOL | 2 TESALONAEKA 1-3
“Man Blong Brekem Loa i Kamaot Long Klia Ples”
it-1 pej 972-973
Wosip Long God
I gat wan narafala samting we i stap haed we i go agensem “tabu tokhaed” blong Jehova. Hemia ol wok haed blong “man ya blong brekem loa.” Long taem blong aposol Pol, ol trufala Kristin oli no luksave se “man ya blong brekem loa,” from we hem no kamaot long klia ples yet. Nating se afta, “man ya” bambae i kamaot long klia ples, plante man bambae oli no luksave ol rabis fasin blong hem mo oli ting se hem i stap wosipim God. Maet hem nao bambae i kam apostasi. Pol i talem se “man ya i stap mekem ol rabis wok blong hem finis be long fasin haed” i stap mekem wok finis long taem blong hem, from we i gat ol man we oli stap mekem ol rabis wok insaed long Kristin kongregesen nao oli kam ol man blong apostasi. Be long taem ya we Jisas i stap, samting ya bambae i mas kam long klia ples. Ol apostasi ya oli ol “man” blong Setan mo oli leftemap olgeta se oli “hae moa antap long eni samting we i olsem wan god, no eni samting we ol man oli stap wosipim” (Grik, seʹba·sma). Taswe ol man ya blong agens oli olsem ol tul we Setan yusum blong trikim gud ol man mo blong spolem olgeta we oli folem hem. Ol trik blong “man ya we i man blong brekem loa” bambae i haedem ol rabis wok blong hem, be i giaman nomo se i stap wosipim God.—2Tes 2:3-12; skelem wetem Mt 7:15, 21-23.
it-2 pej 245
Giaman
Jehova God i letem “tingting we i no stret” i go long ol man we oli laekem blong giaman “blong oli bilivim ol samting we oli giaman” nao oli no save bilif long gud nius blong Jisas Kraes. (2Tes 2:9-12) Samting we i hapen long King Ehab blong Isrel i soemaot samting ya. Ol giaman profet oli talem se Ehab bambae i winim faet agensem ol man Ramot long Gilead, be profet Maeka i talemaot finis se hem i no save win. Maeka i luk wan vison we Jehova i letem wan enjel blong hem blong i “trikim” ol giaman profet blong Ehab. Taswe enjel ya i pulum olgeta blong oli talem ol giaman toktok we i kamaot long tingting blong olgeta nomo mo samting we Ehab i wantem harem. Nating se hem i kasem woning long profet Maeka, be hem i wantem moa blong lesin long ol giaman profet mo i lusum laef blong hem.—1Ki 22:1-38; 2Kr 18.
Traem Faenem Ol Gudfala Samting
it-1 pej 834 haf 7
Faea
Pita i talem se ‘skae mo wol blong naoia bambae faea i kasem tufala.’ Ol tok long vas ya mo sam narafala vas bakegen, oli soemaot klia se hemia i no wan prapa faea, be i minim lus blong olwe. Hemia i sem mak long Bigfala Wota we i ron long taem blong Noa we i no spolem prapa heven mo wol, be i spolem ol rabis man nomo. Long sem fasin, taem Jisas Kraes bambae i kamtru wetem ol strongfala enjel blong hem mo faea we i laet, bambae oli spolem ol man we oli no wantem obei long God mo ol rabis fasin we oli blong wol ya.—2Pi 3:5-7, 10-13; 2Te 1:6-10; skelem wetem Aes 66:15, 16, 22, 24.
