Welkam Long Distrik Asembli Ya “Wokbaot Wetem God”
◼ Plante milian man bambae oli kam long asembli ya long plante handred ples blong wol. Bambae oli mekem asembli long Port Vila long Ogis 27 kasem 29. Long klosap evri ples, asembli ya bambae i stap long Fraede, Sarede mo Sande. Ating wan long ol asembli ya bambae i stap long wan taon we i no longwe long ples blong yu.
Long klosap olgeta asembli, miusik bambae i stat long haf pas naen evri moning. Stamba tok blong Fraede: “Hemia Rod. Yufala i Folem.” Afta long faswan tok ya “Yumi Kam Wanples Blong Jeova i Tijim Yumi Long Rod Blong Hem,” bambae oli askem kwestin long samfala we oli stap wokbaot wetem God oltaem. Biaen, bambae i gat tufala tok ya, “Yufala i Mas Traem Faenemaot Se Yufala i Stap Holem Yet Fasin Blong Bilif” mo “Letem Tok Blong God i Lidim Yu Evri Dei.” Nao program blong moning bambae i finis wetem stamba tok blong asembli, “Wokbaot Wetem God Long Trabol Taem Ya.”
Long Fraede aftenun, yumi save lesin long wan tok we i gat tri haf blong hem, “Profet Tok Blong Hosea i Halpem Yumi Blong Wokbaot Wetem God.” Biaen, bambae i gat tufala tok ya “No Brekem Mared Blong Man Mo Woman We ‘God i Joenem’” mo “Soem Respek Long Ol Tabu Miting Blong Yumi.” Laswan tok blong Fraede, “Gud Nius Blong Ol Man Blong Olgeta Kantri,” bambae i leftemap tingting blong yumi blong traehad blong talemaot gud nius long ol man we oli toktok ol narafala lanwis.
Stamba tok blong Sarede: “Yufala i Mas Lukaotgud Olsem Wanem Yufala i Stap Wokbaot.” Wan tok long moning we i gat tri haf blong hem, hemia “Ol Man Blong Talemaot Gud Nius Oli Wokbaot i Go Fored Oltaem.” Long wan haf blong tok ya, bambae yumi harem moa advaes blong soem olsem wanem blong prij long ol man we oli toktok ol narafala lanwis. Las haf blong program blong moning ya, hemia impoten tok ya “Mekem Plan Fastaem Blong Wokbaot Wetem Jeova.” Afta long tok ya, ol man we oli naf bambae oli gat janis blong tekem baptaes.
Long Sarede aftenun, bambae i gat tufala tok ya “Lukaot Blong ‘No Mekem Fasin We Narafala i Save Foldaon Long Hem’” mo “Ol Gudfala Wok We Oli Save Mekem Yu Yu Haremgud.” Ol nekiswan tok hemia: “Jeova i Lidim Yumi Olsem Man Blong Lukaot Long Ol Sipsip,” “Yusum Evri Janis Blong Mekem Ol Gudfala Wok,” mo “Wokbaot Long Rod We Laet i Stap Saen Strong Moa Long Hem.” Insaed long ol tok ya wanwan bambae oli askem kwestin long samfala, mo ol ansa blong olgeta bambae oli leftemap tingting blong yumi. Laswan tok blong dei ya bambae i pulum gud tingting blong yumi “‘Yufala i Mas Lukaot Gud’—Taem Blong Jajmen i Kam Finis.”
Stamba tok blong Sande: “Folem Trutok Oltaem Long Laef Blong Yu.” Tingting ya bambae i kamaot klia long tok ya “Ol Yangfala—Wokbaot Long Rod Blong Stret Fasin.” Biaen, samfala bambae oli jenis long ol klos blong bifo blong aktem wan drama we i tokbaot wok blong prij we aposol Pol i mekem. Afta long hemia, bambae yumi lesin long wan tok we i soemaot ol lesen we yumi lanem long drama ya. Long aftenun, bambae i gat pablik tok we nem blong hem se, “Wokbaot Wetem God Mo Kasem Blesing Naoia Mo Blong Olwe.”
Blong faenemaot wanem asembli i klosap moa long yu, yu save askem long ol Witnes blong Jeova long Haos Kingdom long ples blong yu. Sipos no, yu save raet i kam long ol man we oli wokem magasin ya. Long Wajtaoa, Maj 1, i gat wan lis blong ol asembli long olgeta kantri blong Saot Pasifik.