?From Wanem Ol Man Long Evri Ples Oli Intres Long Ol Rabis Spirit?
Wok blong ol rabis spirit hem i wan “bilif se taem bodi blong man i ded, spirit blong hem bambae i gohed blong laef samples, mo se spirit ya i save toktok wetem ol man we oli laef yet. Plante taem hem i toktok tru long wan narafala man, olsem wan kleva.”
LONG 1998, wan man i raetem buk we i tokbaot olsem wanem blong toktok wetem ol dedman. Fulap man Amerika oli intres long buk ya. Niuspepa ya New York Times i talemaot se moa man oli pem buk ya i winim ol narafala buk.
Long Moscow, sam yia i pas, ol man blong politik mo ol bisnesman, oli pem bigfala mane blong go luk ol man we oli save talemaot samting we i haed, mo ol man blong singaot ol spirit blong givim ansa long ol kwestin.
Long Brasil, fulap man oli stap lukluk ol stori long televisin we oli tokbaot ol rabis spirit.
Plante man Afrika mo Esia, oli stap wok wetem ol spirit oltaem nomo olsem we oli go pem kakae long maket.
?From Wanem Fulap Man Oli Trastem Ol Rabis Spirit?
Plante man we wan famle no fren blong olgeta i ded, oli lukluk i go long ol rabis spirit blong mekem olgeta oli harem gud bakegen. Maet oli kasem sam spesel mesej tru long wan man we ol spirit oli yusum, mo long lukluk blong olgeta, mesej ya i kam long hemia we i ded. From samting ya, oli bilif se dedman ya i stap laef samples, mo se sipos oli save toktok long hem, bambae hem i givhan long olgeta blong harem gud bakegen.
Sam narafala oli intres long wok blong ol rabis spirit from we oli harem samfala oli talem se ol spirit oli save tekemaot ol sik blong olgeta, halpem olgeta blong winim fasin pua, pulum wan boe no gel blong laekem olgeta, stretem trabol long mared, mo faenem wan wok. Plante narafala, oli wantem nomo blong save moa long saed blong ol rabis spirit.
Be i gat wan moa risen tu, from wanem plante milian man oli intres naoia long ol rabis spirit. Wan man we i gat bigfala save long saed ya, i talem se ol man ya oli bin kasem tijing se wok blong ol rabis spirit i olsem “namba tu skul blong olgeta” we i joen “klosap long Kristin bilif.” Tingbaot skul blong ol man Brasil.
I gat moa Katolik i stap long Brasil i winim olgeta ples blong wol. Wan man blong raetem ol buk, nem blong hem Sol Biderman, i talem se: “Plante milian man we oli strong long skul blong olgeta, oli laetem ol kandel long plante olta, mo oli harem se [i no] rong blong mekem olsemia.” Niuspepa we i kamaot evri wik long Brasil (Veja), i givim ripot ya se, 80 pesen blong ol man Brasil we oli stap joen long wok blong ol rabis spirit, oli baptaes finis long skul Katolik mo oli stap go long Lames oltaem. Antap long hemia, sam lida blong skul tu oli joen long ol grup we oli singaot ol spirit. Taswe, plante man we oli stap go long jos, oli ting se God i glad nomo sipos oli singaot ol spirit blong lidim olgeta mo mekem olgeta oli harem gud. ?Be tingting ya i stret?
[Bokis/Foto pija long pej 3]
Ol Defdefren Wok Blong Rabis Spirit
Long ol wok blong rabis spirit, i gat hemia: go luk kleva, traem toktok wetem dedman, mo makemgud ol smosmol saen we man i luk. Plante man oli singaot ol spirit blong givhan long olgeta blong faenemaot fiuja, no faenemaot samting we i stap haed. Oli traem faenemaot samting ya from ol sta, lukluk i go long wan glas bol, lukaot mining blong ol drim, lukluk ol laen long han blong man, mo oli yusum ol tarot kad tu blong talemaot wanem bambae i kamaot long laef blong wan man.