it-1 pej 1206 haf 4
Mesej We Spirit i Talem
“Ol Tok We Oli Kamaot Long God”—Tru Mo Giaman. Grik tok ya pneuʹma (spirit) oli yusum long wan spesel fasin long sam hanraet we ol aposol oli raetem. Eksampol, long 2 Tesalonaeka 2:2, aposol Pol i talem strong long ol brata mo sista blong Tesalonaeka se oli no mas hariap blong harem nogud o seksek from oli “harem long wan man we i talem se God [prapa tok, “spirit”] i givim tok ya long hem, no long wan man we i kam talemaot long yufala, no long wan leta we oli talem se mifala i raetem.” I klia se Pol i yusum tok ya pneuʹma (spirit) blong soemaot samting we tabu spirit i talem, maet tru long ol tok we ‘wan man i talem’ o “long wan leta.” From samting ya, buk ya Lange’s Commentary on the Holy Scriptures (pej 126) i talem se: “Wan Aposol i save gat tingting ya se wan spirit i givim tok long hem blong i talemaot.” (P. Schaff i transletem mo i editim long 1976) Mo buk ya Word Studies in the New Testament we Vincent i raetem i talem se: “Samting we spirit i talem. Samting we profet tok i talem long saet blong ol Kristin i soemaot se ol tok ya oli kam long God.” (1957, Vol. IV, pej 63) Taswe taem sam transleta oli tanem tok ya pneuʹma, sam narafala transleta oli talem tok ya “spirit” se, “mesej we i kam long spirit” (AT), “samting we man i talem bae i hapen” (JB), “samting we yu plan blong mekem” (D’Ostervald; Segond [French]), “spirit blong God i stap long olgeta” (NW).
22-28 JULAE
OL GUDGUDFALA SAMTING LONG BAEBOL | 1 TIMOTI 1-3
“Traehad Blong Kasem Wan Gudfala Wok Long Kongregesen”
?Yu Yu Luksave Se Yu Mas Mekem Moa Blong Gohed Gud?
3 Ridim 1 Timoti 3:1. Aposol Pol i talem gudfala toktok long ol brata we oli “wantem mekem” wok blong elda. Sipos wan man i wantem tekem wan samting we i stap longwe long hem, hem i mas traehad, mo maet i mas pusum han blong hem i go blong kasem. Traem tingbaot wan brata we i wantem kam man blong givhan. Hem i luksave se hem i mas traehad blong kamgud moa long ol Kristin fasin. Biaen, taem hem i kasem mak ya, hem i gohed blong wok had blong i save kam wan elda.
km 78/9 pej 4 haf 7
Olgeta we oli ‘kasem gudnem’
7 I isi blong save from wanem Pol i tokbaot ol man ya se oli “kasem gudnem . . . oli no fraet.” Hemia i no sem mak long ol step we ol lida blong skul oli stap kasem. Be, Jehova nao i blesem ol man blong givhan we “oli stap mekem gud wok”, mo evriwan long kongregesen oli respektem mo sapotem olgeta. Oli gat gudnem mo oli “no fraet nating blong tokbaot bilif blong olgeta we i kamaot long Kraes Jisas.” Oli tinghae long wok blong olgeta, mo narafala i tinghae long wok blong olgeta, oli gat strong bilif mo oli no fraet blong tokbaot bilif blong olgeta, o oli no fraet long ol man we oli agens.
Traem Faenem Ol Gudfala Samting Ya
it-1 pej 914-915
Famle Laen
Hemia i no wan impoten topik blong stadi long hem mo tokbaot, mo tingting ya i kam antap long taem we Pol i raet i go long Timoti. Long taem ya i no moa impoten blong folem gud famle laen, from God i no luk se ol laen blong Isrel oli impoten moa i bitim ol narafala nesen insaed long Kristin kongregesen. (Ga 3:28) Mo i gat rikod blong famle laen blong Jisas kasem Deved. Mo tu, i no longtaem Pol i raetem se bambae Jerusalem i lus wetem ol rikod blong ol man Jiu. God i no protektem ol rikod ya. Taswe, Pol i wari se Timoti mo ol brata sista long kongregesen oli no mas westem taem blong lukaotem ol famle laen, we i no joen nating long bilif blong ol Kristin. Famle laen we i stap long Baebol i naf finis blong pruvum laen we Mesaea o Kraes i kamaot long hem. Taswe hemia nao i impoten long ol Kristin. Ol narafala famle laen we oli stap long Baebol, oli pruvum se laen blong Mesaea i klia we i klia.
cl pej 12 haf 15
“!Yufala i Luk! Hemia God Blong Yumi”
15 Wan narafala taetel i talem se Jehova i “King oltaem gogo i no save finis.” (1 Timoti 1:17; Revelesen 15:3) ?Hemia i minim wanem? I had blong yumi kasemsave, be Jehova i stap oltaem—bifo mo long fiuja. Ol Sam 90:2 i talem se: “Bifo, taem we yu no mekem ol hil ya yet, long taem ya we yu no wokem wol ya nating yet, be yu yu stap fastaem finis. Yu yu God.” Taswe Jehova i no gat stat blong hem. Hem i stap oltaem. Oli singaot hem se “Olfala ya we i stap fastaem bifo olgeta, mo bambae i stap gogo i no save finis,” hem i laef bifo long olgeta samting long heven mo long wol. (Daniel 7:9, 13, 22) ?Hu i naf blong talem se hem i gat raet blong tekem ples blong God we i gat olgeta paoa?
29 JULAE–4 OGIS
OL GUDGUDFALA SAMTING LONG BAEBOL | 1 TIMOTI 4-6
“Wosip Long God Mo Ol Sas Samting”
Lanem Fasin Blong Haremgud Long Samting We Yu Gat
Wan bigfala samting we i givhan long Pol blong i stap glad, hemia fasin blong hem blong haremgud long samting we hem i gat. ?Be fasin ya blong haremgud long samting we yumi gat, i rili minim wanem? Blong talem klia, i min se man i glad long ol smol samting we hem i gat blong laef. Long saed blong fasin ya, Pol i talem long Timoti, wan fren blong hem we hem tu i mekem wok blong prij, i se: “Yes i tru, fasin blong stap fasgud long God i wan rod blong kasem plante samting. Be yumi mas harem gud long wanem samting we yumi gat. From we taem yumi kam long wol, yumi no karem wan samting i kam, mo bambae yumi no save karem wan samting i aot long wol tu. Taswe sipos yumi gat kakae mo klos blong yumi, hemia i naf, yumi save harem gud wetem ol samting ya.”—1 Timoti 6:6-8.
Makemgud we Pol i joenem fasin blong haremgud long samting we hem i gat, wetem fasin blong stap fasgud long God. Hem i luksave we trufala glad i kamaot from fasin blong fasgud long God. ?Hemia i minim wanem? I min se yumi putum wok blong God long fasples long laef blong yumi, bifo long ol samting blong bodi no ol sas samting. “Kakae mo klos,” tufala samting ya i jes wan rod we Pol i yusum blong hem i save gohed blong fasgud long God. Taswe Pol i luksave se, wan man i save stap glad long samting we hem i gat sipos hem i trastem Jehova, nomata wanem i hapen long laef blong hem.
Wantem Tumas Blong Kam Rij—?Olsem Wanem Samting Ya i Save Spolem Yu?
I tru, plante man oli no ded from fasin ya blong wantem tumas ol sas samting. Be, oli spenem plante taem blong lukaotem plante samting long laef mo oli traehad blong kasem. From samting ya, oli stap safa from we oli wok tumas, o oli fraet blong gat problem blong mane, oli no slip gud, oli stap wari o oli gat problem blong helt we i save sotem laef blong olgeta. Mo tu sipos wan man i no luksave kwiktaem, bambae i let tumas. Maet waef blong hem i no moa trastem hem, hem i spolem filing blong ol pikinini blong hem, mo i save spolem helt blong hem tu. Nating se ol samting ya oli save kamgud, be i nidim bigfala wok. Ol man olsem oli stap harem nogud tumas, i “olsem we olgeta bakegen oli stap sperem olgeta long naef.”—1 Timoti 6:10.
g 08/11 pej 6 haf 4-6
Sikis Rod Blong Win Long Laef
Olsem we yumi luk long faswan haf, ol man oli ting se blong win long laef, oli mas mared mo kam rij man. Defren olgeta hemia i mekem se oli nogat hop mo oli harem nogud. Eksampol, taem wan man i wantem kam rij, plante taem hem i spolem ol fren mo famle blong hem. Sam narafala oli no save slip gud from wok, o oli wari. Prija 5:12 i talem se: “Man we i wok had hem i save slip gud, nating se hem i gat smol samting o plante samting. Be man we i laekem mane tumas i no save slip gud.”—Hebrew Names Version.
Mane i no wan rabis masta, be i save trikim yumi. Jisas Kraes i talem se mane “i gat paoa blong trikim man.” (Mak 4:19) Jisas i wantem minim se ol man we oli rij oli talem se oli save hapi, be hemia i no tru. Oli harem nogud nomo. Prija 5:10 i talem se: “Man we i laekem mane tumas neva hem i save talem se mane blong hem i naf.”—The New English Bible.
Fasin blong laekem mane tumas i save spolem man, mo i mekem se hem i nogat hop, i mekem hem i kam kros, o i mekem wan nogud samting. (Proveb 28:20) Be ol man we oli hapi mo oli win long laef oli glad blong givim samting, oli save fogivim narafala, oli gat ol gudfala fasin, oli gat lav, mo oli fren wetem God.
Traem Faenem Ol Gudfala Samting Ya
?Olsem Wanem Tingting Blong Yu i Save Lidimgud Yu?
17 Aposol Pita i raetem se: “Tingting blong yumi i [mas] klin.” (1 Pita 3:16) Wan tingting we i lidimgud yumi mo i klin olsem we Jehova i wantem, i save mekem i gud bigwan long yumi. Hem i defren long tingting blong plante man tede. Pol i tokbaot sam man we oli “bonem mak . . . finis long tingting blong olgeta, olsem we man i bonem mak long buluk blong hem.” (1 Timoti 4:2, NTB) Wan aean we i hot i save bonem skin, nao i mekem skin i ded mo i no moa harem save samting. Gudfala voes long hat blong plante man i ded finis tu. Tingting blong olgeta i no moa harem save samting, hem i no moa givim woning long olgeta mo i no moa toktok blong blokem ol fasin nogud, mo i no moa stikim olgeta taem oli mekem i nogud. Plante man tede oli no laekem taem tingting no filing blong olgeta i stikim olgeta se oli mekem rong, from we oli wantem fri nomo blong mekem eni samting.
it-2 pej 714 haf 1-2
Pablik Riding
Insaed Long Kristin Kongregesen. Long faswan handred yia, smol man nomo oli gat ol kopi blong Baebol, taswe olgeta ya oli mas ridimaot long ol man. Long ol leta we Pol i raetem, hem i talem se ol Kristin oli mas ridimaot long evriwan long kongregesen, mo taem oli finisim blong ridim, oli mas sanem i go long ol narafala kongregesen tu blong oli save ridim. (Kol 4:16; 1Tes 5:27) Pol i talem long yangfala Timoti we i wan elda se hem i mas “ridim Baebol long ol man, mo blong givim advaes long ol man, mo blong tijim olgeta.”—1Ti 4:13.
Taem yumi rid long ol man, riding blong yumi i mas ron gud. (Hab 2:2) From we hemia i wan rod blong tijim ol narafala. Taswe man we i rid, i mas kasemsave fastaem long tingting blong man we i raetem, blong i no givim ron tingting long ol man we oli stap lesin. Folem Revelesen 1:3, olgeta we oli stap ridim ol profet tok long ol man, mo olgeta we oli harem ol tok ya mo obei long olgeta bambae oli hapi.